Mormónpaj Quilcashca

1 Cunan ñuca Mormón, cuzascunamanda shuj tandachishca quilcashcata rurani imata ñuca ricushcani, uyashcanipash, caita shutichini Mormónpaj Quilcashca.

2 Ammarón shina punllapi pacashcarca tandachishca quilcashcacunata Apunchijman, ñucapaman shamurca (ñuca charircani chunga huatatashna, ñuca callarijurcani yachajushpa ñuca llactapuracunapaj yachajuicunamanda), Ammarón ñucata nihuarca: Ñuca ricuipi quiquin shuj serio viñaj huahua cangui, ñapash ricujpash;

3 Chaimanda, imaura charingui ishcai chunga chuscu huatacuna ñuca munani can yarichun cuzascunata can ricushcata cai llactapuracunamanda; imaura chai edadta charishpa ringui Antum alpaman, shuj urcuman imami shutichishca canga Shim; chaipimi ñuca saquishcani Apunchijman tucuilla achilyachishca quilcashcacunata cai llactapuracunamanda.

4 Riqui, japingui Nefipaj jirru fangacunata quiquinba, chaishucunataca maipi cashcapillata saquingui; quilcangui Nefipaj jirru fangacunapi tucui cuzascunata imata quiquin ricushcangui cai llactapuracunamanda.

5 Ñuca, Mormón, Nefipaj cati aillu cashpa (ñuca taitapaj shuti carca Mormón), ñuca yarini cuzascunata imata Ammarón mandahuarca.

6 Yalishca jipa ñuca, chunga shuj huatacunata charishpa, ñuca taitahuan pushai tucurcani urai alpaman, Zarahemlapaj alpacaman.

7 Tucuilla alpa jahualla jatun huasicunahuan quilpashca saquirirca, llactapuracuna carca ashtacapacha, imashna jatun mama cochapaj tʼiyushna.

8 Yalishca jipa chai huatapi macanajui tiai callarirca Nefitacunahuan, caicuna carca Nefitacuna, Jacobitacuna, Josefitacuna, Zoramitacuna; cai macanajui carca Nefitacuna Lamanitacunahuan, Lemuelitacuna Ismaelitacunahuan.

9 Cunan Lamanitacuna, Lemuelitacuna, Ismaelitacunapash shutichirishca carca Lamanitacuna, ishcaipi tandanajushcacuna carca Nefitacuna, Lamanitacunapash.

10 Yalishca jipa macanajui callarirca paipuracunapi Zarahemlapaj manñacunapi, Sidónpaj yacucuna ladopi.

11 Yalishca jipa Nefitacuna tandachishca carca jatun taucapacha runacunata, quimsa chunga huarangata yali. Yalishca jipa paicuna charirca chai huatallata tauca macanajuicunata, chaipi Nefitacuna Lamanitacunata misharca taucacunata huañuchircapash.

12 Yalishca jipa Lamanitacuna saquirca paicunapaj munashcata rurangapa, shina alpapi sumaj causai tiarca; sumaj causai catirca chuscu huatacunacaman, chaimanda yahuarta jichai na tiarca.

13 Ashtahuangari na ali ruraicuna mirarca tucui alpa jahuallapi, shinapi Apunchij paipaj juyashca discípulocunata aparca, juyailla ruraita ricuchinacunapaj, jambinacunapaj ruraicuna tucurirca llactapuracunapaj na ali ruraicunamanda.

14 Na tiarca Apunchijpamanda carashcacuna, Espíritu Santo nimaijanbaman na shamurca, paicunapaj na ali ruraicunamanda, na crimandapash.

15 Ñuca, chunga picha huatacunata charishpa, asha serio yuyai cashpa, chaimanda ñucata Apunchij ricuj shamurca, malircani, yacharcanipash Jesúspaj alicaita.

16 Ñuca munarcani cai llactapuracunata yachachingapa, ashtahuangari ñuca shimi vichashca carca, ñuca na saquishca carcani paicunaman yachachichun; riqui paicuna munaimanda paicunapaj Diosta na cazushca carca; juyashca discípulocuna apai tucushca carca paicunapaj na ali ruraicunamanda.

17 Ashtahuangari ñuca paicunahuan carcani, ashtahuangari ñuca na saquishca carcani paicunaman yachachichun, paicunapaj shinlli shungucunamanda; paicunapaj shungucuna shinlliyashcamanda paicunamanda alpa llaquichishca carca.

18 Cai Gadiantón shuhuacuna, picuna carca Lamanitacunapi, llactata llaquichishpa causarca, shinashpa chaipi causajcuna paicunapaj charijyashcacunata alpapi pacai callarirca; llushpirinallacunaman tigrarca, Apunchij alpata llaquichishca cajpi, chaimanda paicuna na alichi usharca, cutin charishcatapash na cati usharca.

19 Yalishca jipa hechiceríacuna, brujeríacuna, magiacunapash tiarca; ayapaj ushai tucui alpa jahuallapi rurashcapash carca, Abinadípaj tucui shimicuna pactashcangacaman, Samuel shuj Lamanita shimicunapash.