1 Ug nahitabo nga si hari Lamoni misugo nga ang iyang mga sulugoon mobarog ug mopamatuod sa tanan nga butang nga ilang nakita kabahin sa hitabo.

2 Ug sa dihang silang tanan nakapamatuod sa mga butang nga ilang nakita, ug iyang nasayran ang kamatinud-anon ni Ammon sa pagpanalipod sa iyang mga gagmayng kahayopan, ug usab sa iyang dakong gahom sa pagpakig-away batok niadtong nagtinguha sa pagpatay kaniya, natingala siya sa hilabihan, ug miingon: Sa tinuod, kini labaw pa sa usa ka tawo. Tan-awa, dili ba kini ang Gamhanang Espiritu kinsa mipadala sa dagko nga mga silot niini nga katawhan, tungod sa ilang mga pagpatay?

3 Ug gitubag nila ang hari, ug miingon: Kon siya usa man ka Gamhanang Espiritu o usa ka tawo, kami wala masayod; apan kini mao ang among nahibaloan, nga siya dili mapatay sa mga kaaway sa hari; ni sila makapatibulaag sa mga panon sa hari kon siya among kauban, tungod sa iyang kabatid ug labihan ka kusgan; busa, kami nasayod nga siya usa ka higala sa hari. Ug karon, O hari, kami wala magtuo nga ang usa ka tawo adunay ingon ka dako nga gahom, kay kami nasayod nga siya dili mapatay.

4 Ug karon, sa dihang nadungog sa hari kini nga mga pulong, miingon siya kanila: Karon nasayod ako nga kini mao ang Gamhanang Espiritu; ug siya nanaog karon nga panahon aron sa pagpanalipod sa inyong kinabuhi, aron kamo dili nako patyon sama sa akong gihimo sa inyong kaigsuonan. Karon mao na kini ang Gamhanang Espiritu nga gihisgotan sa atong mga amahan.

5 Karon mao kini ang tradisyon ni Lamoni, nga iyang nadawat gikan sa iyang amahan, nga adunay usa ka Gamhanang Espiritu. Bisan og mituo sila sa usa ka Gamhanang Espiritu, nagtuo sila nga bisan unsa ang ilang buhaton matarong; bisan pa niana, si Lamoni misugod sa pagkahadlok sa hilabihan, uban ang kahadlok nga basin pa og siya nakahimo og sayop sa pagpatay sa iyang mga sulugoon;

6 Kay nakapatay siya og daghan kanila tungod kay ang ilang kaigsuonan mipatibulaag sa ilang mga gagmayng kahayopan didto sa dapit nga adunay tubig; ug sa ingon niana, tungod kay sila mitugot nga ang ilang mga gagmayng kahayopan mapatibulaag sila gipamatay.

7 Karon ang naandan niining mga Lamanita nga magpundok dapit sa tubig sa Sebus sa pagpatibulaag sa mga gagmayng kahayopan sa katawhan, nga niana ilang maabog ang daghan nga natibulaag ngadto sa ilang kaugalingon nga yuta, mao kini ang naandang paagi sa pagpangilog taliwala kanila.

8 Ug nahitabo nga si hari Lamoni nangutana sa iyang mga sulugoon, nga nag-ingon: Hain kining tawhana nga adunay dakong gahom?

9 Ug miingon sila kaniya: Tan-awa, siya naglawog sa imong mga kabayo. Karon ang hari misugo sa iyang mga sulugoon, sa wala pa ang panahon sa pagpainom sa mga gagmayng kahayopan, nga ilang andamon ang iyang mga kabayo ug mga karwahe, ug mohatod kaniya ngadto sa yuta sa Nephi; kay didto adunay dako nga kasaulogan nga gikatakda sa yuta sa Nephi, sa amahan ni Lamoni, kinsa mao ang hari sa tibuok yuta.

10 Karon sa dihang si hari Lamoni nakadungog nga si Ammon nag-andam sa iyang mga kabayo ug sa iyang mga karwahe mas natingala pa siya, tungod sa kamatinud-anon ni Ammon, nga nag-ingon: Sa tinuod walay bisan usa nga sulugoon taliwala sa tanan kong mga sulugoon nga ingon ka matinud-anon sama niining tawhana; kay gani nahinumdom siya sa tanan kong mga sugo sa paghimo niini.

11 Karon ako sa tinuod nasayod nga kini mao ang Gamhanang Espiritu, ug ako nagtinguha kaniya nga moduol siya kanako, apan dili ako mangahas.

