1Ti ne hoko ai, ke he tau tau ko e tolu e teau mo e ono hogofulu ma tolu aki ne o hake ai e tau kautau Nifai ke tau atu ke he tau Lamana mai he motu ko Tesolatonu.

2Ne hoko ai, ne o atu a lautolu mo e liu halatua ai ke he motu ko Tesolatonu. Ti ne mategugu a lautolu, ko e magaaho ia ne hohoko atu foki ki a lautolu e falu a kautau foou foki he tau Lamana; ti ne tau lahi mo e mamahi lahi ai a lautolu, kua lahi ni a ti uta ai he tau Lamana e maaga ko Tesolatonu, mo e kelipopo e tokologa he tau Nifai, mo e uta fakapagota ai e tokologa.

3Ko lautolu ne toe ai ne fehola a lautolu mo e nonofo ai mo lautolu i Tenikamu. Ko e maaga ko Tenikamu ha ha he katofia tata atu ke he tapa tahi; ti tata atu foki ke he maaga ko Tesolatonu.

4Ne pihia ha ko e tau kautau Nifai ne o atu ai ke he tau Lamana a ti mamahi ai a lautolu; a ne mai ai taute pihia a kua nakai fai malolo e tau Lamana ki a lautolu.

5Ka e, kitia la, to moua he fakafiliaga he Atua a lautolu ne mahani kelea; ti ko e tau tagata mahani kelea to fakahala ni he tau tagata mahani kelea; ha ko e tau tagata mahani kelea ne fakaohooho e tau loto he tau fanau he tau tagata ke fakamaligi toto.

6Ti hoko ai, ne tauteute ai e tau Lamana ke tau atu ke he maaga ko Tenikamu.

7Ti hoko ai, he tau tolu e teau mo e ono hoguflu ma fa aki ne o atu ai e tau Lamana ke he maaga ko Tenikamu mo e lali a lautolu ke moua foki e lautolu e maaga.

8Ne hoko ai, ne vihiatia lahi a lautolu mo e tutuli ai he tau Nifai a lautolu. Koe magaaho ia ne kitia ai he tau Nifai kua fehola ai e tau Lamana, ne liu fakatokoluga ai a lautolu ha kua malolo lahi a lautolu; ti ne o fano ai a lautolu mo e tua ai ke he ha lautolu a malolo, mo e liu a lautolu moua ai e maaga ko Tesolatonu.

9Ti ko e magaaho nai he mole atu e tau mena na, ne mamate ai e afe tagata he na faahi ne ua, he tau Nifai mo e tau Lamana.

10Ne hoko ai, he mole atu e tau tolu e teau mo e ono hogfulu ma ono aki, ne liliu mai foki e tau Lamana mo e tau atu ke he tau Nifai, ka kua nakai ni fakatokihala ai e tau tagata Nifai ha ko e ha lautolu a tau mahani kelea, ka e tumau ni ke he ha lautolu a tau mahani kelea na.

11Ne uka lahi ke talahau ai, po ke tohi ai he ha tagata e talahauaga kua tonu mooli ke he fakatino kelea na ke he toto mo e keli tagata ne hoko ai ke he tau tagata, ke he tau Nlfai moe tau Lamana; ti ne mao ai e tau loto he tau tagata oti, mo e fiafia tumau ni a lautolu ke fakamaligi toto.

12Ne nakai ha ha i ai ha mena kua mua ia he kelea mai he tau fanau oti a Lihai, po ke magafaoa katoa a Isaraela, ke tuga mo e tau kupu he Iki, ne talahau ai, ke he kelea ne toka ai he tau tagata he magahala ia.

13Ne hoko ai, ne liu moua ai he tau Lamana e maaga ko Tesolatonu, pihia ha kua mua atu ha lautolu a tokologa ke he tau Nifai.

14Ne liu foleni atu foki a lautolu ke he maaga ko Tenikamu, mo e vega kehe a lautolu ne nonofo ai, mo e uta ai tokologa ke fakapagota, ko e tau fifine mo e tau fanau, mo e eke ai a lautolu mo poa ke he ha lautolu a tau tupua ta.

15Ne hoko ai, ke he tau tolu e teau ono hogofulu ma fitu aki, ne ita lahi ai e tau Nifai ha kua poa he tau Lamana e tau fifine mo e tau fanau ha lautolu, ne o atu a lautolu mo e ita lahi mo e tau atu ke he tau Lamana, ne pihia a ti mahala ai e tau Lamana mo e tutuli kehe a lautolu mai he ha lautolu a tau fonua.

16Ti ne nakai liliu mai e tau Lamana ke tau ke he tau Nifai a to hoko ke he tau tolu e teau mo e fitu hogofulu ma lima aki.

17Ti ko e tau ia ne liliu o hifo mai a lautolu mo e malolo katoa mo e tau ke he tau Nifai; ti ne nakai maeke ai ke totou e numela ha kua tokologa lahi a lautolu.

18Mai he magaaho ia ne nakai liu e tau Nifai ke kautu ai ke he tau Lamana, ka kua tafi kehe a lautolu ke tuga e hahau ka hake mai e la.

19Ne hoko ai, ne liliu o hifo mai foki e tau Lamana ke he maaga ko Tesolatonu; ne hoko ai e tauaga lahi ki Tesolatonu ti mahala ai e tau Nifai.

20Ne liu fehola ai a lautolu mai ia lautolu; mo e hohoko atu ke he maaga ko Poasa; mai he mena ia ne tutu fakamalolo ai a lautolu ke he tau Lamana, ne pihia, ti ne nakai mahala a lautolu ne tau Lamana a to liliu mai e tau Lamana ke laga ua aki.

21Ti ko e magaaho ne liliu mai a lautolu ke laga ua aki, ne mahaikava kua lahi mahaki; kua liu ai e ha lautolu a tau fifine mo e tau fanau eke ai mo poa ke he tau tupua ta he tau Lamana.

22Ne hoko ai, ne liu fehola ai foki e tau Nifai mai he tau Lamana, mo e uta ai e lautolu e tau tagata oti mai he tau maaga lalahi mo e ikiiki.

23Ko e magaaho nai ne kitia ai e au ko Moromona kua tote e magaaho ti kautu ai e tau Lamana mo e pule katoatoa ai ke he motu, ko e mena ia, ne fina atu ai au ke he matiketike ko Sima mo e uta kehe ai e tau fakamauaga oti ne fufu ai e Amarona ke he Iki.