1 Karon anaa sa balaod ni Mosiah nga ang matag tawo kinsa usa ka maghuhukom sa balaod, o kadtong gitudlo nga mga maghuhukom, makadawat og mga suhol sumala sa oras sa ilang pagtrabaho sa paghukom niadtong kinsa gidala sa ilang atubangan aron pagahukman.

2 Karon kon ang usa ka tawo makautang sa laing tawo, ug magdumili siya sa pagbayad nianang iyang nautang, isumbong siya ngadto sa maghuhukom; ug ang maghuhukom mogamit sa iyang awtoridad, ug mosugo og mga opisyal nga ang tawo kinahanglan dad-on sa iyang atubangan; ug hukman niya ang tawo sumala sa balaod ug sa mga ebidensya nga gidala batok kaniya, ug sa ingon niana ang tawo mapugos sa pagbayad nianang iyang nautang, o siya kuhaan sa tanang anaa kaniya, o isalikway gikan sa katawhan isip usa ka kawatan ug usa ka tulisan.

3 Ug ang maghuhukom makadawat sa iyang mga suhol sumala sa iyang oras—usa ka senine nga bulawan alang sa usa ka adlaw, o usa ka senum nga pilak, nga katumbas sa usa ka senine nga bulawan; ug kini sumala sa balaod nga gihatag.

4 Karon mao kini ang mga ngalan sa nagkalainlaing piraso sa ilang bulawan, ug sa ilang pilak, sumala sa kantidad niini. Ug ang mga ngalan gihatag sa mga Nephita, kay ang ilang pagbanabana sa kantidad dili sama sa paagi sa mga Judeo kinsa tua sa Jerusalem; ni ang ilang pagsubay sama sa paagi sa mga Judeo; apan ilang giusab ang ilang pagbanabana sa kantidad ug ang ilang pagsubay, sumala sa mga panghunahuna ug sa mga kahimtang sa katawhan, sa matag henerasyon, hangtod sa paghari sa mga maghuhukom, diin kini gipahimutang ni hari Mosiah.

5 Ug karon ang pagbanabana sa kantidad ingon niini—usa ka senine sa bulawan, usa ka seon sa bulawan, usa ka shum sa bulawan, ug usa ka limnah sa bulawan.

6 Usa ka senum sa pilak, usa ka amnor sa plata, usa ka ezrom sa plata, ug usa ka onti sa pilak.

7 Usa ka senum sa pilak katumbas sa usa ka senine sa bulawan, ug usa niana alang sa usa ka sukod nga sebada, ug usab alang sa usa ka sukod sa matag matang nga lugas.

8 Karon ang bili sa usa ka seon nga bulawan kaduhaon ang kantidad sa usa ka senine.

9 Ug ang usa ka shum nga bulawan kaduhaon ang kantidad sa usa ka seon.

10 Ug ang usa ka limnah nga bulawan mao ang kantidad sa tanan niini.

11 Ug ang usa ka amnor nga pilak sama sa gidaghanon sa duha ka senum.

12 Ug ang usa ka ezrom sa pilak sama sa gidaghanon sa upat ka senum.

13 Ug ang usa ka onti sama sa gidaghanon kanilang tanan.

14 Karon mao kini ang kantidad sa gagmay nga ihap sa ilang pagbanabana sa kantidad—

15 Usa ka shiblon katunga sa usa ka senum; busa, usa ka shiblon alang sa katunga sa usa ka sukod sa sebada.

16 Ug ang usa ka shiblum katunga sa usa ka shiblon.

17 Ug ang usa ka leah mao ang katunga sa usa ka shiblum.

18 Karon mao kini ang ilang ihap, sumala sa ilang pagbana-bana sa kantidad.

19 Karon ang usa ka antion sa bulawan katumbas sa tulo ka shiblon.

20 Karon, tungod sa katuyoan aron makasapi, kay masuholan man sila sumala sa ilang pangita, busa, gihulhogan nila ang katawhan sa paghimo og mga kagubot, ug tanan nga matang sa kasamok ug pagkadaotan, aron makakuha pa sila og daghan nga kapangitaan, aron makasapi sila sumala sa mga sumbong nga gidala sa ilang atubangan; busa gihulhogan nila ang katawhan batok kang Alma ug kang Amulek.

21 Ug kini nga Zeezrom misugod sa pagpangutana kang Amulek, nga nag-ingon: Ikaw ba motubag sa pipila nga akong ipangutana kanimo? Karon si Zeezrom usa ka tawo nga hanas sa mga paagi sa yawa, aron iyang malaglag kana nga maayo; busa, giingnan niya si Amulek: Ikaw motubag ba sa akong mga ipangutana kanimo?

22 Ug si Amulek miingon kaniya: Oo, kon kini sumala sa Espiritu sa Ginoo, nga ania kanako; kay ako walay isulti nga supak sa Espiritu sa Ginoo. Ug si Zeezrom miingon kaniya: Tan-awa, aniay unom ka onti nga pilak, ug kining tanan akong ihatag kanimo kon ikaw molimod nga adunay Labing Gamhanan nga Binuhat.

23 Karon si Amulek miingon: O ikaw nga anak sa impyerno, nganong tentalon man ko nimo? Nasayod ka ba nga ang matarong dili madala sa ingon nianang mga pagtental?

24 Nagtuo ka ba nga walay Dios? Sultihan ko ikaw, Wala, ikaw nasayod nga adunay Dios, apan gihigugma nimo ang katigayonan labaw kay kaniya.

25 Ug karon ikaw namakak kanako sa atubangan sa Dios. Gisultihan ko nimo nga—Tan-awa kining unom ka onti, nga dako og bili, akong ihatag kanimo—apan diha sa imong kasingkasing idumili mo kini kanako; ug ang imong tinguha lamang mao nga ako molimod sa tinuod ug buhi nga Dios, aron tungod niini nga hinungdan ikaw molaglag kanako. Ug karon tan-awa, tungod niining hilabihan nga kadaotan madawat nimo ang imong ganti.