12 Ug nahitabo nga sa dihang si Ammon nakaandam na sa mga kabayo ug sa mga karwahe alang sa hari ug sa iyang mga sulugoon, giadto niya ang hari, ug nakita niya nga nausab ang panagway sa hari; busa mobiya na unta siya gikan sa iyang atubangan.

13 Ug ang usa sa mga sulugoon sa hari miingon kaniya, Rabbanah, nga mao, kon hubaron, gamhanan o halangdon nga hari, nga nagtamod sa ilang mga hari nga gamhanan; ug sa ingon niana miingon siya ngadto kaniya: Rabbanah, gusto sa hari nga ikaw magpabilin.

14 Busa si Ammon mibalik ngadto sa hari, ug miingon kaniya: Unsa ang buot nimong akong buhaton alang kanimo, O hari? Ug ang hari wala motubag kaniya sulod sa usa ka oras, sumala sa ilang orasan, kay wala siya masayod unsa ang iyang isulti kaniya.

15 Ug nahitabo nga si Ammon miingon kaniya pag-usab: Unsa ang imong tinguha kanako? Apan ang hari wala motubag kaniya.

16 Ug nahitabo nga si Ammon, kay puno sa Espiritu sa Dios, busa nasabtan niya ang mga hunahuna sa hari. Ug siya miingon kaniya: Tungod ba kay imong nadunggan nga ako nanalipod sa imong mga sulugoon ug sa imong mga gagmayng kahayopan, ug mipatay sa pito sa ilang kaigsuonan gamit ang saplong ug sa espada, ug miputol sa mga bukton sa uban, aron sa pagpanalipod sa imong mga gagmayng kahayopan ug sa imong mga sulugoon; tan-awa, mao ba kini ang hinungdan sa imong mga kahibulong?

17 Ako moingon kanimo, unsa man kana, nga nakapahibulong kanimo og dako kaayo? Tan-awa, usa lamang ako ka tawo ug ako imong sulugoon; busa, bisan unsa ang imong tinguhaon nga matarong, kana akong buhaton.

18 Karon sa dihang ang hari nakadungog niini nga mga pulong, nahibulong na usab siya, kay nakamatikod nga masabtan ni Ammon ang iyang mga hunahuna; apan bisan pa niini, si hari Lamoni mibuka sa iyang ba-ba, ug miingon kaniya: Kinsa man ka? Ikaw ba kanang Gamhanang Espiritu, kinsa nasayod sa tanan nga butang?

19 Mitubag si Ammon ug miingon kaniya: Ako dili mao.

20 Ug ang hari miingon: Giunsa nimo pagkasayod sa mga gihunahuna sa akong kasingkasing? Makapamulong ka nga walay kahadlok, ug sultihi ko kabahin niini nga mga butang; ug usab sultihi ko sa unsa nga gahom nga imong gipatay ug giputol ang mga bukton sa akong kaigsuonan nga mipatibulaag sa akong mga gagmayng kahayopan—

21 Ug karon, kon sultihan ko nimo kabahin niining mga butanga, bisan unsa ang imong gusto akong ihatag kanimo; ug kon gikinahanglan, pabantayan ko ikaw sa akong kasundalohan; apan nasayod ko nga ikaw labaw nga gamhanan kay kanilang tanan; bisan pa niana, bisan unsa ang imong gusto ngari kanako ihatag ko kini kanimo.

22 Karon si Ammon kay usa ka maalamon, bisan pa niana dili mopasakit, miingon siya ni Lamoni: Mopatalinghog ka ba sa akong mga pulong, kon mosulti ko nimo kon pinaagi sa unsang gahom nga akong nabuhat kining mga butanga? Ug kini mao ang butang nga akong gitinguha kanimo.

23 Ug ang hari mitubag kaniya, ug miingon: Oo, ako motuo sa imong tanan nga pulong. Ug sa ingon niana siya miuyon.

24 Ug si Ammon misugod sa pagsulti kaniya sa walay kahadlok, ug miingon kaniya: Motuo ka ba nga adunay usa ka Dios?

25 Ug siya mitubag, ug miingon kaniya: Ako wala masayod unsa ang gipasabot niana.

26 Ug unya si Ammon miingon: Motuo ka ba nga adunay usa ka Gamhanang Espiritu?

27 Ug siya miingon, Oo.

28 Ug si Ammon miingon: Kini mao ang Dios. Ug giingnan na usab siya ni Ammon: Motuo ka ba nga kining Gamhanang Espiritu, kinsa mao ang Dios, milalang sa tanang butang nga anaa sa langit ug sa yuta?

