1Ti hoko ai e magaaho he mole atu e vagahau e Apinatai e tau mena nai ku fekau ai he patuiki e tau ekepoa ke uta a ia mo e taute ai e taha mena ke kelipopo aki a ia.

2Ka e taha mai ia lautolu ne higoa ko Alama, ko ia ne tupu mai ia Nifai. Ko ia ko e fuata mui ne tua a ia ke he tau kupu ha Apinatai he kua iloa e ia e talahauaga haana ke he tau mahani kelea ha lautolu, ko e mena ia ne hulalo atu ai a ia ke he patuiki ke ua fakahoko haana a ita ki a Apinatai ka e toka ai a ia ke fano kehe mo e mafola.

3Ka kua ita lahi e patuiki mo e poaki ai ke uta kehe a Alama mai ia lautolu mo e fakafano atu e ia e haana a tau fekafekau ke kelipopo a ia.

4Ka e hola kehe mai a Alama mai ia lautolu mo e fakamumuli ai a ia he mena ke nakai maeke ia lautolu ke kitia. Ne fakamumuli a ia ke ke loga he tau aho, mo e tohi ai e ia e tau kupu oti ne vagahau ai e Apinatai.

5Ne hoko ai, ne fekau atu e Patuiki ke he haana a tau leoleo ke taofi a Apinatai ti lili mo e tuku atu a ia ke he fale puipui.

6Ne hoko ai, mole atu e tolu e tau aho, mo e haana fakatutalaaga mo e haana a tau ekepoa, ne poaki atu a ia ke liuaki atu a Apinatai ki mua haana.

7Ne pehe atu a ia ki a ia: Apinatai, kua iloa tuai e mautolu kua agahala tuai a koe, ti kua lata ni a koe ke mate.

8Ha kua pehe mai a koe, to haele mai e Atua ke he fanau he tau tagata, ti ko e mena ia to fakahoko ai e mate ki a koe, kaeke ke fakatikai e koe e tau kupu oti ne kua vagahau e koe mo e haau a eke fakakelea ki a au mo e haaku a tau tagata.

9Ti pehe atu a Apinatai ki a ia; kua tala atu nai au ki a koe, to nakai fakatikai e au e haaku a tau kupu hagaao ke he tau tagata nai, ha ko e tau kupu ia kua mooli ni, ti kua tonuhia ni ki a koe e mooli he tau kupu ia, ko e mena ia a ti matematekelea ai au mo e tuku atu ai ke he tau lima haau.

10Hanai, to mamahi ni au a to hoko ke he mate, to nakai fakatikai e au e haaku a tau kupu, to tumau ni ke eke mo fakamooliaga ki a koe. Ti kaeke ke fakahoko haau a lima ki a au, kua fakamaligi tuai e koe e toto nakai fai hala, to eke foki e mena ia mo fakamooliaga ki a koe he aho fakahiku.

11Ti ko e magaaho nai kua amanaki ai e patuiki ko Noa ke fakatoka a ia ha ko e matakutaku ke he haana a kupu; ha kua matakutaku foki a ia neke hoko mai e fakafiliaga he Atua ki a ia.

12Ka e ko e tau ekepoa ne fakatutu hake a lautolu mo e leo lahi, ki a ia, mo e kumi lekua ki a ia mo e pehe atu: Kua vagahau kelea a ia ke he patuiki. Ti ko e mena ia kua ita lahi ai e patuiki mo e tuku atu ke kelipopo a ia.

13Ne hoko ai, ne uta e lautolu a ia mo e lili ai, ti fahi mo e tugi e tino haana, hanai, pihia ni a ti mate a ia.

14Ko e magaaho ne kamata ai a ia ke vela he afi, ne tagi atu a ia ki a lautolu mo e pehe;

15Kitia la, tuga ni a nai kua taute e mutolu ki au, to eke pihia foki ni he tau hau a mui ha mutolu, to tokologa ia lautolu ka matematekelea mo e mamahi a ia to hoko ke he mate ke he afi; to pihia ha kua tua a lautolu ia ke he fakamouiaga he iki ko e ha lautolu a Atua.

16To hoko ai foki e malaia mo e matematekelea ki a mutolu ke he tau gagao kehekehe ha ko e ha mutolu a tau mahani kelea.

17Hanai, to fahi ai a mutolu ke he tau lima oti mo e mavehevehe fano ai ke he taha mena mo e taha mena; ke tuga e fuifui manu vao kua tutuli fano he tau manu favale.

18Ti ko e aho na, to tutuli fano ai a mutolu, mo e to uta ai he tau fi a mutolu, mo e fakamamahi ai tuga au kua mamahi ai ke mate ke he afi.

19Kua pihia e puhala nai ke taui atu ai he Atua ki a lautolu ne fakaotioti haana a tau tagata. Ko e Atua na e kia talia mai haaku aagaaga.

20Ko e magaaho ia, kua mole he vagahau e Apinatai e tau kupu nai, ti veli ai a ia ki lalo mo e mate ai ha ko e haana a tau kafokia ke he afi; hanai, kua kelipopo ai a ia ha kua nakai fakatikai e ia e tau poakiaga he Atua, ti kua eke ai haana mate mo fakamauaga ke he tonuhia he haana a tau kupu.