1 Ut jo’kan wi’chik, ex was wiitz’in, tinb’eresi lee k’a’uxl chi uub’ej toj sa’ li kutan naq li Qaawa’ Dios kixk’e li taqlahom a’in reheb’ li ralal xk’ajol, ut nawaj raj naq taajultiko’q eere naq li Qaawa’ Dios kixk’ojob’eb’ laj tij, jo’ chanru lix santil k’anjelil, a’an jo’ chanru xk’anjelil li Ralal, re te’xk’ut li k’a’aq re ru a’in chiruheb’ li tenamit.

2 Ut eb’ laj tij a’an ke’k’ojob’aak jo’ chanru xk’anjelil li Ralal, ut ki’uxman chi jo’kan re naq eb’ li tenamit te’ruuq chixnawb’al chanru taa’uxmanq naq te’ril chi uub’ej li Ralal re te’toje’q rix.

3 Ut jo’ka’in ki’uxman naq ke’k’ojob’aak—chi ak b’oqb’ileb’ ut kawresinb’ileb’ chalen chaq sa’ xk’ojlajik li ruchich’och’ jo’ chanru lix nawom li Dios chi junxilaj, sa’ xk’ab’a’ xnumtajenaqil lix paab’aaleb’ ut lix chaab’il k’anjeleb’; rik’in naq xb’een wa kanab’anb’ileb’ chixsik’b’al ru li us malaj li ink’a’ us; jo’kan ut, rik’in naq ke’xsik’ ru li us, ut ke’xk’anjela li paab’aal q’axal nim, neke’b’oqe’ rik’in jun li santil b’oqok, relik chi yaal, rik’in li santil b’oqok a’an li kikawresiman rochb’een, ut jo’ chanru ajwi’, jun xtojb’al rix xkomoneb’ a’an, li ak kawresinb’il chaq.

4 Ut chi jo’kan ke’b’oqe’ sa’ li santil b’oqok a’in sa’ xk’ab’a’ lix paab’aaleb’, us ta wankeb’ chik jalan li ke’ajok re xtz’eqtaanankil lix Musiq’ li Dios sa’ xk’ab’a’ lix kawileb’ li raam ut lix mutz’ileb’ lix k’a’uxl, a’ut wi ta moko xb’aan ta a’in, juntaq’eet raj xnimal li kiru raj chi k’eemank reheb’ jo’eb’ li ras riitz’ineb’.

5 Malaj ut, xb’een wa ke’wan jo’ chan ruheb’ ajwi’ li ras riitz’ineb’; chi jo’kan, rik’in naq li santil b’oqok a’in kawresinb’il chalen chaq sa’ xk’ojlajik li ruchich’och’ choq’ re xkomoneb’ li ink’a’ te’xkawob’resi li raameb’, ut a’an rik’in ut sa’ xk’ab’a’ lix tojb’al rix li maak xb’aan li K’ajolb’ej Junaj Chirib’il, li kikawresiman—

6 Ut chi jo’kan, rik’in naq b’oqb’ileb’ xb’aan li santil b’oqok a’in, ut k’ojob’anb’ileb’ sa’ li taqenaqil tijonelil sa’ lix santil k’anjelil li Dios, re xk’utb’al lix taqlahom a’an chiruheb’ li ralal xk’ajoleb’ li winq, re naq eb’ a’an te’ok ajwi’ sa’ lix hilob’aal—

7 Ut li taqenaqil tijonelil a’in wan jo’ chanru xk’anjelil li Ralal, ut a’ k’anjelil a’an, wanjenaq chalen chaq sa’ xk’ojlajik li ruchich’och’; malaj sa’ jalan aatin, wan chi maak’a’ xtiklajik lix kutan chi moko roso’jik lix chihab’, kawresinb’il chalen chaq junelik q’e kutan toj anchal li junelik q’e kutan chik, jo’ chanru lix nawom a’an chi junxilaj chirix chixjunil li k’a’aq re ru—

8 Anajwan jo’ka’in naq ki’uxman naq ke’k’ojob’aak—ak b’oqb’ileb’ rik’in jun li santil b’oqok, ut k’ojob’anb’ileb’ rik’in jun li santil k’ojob’ank, ut xk’ulumeb’ sa’ xb’eeneb’ li taqenaqil tijonelil re li santil k’anjelil, ut a’ b’oqok, ut k’ojob’ank, ut taqenaqil tijonelil a’in, wan chi maak’a’ xtiklajik chi moko roso’jik—

9 Chi jo’kan neke’ok chi junelik choq’ taqenaqil aj tij, jo’ chanru xk’anjelil li K’ajolb’ej, li Junaj Yo’lajenaq chiru li Yuwa’b’ej, li maak’a’ xtiklajik lix kutan chi moko wan roso’jik lix chihab’, li nujenaq chi usilal, juntaq’eetalil, ut yaal. Ut chi jo’kan na’uxman. Amen.