26 Ug si Zeezrom miingon kaniya: Miingon ka nga adunay tinuod ug buhi nga Dios?

27 Ug si Amulek miingon: Oo, adunay tinuod ug buhi nga Dios.

28 Karon si Zeezrom miingon: Aduna bay labaw pa sa usa ka Dios?

29 Ug siya mitubag, Wala.

30 Karon si Zeezrom miingon na usab kaniya: Giunsa nimo pagkasayod niining mga butanga?

31 Ug siya miingon: Usa ka anghel ang mipahibalo niini kanako.

32 Ug si Zeezrom miingon na usab: Kinsa siya nga moanhi? Kini ba ang Anak sa Dios?

33 Ug siya miingon kaniya, Oo.

34 Ug si Zeezrom miingon na usab: Luwason ba niya ang iyang katawhan sa ilang mga sala? Ug si Amulek mitubag ug miingon kaniya: Sultihan ko ikaw nga siya dili, kay imposible alang kaniya ang paglimod sa iyang pulong.

35 Karon giingnan ni Zeezrom ang katawhan: Seguroha nga mahinumdoman ninyo kining mga butanga; kay miingon siya nga adunay usa lang ka Dios; apan miingon siya nga ang Anak sa Dios moanhi, apan siya dili moluwas sa iyang katawhan—ingon og siya adunay katungod sa pagsugo sa Dios.

36 Karon si Amulek miingon na usab kaniya: Tan-awa ikaw namakak, kay miingon ka nga namulong ko ingon og ako adunay katungod sa pagsugo sa Dios tungod kay miingon ko nga siya dili moluwas sa iyang katawhan sa ilang mga sala.

37 Ug ako moingon na usab kanimo nga sila dili niya maluwas sa ilang mga sala; kay ako dili makalimod sa iyang pulong, ug siya miingon nga walay hugaw nga butang ang makapanunod sa gingharian sa langit; busa, sa unsang paagi nga kamo maluwas, gawas nga kamo makapanunod sa gingharian sa langit? Busa, kamo dili maluwas sa inyong mga sala.

38 Karon si Zeezrom miingon na usab kaniya: Ang Anak ba sa Dios mao ang Amahan sa Kahangtoran?

39 Ug si Amulek miingon kaniya: Oo, siya gayod ang Amahan sa Kahangtoran sa langit ug sa yuta, ug sa tanan nga butang nga anaa niini; siya ang sinugdanan ug ang kataposan, ang una ug ang ulahi;

40 Ug moanhi siya sa kalibotan sa pagtubos sa iyang katawhan; ug siya modala diha kaniya sa mga kalapasan niadtong kinsa motuo sa iyang ngalan; ug sila ang makaangkon og kinabuhing dayon, ug ang kaluwasan moabot ngadto sa walay lain.

41 Busa ang mga daotan magpabilin ingon og walay katubsanan nga nahimo, gawas sa pagbadbad sa mga higot sa kamatayon; kay tan-awa, ang adlaw moabot nga ang tanan mobangon gikan sa mga patay ug mobarog sa atubangan sa Dios, ug pagahukman sumala sa ilang mga buhat.

42 Karon, adunay kamatayon nga gitawag og temporal nga kamatayon; ug ang kamatayon ni Kristo mobadbad sa mga higot niining temporal nga kamatayon, nga ang tanan pagabanhawon gikan niining temporal nga kamatayon.

43 Ang espiritu ug ang lawas pagahiusahon na usab sa hingpit nga kahimtang niini; ang mga bahin sa lawas ug ang mga lutahan ipahiuli sa tukma niini nga bayanan, gani sama kanato karon niini nga panahon; ug kita pagadad-on aron mobarog atubangan sa Dios, masayod sama sa atong nasayran karon, ug adunay matin-aw nga panumdoman sa atong tanan nga kasaypanan.

44 Karon, kini nga pagpahiuli modangat sa tanan, tigulang ug batan-on, ulipon ug gawasnon, lalaki ug babaye, daotan ug matarong; ug gani walay bisan usa ka buhok sa ilang mga ulo nga mawala; apan ang matag butang ipahiuli ngadto sa iyang hingpit nga bayanan, sama niini karon, o sa lawas, ug pagadad-on aron patubagon sa atubangan sa hukmanan ni Kristo ang Anak, ug sa Dios nga Amahan, ug sa Balaang Espiritu, nga mao ang usa ka Dios sa Kahangtoran, aron pagahukman sumala sa ilang mga buhat, kon sila ba maayo o kon sila ba daotan.

45 Karon, tan-awa, ako nakapamulong kaninyo mahitungod sa kamatayon sa mortal nga lawas, ug usab mahitungod sa pagkabanhaw sa mortal nga lawas. Sultihan ko kamo nga kining mortal nga lawas pagabanhawon ngadto sa pagka-imortal nga lawas, nga ang gipasabot gikan sa kamatayon, gani gikan sa unang kamatayon ngadto sa kinabuhi, nga sila dili na mamatay; ang ilang mga espiritu mahiusa uban sa ilang mga lawas, nga dili na gayod pagabulagon; sa ingon ang tibuok mahimo na nga espirituhanon ug imortal, nga sila dili na makasinati og pagkadunot.

46 Karon, diha nga si Amulek nakahuman niini nga mga pulong ang katawhan nagsugod na usab sa pagkahibulong, ug usab si Zeezrom nagsugod sa pagpangurog. Ug sa ingon niana natapos ang mga pulong ni Amulek, o mao kini ang tanan nga akong gisulat.