1Ti kitia la, he magaaho nai, to vagahau atu au falu a mena ke he toe tagata he motu nai ne momoui agaia, kaeke ni ke foaki atu he Atua ki a lautolu e haaku a tau kupu, kia iloa ai e lautolu e tau mena he tau matua ha lautolu; hanai, kua vagahau atu au ki a mutolu, ko mutolu ne toe he magafaoa a Isaraela; ti hanai e tau kupu ka tala atu e au:

2Kia iloa e mutolu, ko mutolu mai he magafaoa a Isaraela a mutolu.

3Kia iloa e mutolu kua lata ke o mai a mutolu ke he fakatokihalaaga, kaeke ke nakai pihia to nakai maeke a mutolu ke fakahao ai.

4Kia iloa e mutolu kua lata ke tuku ki lalo e mutolu ha mutolu a tau kanavaakau tau, aua foki neke liu ke fiafia ke he fakamaligi toto mo e aua neke liu lagaaki foki a to poaki atu ai he Atua ki a mutolu.

5Kia iloa e mutolu kua lata ke iloa e mutolu ha mutolu a tau matua, mo e fakatokihala mai he ha mutolu a tau hala mo e tau mahani kelea oti, moe tua ki a Iesu Keriso, ko ia ko e Tama he Atua, ne kelipopo a ia he tau tagata Iutaia, ti ko e malolo he Matua kua liu tu mai ai a ia, ko e mena ia ne kua kautu a ia ke he tukuaga; ti ko ia foki kua folofua ai e mamahi he mate.

6Ti ne fakakatoatoa ai foki e liu tutu mai he tau tagata mamate, ko e mena ia ke liu lagaaki ai e tagata ke tu ai ki mua he nofoa he fakafiliaga.

7Ti kua fakakatoatoa ai e ia e fakamouiaga he lalolagi,ko ia he aho he fakafiliaga ka nakai agahala a ia to foaki ki a ia ke nofo ai mo e Atua ke he haana a kautu, mo e lologo hololoa mo e fakaheke ai mo e tau kau lologo i luga, ke he Matua, mo e Tama mo e Agaaga Tapu. Ko e Atua taha, kua nofo ai ke he fiafiaaga kua nakai fai fakaotiaga.

8Ko e mena ia kia tokihala mo e papatiso ke he higoa a Iesu, mo e taofi mau ke he evagelia a Keriso, ka tuku atu ia ki mua ha mutolu, nakai ni ke he tau fakamauaga nai ka e pihia foki ke he tau fakamauaga ka moua ai he tau Tagata Kehe mai he tau Iutaia, ko e tau fakamauaga ia to ta mai ai he tau Tagata Kehe ki a mutolu.

9He kitia la, kua tohi e tau mena nai mo e amaamanaki kia tua a mutolu ki ai; ti kaeke ke tua a mutolu ke he tau mena na to tau foki a mutolu ke he tau mena nai; ti kaeke ke tua a mutolu ke he tau mena nai to iloa ai e mutolu e tau mena hagaao ia ke he tau matua ha mutolu, mo e tau gahua ofoofogia ne fakahoko ai he malolo he Atua.

10To iloa ai foki e mutolu, ko mutolu ko e toe tagata he tau fanau ne tupu mai ia Iakopo; ko e mena ia, kua totou a mutolu mo e tau tagata he maveheaga fakamua; ti kaeke ni ke tua a mutolu ki a Keriso, mo e papatiso fakamua ai ke he vai, ka mole ia ti pihia foki ke he afi mo e Agaaga Tapu, mo e muitua atu ke he fakafifitakiaga he ha talu a Fakamoui, ke tuga ne poaki mai e ia ki a tautolu to mafola ni a mutolu ke he aho he fakafiliaga. Amene.