10 Anajwan, jo’ kinye chirix li santil k’anjelil, malaj li taqenaqil tijonelil a’in, ke’wan naab’al li ke’k’ojob’aak ut ke’ok choq’ taqenaqil aj tij chiru li Dios; ut a’an sa’ xk’ab’a’ lix numtajenaqil xpaab’aaleb’ ut xjaljookil xk’a’uxleb’, ut lix tiikilaleb’ xch’ool chiru li Dios, xb’aan naq ke’xsik’ ru xjalb’al xk’a’uxleb’ ut xk’anjelankil li tiikilal, chiru li oso’k;

11 Jo’kan naq ke’b’oqe’ jo’ chanru li santil k’anjelil a’in, ut ke’santob’resiik, ut ke’ch’aje’ li raq’ chi saq rik’in xkik’el li Karneer.

12 Anajwan eb’ a’an, chirix naq ke’santob’resiik xb’aan li Santil Musiq’ej, chi saqob’resinb’ileb’ li raq’, rik’in naq saqeb’ ru ut maak’a’eb’ xtz’ajnil chiru li Dios, ink’a’ ke’ru chirilb’al li maak, ka’ajwi’ rik’in xik’ ilok; ut ke’wan naab’al, q’axal k’iheb’ ke’wan, li ke’saqob’resiik ru ut ke’ok sa’ xhilob’aal li Qaawa’ lix Dios.

13 Ut anajwan, ex was wiitz’in, nawaj raj naq teetuulanob’resi eerib’ chiru li Dios, ut tex’uuchinq rik’in li k’ulub’ej choq’ re li jalb’a-k’a’uxlej, re texruuq ajwi’ chi ok sa’ li hilob’aal a’an.

14 Relik chi yaal, tuulanob’resihomaq eerib’ jo’ chanru eb’ li tenamit sa’ xkutankil laj Melkisedek, li kiwan ajwi’ choq’ taqenaqil aj tij jo’ chanru li k’anjelil ajwi’ a’in li kin’aatinak wi’, li kixk’ul ajwi’ chi junelik sa’ xb’een li taqenaqil tijonelil.

15 Ut a’an ajwi’ laj Melkisedek a’in li kixtoj wi’ laj Abraham li lajetqil; relik chi yaal, li qayuwa’ aj Abraham kixtoj choq’ lajetqil lix lajetq raqal chixjunil li k’a’ru re.

16 Anajwan eb’ li k’ojob’anb’il k’anjel a’in ke’k’eeman chi jo’ka’in, re naq rik’in a’an, eb’ li tenamit te’ruuq chirilb’al chi uub’ej li Ralal li Dios, xb’aan naq a’an jun reetalil lix k’anjelil, malaj ut a’an ajwi’ lix k’anjelil, a’in ut re naq te’ril a’an chi uub’ej re xk’ulb’al risinkil lix maakeb’, re naq te’ruuq chi ok sa’ xhilob’aal li Qaawa’.

17 Anajwan laj Melkisedek a’in kiwan choq’ rey sa’ xb’een li ch’och’ Salem; ut eb’ lix tenamit ke’niman chaq sa’ li maa’usilal ut tz’eqb’eetalil; relik chi yaal, chixjunileb’ ke’sach chaq xb’e, ut nujenaqeb’ chaq rik’in li k’iila paay chi maa’usilal.

18 A’b’anan laj Melkisedek, chirix xk’anjelankil nimla paab’aal, ut xk’ulb’al ropiis li taqenaqil tijonelil jo’ chanru lix santil k’anjelil li Dios, kixjultika li jalb’a-k’a’uxlej chiru lix tenamit. Ut k’ehomaq reetal, ke’xjal xk’a’uxleb’, ut laj Melkisedek kixxaqab’ li tuqtuukilal sa’ li ch’och’ chiru lix kutan; jo’kan naq awa’b’ej re tuqtuukilal kiyeeman re, xb’aan naq a’an chaq rey aran Salem; ut ki’awa’b’ejin rub’el lix yuwa’.

19 Anajwan, ke’wan naab’al chi junxilaj chiru, ut jo’kan ajwi’ ke’wan naab’al moqon, a’b’an maajun kixq’ax xnimal ru, jo’kan naq a’an li q’axal wi’chik ke’xye resil.

20 Anajwan moko na’aje’ ta ru naq tinnumsi li aatin chirix; tz’aqal tana’ li k’a’ru ak xinye. K’ehomaq reetal, wankeb’ li loq’laj hu cheru; wi ut nekepo’ xyaalaleb’, a’an taawanq choq’ eesachb’al laa’ex.

