1Ti ko e magaaho nai, kua vagahau atu foki au hagaao iakia lautolu kua nakai tua ki a Keriso.

2Kitia la, to tua nakai a mutolu ke he aho he ha mutolu a aahiaga — kitia la, ka haele mai e Iki, hanai, ko e aho lahi ia ke viko fakalataha ai e lalolagi ke tuga e tohi viko, to tataka ai he velagia, hanai, ko e aho ia ka ta mai ai a mutolu ke tutu ai ki mua he Punua Mamoe he Atua to pehe mai kia a mutolu kua nakai fai Atua?

3To tumau ni kia a mutolu ke fakatikai e Keriso? Po ke kitia nakai e mutolu e Punua Mamoe he Atua? Liga manatu kia a mutolu to nonofo a mutolu mo ia ka e iloa e mutolu ha mutolu a tau hala? Liga manatu kia a mutolu to fiafia ke nonofo fakalataha a mutolu mo e Tagata fakatapuina ia, ka kua tupetupe ha mutolu a tau agaaga he iloa e mutolu ha mutolu a tau hala ha kua fakahanoa a mutolu ke he haana a tau fakatufono?

4Kitia la, kua tala atu au to mua atu ha mutolu a fakaatukehe kaeke ke nonofo a mutolu mo e Atua fakafili tonu mo e tapu, ka e iloa e mutolu ha mutolu a tau kelea ki mua haana; ke he ha mutolu a nonofo mo e tau agaaga ne kua fakahala tukulagi i teoli.

5He kitia la, ko e magaaho ka fakakite ai ki a mutolu ha mutolu a nakai fai tapulu ki mua he Atua, mo e lilifu foki he Atua, mo e fakatapuina ha Iesu Keriso, to kamata ke lupa ai e taha afi kua nakai mate he tamate ia mutolu.

6Oi, kia mutolu kua nakai tua, kia fuluhi atu a ke he Iki; kia tagi eke taha atu ke he Matua ke he higoa a Iesu, ke liga maeke nakai ke nakai fai ila a mutolu, mea, hina, mo e tea, ha kua fakamea ai he toto he Punua Mamoe, ke he aho lahi fakahiku na.

7Ti liu au ke vagahau atu foki ki a mutolu kua fakatikai e mutolu e tau fakakiteaga he Atua, mo e pehe ai kua mole tuai e tau mena ia, kua naaki ha ha i ai ha fakakiteaga, po ke ha perofetaaga, po ke ha mena fakaalofa, po ke ha fakamalolo e tau kafokia, po ke iloilo he tau vagahau kehekehe, po ke fakaliliuaga he tau vagahau kehekehe;

8Kitia la, kua tala atu e au ki a mutolu, ko ia ke fakatikai e tau mena nai, kua nakai iloa e ia e evagelia a Keriso; hanai, kua nakai totou e ia e tau tohi; kaeke ke totou ai, kua nakai maama e ia.

9He mena nai, nakai kia totou e tautolu ko e tatai nei e Atua i ne afi, aho nai, mo e tukulagi kua nakai fai mena ke kehe ai po ke ha manatu ke hiki ai?

10ti kaeke kua ha ha ke he tau loto ha mutolu e taha atua ne kehe mo e hikihiki fano, ti kua manatu a mutolu ke he taha atua kehe nakai ko e Atua he tau mana.

11Ka e kitia la, to fakakite atu e au ki a mutolu e Atua he tau mana, ko e Atua ia a Aperahamo, mo e Atua a Isaako, mo e Atua a Iakopo; ti ko e Atua taha ia ne tufugatia e lagi mo e lalolagi, moe tau mena oti kua ha ha i ai.

12Kitia la, ne tufugatia e ia a Atamu, ti ko Atamu ia ne veli ai e tagata. Ha ko e veliaga ia he tagata a ti hau ai a Iesu Keriso, pihia mo e matua mo e Tama; ti ha ko Iesu Keriso kua maeke ke moua ai e fakamouiaga he tagata.

