4 Capítulo
Macanajui, huañuchishpa tucuchicuna catirca—Na alita rurajcuna castigan na alita rurajcunata—Imaurapash shina na tiashca jatun na ali ruraicuna yali miran tucui Israelpi—Huarmicuna, huahuacunapash yanga diosman sacrificashca can—Lamanitacuna paicunapaj ñaupamanda Nefitacunata calpachi callarin. Nara C.H. 363–375.
1 Cunan yalishca jipa quimsa patsaj sujta chunga quimsa huatapi Nefitacuna llujshirca Imapash Illaj alpamanda paicunapaj macanajuj runacunahuan Lamanitacunapaj contra macanajungapa.
2 Yalishca jipa Nefitacunapaj macanajuj runacuna huashaman cutin tigrachishca carca Imapash Illaj alpacaman. Paicuna shayajushca cajllapita, samashca Lamanita macanajuj runacuna shamurca paicunapaj jahuaman; llaquinayai macanajuita charirca, shinashpa Lamanitacuna Imapash Illaj llactata mishashpa japirca, tauca Nefitacunata huañuchirca, taucacunata prezu japircapash.
3 Puchushcacunaca calparca, Teáncumpaj llactapi causajcunahuan tandanajungapa. Cunan Teáncum llacta manñacunapi carca jatun mama cocha lodopi; cai carca Imapash Illaj llacta ladolla.
4 Cai carca Nefitacunapaj macanajuj runacuna Lamanitacunapaman vichai rimanda imamanda atacai callarirca; cai na shina cashpaca, Lamanitacuna na ushaita paicunapaj jahuapi chari ushanman carca.
5 Ashtahuangari, riqui, Diospaj castigocuna na alita rurajcunaman shamunga; cai can na alita ruraicunamanda na alita rurajcuna castigai tucushca can; imashpa na alita rurajcuna tangachin runacunapaj huahuacunapaj shungucunata yahuarta jichachun.
6 Yalishca jipa Lamanitacuna prepararinacunata rurarca Teáncum llacta contra ringapa.
7 Yalishca jipa quimsa patsaj sujta chunga chuscu huatapi Lamanitacuna Teáncum llacta contra rirca, Teáncum llactapash mishashpa japirca.
8 Yalishca jipa Nefitacunahuan huashaman tigrachi tucurca. Imaura Nefitacuna ricurca Lamanitacuna tigrajta ricushpa cutin jariyai callarirca paicunapaj propio ushaimanda; llujshirca paicunapaj propio ushaipi confiashpa, cutin japirca Imapash Illaj llactata.
9 Cunan tucui cai cuzascuna rurashca carca, tiarcapash huaranga huaranga huañushcacuna ishcandi ladomanda, Nefitacunapi, Lamanitacunapipash.
10 Yalishca jipa quimsa patsaj sujta chunga sujta huata yalishca carca, Lamanitacuna cutin shamurca Nefitacunahuan macanajungapa; ashtahuangari Nefitacuna na arrepentirirca na alita rurashcamanda, ashtahuangari catinajurca paicunapaj na ali ruraicunapi catilla.
11 Napacha ushana can shuj jallu villana, nacashpa shuj runa alipacha ricushcata quilcana yahuar jichanapaj, huañuchishpa tucuchina manllanayai ricuchicunamanda, imami tiarca llactapuracunapi, ishcandi Nefitacunapi, Lamanitacunapipash; shujllangaman shungu shinlliyashca carca, shina cushijurca catilla yahuar jichaipi.
12 Nimaurapash na shina jatun na ali ruraicuna tiashca carca Lehipaj tucui huahuacunapi, nacashpa tucui Israelpaj huasipi, Apunchijpaj shimicunamanda, imashna cai llactapuracuna carca.
13 Yalishca jipa Lamanitacuna Imapash Illaj llactata mishashpa japirca, Nefitacunata yali taucapachacuna caimanda.
14 Paicuna rircapash Teáncum llactapaj contra, chaipi causajcunata llujchircapash, tauca prezucunata japirca huarmicunata, huahuacunatapash, paicunata curca sacrificiocunatashna paicunapaj yanga dioscunaman.
15 Yalishca jipa quimsa patsaj sujta chunga canchis huatapi Nefitacuna fiñashca cashpa Lamanitacuna sacrificashca cajpi paicunapaj huarmicunata, paicunapaj huahuacunata, Lamanitacunapaj contra rirca ninan jatun fiñaihuan, shinashpa cutin Lamanitacunata misharca, paicunapaj alpacunaman calpachircapash.
16 Lamanitacuna Nefitacunapaman contra cutin ñana shamurca quimsa patsaj canchis chunga picha huatacaman.
17 Cai huatapi paicuna urai shamurca Nefitacunapaj contra paicunapaj tucui ushaicunahuan; paicuna na yupashca carca paicuna ashtacapacha yupana caimanda.
18 Chai punllamanda Nefitacuna na misharca ushaitapash na charirca Lamanitacunapaj jahuapi, ashtahuangari tucuchi tucurca paicunahuan rocíoshna indi ñaupapi.
19 Yalishca jipa Lamanitacuna urai shamurca Imapash Illaj llacta contra; tiarca ninan llaquinayai macanajui Imapash Illaj alpapi, caipi Nefitacunata misharca.
20 Cutin calparca paicunapaj ñaupamanda, rirca Boaz llactaman; chaipi Lamanitacunapaj contra shayarirca ninan na manllaihuan, shinashpa Lamanitacuna na misharca imaura ishcai viaje shamungacaman.
21 Imaura paicuna ishcai viaje shamujpi, Nefitacuna calpachi tucurca tucuchi tucurcapash ninan jatun huañuchihuan; paicunapaj huarmicuna, paicunapaj huahuacuna cutin sacrificashca carca yanga dioscunaman.
22 Yalishca jipa Nefitacuna cutin paicunapaj ñaupamanda calparca, paicunahuan tucui causajcunata apashpa llactacunamanda uchilla llactacunamandapash.
23 Cunan ñuca, Mormón ricushpa Lamanitacuna cai alpata ña tucuchigrinajujta, chaimanda Shim uchilla urcuman rircani, tandachishpa tucui quilcashcacunata imata Ammarón pacashca carca Apunchijman.