21 Ut anajwan kik’ulman naq chirix naq laj Alma kixye li aatin a’in reheb’, kixye’ li ruq’ reheb’ ut kixjap re chi kaw xyaab’ xkux, ut kixye: A’in xq’ehil re teejal eek’a’uxl, xb’aan naq taanach’oq chaq xkutankil li kolb’a-ib’;

22 Relik chi yaal, ut lix yaab’ xkux li Qaawa’, rik’in xtz’uumaleb’ re li anjel, naxch’olob’ chiruheb’ chixjunil li tenamit; relik chi yaal, naxch’olob’ re naq taaruuq te’xk’ul li sahil esilal re nimla sahil ch’oolejil; relik chi yaal, ut a’an naxyaab’asi li sahil esilal a’in sa’ xyanq chixjunil lix tenamit; relik chi yaal, reheb’ ajwi’ li jek’inb’ileb’ chi najt chiru lix b’een li ch’och’; jo’kan naq chalenaq qik’in laa’o.

23 Ut k’eeb’il chiqanaw chi saqen ru li aatin, re naq tooruuq chixtawb’al ru, re naq ink’a’ naru nokosach; ut a’in xb’aan naq laa’o aj b’ehenel sa’ jun jalanil ch’och’; jo’kan ut, q’axal usilanb’ilo chi jo’kan, xb’aan naq laa’o ch’olob’anb’il chiqu li sahil esilal a’in sa’ chixjunil li jar raqal re li qawimq.

24 Xb’aan naq k’ehomaq reetal, eb’ li anjel yookeb’ chixch’olob’ankil chiruheb’ naab’al sa’ li kutan a’in sa’ li qach’och’, a’in ut re taa’uxq xkawresinkil xch’ooleb’ li ralal xk’ajoleb’ li winq re xk’ulb’al li raatin sa’ xkutankil lix k’ulunik sa’ lix loq’alil.

25 Ut anajwan ka’ajwi’ naqoyb’eni rab’inkil li esilal re sahil ch’oolejil, ch’olob’anb’il chiqu rik’in xtz’uumaleb’ re li anjel, chirix lix k’ulunik; xb’aan naq taachalq xkutankil, moko naqanaw ta jo’ nach’il. Tinwaj raj chiru li Dios naq sa’aq raj inkutan laa’in; a’b’an us ta nach’ malaj najt, rik’in a’an taasaho’q inch’ool.

26 Ut taak’ehe’q chi nawmanq chiruheb’ li tiikil ut santil winq, rik’in xtz’uumaleb’ re li anjel, sa’ xkutankil lix k’ulunik, re naq taatz’aqloq ru li raatineb’ li qayuwa’, jo’ chanru li k’a’ru ke’xye chaq chirix a’an, li kiwan jo’ chanru li musiq’ej re profeetil aatin li kiwan rik’ineb’.

27 Ut anajwan, ex was wiitz’in, nawaj sa’ xchamal inch’ool, relik chi yaal, rik’in x’anchalil ink’a’uxl toj ninraho’ rik’in, naq chex’ab’inq taxaq chiru li waatin, ut chetz’eq chaq cherix lee maak, ut ink’a’ teeb’ay xkutankil lix jalb’al eek’a’uxl;

28 Naq teetuulanob’resi b’an eerib’ chiru li Qaawa’, ut teepatz’ lix santil k’ab’a’, ut rajlal yooqex chi yo’lek ut chi tijok, re naq ink’a’ tex’aaleeq chi numtajenaq chiru li nekexru chixkuyb’al, ut chi jo’kan texb’eresiiq xb’aan li Loq’laj Musiq’ej, ut rik’in a’an tuulanaqex, q’unaq eech’ool, kub’enaqaq eeratawom, aj kuyunelaqex, nujenaqaqex rik’in rahok ut rik’in anchal li najtil oyb’enink;

29 Rik’in xpaab’ankil li Qaawa’; rik’in xyo’oninkil naq teek’ul li junelik yu’am; chi wank junelik sa’ eech’ool lix rahom li Dios; re naq texwaklesiiq sa’ roso’jik li kutan ut tex’ok sa’ lix hilob’aal.

30 Ut li Qaawa’ chixk’ehaq eere xjalb’al eek’a’uxl, re naq ink’a’ teek’am chaq xjosq’il sa’ eeb’een, re naq ink’a’ texb’ak’e’q chaq taq’a xb’aan lix b’ak’leb’ ch’iich’ li xb’alb’a, re naq ink’a’ teek’ul li xkab’ kamk.

31 Ut laj Alma kixye k’iila aatin chik chiru li tenamit, li moko tz’iib’anb’il ta sa’ li hu a’in.