1Kitia la, ko au ko Moronai kua fakaoti e au e fakamauaga he haaku a matua ko Moromona. Kitia la kua gahoa ni haaku a tau mena ke tohi ai, ko e tau mena ni ne poaki mai he haaku a matua.

2Ne hoko ai, he magaaho kua mole atu e tauaga lahi i Komora, kitia la, ko e tau Nifai ne fehola atu ai ke he faahi toga he motu, ne tatao ai he tau Lamana a lautolu a to fakaotioti ai a lautolu oti kana.

3Ne kelipopo ai foki e lautolu mo e haaku a matua, ti ko au ni tokotaha maka ne toe ai ke tohi ai e tala momoko nai ke he fakaotiaga he haaku a tau tagata. Ka e kitia la kua mole atu a lautolu, ti fakakatoatoa e au e poakiaga he haaku a matua. Ka to kelipopo e lautolu au, kua nakai iloa e au.

4Ko e mena ia to tohi e au ti fufu ai e tau fakamauaga ke he kelekele; ti ko fe e mena ka fano au ki ai, nakai lekua ia.

5Kitia la, ne taute ai he matua haaku e fakamauaga nai mo e tohia ai e ia e tau mena ne manatu a ia ki ai. Ti kitia la, to tohi ai foki e au kaeke ke ata e tau lapa maka, ka kua nakai ata; ti nakai ha ha i ai foki ha lapamaka veo ha ko au ni tokotaha; Kua mate haaku a matua he tau, mo e haaku a tau magafaoa oti, ti nakai ha ha i ai foki haaku a tau kapitiga po ke ha mena ke fano au ki ai; ti ko e leva fefe he toka ai he Iki au ke moui kua nakai iloa e au.

6Kitia la, ne kua fa e teau he tau tau he mole tali mai he hauaga he ha tautolu a Iki mo e Fakamoui.

7Ti kitia la, ne tatao ai he tau Lamana e haaku a tau tagata, ko e tau Nifai, mai he taha maaga ke he taha maaga, mai he taha mena ke he taha mena, a to nakai toe ai ha taha; ti kua lahi ni e ha lautolu a veliaga; hanai, kua lahi mo e mena ke ofo ai e fakaotiotiaga he haaku a tau tagata ko e tau Nifai.

8Ti kitia la, ko e lima he Iki ne taute ai pihia. Ti kitia la foki, kua felatauaki e tau Lamana a lautolu ni ko e taha ke he taha; ti ko e motu katoa nai kua viko tumau ai e kelipopo tagata mo e fakamaligi toto; ti nakai iloa he taha e fakaotiaga he tau.

9Ti kitia la he magaaho nai, kua nakai fai mena foki au ke tala atu hagaao ia ki a lautolu, ha kua nakai toe ai ha taha, ka ko e tau Lamana ni mo e tau fofo mena ne toe agaia ke he motu.

10Ti ne nakai ha ha i ai taha ne iloa e Atua mooli ka ko e tau tutaki ni a Iesu ne toe hifo he motu a to mahani kelea lahi ai e tau tagata ti nakai toka ai he Iki a lautolu ke nonofo loa ai mo e tau tagata; ke pehe ko lautolu agaia ke he motu kua nakai iloa ai he ha tagata.

11Ka e kitia la, ne kitia ai e maua mo e haaku a matua a lautolu, ti ne fakako mai foki e lautolu a maua.

12Ti ko hai ni ke moua ai e tau fakamauaga nai, mo e nakai fakakelea ki ai ha ko e tau mena kua nakai hakohako mitaki, to iloa e lautolu ia e tau mena lalahi atu he tau mena nai. Kitia la, ko au ko Moronai, ti a ne mai ke maeke ia au, a kua fakakite atu e au e tau mena oti ki a mutolu.

13Kitia la, kua fakaoti tuai haaku a tau mena kua vagahau atu ai hagaao ke he tau tagata nai. Ko au ko e tama a Moromona, ti ne tupu mai e haaku a matua mai ia Nifai.

14Ti ko au ia ni ne fufu hake e tau fakamauaga nai ke he Iki; ko e tau lapa maka kua nakai aoga ha mena, ha ko e poakiaga he Iki. Ha ko e mena ne pehe mai a ia to nakai uta ai he taha ke moua mena ai; ka ko e tau fakamauaga ha ha i ai; ti ko hai ni ke ta mai ai ke he maama, to fakamonuina he Iki a ia.

15To nakai ha ha i ai ha taha kua moua ai e malolo ke ta mai ai ke he maama a to foaki atu ai he Atua ki a ia; ha ko e finagalo he Atua to taute ai mo e mata kua hagaao atu hokoia ni ke he haana a lilifu, po ke mafola he tau tagata tuai he Iki he maveheaga, ne kua leva e mavehevehe fano a lautolu.

