1 Tan-awa, karon nahitabo nga ang hari sa mga Lamanita mipadala og pahibalo sa iyang tanang katawhan, nga dili sila mobakyaw sa ilang mga kamot diha ni Ammon, o ni Aaron, o ni Omner, o ni Himni, ni bisan kinsa sa ilang kaigsoonan nga magsangyaw sa pulong sa Dios, sa bisan asa silang dapita, sa bisan asang bahin sa ilang yuta.

2 Oo, mipadala siya og balaod kanila, nga dili sila mobakyaw sa ilang mga kamot diha kanila nga mogapos kanila, o mobalhog kanila sa bilanggoan; ni sila moluwa kanila, ni mobunal kanila, ni moabog kanila gikan sa ilang mga sinagoga, ni mosilot kanila; ni sila molabay og mga bato kanila, apan nga sila kinahanglan adunay kagawasan nga mosulod sa ilang mga panimalay, ug usab sa ilang mga templo, ug sa ilang mga santuwaryo.

3 Ug sa ingon niana sila makalakaw ug makasangyaw sa pulong sumala sa ilang mga tinguha, kay ang hari nakabig na ngadto sa Ginoo, ug ang tanang sakop sa iyang panimalay; busa siya mipadala sa iyang pahibalo sa tibuok yuta ngadto sa iyang katawhan, aron ang pulong sa Dios unta walay babag, apan aron kini masangyaw sa tibuok yuta, aron ang iyang katawhan makombinser kabahin sa daotan nga mga tradisyon sa ilang mga amahan, ug aron sila makombinser nga silang tanan managsoon, ug nga sila dili angay nga magpinatyanay, ni manglungkab, ni mangawat, ni manapaw, ni magbuhat sa bisan unsa nga matang sa pagkadaotan.

4 Ug karon nahitabo nga sa dihang ang hari nakapadala na niini nga pahibalo, si Aaron ug ang iyang kaigsoonan miadto sa usa ka siyudad ngadto sa laing siyudad, ug gikan sa usa ka balay nga alampoan ngadto sa lain, nagtukod og mga simbahan, ug mitudlo og mga pari ug mga magtutudlo sa tibuok yuta taliwala sa mga Lamanita, aron sa pagsangyaw ug sa pagtudlo sa pulong sa Dios taliwala kanila; ug sa ingon niana nagsugod sila nga makaangkon og dakong kalamposan.

5 Ug kaliboan ang nadala sa kahibalo sa Ginoo, oo, kaliboan ang nadala aron motuo sa mga tradisyon sa mga Nephita; ug gitudloan sila sa mga talaan ug mga panagna nga gipanunod gani hangtod karong panahona.

6 Ug ingon ka seguro nga ang Ginoo buhi, segurado kaayo kutob sa motuo, o kutob sa nadala sa kahibalo sa kamatuoran, pinaagi sa pagsangyaw ni Ammon ug sa iyang kaigsoonan, sumala sa espiritu sa pagpadayag ug sa pagpanagna, ug sa gahom sa Dios nga nagbuhat og mga milagro diha kanila—oo, sultihan ko kamo, ingon nga ang Ginoo buhi, kutob sa mga Lamanita nga mituo sa ilang pagsangyaw, ug nakabig ngadto sa Ginoo, wala gayod mobiya.

7 Kay sila nahimong matarong nga katawhan; gihunong nila ang paggamit sa mga hinagiban sa ilang rebelyon, nga sila wala na makig-away batok sa Dios, ni batok ni bisan kinsa sa ilang kaigsoonan.

8 Karon, mao kini sila ang nakabig ngadto sa Ginoo:

9 Ang katawhan sa mga Lamanita nga didto sa yuta sa Ishmael;

10 Ug usab ang katawhan sa mga Lamanita nga didto sa yuta sa Middoni;

11 Ug usab ang katawhan sa mga Lamanita nga didto sa siyudad sa Nephi;

12 Ug usab ang katawhan sa mga Lamanita nga didto sa yuta sa Shilom, ug nga didto sa yuta sa Shemlon, ug didto sa siyudad sa Lemuel, ug didto sa siyudad sa Shimnilom.

13 Ug mao kini ang mga ngalan sa mga siyudad sa mga Lamanita nga nakabig ngadto sa Ginoo; ug mao kini sila kinsa mihunong sa paggamit sa mga hinagiban sa ilang pagsupil, oo, sa ilang tanan nga hinagiban sa gubat; ug silang tanan mga Lamanita.

14 Ug ang mga Amalekita wala makabig, gawas sa usa lamang; ni bisan kinsa sa mga Amulonita; apan gipatig-a nila ang ilang mga kasingkasing, ug usab ang mga kasingkasing sa mga Lamanita niana nga bahin sa yuta diin sila nagpuyo, oo, ug ang ilang tanan nga balangay ug ilang tanan nga siyudad.

15 Busa, among gipangalanan ang tanang siyudad sa mga Lamanita nga naghinulsol ug nakahibalo sa kamatuoran, ug nakabig.

16 Ug karon nahitabo nga ang hari ug kadtong mga nakabig matinguhaon nga sila makabaton og ngalan, aron mailhan sila gikan sa ilang kaigsoonan; busa ang hari nagpakisayod kang Aaron ug sa ilang daghang pari, kabahin sa ngalan nga ilang dad-on, aron sila mailhan.

17 Ug nahitabo nga gitawag nila ang ilang mga ngalan og mga Anti-Nephi-Lehi; ug sila gitawag pinaagi niini nga ngalan ug wala na tawga nga mga Lamanita.

18 Ug nagsugod sila nga nahimong kugihan kaayo nga katawhan; oo, ug mahigalaon sila sa mga Nephita; busa, nagpasiugda sila og kauyonan uban kanila, ug ang tunglo sa Dios wala na magpadayon kanila.