1 Ug nahitabo nga human siya mohimo og panapos sa iyang pagpamulong sa katawhan daghan kanila ang mituo sa iyang mga pulong, ug misugod sa paghinulsol, ug pagsiksik sa mga kasulatan.

2 Apan ang daghan nga bahin kanila nagtinguha nga malaglag nila si Alma ug si Amulek; kay nasuko sila kang Alma, tungod sa pagkaprangka sa iyang mga pulong ngadto kang Zeezrom; ug sila usab miingon nga si Amulek nakapamakak kanila, ug mibiaybiay batok sa ilang balaod ug usab batok sa ilang mga manlalaban ug mga maghuhukom.

3 Ug nasuko usab sila kang Alma ug kang Amulek; ug tungod kay mipamatuod sila sa dayag batok sa ilang pagkadaotan, gitinguha nila ang pagpatay kanila sa hilom.

4 Apan nahitabo nga wala nila buhata; apan sila midala kanila ug migapos kanila og lig-ong mga pisi, ug midala kanila sa atubangan sa labaw nga maghuhukom sa yuta.

5 Ug ang katawhan nangadto ug misaksi batok kanila—nagpamatuod nga sila mibiaybiay batok sa balaod, ug sa ilang mga manlalaban ug mga maghuhukom sa yuta, ug usab sa tanang katawhan nga diha sa yuta; ug usab mipamatuod nga dihay usa lamang ka Dios, ug nga siya mopadala sa iyang Anak taliwala sa katawhan, apan siya dili moluwas kanila; ug daghan nga ingon niini nga butang ang gipamatuod sa katawhan batok kang Alma ug kang Amulek. Karon kini nahimo sa atubangan sa labaw nga maghuhukom sa yuta.

6 Ug nahitabo nga si Zeezrom natingala sa gipangsulti nga mga pulong; ug nasayod usab siya mahitungod sa pagkabuta sa hunahuna, nga iyang nahimo sa katawhan pinaagi sa iyang bakak nga mga pulong; ug ang iyang kalag nagsugod sa pagkahasol tungod sa pagkahibalo sa iyang kaugalingon nga kasaypanan; oo, siya giliyokan na og sugod sa kasakit sa impyerno.

7 Ug nahitabo nga misugod siya sa pagsangyaw sa katawhan, nga nag-ingon: Tan-awa, nakasala ako, ug kining mga tawhana walay sala sa atubangan sa Dios. Ug misugod siya sa pagpakiluoy alang kanila gikan niana nga panahon; apan sila mibiaybiay kaniya, nga nag-ingon: Ikaw ba gipuy-an usab sa yawa? Ug gilud-an nila siya, ug mipapahawa kaniya gikan kanila, ug usab niadtong tanan nga mituo sa mga pulong nga gisulti ni Alma ug ni Amulek; ug sila mipapahawa kanila, ug mipadala og mga tawo sa pagbato kanila.

8 Ug gidala nila og dungan ang ilang mga asawa ug mga anak, ug kadtong tanan nga mituo o natudloan aron motuo sa pulong sa Dios ilang gipatambog sa kalayo; ug sila usab midala sa ilang mga talaan nga naglangkob sa balaan nga mga kasulatan, ug mitambog usab niini sa kalayo, aron kini masunog ug malaglag pinaagi sa kalayo.

9 Ug nahitabo nga gikuha nila si Alma ug Amulek, ug midala kanila sa dapit diin patyon ang usa ka martir, aron masaksihan nila ang pagkamatay niadtong kinsa gilamoy sa kalayo.

10 Ug dihang nakita ni Amulek ang mga kasakit sa mga babaye ug mga bata kinsa gilamoy sa kalayo, siya usab gisakitan; ug miingon siya kang Alma: Manghinan-aw lang ba kita niining makahahadlok nga talan-awon? Busa ituyhad nato ang atong mga kamot, ug gamiton ang gahom sa Dios nga ania kanato, ug luwason sila gikan sa mga dilaab sa kalayo.

