1 Yalishca jipa quimsa chunga chuscu huata yalirca, quimsa chunga pichapash, riqui Jesúspaj discípulocuna Cristopaj shuj iglesiata shayachishcarca tucui muyundi alpacunapi. Mashna paicunapaman shamurca, ciertopacha arrepentirishpa paicunapaj juchacunamanda, bautizarishca carca Jesúspaj shutipi; chasquircapash Espíritu Santota.

2 Yalishca jipa quimsa chunga sujta huatapi, llactapuracuna Apunchijpaman tucuilla tigrarirca, tucui alpa jahuallapi, ishcandi Nefitacuna, Lamanitacunapash, na tiarca randimanda plituricuna, yali canchi ninajuicuna paipuracunapi, tucui runa ali rurashpa caishuhuan chaishuhuan.

3 Tucui cuzascunata pacta charirca paipuracunapi; chaimanda na tiarca charij, huajchapash, esclavo, librepash, ashtahuangari tucuilla libreta rurarca, chasquijcuna jahua pachamanda carashcata.

4 Yalishca jipa quimsa chunga canchis huatapash yalirca, alpapi sumaj causai catircara.

5 Jesúspaj discípulocuna jatun juyailla ricuchicunata rurarca, shinashpa paicuna ungushcacunata jambishpa, huañushcata causachishpa, na purij ushajcunata purichishpa, ñausacunata paicunapaj ricuita chasquichishpa, na uyaita ushajcunata uyachishpa; tucui laya juyailla ruraita ricuchinacunata rurarca runacunapaj huahuacunapi; nima juyailla ruraita ricuchinacunata na rurarca ashtahuangari Jesúspaj shutipilla.

6 Shina quimsa chunga pusaj huata yalirca quimsa chunga iscunbash, chuscu chunga shujpash, chuscu chunga ishcaipash, ari chuscu chunga iscun huatapash yalishca carca, picha chunga shujpash, picha chunga ishcaipash; ari, picha chunga iscun huatacunapash yalishca carca.

7 Apunchij paicunata ali mirachirca ninandapacha alpapi; ari, shinashpa paicuna cutin llactacunata huasichirca maipi llactacuna rupashca carca.

8 Ari, jatun llacta Zarahemlatapash cutin huasichirca.

9 Ashtahuangari, tiarca tauca llactacuna maijan huashajushca carca, yacucuna ricurimushca carca chai pushtupi; chaimanda cai llactacuna na cutin huasichishca carca.

10 Cunan, riqui, yalishca jipa Nefipaj llactapuracuna shinllicunaman tigrarca, ñapash ninanda mirarirca, ninan juyaillagucunapachapash, sumajlla llactapuracunaman tigrarca.

11 Paicuna cazararca, curinajurca cazamentopi, achilyachishca carca taucapacha nishcapachacunahuan imata Apunchij paicunaman rurashca carca.

12 Ashtahuan ñana causarca Moiséspaj catichunbacha saquishcacunapaj rurashcacunata, ordenanzacunatapash; ashtahuangari paicuna catirca rurachunbacha saquishcacunata imata chasquirca paicunapaj Apunchij, paicunapaj Diosmanda, causarca ayunashpa, achil mañashpa, catilla tandanajushpa ishcandipa achil mañangapa, Apunchijpaj shimita uyangapapash.

13 Yalishca jipa na tiarca randimanda plituricuna tucui llactapuracunapi, tucui alpapi; ashtahuangari jatun juyailla ruraita ricuchinacunata rurarca Jesúspaj discípulocunapi.

14 Yalishca jipa canchish chunga shuj huata yalishca carca, canchis chunga ishcai huatapash, ari, tucuripipash, canchis chunga iscun huata yalishca carca; ari, patsaj huatacunapash yalishca carca, Jesúspaj discípulocuna, picunata pai ajllashca carca tucuilla rishca carca Diospaj paraísoman, ashtahuangari quimsa saquirina na; tiarca cutishuj discípulocuna ordenashca paicunapaj randi; chai miraicunamanda taucacunapash huañushca carca.

15 Yalishca jipa na tiarca alpapi randimanda plituri, Diospaj juyaimanda ima causarca llactapuracunapaj shungucunapi.

16 Na tiarca envidiacuna, fiñanajuicuna, bulla mascaicuna, fornicacióncuna, llullaicuna, huañuchicuna, tucui laya mapataruraicuna; ciertopacha ashtahuan yali cushilla llactapuracuna na tiai usharca tucui llactapuracunapi picuna rurashca carca Diospaj maquihuan.

17 Na tiarca shuhuacuna, huañuchijcuna, Lamanitacunapash, nima laya itacuna; ashtahuangari tiarca shujlla, Cristopaj huahuacuna, Diospaj reinota chasquinacuna.

