1 Karon sa dihang si Ammon ug ang iyang kaigsoonan nagkabulag didto sa mga utlanan sa yuta sa mga Lamanita, tan-awa si Aaron mipanaw paingon sa yuta nga gitawag sa mga Lamanita, og Jerusalem, gitawag kini sunod sa yuta nga natawhan sa ilang mga amahan; ug kini layo nga nagsumpay sa mga utlanan sa Mormon.

2 Karon ang mga Lamanita ug ang mga Amalekita ug ang katawhan ni Amulon nagtukod og dako nga siyudad, nga gitawag og Jerusalem.

3 Karon ang mga Lamanita tig-a na kaayo, apan ang mga Amalekita ug ang mga Amulonita mas tig-a pa; busa sila ang hinungdan nga ang mga Lamanita nagpatig-a sa ilang mga kasingkasing, nga sila nag-anam sa hilabihan nga pagkadaotan ug sa ilang mga pagkasalawayon.

4 Ug nahitabo nga si Aaron miabot sa siyudad sa Jerusalem, ug sa sinugdanan misugod sa pagsangyaw ngadto sa mga Amalekita. Ug misugod siya sa pagsangyaw kanila sa ilang mga sinagoga, kay sila mitukod og mga sinagoga sunod sa kapunongan sa mga Nehor; kay daghan sa mga Amalekita ug sa mga Amulonita misunod sa kapunongan ni Nehor.

5 Busa, sa pagsulod ni Aaron sa usa sa ilang mga sinagoga aron mosangyaw ngadto sa katawhan, ug samtang siya namulong kanila, tan-awa dihay mibarog nga usa ka Amalekita ug nakiglalis kaniya, nga nag-ingon: Unsa kanang imong gipamatuod? Ikaw nakakita ba og anghel? Nganong dili man magpakita ang mga anghel kanamo? Tan-awa dili ba kini nga katawhan sama ka maayo sa imong katawhan?

6 Ikaw usab nag-ingon, gawas kon kami maghinulsol kami mamatay. Giunsa nimo pagkahibalo sa hunahuna ug katuyoan sa among mga kasingkasing? Giunsa nimo pagkahibalo nga kami kinahanglan nga maghinulsol? Giunsa nimo pagkahibalo nga kami dili matarong nga katawhan? Tan-awa, kami nagtukod og mga santuwaryo, ug kami nagpundok sa among mga kaugalingon aron sa pagsimba sa Dios. Kami nagtuo nga ang Dios moluwas sa tanan nga tawo.

7 Karon si Aaron miingon kaniya: Motuo ba ikaw nga ang Anak sa Dios moanhi aron sa pagtubos sa katawhan gikan sa ilang mga sala?

8 Ug ang tawo miingon kaniya: Kami dili motuo nga ikaw nasayod sa maong butang. Kami dili motuo niining sayop nga mga tradisyon. Kami dili motuo nga ikaw nasayod sa mga butang nga moabot, ni kami motuo nga ang imong mga amahan ug usab nga ang among mga amahan nasayod kabahin sa mga butang nga ilang gipamulong, kabahin nianang moabot.

9 Karon si Aaron misugod sa pag-abli sa mga kasulatan nganha kanila kabahin sa pag-anhi ni Kristo, ug usab kabahin sa pagkabanhaw sa mga patay, ug nga walay katubsanan alang sa katawhan gawas kon pinaagi sa kamatayon ug mga pag-antos ni Kristo, ug sa pag-ula sa iyang dugo.

10 Ug nahitabo nga samtang siya misugod sa pagpasabot niini nga mga butang ngadto kanila nasuko sila kaniya, ug misugod sa pagbiaybiay kaniya; ug dili sila mamati sa mga pulong nga iyang gisulti.

11 Busa, sa dihang nakita niya nga dili sila mamati sa iyang mga pulong, mibiya siya sa ilang sinagoga, ug miabot sa usa ka lugar nga gitawag og Ani-Anti, ug didto nakita niya si Muloki nga nagsangyaw sa pulong ngadto kanila; ug usab si Ammah ug ang iyang kaigsoonan. Ug nakiglalis sila sa daghang tawo mahitungod sa pulong.

12 Ug nahitabo nga ilang nakita nga ang katawhan nagpatig-a sa ilang mga kasingkasing, busa mibiya sila ug miabot sa yuta sa Middoni. Ug gisangyaw nila ang pulong sa daghang tawo, ug gamay ra ang mituo sa mga pulong nga ilang gitudlo.

13 Bisan pa niana, si Aaron ug pipila sa iyang kaigsoonan gidakop ug gibalhog sa bilanggoan, ug ang nahibilin kanila milayas gikan sa yuta sa Middoni ngadto sa mga rehiyon nga naglibot niini.

14 Ug kadtong gipriso sa pisohan nag-antos sa daghang butang, ug giluwas sila ni Lamoni ug ni Ammon, ug gipakaon sila ug gisul-oban og sinina.

15 Ug nanglakaw sila pag-usab aron sa pagpahayag sa pulong, ug sa ingon niana naluwas sila sa unang higayon gikan sa bilanggoan; ug sa ingon niana sila nag-antos.

16 Ug miadto sila bisan asa sila dad-a sa Espiritu sa Ginoo, nagsangyaw sa pulong sa Dios sa matag sinagoga sa mga Amalekita, o diha sa matag tigomanan sa mga Lamanita nga diin sila dawaton.

17 Ug nahitabo nga ang Ginoo misugod sa pagpanalangin kanila, hangtod nga nakadala sila og daghan ngadto sa kahibalo sa kamatuoran; oo, nakadani sila og daghan bahin sa ilang mga sala, ug mga tradisyon sa ilang mga amahan, nga dili matarong.

18 Ug nahitabo nga sila si Ammon ug Lamoni mibalik gikan sa yuta sa Middoni ngadto sa yuta sa Ishmael, nga mao ang yuta sa ilang kabilin.

19 Ug si hari Lamoni dili motugot nga si Ammon moalagad kaniya, o mahimo niyang sulugoon.

20 Apan siya misugo nga kinahanglan adunay mga sinagoga nga tukoron sa yuta sa Ishmael; ug siya misugo nga ang iyang katawhan, o ang katawhan nga ubos sa iyang paghari, kinahanglan magpundok sa ilang kaugalingon.

21 Ug nalipay siya tungod kanila, ug mitudlo siya kanila og daghang butang. Ug siya usab mipahayag kanila nga sila usa ka katawhan nga ubos kaniya, ug nga sila gawasnon nga katawhan, nga sila gawasnon gikan sa mga pagpanglupig sa hari, nga iyang amahan; kay niana ang iyang amahan mitugyan ngadto kaniya nga siya maghari sa katawhan nga atua sa yuta sa Ishmael, ug sa tanan nga yuta nga naglibot niini.

22 Ug siya usab mipahayag ngadto kanila nga sila unta makabaton og kalingkawasan sa pagsimba sa Ginoo nga ilang Dios sumala sa ilang mga tinguha, sa bisan asa nga dapit nga sila anaa, kon kini anaa sa yuta nga ubos sa paghari ni hari Lamoni.

23 Ug si Ammon misangyaw sa katawhan ni hari Lamoni; ug nahitabo nga mitudlo siya kanila sa tanan nga butang kabahin sa mga butang nga may kalabotan sa pagkamatarong. Ug siya miawhag kanila matag adlaw, sa tumang kakugi; ug naminaw sila sa iyang pulong, ug madasigon sila sa pagtuman sa mga sugo sa Dios.