1 Karon nahitabo nga sa dihang kadtong mga Lamanita nga nakiggubat batok sa mga Nephita nakamatikod, human sa ilang daghan nga panglimbasog sa paglaglag kanila, kay kawang lamang ang pagtinguha sa ilang kalaglagan, namalik na usab sila ngadto sa yuta sa Nephi.

2 Ug nahitabo nga ang mga Amalekita, tungod sa ilang kapildihan, nangasuko pag-ayo. Ug sa dihang nakita nila nga dili sila makapanimalos sa mga Nephita, misugod sila sa paghulhog sa katawhan nga masuko batok sa ilang kaigsoonan, ang katawhan sa Anti-Nephi-Lehi; busa misugod na usab sila sa paglaglag kanila.

3 Karon kini nga katawhan nagdumili na usab sa paggamit sa ilang hinagiban, ug mosugot ra nga pamatyon sila sumala sa mga tinguha sa ilang mga kaaway.

4 Karon sa dihang nakita ni Ammon ug sa iyang kaigsoonan kini nga buhat sa kalaglagan niadtong ilang gimahal pag-ayo, ug niadtong nagmahal pag-ayo kanila—kay sila giisip nga sama sa mga anghel nga gipadala gikan sa Dios aron pagluwas kanila gikan sa walay kataposan nga kalaglagan—busa, sa dihang nakita ni Ammon ug sa iyang kaigsoonan kining dako nga buhat sa kalaglagan, natandog sila uban ang kaluoy, ug miingon sila ngadto sa hari:

5 Pundokon nato kini nga katawhan sa Ginoo, ug molugsong kita ngadto sa yuta sa Zarahemla sa atong kaigsoonan nga mga Nephita, ug molayas gikan sa mga kamot sa atong mga kaaway, aron dili kita malaglag.

6 Apan ang hari miingon kanila: Tan-awa, ang mga Nephita molaglag kanamo, tungod sa daghan nga pagpamatay ug kasal-anan nga among nabuhat batok kanila.

7 Ug si Ammon miingon: Molakaw ko ug mangutana sa Ginoo, ug kon moingon siya kanato, lugsong ngadto sa atong kaigsoonan, kamo moadto ba?

8 Ug ang hari miingon kaniya: Oo, kon ang Ginoo moingon kanamo lakaw, kami molugsong ngadto sa atong kaigsoonan, ug magpaulipon kami kanila hangtod nga kami makaalim kanila sa daghan nga pagpamatay ug kasal-anan nga among nabuhat batok kanila.

9 Apan si Ammon miingon kaniya: Supak sa balaod sa among kaigsoonan, nga gitukod sa akong amahan, nga adunay mga ulipon kanila; busa molugsong kita ug mosalig sa mga kaluoy sa atong kaigsoonan.

10 Apan ang hari miingon kaniya: Pangutana sa Ginoo, ug kon moingon siya kanato nga lakaw, kita manglakaw; kay kondili mangamatay kita sa yuta.

11 Ug nahitabo nga si Ammon milakaw ug nangutana sa Ginoo, ug ang Ginoo miingon kaniya:

12 Ipagawas kini nga katawhan gikan niini nga yuta, aron dili sila mamatay; kay si Satanas miimpluwensya sa mga kasingkasing sa mga Amalekita, kinsa mihulhog sa mga Lamanita nga masuko batok sa ilang kaigsoonan sa pagpatay kanila; busa panggawas kamo gikan niini nga yuta; ug bulahan kini nga katawhan niini nga kaliwatan, kay ako manalipod kanila.

13 Ug karon nahitabo nga si Ammon milakaw ug misulti sa hari sa tanang pulong nga gisulti sa Ginoo kaniya.

14 Ug gipundok nila ang tanan nilang katawhan, oo, ang tanang katawhan sa Ginoo, ug mipundok sa ilang tanang pundok sa gagmayng kahayopan ug mga pundok sa dagkong kahayopan, ug mibiya gikan sa yuta, ug miabot sa kamingawan nga nagbahin sa yuta sa Nephi gikan sa yuta sa Zarahemla, ug miabot duol sa mga utlanan sa yuta.

15 Ug nahitabo nga si Ammon miingon kanila: Tan-awa, ako ug ang akong kaigsoonan moadto sa yuta sa Zarahemla, ug kamo magpabilin dinhi hangtod sa among pagbalik; ug among susihon ang mga pagbati sa among kaigsoonan, kon uyon ba sila nga mosulod kamo sa ilang yuta.

16 Ug nahitabo nga samtang si Ammon nagpaingon ngadto sa yuta, nasugatan niya ug sa iyang kaigsoonan si Alma, didto sa dapit nga gihisgotan; ug tan-awa, usa kini ka malipayon nga panagkita.

17 Karon ang kamaya ni Ammon hilabihan ka dako nga mipuno kaniya; oo, hilabihan ang iyang kamaya sa iyang Dios, gani nawad-an siya sa iyang kusog; ug natumba siya pag-usab sa yuta.

