1 Ug nahitabo nga sa pagsugod sa ikakatloan ug unom nga tuig sa paghari sa mga maghuhukom sa katawhan ni Nephi, gihuptan ni Shiblon kadtong sagrado nga mga butang nga gihatag ngadto ni Helaman gikan ni Alma.

2 Ug usa siya ka makiangayon nga tawo, ug naglakaw siya nga matarong sa atubangan sa Dios; ug gipaningkamotan niya ang pagbuhat og maayo sa kanunay, sa pagtuman sa mga sugo sa Ginoo nga iyang Dios; ug mao usab ang iyang igsoon nga lalaki.

3 Ug nahitabo nga si Moroni namatay usab. Ug sa ingon niana natapos ang ikakatloan ug unom nga tuig sa paghari sa mga maghuhukom.

4 Ug nahitabo nga sa ikakatloan ug pito nga tuig sa paghari sa mga maghuhukom, dihay daghang pundok sa mga tawo, gani sa gidaghanon nga lima ka libo ug upat ka gatos ka tawo, uban sa ilang asawa ug mga anak nga mibiya gikan sa yuta sa Zarahemla ngadto sa yuta paingon sa amihanan nga bahin.

5 Ug nahitabo nga si Hagoth, kay siya hilabihan man ka mausisahon nga tawo, busa milakaw siya ug naghimo og dako kaayo nga barko, dapit sa mga utlanan sa yuta sa Mabungahon, duol sa yuta sa Biniyaan, ug gipalawig kini ngadto sa dagat sa kasadpan, dapit sa pig-ot nga lawis paingon sa yuta sa amihanan nga bahin.

6 Ug tan-awa, dihay daghang Nephita nga nanakay niini ug milawig uban ang daghang pagkaon ug ubang panginahanglanon, ug usab daghang babaye ug mga bata; ug milawig sila paingon sa amihanan nga bahin. Ug sa ingon niana natapos ang ikakatloan ug pito nga tuig.

7 Ug sa ikakatloan ug walo nga tuig, kini nga tawo mihimo og lain pang mga barko. Ug ang unang barko usab mibalik, ug daghan pa nga tawo ang misakay niini; ug sila usab nagdala og daghang pagkaon ug ubang panginahanglanon, ug milawig na usab ngadto sa yuta sa amihanan nga bahin.

8 Ug nahitabo nga sila wala na igdungog. Ug nagtuo kami nga nalunod sila sa kahiladman sa dagat. Ug nahitabo nga usa pa ka barko ang milawig; ug asa kini paingon kami wala masayod.

9 Ug nahitabo nga niini nga tuig dihay daghang tawo nga mibiyahe ngadto sa yuta sa amihanan nga bahin. Ug sa ingon niana natapos ang ikakatloan ug walo nga tuig.

10 Ug nahitabo nga sa ikakatloan ug siyam nga tuig sa paghari sa mga maghuhukom, si Shiblon namatay usab, ug si Corianton milawig paingon sa yuta sa amihanan nga bahin sakay sa usa ka barko, aron sa pagdala og mga pagkaon ug ubang panginahanglanon sa katawhan nga nakalawig ngadto niana nga yuta.

11 Busa kinahanglan nga itugyan ni Shiblon ang sagradong mga butang sa dili pa siya mamatay, ngadto sa anak nga lalaki ni Helaman, kinsa gitawag og Helaman, nga gitawag sunod sa ngalan sa iyang amahan.

12 Karon tan-awa, kadtong tanan nga kinulit nga gikuptan ni Helaman gisulat ug gipadala ngadto sa katawhan sa tibuok yuta, gawas niadtong mga bahin nga gimando ni Alma nga dili ipadayag.

13 Bisan pa niana, kining mga butanga kinahanglan ampingan nga sagrado, ug ihatag gikan sa usa ka kaliwatan ngadto sa lain; busa, niini nga tuig, gitugyan kini ngadto kang Helaman, sa wala pa mamatay si Shiblon.

14 Ug nahitabo usab niini nga tuig nga dihay mga masupilon nga nangadto sa mga Lamanita; ug gihulhogan na usab sila aron masuko batok sa mga Nephita.

15 Ug usab niining sama nga tuig milugsong sila kauban sa daghang kasundalohan aron sa pagpakiggubat batok sa katawhan ni Moronihah, o batok sa kasundalohan ni Moronihah, diin napildi sila ug giabog pagbalik ngadto sa ilang kaugalingong mga yuta, nag-antos og dakong kapildihan.

16 Ug sa ingon niana natapos ang ikakatloan ug siyam nga tuig sa paghari sa mga maghuhukom sa katawhan ni Nephi.

17 Ug sa ingon niana natapos ang asoy ni Alma, ug ni Helaman nga iyang anak nga lalaki, ug kang Shiblon usab, kinsa iyang anak nga lalaki.