1 Ug karon nahitabo nga human ang katawhan ni Ammon mahiluna sa yuta sa Jershon, ug usa ka simbahan usab natukod sa yuta sa Jershon, ug ang kasundalohan sa mga Nephita gilibot sa yuta sa Jershon, oo, sa tanang utlanan libot sa yuta sa Zarahemla; tan-awa ang kasundalohan sa mga Lamanita misunod sa ilang kaigsoonan ngadto sa kamingawan.

2 Ug tungod niini dihay makalilisang nga gubat; oo, gani usa ka gubat nga wala pa mahibaloi sukad sa tanang katawhan sa yuta gikan sa panahon sa pagbiya ni Lehi sa Jerusalem; oo, ug napulo ka kaliboan sa mga Lamanita ang gipamatay ug nagkatibulaag sa layo nga dapit.

3 Oo, ug usab dihay makalilisang nga kamatay sa katawhan ni Nephi; bisan pa niana, ang mga Lamanita giabog ug nagkatibulaag, ug ang katawhan ni Nephi mibalik pag-usab sa ilang yuta.

4 Ug karon mao kini ang panahon nga dihay labihan nga pagbangotan ug kagul-anan nga nadungog sa tibuok yuta, sa tanang katawhan ni Nephi—

5 Oo, ang bakho sa mga biyuda nga nagbangotan alang sa ilang mga bana, ug usab sa mga amahan nga nagbangotan alang sa ilang mga anak nga lalaki, ug ang anak nga babaye alang sa igsoon nga lalaki, oo, sa igsoon nga lalaki alang sa amahan; ug sa ingon ang bakho sa pagbangotan nadungog taliwala kanilang tanan, nagbangotan alang sa ilang kaliwatan nga gipamatay.

6 Ug karon sa pagkatinuod kini usa ka masulub-on nga adlaw; oo, usa ka panahon sa paghinuklog, ug usa ka panahon sa daghan nga pagpuasa ug pag-ampo.

7 Ug sa ingon niana natapos ang ikanapulo ug lima nga tuig sa paghari sa mga maghuhukom sa katawhan ni Nephi;

8 Ug mao kini ang asoy ni Ammon ug sa iyang kaigsoonan, ang ilang mga pagpanaw sa yuta sa Nephi, ang ilang mga pag-antos diha sa yuta, ang ilang mga kasubo, ug ang ilang mga kasakit, ug ang ilang dili matukib nga kamaya, ug ang pagdawat ug ang kasiguroan sa kaigsoonan didto sa yuta sa Jershon. Ug karon hinaot nga ang Ginoo, ang Manunubos sa tanang tawo, mopanalangin sa ilang mga kalag sa kahangtoran.

9 Ug mao kini ang asoy sa mga gubat ug mga panagbingkil taliwala sa mga Nephita, ug usab ang mga gubat tali sa mga Nephita ug sa mga Lamanita; ug ang ikanapulo ug lima nga tuig sa paghari sa mga maghuhukom natapos.

10 Ug gikan sa unang tuig hangtod sa ikanapulo ug lima nahitabo ang pagkalaglag sa daghang kaliboan nga kinabuhi; oo, nahitabo kini sa usa ka makahahadlok nga talan-awon sa pagpaagas sa dugo.

11 Ug ang mga lawas sa daghang kaliboan gilubong sa yuta, samtang ang mga lawas sa daghang kaliboan nadunot nga nagtipun-og sa ibabaw sa yuta; oo, ug daghang kaliboan ang nagbangotan sa pagkawala sa ilang kaliwatan, tungod kay sila adunay katarongan nga mahadlok, sumala sa mga saad sa Ginoo, nga sila itugyan sa usa ka kahimtang sa walay kataposan nga kaalaotan.

12 Samtang daghang kaliboan pa nga sa tinuod nagbangotan tungod sa pagkamatay sa ilang kaliwatan, sa gihapon nagmaya sila ug naghimaya sa paglaom, ug gani nasayod, sumala sa mga saad sa Ginoo, nga sila pagabanhawon aron mopuyo sa tuo nga kamot sa Dios, sa usa ka kahimtang sa walay kataposan nga kalipay.

13 Ug sa ingon niana nasabtan nato ang pagkadako sa pagkawalay kaangayan sa tawo tungod sa sala ug kalapasan, ug ang gahom sa yawa, nga moabot pinaagi sa malipoton nga mga plano nga iyang gimugna aron sa paglaang sa mga kasingkasing sa mga tawo.

14 Ug sa ingon niana nasabtan nato ang madasigong tawag sa kakugi sa mga tawo nga motrabaho sa mga ubasan sa Ginoo; ug sa ingon niana nasabtan nato ang dakong rason sa kasubo, ug usab sa pagmaya—kasubo tungod sa kamatayon ug kalaglagan sa mga tawo, ug kamaya tungod sa kahayag ni Kristo ngadto sa kinabuhi.