1Ti ko e magaaho nai kua fakaoti ai e haaku a talahauaga hagaao ia ke he fakaotiotiaga he haku motu ko e tau Nifai. Ne hoko ai ne foleni atu a mautolu i mua he tau Lamana.

2Ti ko au ko Moromona ne tohi e au e taha tohi ke he patuiki he tau tagata Lamana, mo e tuku atu ki a ia ke fakaata mai a mautolu ke fakapotopoto fakalataha ha mautolu a tau tagata ke he fonua ko Komora, tata ke he matiketike ne fakahigoa ai ko Komora, to fakahoko ai e tau ke he matakavi na.

3Ne hoko ai, ne talia ai he patuiki he tau Lamana e mena ia ne manako au ki ai.

4Ne hoko ai, ne foleni atu a mautolu ke he fonua ko Komora, mo e fakatutu ai ha mautolu a tau fale ie ke he matatepu na he matiketike ko Komora; ti ne ha ha i ai ke he fonua he tau vai loga, tau vai tafe, mo e tau vai puna; ti ne amaamanaki a mautolu ke kautu a mautolu ke he tau Lamana.

5Ti ko e magaaho ne mole atu ai e tolu e teau mo e valu hogofulu ma fa aki he tau tau, ne kua maopoopo oti ai a lautolu ne toe he ha mautolu a tau tagata ke he fonua ko Komora.

6Ne hoko ai, ko e magaaho ne maopoopo oti ai e ha mautolu a tau tagata ke he taha ni e mena, ke he fonua ko Komora, kitia la ko au ko Moromona kua motua; mo e iloa ai ko e tauaga fakahiku a nai he haaku a tau tagata, ti ha kua poaki mai he Iki ki a au ke ua toka e tau fakamauaga ne tokiofa mai he tau matua, ko e tau mena kua tapu, ke moua ai ke he lima he tau tagata Lamana, (ha ko e mena to moumou ni he tau Lamana) ko e mena ia, ne taute e au e fakamauaga nai mai he tau lapa maka a Nifai, mo e fufu ai he matiketike ko Komora e tau fakamauaga oti ne tuku mai ai he lima he Iki ke he levekiaga haaku, ka ko e tau lapa maka fiha nai ni ne foaki atu e au ke he haaku tama ko Moronai.

7Ne hoko ai, ko e haaku a tau tagata fakalataha mo e ha lautolu a tau hoana mo e ha lautolu a tau fanau, ne kitia atu e lautolu he magaaho nai e tau kautau he tau Lamana he ne foleni mai ai ki a lautolu; ti ko e matakutaku kelea lahi ia ke he mate ne puke ai ke he tau loto he tau tagata mahani kelea oti, ne leo atu a lautolu ki ai.

8Ne hoko ai, ne o mai a lautolu ke tau mai ki a mautolu, kua puke namo ke he hopo ate e tau agaaga oti ha kua tokologa lahi e tau kau he tau Lamana.

9Ne hoko ai, ne moua ai e lautolu e haaku a tau tagata ke he pelu, moe fana fiti, mo e toki, mo e falu a kanavaakau tau kehekehe.

10Ne hoko ai, ne hahala hifo e lautolu e haaku a tau tagata, hanai, pihia ke hoko foki ke he hogofulu afe ne fakalataha ai mo au, ti ne veli ai foki au kua kafokia, ke he vahaloto ha lautolu; ti ne o loa ai a lautolu mo e nakai fakaoti e lautolu haaku a moui.

11Ko e magaaho ne mole ai e hahala hifo e lautolu haaku a tau tagata oti kana ka e toe ni e ua hogofulu ma fa ha mautolu, (ko e haaku tama taane ko Moronai taha) mo e kautu ai a mautolu ke he mate ke ha mautolu a tau tagata, ne kitia ai he aho hake, kua liliu atu e tau Lamana ke he ha lautolu a tau apiaga, mai i luga he matiketike ko Komora, ko e hogofulu e afe he haaku a tau tagata ne lauia ai, ko lautolu ia ne takitaki mo e matamua e au.

12Ti ne kitia ai foki e mautolu e taha toko hogofulu afe ha mautolu ne takitaki ai he haaku a tama taane ko Moronai.

13Ti kitia la, ko e hogofulu afe a Kitikitona ne veveli foki fakalataha ai mo ia.

14Ti ne veli foki a Lamana fakalataha mo e haana a hogofulu afe; ti veli ai foki a Kilikala mo e haana a hogofulu afe; mo Limiha foki kua veli a ia mo e haana a hogofulu afe; mo Sionima mo e haana a hogofulu afe; pihia mo Kameniha, mo Moronaiha, Anationuma, mo Sipoloma, mo Semu, mo Ioata, ne veveli ai mo e ha lautolu a taki hogofulu afe.

15Ne hoko ai ne ha ha i ai toko hogofulu foki ne veveli ai ke he pelu, mo e ha lautolu a taki hogofulu afe; hanai, pihia ke he tau tagata oti kana haaku ka ko e toko ua hogofulu ma fa ne fakalataha mo au mo lautolu tokogaogao ne fehola atu ke he faahi toga he motu, mo e falu ne fehola mo e huhu ai ke he kau ke tau Lamana, ko e tau kau oti ne toe ne veveli oti a lautolu; ti ko e ha lautolu a tau kakano, tau hui atua, mo e toto ne tafola aki ke he kelekele. Ne tokahifo ai he tau lima ha lautolu ne kelipopo a lautolu ke polokau ai ke he kelekele mo e mavalavala ai mo e liliu atu ai ke he kelekele ko e matua fifine.

16Ko e haaku a agaaga kua taufetului ai ke he tupetupe, ha ko e mahaikava he haaku a tau tagata, ti tagi ai au;

17Oi ma haku tau tagata tino mea, o kehe fefe a mutolu mai he tau puhala he Iki? Oi ma haku tau tagata tino mea, tiaki fefe e mutolu a Iesu ia ne tu mai mo e haana a lima kua hafagi mai ke moua a mutolu!

18Kitia la, a ne mai ne nakai taute e mutolu e mena nai, a kua nakai veveli ai a mutolu. Ka e kitia la, kua veveli a mutolu, ti momoko atu au ha kua galo a mutolu.

19Oi a mutolu ko e tau fanau taane mo e tau fanau fifine tino mitaki, ko mutolu e tau matua taane mo e tau matua fifine, ko mutolu e tau taane mo e tau hoana, ko mutolu ne tino mea, kua veveli fefe a mutolu?

20Ka e kitia la, kua mole tuai a mutolu, ti koe haaku a tau momoko to nakai maeke ke ta mai aki e liliu mai ha mutolu.

21Ti kua tata mai foki e aho ko e ha mutolu a tau tino popo kia liliu ai ke he tau tino nakai popo, ti ko e tau tino nai kua polokau ai ke he popo to faliu ke eke ai mo tau tino nakai popo ti to tu ai ki mua he nofoa he fakafiliaga a Keriso ke fakafili ai ke lata ai mo e ha mutolu a tau gahua; ti kaeke ni kua tututonu a mutolu, ti kua monuina a mutolu fakalataha mo e ha mutolu a tau matua kua mole atu fakamua ia mutolu.

22Oi, ka ne ha he fakatokihala a mutolu a to hoko ai e fakaotiaga nai ki a mutolu. Ka e kitia la, kua mole tuai a mutolu, ti ko e matua, hanai, ko e matua tukulagi ha he lagi, kua iloa e ia ha mutolu a tau tutuaga; to taute e ia mo mutolu ke tuga ni mo e haana a fakafiliaga mo e fakaalofa noa.