1 O nga ako usa pa lang unta ka anghel, ug mangandoy sa akong kasingkasing, nga ako makalakaw ug makasulti gamit ang trumpeta sa Dios, sa tingog nga makapakurog sa yuta, ug mosinggit og paghinulsol sa tanang katawhan!

2 Oo, akong isangyaw sa matag kalag, sama sa tingog sa dugdog, ang paghinulsol ug ang plano sa katubsanan, nga sila kinahanglan nga maghinulsol ug moduol sa atong Dios, aron wala nay dugang pa nga kasubo sa ibabaw sa tibuok yuta.

3 Apan tan-awa, tawo ako, ug makasala sa akong gipangandoy; kay angay unta nga makontento ako sa mga butang nga gihatag sa Ginoo kanako.

4 Dili angay nga akong daoton ang lig-ong balaod sa makiangayon nga Dios, kay nasayod ako nga siya mohatag sa mga tawo sumala sa ilang gitinguha, bisan sa kamatayon o sa kinabuhi; oo, nasayod ako nga mohatag siya sa mga tawo, oo, momando kanila og mga mando nga dili mausab, sumala sa ilang mga kabubut-on, alang sa kaluwasan man o sa kalaglagan.

5 Oo, ug ako nasayod nga ang maayo ug daotan masinati sa tanang tawo; siya nga wala masayod sa maayo gikan sa daotan walay sala; apan siya nga nasayod sa maayo ug sa daotan, kaniya gihatag sumala sa iyang mga tinguha, kon siya ba magtinguha og maayo o daotan, kinabuhi o kamatayon, kamaya o pagbasol sa tanlag.

6 Karon, tungod kay ako nasayod niining mga butanga, nganong ako magtinguha pa og dugang kay sa paghimo sa buluhaton diin ako gitawag?

7 Nganong magtinguha man ako usa unta ka anghel, aron makasulti ako sa tanang lumulupyo sa yuta?

8 Kay tan-awa, ang Ginoo mitugot sa tanang kanasoran, sa ilang kaugalingon nga nasod ug pinulongan, sa pagtudlo sa iyang pulong, oo, sa kaalam, ang tanan nga iyang nakita nga angay nilang mabatonan; busa aron nasabtan nato nga ang Ginoo nagtambag pinaagi sa kaalam, sumala niana nga makiangayon ug tinuod.

9 Ako nasayod nianang gisugo sa Ginoo kanako, ug ako naghimaya niini. Wala ako maghimaya sa akong kaugalingon, apan naghimaya ako nianang gisugo sa Ginoo kanako; oo, ug kini mao ang akong himaya, nga unta mahimo ako nga instrumento sa mga kamot sa Dios aron sa pagdala sa pipila ka kalag ngadto sa paghinulsol; ug mao kini ang akong kamaya.

10 Ug tan-awa, kon makita nako ang kadaghanan sa akong kaigsoonan nga matinud-anong naghinulsol, ug moduol sa Ginoo nga ilang Dios, niana ang akong kalag mapuno sa kamaya; dayon mahinumdom ako unsa ang nahimo sa Ginoo alang kanako, oo, gani nga siya mipatalinghog sa akong pag-ampo; oo, niana ako mahinumdom sa iyang maluluy-on nga kamot nga iyang gitunol kanako.

11 Oo, ug nahinumdom usab ako sa pagkabihag sa akong mga amahan; kay sa pagkatinuod nasayod ako nga ang Ginoo miluwas kanila gikan sa pagkaulipon, ug pinaagi niini mitukod sa iyang simbahan; oo, ang Ginoong Dios, ang Dios ni Abraham, ang Dios ni Isaac, ug ang Dios ni Jacob, miluwas kanila gikan sa pagkaulipon.

12 Oo, sa kanunay nahinumdom ako sa pagkabihag sa akong mga amahan; ug kana nga mao gihapon nga Dios kinsa miluwas kanila gikan sa mga kamot sa mga Ehiptohanon nga miluwas kanila gikan sa pagkaulipon.

13 Oo, ug kanang mao gihapon nga Dios mitukod sa iyang simbahan taliwala kanila; oo, ug kanang mao gihapon nga Dios mitawag kanako pinaagi sa balaan nga pangatungdanan, sa pagsangyaw sa pulong ngadto niini nga katawhan, ug mihatag kanako og dakong kalamposan, diin ang akong kamaya mahingpit.

14 Apan wala ako malipay sa akong kalamposan lamang, apan ang akong kamaya mas nahingpit tungod sa kalamposan sa akong kaigsoonan, kinsa mitungas ngadto sa yuta sa Nephi.

15 Tan-awa, nagtrabaho sila pag-ayo, ug nagdala og daghan nga bunga; ug pagkadako sa ilang mahimong ganti!

16 Karon, kon ako maghunahuna sa kalamposan niining akong kaigsoonan ang akong kalag pagabayawon, gani ngadto sa pagkabulag niini gikan sa lawas, sa ingon niini, hilabihan ka dako ang akong kamaya.

17 Ug karon hinaot nga ang Dios motugot niining, akong kaigsoonan, nga sila molingkod sa gingharian sa Dios; oo, ug usab kadtong tanan nga bunga sa ilang mga pagtrabaho nga dili na sila mobiya, apan nga sila modayeg kaniya sa kahangtoran. Ug hinaot nga ang Dios motugot nga mahimo kini sumala sa akong mga pulong, gani sama sa akong gipamulong. Amen.