29 Ug siya miingon: Oo, ako motuo nga siya ang milalang sa tanang butang nga ania sa yuta; apan ako wala masayod sa kalangitan.

30 Ug si Ammon miingon kaniya: Ang kalangitan mao ang usa ka dapit diin nagpuyo ang Dios ug ang iyang tanang balaan nga anghel.

31 Ug si hari Lamoni miingon: Naa ba kini ibabaw sa yuta?

32 Ug si Ammon miingon: Oo, ug nagtan-aw siya sa ubos sa tanan nga katawhan; ug nasayod siya sa tanan nga mga hunahuna ug mga tumong sa kasingkasing; kay pinaagi sa iyang kamot kining tanan gilalang gikan sa sinugdanan.

33 Ug si hari Lamoni miingon: Ako motuo niining tanan nga butang nga imong gipamulong. Ikaw ba gipadala gikan sa Dios?

34 Si Ammon miingon kaniya: Usa ako ka tawo; ug ang tawo sa sinugdanan gilalang sunod sa hitsura sa Dios, ug gitawag ako pinaagi sa iyang Balaang Espiritu aron sa pagtudlo niini nga mga butang ngadto niini nga katawhan, aron magiyahan sila sa pagkahibalo niana nga makiangayon ug tinuod;

35 Ug ang usa ka bahin niana nga Espiritu nagpabilin ngari kanako, nga naghatag kanako og kahibalo, ug usab gahom sumala sa akong pagtuo ug mga tinguha nga anaa sa Dios.

36 Karon sa dihang si Ammon nakasulti niini nga mga pulong, gisugdan niya gikan sa paglalang sa kalibotan, ug usab sa paglalang ni Adan, ug misulti kaniya sa tanang butang mahitungod sa pagkapukan sa tawo, ug misaysay pag-usab ug gipahiluna sa iyang atubangan ang mga talaan ug ang balaan nga mga kasulatan sa katawhan, nga gipamulong sa mga propeta, gani sukad sa panahon nga ang ilang amahan, si Lehi, mibiya sa Jerusalem.

37 Ug siya usab misaysay kanila (kay kini alang man sa hari ug sa iyang mga sulugoon) ang tanan nga panaw sa ilang mga amahan sa kamingawan, ug ang ilang tanan nga pag-antos sa kagutom ug kauhaw, ug ilang kalisod, ug uban pa.

38 Ug siya usab misaysay pag-usab kanila kabahin sa mga pagsupil nila ni Laman ug Lemuel, ug sa mga anak nga lalaki ni Ishmael, oo, ang ilang tanang pagsupil iyang gisaysay ngadto kanila; ug gipasabot niya ngadto kanila ang tanan nga talaan ug mga kasulatan gikan sa panahon nga si Lehi mibiya sa Jerusalem hangtod niini nga panahon.

39 Apan dili kini mao ang tanan; kay siya mipasabot kanila sa plano sa katubsanan, nga giandam gikan sa katukoran sa kalibotan; ug siya usab mipahibalo kanila kabahin sa pag-anhi ni Kristo, ug ang tanan nga buhat sa Ginoo iyang gipahibalo ngadto kanila.

40 Ug nahitabo nga human niya masulti kining tanan nga butang, ug mipasabot niini ngadto sa hari, nga ang hari mituo sa iyang tanan nga pulong.

41 Ug misugod siya sa pagpangamuyo sa Ginoo, nga nag-ingon: O Ginoo, maluoy ka; sumala sa imong tugob nga kaluoy nga imong gipabatyag sa katawhan ni Nephi, ngari kanako ug sa akong katawhan.

42 Ug karon, sa dihang nakasulti na siya niini, natumba siya sa yuta, ingon og siya patay.

43 Ug nahitabo nga gialsa siya sa iyang mga sulugoon ug gidala siya ngadto sa iyang asawa, ug gipahigda siya sa higdaanan; ug naghigda siya ingon og siya patay sulod sa duha ka adlaw ug duha ka gabii; ug ang iyang asawa, ug ang iyang mga anak nga lalaki ug ang iyang mga anak nga babaye nagbangotan tungod kaniya, sunod sa nabatasan sa mga Lamanita, hilabihan ang pagbangotan sa iyang pagkamatay.