13Ti ko e fakamouiaga he tagata, ne moua mai ia Iesu Keriso, kua liuaki mai a lautolu ki mua he Iki; hanai, ko e mena nai kua fakamomoui e tau tagata oti kana, ha ko e matulei a Keriso kua fakahoko mai ai e liu tu mai, ne ta mai ai e fakamouiaga mai he mohe nakai fai fakaotiaga, to fafagu mai he mohe ia e tau tagata oti kana ha ko e malolo he Atua ka fakatagi ai e pu; to o mai ai a lautolu, ko lautolu ne ikiiki mo e lalahi, to tutu a lautolu oti ki mua he laulau, kua fakamoui mo e vevete ai mai he liliaga tukulagi he mate, ko e mate ia ko e mate ke he tino fakalalolagi.

14Ti hoko mai ai e fakafiliaga he Tama Tapu ki a lautolu; ti hoko mai ai e magaaho, ko ia ne kiva to tumau agaia ke he kiva; ti ko ia ne tututonu to tumau agaia ke he tututonu; ko ia ne fiafia to tumau agaia ke he fiafia; ti ko ia ne nakai fiafia to tumau agaia ke he nakai fiafia.

15Ti ko e magaaho nai, ki a mutolu oti kua manatu ke he taha atua ne nakai maeke ke eke ai ha mana, kua huhu atu au, kua hoko nakai ha mena he tau mena nai ne kua vagahau atu e au? Kua hoko mai nakai e fakaotiaga? Kitia la kua tala atu au, Nakai; ti ko e Atua kua nakai oti e haana a gahua ko e Atua he tau mana.

16Kitia la, nakai kia ofo ai ha tautolu a tau mata ke he tau mena ne kua taute ai he Atua? Hanai, ko hai kia ke fakamaama e tau gahua mitaki he Atua?

17Ko hai ke pehe nakai ko e mana e mena nai, ha ko e haana a kupu kua pihia ai e lagi mo e lalolagi; ti ko e malolo he haana a kupu ne tufugatia ai e tagata mai he efuefu he kelekele; ti ko e malolo he haana a kupu a ti taute ai e tau mana ia?

18Ti ko hai ke pehe mai ne nakai eke e Iesu Keriso e tau mana lalahi mo e loga? Ti ne taute ai foki loga e tau mana lalahi he tau lima he tau aposetolo.

19Ti kaeke ne eke ai e tau mana he magaaho ia ti ko e ha kia kua fakaoti ai kua nakai eke e Atua mo Atua he tau mana kaeke ko ia kua nakai kehe ai? Kitia la, kua tala atu e au ki a mutolu kua nakai fai kehe a ia; kaeke ke pihia, kua fakaoti kua nakai eke a ia mo Atua; ti nakai kua fakaoti a ia ko e Atua, ko e Atua a ia he tau mana.

20Ti ko e kakano kua fakaoti ai e tau mana ke he tau fanau he tau tagata ha kua liu tua a lautolu ke he nakai tua, mo e o kehe mai he puhala hako, mo e nakai iloa ai e Atua kua lata ke taofi a lautolu ki ai.

21Kitia la, kua tala atu au ki a mutolu ko hai ni kua tua ki a Keriso, mo e nakai fakauaua ai, ko e ha mena kua ole e ia ke he Matua ke he higoa a Keriso to foaki atu ai ki a ia; ti ko e maveheaga nai ke he tau tagata oti, ke hoko atu ke he lalolagi oti.

22He kitia la, kua pihia he tala mai e Iesu Keriso, ko e Tama he Atua ke he haana a tau tutaki kua nonofo loa ai, hanai, ti pihia foki ke he tau tutaki oti haana, mo e logona ai he moto tagata: Kia o atu a mutolu ke he lalolagi oti, mo e fakamatala e evagelia ke he tau tagata oti kana;

23Ti ko ia kua tua mo e papatiso ai kua fakahao a ia, ka ko ia kua nakai tua to mate a ia.

24Ko e tau fakamailoga nai ka mumui ai ki a lautolu kua tua — ko e haaku a higoa ke vega kehe ai e lautolu e tau temoni; to vagahau e lautolu e tau vagahau foou; to toto ai e lautolu e tau gata; ti kaeke ke inu ai e lautolu ha mena kona ke mate ai to nakai haofia a lautolu; to fakalago ha lautolu a tau lima ki a lautolu kua gagao, ti malolo ai a lautolu;

25Ti ko e ha tagata kua tua ai ke he haaku a higoa, mo e nakai fakauaua ke he ha mena taha, to fakamooli e au haaku a tau kupu ki a ia, pihia ke hoko atu ke he lalolagi oti.