18 Karon dili ba kini naghingapin nga kamaya? Tan-awa, mao kini ang kamaya nga walay lain nga makadawat gawas sa matinud-anong maghinulsol ug mapainubsanon nga nagpangita sa kalipay.

19 Karon ang kamaya ni Alma sa pagkakita sa iyang kaigsoonan tinuod gayod nga hilabihan, ug usab ang kamaya ni Aaron, ni Omner, ug ni Himni; apan tan-awa ang ilang kamaya wala molabaw sa ilang kusog.

20 Ug karon nahitabo nga si Alma midala sa iyang kaigsoonan balik sa yuta sa Zarahemla; gani ngadto sa iyang kaugalingon nga balay. Ug nangadto sila ug gisultihan ang labaw nga maghuhukom sa tanang butang nga nahitabo kanila didto sa yuta sa Nephi, taliwala sa ilang kaigsoonan nga mga Lamanita.

21 Ug nahitabo nga ang labaw nga maghuhukom mipadala og pahibalo sa tibuok yuta, nagtinguha sa tingog sa katawhan kabahin sa pagdawat sa ilang kaigsoonan, kinsa mao ang katawhan sa Anti-Nephi-Lehi.

22 Ug nahitabo nga miabot ang tingog sa katawhan, nga nag-ingon: Tan-awa, atong ihatag ang yuta sa Jershon, nga anaa sa silangan nga daplin sa dagat, nga nagsumpay sa yuta sa Mabungahon, nga anaa sa habagatan sa yuta sa Mbungahon; ug kini nga yuta sa Jershon mao ang yuta nga atong ihatag sa atong kaigsoonan alang sa usa ka kabilin.

23 Ug tan-awa, atong ibutang ang atong kasundalohan taliwala sa yuta sa Jershon ug sa yuta sa Nephi, aron mapanalipdan nato ang atong kaigsoonan sa yuta sa Jershon; ug buhaton nato kini alang sa atong kaigsoonan, tungod sa ilang kahadlok nga mogamit sa mga hinagiban batok sa ilang kaigsoonan basin pa unya makabuhat sila og sala; ug kining dako nilang kahadlok miabot tungod sa ilang hilabihan nga paghinulsol nga ilang nahimo, tungod sa ilang daghan nga mga pagpatay ug sa ilang makahahadlok nga pagkadaotan.

24 Ug karon tan-awa, kini ang atong buhaton sa atong kaigsoonan, aron makapanunod sila sa yuta sa Jershon; ug bantayan nato sila gikan sa ilang mga kaaway uban sa atong kasundalohan, sa kasabotan nga mohatag sila kanato og bahin sa ilang kabtangan aron itabang kanato nga kita makaamuma sa atong kasundalohan.

25 Karon, nahitabo nga sa dihang si Ammon nakadungog niini, mibalik siya ngadto sa katawhan sa Anti-Nephi-Lehi, ug si Alma usab miuban kaniya, ngadto sa kamingawan, diin sila mipabarog sa ilang mga tolda, ug mipahibalo kanila niining tanan nga butang. Ug si Alma usab misaysay kanila sa iyang pagkakabig, uban kang Ammon ug ni Aaron, ug sa iyang kaigsoonan.

26 Ug nahitabo nga nakahatag kini og dakong kamaya kanila. Ug milugsong sila ngadto sa yuta sa Jershon, ug nanag-iya sa yuta sa Jershon; ug gitawag sila sa mga Nephita nga katawhan ni Ammon; busa nailhan sila sa mao nga ngalan sukad niana.

27 Ug apil sila sa katawhan ni Nephi, ug usab giihap uban sa katawhan kinsa anaa sa simbahan sa Dios. Ug usab nailhan sila tungod sa ilang kadasig ngadto sa Dios, ug usab ngadto sa mga tawo; kay hingpit sila nga matinuoron ug matarong sa tanang butang; ug lig-on sila sa pagtuo kang Kristo, gani hangtod sa kataposan.

28 Ug ilang giisip ang pagpaagas sa dugo sa ilang kaigsoonan uban ang dakong kasilag; ug dili na gayod sila madani pa sa paggamit sa ilang mga hinagiban batok sa ilang kaigsoonan; ug dili na gayod sila motan-aw sa kamatayon uban sa bisan gamay nga matang sa kahadlok, tungod sa ilang paglaom ug pagkasabot kang Kristo ug sa pagkabanhaw; busa, ang kamatayon ilang nabuntog tungod sa kadaogan ni Kristo niini.

29 Busa, moantos sila sa kamatayon bisan sa labing grabe ug sakit nga paagi nga ipahamtang sa ilang kaigsoonan, sa dili pa sila mogamit og espada o sundang aron sa pagtigbas kanila.

30 Ug sa ingon niana mga mahalaron sila ug pinalangga nga katawhan, pinalabi kaayo nga katawhan sa Ginoo.