1 Ket kitaen, ita napasamak nga ad-adda a nakapungtot dagidiay Lamanita gapu ta napapatayda dagiti kabsatda; ngarud insapatada ti panagibalesda kadagiti Nephita; ket saandan a ginamgam pay a papatayen dagiti tattao nga Anti-Nephi-Lehi iti dayta a panawen.

2 Ngem innalada dagiti buyotda ket napanda kadagiti nagbedngan ti daga ti Zarahemla, ket dinarupda dagiti tattao nga adda iti daga ti Ammonihah ket dinadaelda ida.

3 Ket kalpasanna, adu ti pannakidangadangda kadagiti Nephita, a nakapasanudan ken nakapapatayanda.

4 Ket naibilang kadagiti Lamanita a napapatay ti dandani amin a kaputotan ni Amulon ken dagiti kabsatna, a dagiti saserdote ni Noe, ket napapatayda babaen dagiti ima dagiti Nephita;

5 Ket dagiti nabati, gapu ta nakalibasda iti langalang iti daya, ken gapu ta narabsutda ti bileg ken panangituray dagiti Lamanita, imbilinda a nasken nga adu kadagiti Lamanita ti maungaw iti apuy gapu iti pammatida—

6 Agsipud ta adu kadakuada, kalpasan ti panagsagabada iti adu a pukaw ken adu a rigat, nangrugida a natignay iti pannakalagip kadagiti balikas nga inkasaba kadakuada da Aaron ken dagiti kabsatna iti dagada; ngarud nangrugida a saan a patien dagiti kaugalian dagiti ammada, ket patienda ti Apo, ken inikkanna iti naindaklan a bileg dagiti Nephita; ket iti kasta adu kadakuada ti namalbaliw iti langalang.

7 Ket napasamak a kinayat dagidiay agturay a nabati kadagiti annak ni Amulon a mapapatayda, wen, amin dagidiay a namapati kadagitoy a banag.

8 Ita daytoy a kinabannuar ti nakaigapuan ti kaadu kadagiti kabsatda ti nasugsogan nga agpungtot; ket nangrugi dita ti panagsusussik iti langalang; ket rinugian dagiti Lamanita nga inanup ti kaputotan ni Amulon ken dagiti kabsatna ket rinugianda a pinatay ida; ket kimmamangda iti langalang iti daya.

9 Ket kitaen maan-anupda ita nga aldaw dagiti Lamanita. Kasta ti pannakapasamak dagiti balikas ni Abinadi, nga imbagana maipanggep iti kaputotan dagiti saserdote a nakaigapuan nga agsagaba isuna iti patay babaen iti apuy.

10 Agsipud ta kinunana kadakuada: Ania man ti aramidenyo kaniak kastanto met ti kita dagiti banag nga umay.

11 Ket ita ni Abinadi ti immuna a nagsagaba iti patay babaen iti apuy gapu iti pammatina iti Dios; ita kastoy ti kayatna a sawen, nga adu ti agsagaba iti patay babaen iti apuy, a mayannurot iti sinagabana.

12 Ket kinunana kadagiti saserdote ni Noe a nasken nga ipakat dagiti kaputotanda nga adu ti mapapatay, a kas iti napasamakna, ken nasken a maiwarawarada iti ganggannaet ken mapapatay, a kas iti karnero nga awanan iti agpaspastor a naabug ken pinatay dagiti atap nga ayup; ket ita kitaen, napaneknekan dagitoy a balikas, agsipud ta naabug ida dagiti Lamanita, ken naanupanda, ken nadangranda.

13 Ket napasamak nga idi nakita dagiti Lamanita a saanda madaeran dagiti Nephita nagsublida manen iti dagada; ket adu kadakuada ti immay nagnaed iti daga ti Ismael ken iti daga ti Nephi, ket intiponda ti bagbagida kadagiti tattao ti Dios, a tattao nga Anti-Nephi-Lehi.

14 Ken kasta met nga inkalida dagiti armasda a pakigubat, a mayannurot iti inaramid dagiti kabsatda, ket nangrugida a nagbalin a nalinteg a tattao; ket nagnada kadagiti wagas ti Apo, ken tinungpalda dagiti bilinna ken dagiti alagadenna.

15 Wen, ket sinurotda ti paglintegan ni Moises; agsipud ta rumbeng unay a surotenda pay laeng ti paglintegan ni Moises, ta saan pay a natungpal amin. Ngem iti laksid ti linteg ni Moises, namnamaenda ti yaay ni Cristo, iti ibilbilangda ti linteg ni Moises a maysa a kita ti yaayna, ken patienda a nasken a surotenda dagidiay makinruar nga araramid agingga iti kanito a nasken nga maipalgakna isuna kadakuada.

16 Ita saanda impagarup a dumteng ti pannakaisalakan babaen ti linteg ni Moises; ngem nagbalin ti linteg ni Moises a mangpapigsa iti pammatida ken ni Cristo; ket iti kasta napagtalinaedda ti namnamada babaen ti pammati, nga agturong iti agnanayon a pannakaisalakan, nga agkammatalek iti espiritu ti pammadto, a nangisao kadagidiay banag nga umay.

17 Ket ita kitaen, nalaus ti ragsak da Ammon, ken Aaron, ken Omner, ken Himni, ken dagiti kabsatda, iti balligi a naragpatda kadagiti Lamanita, iti pannakakitada a nangipaay ti Apo kadakuada a mayannurot kadagiti kararagda, ken kasta met a pinaneknekanna nga imbinsabinsa kadakuada ti balikasna.