1 Cunan ñuca tucuchini ñucapaj tandachishpa quilcashcata ñuca Nefita llactapuracunapaj tucuricunamanda. Yalishca jipa rircanchi Lamanitacunapaj ñaupamanda.

2 Ñuca, Mormón, quilcarcani shuj cartata Lamanitacunapaj jatun mandajman, mañashpa pai ñucanchita saquichun ñucanchi llactapuracunata tandachingapa Cumorahpaj alpapi, shuj urcu ladopi caita shutichishca carca Cumorah, chaipi macanajungapa.

3 Yalishca jipa Lamanitacunapaj jatun mandaj saquirca ima ñuca mañashcata.

4 Yalishca jipa ñucanchi rircanchi Cumorahpaj alpaman, ñucanchi facha huasicunata shayachircanchi Cumorah urcu muyundi; cai carca acha yacucuna tiaj alpapi, rijuj yacucuna, pujyucuna; caipi Lamanitacunata yalinata yarcanchi.

5 Imaura quimsa patsaj pusaj chunga chuscu huatacuna yalishca cajpi, tandachircanchi tucui puchushca llactapuracunata Cumorahpaj alpaman.

6 Yalishca jipa imaura tandachircanchi tucuilla ñucanchi llactapuracunata shujllapi Cumorahpaj alpaman, riqui ñuca, Mormón, rucuyai callarircani; yachashpa cai ñuca llactapuracunapaj tucuri macanajui cagrijta, Apunchijhuan mandashca caimanda ama saquichun quilcashcacuna imata ñucanchi taitacunamanda maquin maquin yalimushcata, imacunami achil carca, Lamanitacunapaj maquicunapi urmachun, (imashpa Lamanitacuna caicunata tucuchinga) chaimanda ñuca rurarcani cai quilcashcata Nefipaj jirru fangacunamanda, pacarcanipash Cumorah urcupi tucui quilcashcacunata imata ñucaman cuhuashca carca Apunchijpaj maquihuan, ashtahuangari huaquin jirru fangacunata ñuca churi Moroniman curcani.

7 Yalishca jipa ñuca llactapuracuna, paicunapaj huarmicunahuan, paicunapaj huahuacunahuan, cunan ricurca Lamanitacunapaj macanajuj runacuna paicunapaman rinajujta; huañuipaj ninan manllaihuan ima jundan tucui na alita rurajcunapaj pechocunapi, paicunata chasquingapa shuyarca.

8 Yalishca jipa ñucanchihuan macanajungapa shamurca, tucui alma manllaihuan junda carca paicuna taucapachacuna cajpi.

9 Yalishca jipa ñuca llactapuracunapaj jahuapi urmamurca espadahuan, arcohuanbash, flechahuanbash, jachahuanbash, tucui laya macanajungapa macanajunacunahuanbash.

10 Yalishca jipa ñuca runacunata shitarca, ari, chunga huarangacunata picuna ñucahuan carca, ñucapash chugrishpa urmarcani paicunapaj chaupipi; ñuca ladota yalishpa rirca na ñuca causaita tucuchirca.

11 Imaura paicuna rirca tucui ñuca llactapuracunata shitashpa, ashtahuangari ñucanchimanda ishcai chunga chuscutalla na, (caicunahuan carca ñuca churi Moroni) ñucanchi causarcanchira ñucanchi llactapuracunapaj huañuimanda, caya punlla, imaura Lamanitacuna tigrajpi paicunapaj pushtucunaman, Cumorah urcu jahuamanda ricurcanchi chunga huaranga ñucapaj llactapuracunata picuna shitashca carca, picunapaj ñuca ñaupapi carcani.

12 Ricurcanchipash chunga huaranga ñuca llactapuracunata picunata ñuca churi Moroni apashca carca.

13 Riqui, Gidgiddonapaj chunga huaranga urmashca carca, paipash chaupipi carca.

14 Lámahpash paipaj chunga huarangahuan urmashca carca; Gilgalpash paipaj chunga huarangahuan urmashca carca; Límhahpash paipaj chunga huarangahuan urmashca carca; Jeneumpash paipaj chunga huarangahuan urmashca carca; Cumeníahpash, Moroníahpash, Antiónumpash, Shiblompash, Shempash, Joshpash, paicunapaj chunga huarangahuan urmashca carca.

15 Yalishca jipa tiarcapash ashtahuan chunga picuna urmarca espadahuan, paicunapaj chunga huarangahuan; ari, tucui ñuca llactapuracuna, ashtahuangari chai ishcai chunga chusculla picuna ñucahuan carca, huaquin maijan urai llactacunaman pacajushca rishcacunapash, huaquin maijan Lamanitacunapaman yalishcacuna, urmashca can; paicunapaj aichapash, tullucunapash, yahuarpash alpa jahualla jichashca can, saquishca cashpa maquicunahuan maijan paicunata huañuchirca alpapi ashnayangapa, ismungapapash paicunapaj alpa mamaman tigrangapapash.

16 Ñuca alma faquirirca llaquimanda, ñuca llactapuracunapaj huañuimanda, ñuca caparircanipash:

17 Oh juyailla llactapuracuna, imashnata anchuri usharcanguichi Apunchijpaj ñangunamanda! Oh juyailla llactapuracuna, imashnata na cazurcanguichi chai Jesústa, pimi shayajurca rigracunata pascashca cangunata chasquingapa!

18 Riqui, caita na rurashca cashpaca, na urmashca canguichiman. Ashtahuangari riqui, urmashcanguichi, ñuca huacanipash cangunapaj chingashcacunamanda.

19 Oh juyailla churicuna, ushicunapash, canguna taitacuna, mamacunapash, canguna cusacuna, huarmicunapash, juyailla llactapuracuna, imashnata canguna urmai ushashcanguichi!

20 Ashtahuangari riqui, rishca canguichi, ñuca llaquiri na tigrai apamui ushanllu cangunata.

21 Punlla ñapash shamun imaura cangunapaj huañuna churajunga na huañunahuan, cai cuerpocuna imacuna cunan ismun ismunapi ñalla tigranga na ismuna cuerpopi; shina shayaringuichi Cristopaj jatun tiarina ñaupapi, ricushpa chasquichi tucungapa cangunapaj ruraicunamanda; cai shina cajpica canguna ali rurajcuna cajpica, shina achilyachishca canguichi cangunapaj taitacunahuan maijanguna rirca cangunata ñaupashpa.

22 Oh arrepentirishcacashpaca cai jatun tucuchina nara cangunapaj jahuapi shamujpillata. Ashtahuangari riqui, rishcanguichimi, Taitaca, ari, jahua pachamanda Mana Tucuri Taita, yachan cangunapaj caita; pai ruran cangunahuan paipaj alicaihuan, shungumanda llaquihuanbash.