11 Apan si Alma miingon kaniya: Ang Espiritu nagpugong kanako nga dili ko kinahanglan nga mopatuyhad sa akong kamot; kay tan-awa ang Ginoo midawat kanila sa iyang kaugalingon, ngadto sa kahimayaan; ug mitugot siya nga sila mobuhat niini nga butang, o nga ang katawhan mobuhat niini nga butang ngadto kanila, sumala sa katig-a sa ilang mga kasingkasing, aron ang mga paghukom nga iyang ipahamtang kanila tungod sa iyang kasuko makiangayon; ug ang dugo sa inosente mobarog nga usa ka saksi batok kanila, oo, ug mosinggit sa hilabihan batok kanila sa kataposang adlaw.

12 Karon si Amulek miingon kang Alma: Tan-awa, basin sila mosunog usab kanato.

13 Ug si Alma miingon: Mag-agad kini sa kabubut-on sa Ginoo. Apan tan-awa, ang atong buhat wala pa matapos; busa sila dili mosunog kanato.

14 Karon nahitabo nga dihang naugdaw na ang mga lawas niadtong kinsa gitambog sa kalayo, ug usab ang mga talaan nga gitambog uban kanila, ang labaw nga maghuhukom sa yuta miduol ug mibarog sa atubangan ni Alma ug ni Amulek, samtang sila gigapos; ug siya misagpa kanila sa ilang mga aping, ug miingon kanila: Human sa inyong nakita, mosangyaw pa ba kamo pag-usab niini nga katawhan, aron itambog sila ngadto sa linaw sa kalayo ug asupre?

15 Tan-awa, nakita ninyo nga kamo walay gahom sa pagluwas niadtong kinsa gitambog sa kalayo; ni ang Dios miluwas kanila tungod kay sila sakop sa inyong tinuohan. Ug ang maghuhukom misagpa kanila pag-usab, ug nangutana: Unsay inyong ikasulti alang sa inyong kaugalingon?

16 Karon kini nga maghuhukom nagsunod sa kapunongan sa tinuohan ni Nehor, kinsa mipatay kang Gideon.

17 Ug nahitabo nga si Alma ug Amulek wala motubag kaniya; ug siya misagpa kanila pag-usab, ug mitugyan kanila ngadto sa mga tinugyanan aron ibalhog sa bilanggoan.

18 Ug diha nga nabalhog na sila sa bilanggoan sulod sa tulo ka adlaw, dihay nangabot nga daghan nga manlalaban, ug mga maghuhukom, ug mga pari, ug mga magtutudlo, kinsa sama ug tinuohan ni Nehor; ug nanulod sila sa bilanggoan aron makigkita kanila, ug sila misukitsukit kanila mahitungod sa daghan nga mga pulong; apan sila wala motubag kanila.

19 Ug nahitabo nga ang maghuhukom mibarog sa ilang atubangan, ug miingon: Nganong dili kamo motubag sa mga pulong niini nga katawhan? Wala ba kamo masayod nga ako adunay gahom sa pagtambog kaninyo ngadto sa mga dilaab sa kalayo? Ug siya mimando kanila sa pagsulti; apan wala sila motubag.

20 Ug nahitabo nga mibiya sila ug mipadayon sa ilang mga buluhaton, apan mibalik pagkaugma; ug ang maghuhukom misagpa na usab kanila. Ug daghan usab ang miduol, ug misagpa kanila, nga nag-ingon: Mobarog ba kamo pag-usab ug mohukom niini nga katawhan, ug mobiaybiay sa among balaod? Kon kamo adunay dakong gahom ngano nga kamo dili moluwas sa inyong kaugalingon?

21 Ug daghan nga ingon niini nga butang ang ilang gisulti kanila, nga nagpangagot sa ilang mga ngipon diha kanila, ug giluwaan sila, ug nag-ingon: Unsay among mga hitsura kon kami panghimaraoton?