16Ti uhoaki a ia ka ta mai ai e mena nai ke he maama; ha ko e mena to ta mai ai mai he pouli ke he maama, ke tuga mo e kupu he Atua; hanai, to ta mai ai ke kelekele, to maama atu ai mai he pouli, mo e to ta mai ai ke iloa he tau tagata; mo e to taute ai ke he malolo he Atua.

17Ti kaeke ke ha ha i ai ha mena kua hepehepe ai, ko e hepehepe he tagata a ia. Ka e kitia la, kua nakai fai mena ne hepe ai he iloa e maua; pete ia, kua iloa he Atua e tau mena oti kana; ko e mena ia, ko ia ke eke fakakelea, kia mailoga mitaki e ia neke to a ia ke he afi a teoli.

18Ti ko ia ke pehe mai: Kia fakakite mai ki a au neke lauia a koe he fahi — kia mailoga e ia neke kua pule noa aia ke he mena kua fakatapu ai he Iki,

19He kitia la, ko ia ke fakafili vale atu to fakafili vale foki ki a ia; ha ko e mena nai to moua ai e ia e palepale ke lata mo e haana a tau gahua; ko e mena ia ko ia ke fahi, to fahi foki a ia he Iki.

20Kitia la, kua pehe mai he tohi — to nakai fahi ha tagata po ke fakafili atu; ha ko e haaku ia ke fakafili, kua pihia mai e Iki, ko e taui atu ke he kelea ko e haaku foki a ia, ko au foki ke taui atu.

21Ti ko ia ke fafagu atu e ita lahi mo e tau mena ke mamahi ai ke he gahua he Iki, mo e tau tagata he maveheaga he Iki ko lautolu ia he magafaoa a Isaraela, mo e pehe a lautolu: To moumou e mautolu e tau gahua he Iki, mo e to nakai manatu ai he Iki e haana a maveheaga ne taute e ia ke he magafaoa a Isaraela — to nonofo hagahaga kelea foki a lautolu ke hahala hifo ai mo e tolo ai ke he afi;

22Ha ko e tau fakatokaaga tukulagi he Iki to holo ai ni, a to fakakatoatoa oti ai e haana a tau maveheaga.

23Kia kumikumi ke he tau perofetaaga a Isaia. Kitia la, kua nakai maeke ia au ke tohi ai. Hanai, kitia la, kua tala atu au, ko e tau tagata tapu ne kua mole atu ia au nai, ko lautolu ne moua e lautolu e motu nai, to tagi a lautolu, hanai, to tagi mai he efuefu a lautolu ke he Iki.; ti tuga ni kua moui e Iki to manatu e ia e haana a maveheaga ne taute e ia mo lautolu.

24Ti ne iloa ai e ia ha lautolu a tau liogi, ne taute ai ma e ha lautolu a tau matakainaga. Ti ne iloa foki e ia ha lautolu a tua, ha ko e haana a higoa ne uta kehe ai e lautolu e tau mouga; ko e haana a higoa foki ne faka-talulu aki e lautolu e kelekele, ti ko e malolo he haana a kupu ne fakamalolo aki e lautolu e tau fale puipui ke he kelekele; hanai, ne nakai maeke foki he afi puhopuho ke fakapakia a lautolu, nakai maeke ai foki he tau manu favale po ke tau gata kona ke fakapakia a lautolu, ha ko e malolo he haana a tau kupu.

25Ti kitia la, ko e ha lautolu a tau liogi foki kua taute ai maana ka fifili he Iki ke ta mai ai e tau mena nai.

26Ti aua ia neke pehe mai taha to nakai hoko ha mena pihia, ha ko e mena to hoko mai, ha kua vagahau mai pihia he Iki; to ta mai ai he kelekele, he lima he Iki, mo e nakai fai taha ke taofi ai; to hoko ai foki he aho kua talahau ai kua fakaoti e tau mana; to hoko ai tuga mo e taha kua vagahau mai he mate.

27To hoko mai ai he aho ka tagi atu ai ke he Iki e toto he tau tagat tapu, ha ko e tau matakau fufu mo e tau gahua pouliuli.

28Hanai, to hoko mai he aho ka fakatikai ai e malolo he Atua, mo e kua hoko ai foki e kelea ke he tau lotu, moe nikiti hake ai e tau loto fakatokoluga ha lautolu; hanai, pihia ke he aho kua tokoluga ai foki e tau loto ha lautolu e tau takitaki mo e tau faiaoga he tau lotu, ke hoko atu foki ke he mahekeheke ki a lautolu kua ha ha i ai he tau lotu ha lautolu.

29Hanai, to hoko mai ai he aho ke logona ai e tau afi, tau afa, mo e aafu he tau ahua he tau motu kehe;

30Mo e logona ai foki e tau felakutaki, tau ogo tau, mo e tau mafuike ke he tau mena kehekehe.

