1 Ka sa qai yaco ni sa oti na nodra laki tauyavu na tamata i Amoni ena vanua ko Jerisoni, ka sa tauyavutaki talega na lotu ena vanua ko Jerisoni, ka ra sa yadrava wavoki na vanua ko Jerisoni ko ira na mataivalu ni Nifaiti, io, na iyalayala kece ni vanua wavolita na vanua ko Saraemala; raica era sa muri ira na wekadra ki na lekutu na mataivalu ni Leimanaiti.

2 Ka sa yaco kina e dua na ivalu rerevaki; io, oqo na imatai ni valu rerevaki duadua me yaco ena vanua ko ya, tekivu mai na gauna a biuti Jerusalemi mai kina ko Liai; io, e udolu vakatini na Leimanaiti, era sa bale mate kina ka ra sa veiseyaki tale ga ki na veivanua.

3 Io, a ra sa bale mate tale ga e vuqa na tamata i Nifai; ia, era sa vakasavi tani ka veiseyaki ko ira na Leimanaiti, ka ra sa lesu tale na tamata i Nifai ki na nodra vanua.

4 A sa yaco na tagi kei na tagiyaso vei ira na tamata i Nifai, ena nodra vanua taucoko—

5 Io era sa tagicaki ira na watidra tagane ko ira na yalewa, ka ra sa tagicaki ira na luvedra cauravou ko ira na tama, e ra sa tagicaki ira na ganedra ko ira na goneyalewa, io, ka ra sa tagicaki ira na tamadra ko ira na gone tagane; a sa rogo na tagi ni rarawa, ni ra sa tagicaki ira na wekadra era sa mate.

6 Ia sa dua dina na siga ni rarawa na siga oqo; io, e dua na gauna ni lomabibi, kei na dua na gauna ni lolo kei na masumasu.

7 Ia sa cava eke na ikatini kalima ni yabaki ni nodra veiliutaki na turaganilewa vei ira na tamata i Nifai;

8 Ia sai koya oqo na itukutuku kei Amoni kei ira na wekana, na nodra ilakolako ena vanua ko Nifai, na veika dredre a yaco vei ira, na nodra kune rarawa kei na vakararawataki, kei na reki levu e sega ni vakamacalataki rawa, na veitavaki kei na veitaqomaki era a vakayacora vei ira na wekadra ena vanua ko Jerisoni. Ia oqo na Turaga, na nodra Dauveivueti na tamata kecega, me vakalougatataka na yalodra ka sega ni mudu.

9 Ia oqo na itukutuku ni ivalu kei na veileti ena kedra maliwa na Nifaiti, kei na nodra veivaluvaluti na Nifaiti kei na Leimanaiti; ka sa mai cava na ikatini kalima ni yabaki ni nodra veiliutaki na turaganilewa.

10 Ia mai na imatai ni yabaki ki na ikatini kalima e sa vakarusai kina e udolu vakaudolu na bula; io, sa yaco kina na ivalavala ca vakadomobula ni vakadave dra.

11 Ia sa bulu oti na yagodra e udolu vakaudolu na tamata, ia e udolu vakaudolu tale e a bini tu ga na yagodra ena delai vuravura; io, era a tagicaka na udolu vakaudolu na nodra mate na wekadra, baleta ni sa dodonu me ra rere, me vaka na nona yalayala na Turaga, ni ra na laki tu ki na itutu ni veivakararawataki ka tawacava.

12 Ni ra sa vakaloloku tiko vakaidina e udolu vakaudolu me baleti ira na wekadra era sa yali, ia era sa marau ka cibi ena vakanuinui, ka ni ra kila sara tale ga, me vaka na yalayala ni Turaga, ni ra sa vakaturi cake me ra na tiko ena liga imatau ni Kalou, ena marau e sega ni oti rawa.

13 Ka eda sa raica oqo na nodra duidui levu na tamata me baleta na ivalavala ca kei na talaidredre, kei na nona kaukauwa na tevoro, ena nona ilawaki qaseqase ka sa viria me corita kina na lomadra na tamata.

14 Ka eda sa raica eke ni sa kilikili me ra yalodina na tamata ki na ilesilesi era sa kacivi kina ki na were-ni-vaini ni Turaga; ka eda sa raica oqo na vu ni nodra rarawa, kei na vu ni nodra reki—era sa rarawataka na nodra mate ka vakarusai na tamata, ia era sa reki ena vuku ni rarama i Karisito ki na bula.