18 Mashna achilyachishca paicuna carca! Apunchij paicunata achilyachirca tucui paicunapaj ruraicunapi; ari, paicunata achilyachirca, ali mirachirca patsaj shuj chunga huatacuna yalishca cangacaman; Cristomanda cati mirai huañushca carca, na tiarcapash randimanda plituricuna tucui alpapi.

19 Yalishca jipa Nefi, pai alichirca cai tucuri quilcashcata, (pai alichirca Nefipaj jirru fangacunapi) huañurca, paipaj churi Amós alichirca paipaj randi; pai alichirca cai Nefipaj jirru fangacunapillata.

20 Pai alichirca pusaj chunga chuscu huatacunata, tiarcara alpapi sumaj causai, ashalla llactapuracuna maijanguna na cazushca carca iglesiata, paicuna japirca Lamanitacunapaj shutita; chaimanda alpapi tiai callarirca cutin Lamanitacuna.

21 Yalishca jipa Amóspash huañurca, (cai carca patsaj iscun chunga chuscu huatacuna Cristo shamushcamanda) paipaj churi Amós alichirca tandachishca quilcashcata paipaj randi; pai alichirca Nefipaj jirru fangacunapi; cai quilcashcapash carca Nefipaj quilcashcapi, imami can cai quilcashca.

22 Yalishca jipa ishcai patsaj huatacuna yalishca carca; cati miraipash tucuilla huañushca carca ashagulla na.

23 Cunan ñuca, Mormón, canguna yachanguichi llactapuracuna mirashca carca, shinashpa caiman chaiman chajchurishcarca tucui alpa jahuallaman, ninan charijcunaman tigrashca carca, Cristopi ali miraimanda.

24 Cunan, cai ishcai patsaj shuj huata callarirca tiashpa paipuracunapi jariyashpa vichai alsarijcuna, shina valishca churajunacunata churajujcuna, tucui laya fino perlacunahuan, cai pachapaj fino cuzascunahuan.

25 Cunanmanda chaiman paicuna ñana ashtahuan paicunapaj minishtirishcapachacunata paipuracunapi pacta charirca.

26 Paicuna callarirca clasescunapi chaupirishca cangapa; paicuna callarirca iglesiacunata shayachingapa paicunapaj charijyangapa, callarirca negashpa Cristopaj ciertopacha iglesiata.

27 Yalishca jipa imaura ishcai patsaj chunga huatacuna yalishca cajpi alpapi tauca iglesiacuna tiarca; tiarca tauca iglesiacuna Cristota rijsinchi nijcuna, shina cashpapash paipaj quishpiringapa villaicunata tucuimanda yalishcata negarca, shinashpa paicuna chasquirca tucui laya na ali ruraicunata, achil yachachircapash ima achil carca maijangunaman na saquishca carca na dignocuna caimanda.

28 Cai iglesia ninanda mirarca na ali ruraicunamanda, Satanáspaj ushaimanda pimi paicunapaj shungucunata mishashpa charijurca.

29 Cutin, tiarca cutishuj iglesia pimi Cristota negarca; paicuna na ricunayachishpa catiriarca Cristopaj iglesiata, paicunapaj humildadmanda, Cristopi crimanda; paicuna na ricunayachirca juyailla ruraita ricuchinacunamanda imata paicunapi rurarca.

30 Chaimanda paicuna churarca ushaita, autoridadtapash Jesúspaj discípulocunapaj jahuapi pimi carca paicunahuan, paicunata cárcelman shitarca; ashtahuangari Diospaj shimipaj ushaihuan, imata paicunapi carca, cárcelcuna chaupipi faquirca, paicuna rirca rurashpa juyailla ruraita ricuchinacunata paicunapapi.

31 Shina cajpipash, masqui tucui cai juyailla ruraita ricuchinacunapash, llactapuracuna paicunapaj shungucunata shinlliyachirca, paicunata mascarca huañuchingapa, imashna Judíocuna Jerusalénpi Jesústa mascarca shina, paipaj shimimanda.

32 Paicunata nina jornocunaman shitarca, paicuna llujshimujpi nima chugrita na chasquirca.

33 Shitai tucurcapash sacha animalcuna causaj ucucunaman, paicuna pujllarca sacha animalcunahuan shuj llamaguhuan uchilla huahuashna; caicunapamanda llujshirca nima chugrita na chasquishpa.