31Hanai, to hoko mai ai he aho kua ha ha i ai e tau mena fakakelea lahi ke he lalolagi; to ha ha i ai e tau kelipopo tagata, tau fofo mena, mo e pikopiko, mo e tau fakavai, mo e tau mahani feuaki, mo e tau mena fakalialia oti kana, to tokologa ka pehe ai, Taute pehe po ke taute pehe na, mo e nakai fai mena ke lekua ai, to leveki mai ni Iki ke he aho fakahiku. Ka e oi te ki a lautolu ia ha ko e mena to kona ai mo e lili ai a lautolu ke he tau mena kelea.

32Hanai, to hoko mai ai e aho ka ha ha i ai e tau lotu ka fakatutu ai mo e pehe atu: Kia o mai ki a au ko e ha mutolu a tau tupe to magalo ai ha mutolu a tau hala.

33Oi ki a mutolu ko e tau tagata kelea, mahani keukeu mo e mao ha mutolu a tau ua, ko e ha kua fakatu ai e mutolu e tau lotu ma mutolu ke moua mena ai? Ko e ha kua fakaliliu kehe ai e mutolu e kupu fakatapuina he Atua, kia ta mai ai e mate tukulagi ke he ha mutolu a tau agaaga. Kitia la, kikite atu la a mutolu ke he tau fakakiteaga he Atua; he kitia la, to hoko mai e magaaho he aho ia ka fakakatoatoa ai e tau mena nai.

34Kitia la, ha kua fakakite mai he Iki ki a au e tau mena lalahi mo e ofoofogia hagaao ia ke he tau mena kua tata mai, ke he aho ia ka hoko mai ai e tau mena nai ki a mutolu.

35Kitia la, kua vagahau atu au ki a mutolu tuga ni kua ha ha hinai a mutolu, ka kua nakai pihia. Ka e kitia la ne fakakite mai e Iesu Keriso a mutolu ki a au, ti iloa ai e au e tau mena ne taute e mutolu.

36Ti iloa ai e au ne o mo e fakatokoluga ha mutolu a tau loto; ti ko e tokogaogao ni ne nakai fakatokoluga e lautolu a lautolu ke he tau loto ha lautolu, mo e tui ai ke he tau tauteute fulufuluola, ti mahekeheke ai, mo e mamahi, mo e loto kelea, mo e tukumale, mo e tau agahala kelea oti kana; ko e ha mutolu a tau lotu, hanai, kua hufia pihia oti kana ke he kelea, ha ko e tau loto fakatokoluga ha mutolu.

37He kitia la, kua fakaalofa lahi ke he tupe a mutolu, mo e ha mutolu a tau koloa, ko e ha mutolu a tau tauteute fulufuluola mo e tau fakafulufuluola he ha mutolu a tau fale tapu, kua mua ha mutolu a fakaalofa ki ai, ke he ha mutolu a fakaalofa ke he tau matua mo e tau nonofogati ke he tau gagao mo e kafokia.

38Oi ko mutolu e tau mena fakakelea, ko e tau tagata fakatupua, tau faiaoga, kua fakafua e mutolu a mutolu ke he tau mena ke fakakelea ai a mutolu, ko e ha kia kua takiva ai e mutolu e lotu fakatapu he Atua? Ko e ha kia kua ma ai a mutolu ke tuku ki luga e mutolu e higoa a Keriso? Ko e ha ne kua nakai manatu ai e mutolu kua mua atu e mahuiga he fiafia ne nakai fai fakaotiaga ke he matematekelea ia ne nakai mate ha ko e fakahekeaga he lalolagi?

39Ko e ha kua tapulu ai a mutolu ke he tau mena ia kua nakai ha ha i ai ha moui, ka e tiaki noa e tau matehoge, tau nonofogati, nakai fai tapulu, mo e tau gagao mo e tau kafokia ke mole ai ia mutolu mo e nakai mailoga ai e mutolu a lautolu?

40Hanai, ko e ha kua ati hake ai e mutolu e tau mena fufu fakalialia ha mutolu, ke moua mena ai a mutolu, mo e fakatupu ai e momoko atu ki mua he Iki he tau takape, ti pihia foki mo e tau fanau tokaveli, ke momoko atu ke he Iki, mo e tau toto he ha lautolu a tau matua taane mo e ha lautolu a tau taane ke tagi atu ke he Iki mai he kelekele, ke taui atu e kelea ke he tau ulu ha mutolu?

41Kitia la, ko e pelu he taui atu kua tautau ki luga ia mutolu; ti kua tata mai e magaaho ke taui ai e ia ki a mutolu e toto he tau tagata tapu, kua nakai toka loa e ia ha lautolu a tau tagi atu ki a ia.