26Ti kitia la, he magaaho nai, ko hai kia ke totoko atu ke he tau gahua he Iki? Ko hai ke fakatikai haana a tau talahauaga? Ko hai kia ke totoko atu ke he malolo mua ue atu he Iki? Ko hai kia ke vihiatia ke he tau gahua he Iki? Ko hai kia ke vihiatia e tau fanau a Keriso? Kitia la, ko mutolu oti kua vihiatia ke he tau gahua he Iki, to manamanatu ai a mutolu mo e mamate ai.

27Oi, aua ia neke fakavihia, mo e aua ia neke manamanatu teao, ka kia fanogonogo ke he tau kupu he Iki, mo e ole atu ke he Matua ke he higoa a Iesu ke he ha mena kua lata mo mutolu. Aua ia neke fakauaua ka kia tua, mo e kamata ke tuga he tau vaha i tuai, mo e o mai ai ke he Iki mo e loto katoa, mo e tauteute ha mutolu a fakamouiaga mo e matakutaku mo e vivivivi ki mua haana.

28Kia lotomatala he tau aho he ha mutolu a magaaho gahua; kia fakamea a mutolu mai he tau mena kua nakai mea oti kana; aua ia neke ole ai ke he tau mena kua manako noa a mutolu ki ai, ka kia ole mo e tua kua tumau nakai lutu ai, kia nakai mahala ai ke he ha kamatamata, ka kia fekafekau a mutolu ke he Atua mooli kua moui.

29Kia aua neke papatiso ai a mutolu ka kua nakai lata; aua neke kai ai a mutolu ke he fakamanatuaga a Keriso ka kua nakai lata; ka kia taute e tau mena oti mo e tututonu, mo e taute ai ke he higoa a Iesu Keriso, ko e tama he Atua moui; ti kaeke ke taute e mutolu e tau mena nai, mo e fakauka ai ke he fakahikuaga to nakai vega kehe a mutolu.

30Kitia la, kua vagahau atu au ki a mutolu tuga kua vagahau au nai he mate; he iloa e au to logona e mutolu e haaku a tau kupu.

31Aua neke ekefakakelea e mutolu au ha ko e tau mena kua hepehepe ai au, pihia foki ke he haaku a matua ha ko e haana a tau mahani hepehepe pihia ki a lautolu ne tohia ai fakamua ia ia; ka kia fakaaue atu ke he Atua ha kua fakakite atu e ia ki a mutolu e tau mena ne hepehepe ai a mautolu, kia fakaako aki a mutolu ke lotomatala ai ia mautolu ia.

32Ti kitia la, he magaaho nai, kua tohia e mautolu e tau fakamauaga nai tuga ni mo e ha mautolu a iloilo, ke he vagahau ne fakahigoa ai e mautolu ko e vagahau liliu mai he vagahau Aikupito, ne fakaholo fakahaga mo e hiki ai e mautolu, ke he puhala vagahau ha mautolu.

33Ti a ne mai kua lalahi e tau lapa maka nai a ko e tohi ni ke he vagahau Heperu; ka kua hiki foki e mautolu e vagahau Heperu, ti a ne mai ne maeke he tohi ai ke he vagahau Heperu, kitia la, kua nakai moua e mutolu ha mena hepehepe he fakamauaga nai.

34Ka kua iloa he Iki e tau mena ne tohia ai e mautolu, ti nakai fai tagata foki ne iloa e vagahau ha mautolu; ti ko e mena ia kua tauteute ai e ia e puhala ke fakaliliu ai.

35Ti ne tohia ai e tau mena nai ke mea ai ha mautolu a tau tapulu he toto he ha mautolu a tau matakainaga, ne kua tolomuli lahi ha ko e nakai tua.

36Ti kitia la, ko e tau mena nai hagaao ke he ha mautolu a tau matakainaga ne manako a mautolu ki ai, hanai, pihia ke he liuakiaga ha lautolu ke iloa a Keriso, ke tuga mo e tau liogi he tau tagata tapu oti ne kua nonofo ai ke he motu.

37Kia talia he Iki ko Iesu Keriso ha lautolu a tau liogi mo e taui ai fakalata ke ha lautolu a tua; kia manatu ai he Atua ko e Matua e maveheaga ne taute e ia mo e magafaoa a Isaraela; kia fakamonuina e ia a lautolu tukulagi, ke he tua ke he higoa a Iesu Keriso. Amene.