22 Ug daghan nga ingon niini nga butang, oo, tanan nga matang sa ingon niana nga butang ang ilang gisulti kanila; ug sa ingon niana sila mibiaybiay kanila sa sulod sa daghang adlaw. Ug wala sila mohatag kanila og pagkaon aron gutomon sila, ug tubig aron uhawon sila; ug usab sila mikuha sa ilang mga sinina gikan kanila aron sila mahimong hubo; ug sa ingon niana gigapos sila sa lig-on nga mga pisi, ug gibilanggo.

23 Ug nahitabo nga human sila mag-antos sulod sa daghan nga adlaw, (ug kadto sa ikanapulo ug duha nga adlaw, sa ikanapulo nga bulan, sa ikanapulo nga tuig sa paghari sa mga maghuhukom sa katawhan ni Nephi) nga ang labaw nga maghuhukom sa yuta sa Ammonihah ug daghan sa ilang mga magtutudlo ug ilang mga manlalaban misulod sa bilanggoan diin si Alma ug Amulek gigapos og mga pisi.

24 Ug ang labaw nga maghuhukom mibarog sa ilang atubangan, ug, mibunal na usab kanila, ug miingon kanila: Kon kamo adunay gahom sa Dios nga moluwas sa inyong kaugalingon gikan niini nga mga gapos, ug dayon kami motuo nga ang Ginoo molaglag niini nga katawhan sumala sa inyong mga pulong.

25 Ug nahitabo nga silang tanan miduol ug mibunal kanila, nag-ingon sa mao gihapon nga mga pulong, gani hangtod sa kataposan; ug diha nga ang kataposan nakapamulong kanila ang gahom sa Dios diha kang Alma ug kang Amulek, ug sila mitindog ug mibarog.

26 Ug si Alma misinggit, nga nag-ingon: Hangtod kanus-a kami mag-antos niining hilabihan nga mga kasakit, O Ginoo? O Ginoo, hatagi kami og kusog sumala sa among pagtuo nga anaa kang Kristo, gani ngadto sa kaluwasan. Ug gibugto nila ang mga pisi nga naggapos kanila; ug dihang ang katawhan nakakita niini, nagsugod sila sa paglayas, kay ang kahadlok sa kalaglagan miabot kanila.

27 Ug nahitabo nga hilabihan ang ilang kalisang nga sila nangatumba sa yuta, ug wala makaabot sa gawas nga pultahan sa bilanggoan; ug ang yuta nauyog sa hilabihan, ug ang mga bungbong sa bilanggoan nangasiak ngadto sa duha, nga sila nangatumba sa yuta; ug ang labaw nga maghuhukom, ug ang mga manlalaban, ug ang mga pari, ug ang mga magtutudlo, kinsa mibunal kang Alma ug kang Amulek, nangamatay pinaagi sa pagkatumba niana.

28 Ug si Alma ug si Amulek migawas sa bilanggoan, ug sila wala maunsa; kay ang Ginoo mihatag kanila og gahom, sumala sa ilang pagtuo nga anaa kang Kristo. Ug dihadiha nanggawas sila sa bilanggoan; ug nabadbad ang ilang mga gapos; ug ang bilanggoan nahugno sa yuta, ug ang matag kalag nga diha sulod sa mga bungbong niana, gawas kang Alma ug Amulek, namatay; ug dihadiha nangadto sila sa siyudad.

29 Karon ang katawhan nga nakadungog sa dakong kaguliyang nangabot nga nagdinaganay dungan sa dagko nga pundok aron masayod sa hinungdan niini; ug sa dihang ilang nakita sila si Alma ug si Amulek nga migawas sa bilanggoan, ug ang mga bungbong niana nahugno ngadto sa yuta, giabot sila og dakong kahadlok, ug milayas gikan sa atubangan ni Alma ug Amulek gani sama sa usa ka kanding nga milayas uban sa iyang mga gagmay nga anak gikan sa duha ka leon; ug sa ingon niana sila milayas gikan sa atubangan ni Alma ug ni Amulek.