34 Shina cajpipash, llactapuracuna shinlliyachirca paicunapaj shungucunata, apaitucuimanda tauca sacerdotecunahuan, yanga achi villachijcunahuan tauca iglesiacunata shayachingapa, rurangapa tucui laya na ali ruraicunata. Paicuna chugrichirca Jesúspaj llactapuracunata; ashtahuangari Jesúspaj llactapuracuna na tigrai chugrichirca. Shina paicuna na crishpa asha asha chingarirca, na alita rurashpa, huatan huatan, ishcai patsaj quimsa chunga huatacunacaman yalishca carca.

35 Cunan yalishca jipa cai huatapi, ari, ishcai patsaj quimsa chunga shuj huatapi, tiarca shuj jatun chaupiri llactapuracunapi.

36 Yalishca jipa cai huatapi jatarirca shuj llactapura shutichirishca carca Nefitacuna, paicuna carca ciertopacha Cristopi crijcuna; paipuracunapi tiarca Lamanitacuna shutirin carian—Jacobitacuna, Josefitacuna, Zoramitacunapash;

37 Chaimanda ciertopacha Cristopi crijcuna, ciertopacha Cristota adorajcuna, (paicunapi carca quimsa Jesúspaj discípulocuna saquirinacuna) shutichirishca carca Nefitacuna, Jacobitacuna, Josefitacuna, Zoramitacunapash.

38 Yalishca jipa maijan quishpiringapa villaicunata na cazujcuna shutichirishca carca Lamanitacuna, Lemuelitacuna, Ismaelitacuna; paicuna na crishpa asha asha chingarirca, ashtahuangari paicuna munashpapacha na cazurca Cristopaj quishpiringapa villaicunata; paicuna yachachirca paicunapaj huahuacunaman ama crichun, paicunapaj taitacunashna asha asha chingarirca callarimanda.

39 Cai carca paicunapaj taitacunapaj na ali ruraicunamanda, millanayaicunamandapash, imashna carca callaripi. Paicuna yachachishca carca Diospaj huahuacunata napacha ricunayachichun, imashna Lamanitacuna yachachishca carca Nefipaj huahuacunata napacha ricunayachichun callarimanda.

40 Yalishca jipa ishcai patsaj chuscu chunga chuscu huatacuna yalishca carca, shina carca llactapuracunapaj ruranacuna. Llactapuracunapaj ashtahuan na alicuna shinllicunaman tigrarca, ashtahuan ninanda mirarcapash Diospaj llactapuracunata yali.

41 Paicuna catirca iglesiacunata shayachishpa paipuracunapaj, juyaillayachishpa tucui laya juyailla cuzascunahuan. Shina ishcai patsaj picha chunga huatacuna yalirca, ishcai patsaj sujta chunga huatacunapash.

42 Yalishca jipa llactapuracunapaj na ali rurajcuna cutin callarirca churashpa pacalla juramentocunata, Gadiantónpaj pacalla tandanajushcacunatapash.

43 Llactapuracuna picuna cayashca carca Nefipaj llactapuracuna callarirca shungupi jariyaicunahuan, ashtaca charischacunamanda, yangacunaman tigrarca paicunapaj huauquicunashnalla, Lamanitacuna.

44 Chai punllamanda discípulocuna llaquiri callarirca cai pachapaj juchacunamanda.

45 Yalishca jipa imaura quimsa patsaj huatacuna yalijpi, ishcandi Nefipaj llactapuracuna, Lamanitacunapash ninan na alicunaman tigrashca carca caishucuna chaishucunahuan pacta.

46 Yalishca jipa Gadiantónpaj shuhuacuna caiman chaiman chajchurirca tucui alpa jahuallaman; nipipash na tiarca ali rurajcuna, Jesúspaj discípulocunalla. Curi, culqui ninanda mirachishpa alichirca, tucui laya jatunacunatapash jaturca.

47 Yalishca jipa quimsa patsaj picha huatacuna yalishca jipa, (llactapuracuna na ali ruraicunapi catinajurcara) Amós huañurca; paipaj huauqui Ammarón, alichirca quilcashcata paipaj randi.

48 Yalishca jipa quimsa patsaj ishcai chunga huatacuna yalishca jipa, Ammarón, Espíritu Santohuan tangai tucushpa, pacarca tandachishpa quilcashcacunata imacuna achilcuna carca—ari, tucui achilyachishca tandachishpa quilcashcacuna imacuna maquin maquin shamushca carca shuj miraimanda cutishuj miraiman, ima carca achilyachishca—quimsa patsaj ishcai chunga huatacaman Cristo shamushcamanda.

49 Pai Apunchijpaj pacarca, cutin ricuchishca cachun Jacobpaj huasipaj puchucunaman, Apunchijpaj achil villachishcamanda, nishcapachacunamadapash. Shina tucurin Ammarónpaj tandachishca quilcashca.