1 Ket napasamak iti panangrugi ti maikalima a tawen ti panagturayda a nangrugi ti panagsusupiat dagiti tattao; ta ti maysa a lalaki, a maawagan iti Amlici, maysa a nasikap unay a lalaki, wen, masirib a lalaki iti pagsiriban ti lubong, maysa a kameng ti orden ti lalaki a nangpapatay ken ni Gideon babaen ti espada, a napapatay a mayannurot iti linteg—

2 Ita daytoy nga Amlici, babaen ti kinasikapna, napasurotna ti adu a tao; kasta unay ti kaaduda isu a nagbalinda a nakabilbileg; ket rinugianda a gun-oden ti pannakaipatugaw ni Amlici nga ari dagiti tattao.

3 Ita makaam-amak daytoy kadagiti tattao ti simbaan, ken kasta met kadagiti amin a saan a napasurot iti pananguyot ni Amlici; agsipud ta ammoda a mayannurot iti lintegda a nasken a maipasdek dagitoy a banag babaen iti timek dagiti tattao.

4 Ngarud, no mabalin a magun-od ni Amlici ti timek dagiti tattao, isu, a maysa a dakes a tao, ipaidamna kadakuada dagiti kalintegan ken gundawayda iti simbaan; agsipud ta panggepna a dadaelen ti simbaan ti Dios.

5 Ket napasamak nga inummong dagiti tattao ti bagbagida iti amin a daga, tunggal tao a maibatay iti panunotna, kumanunong man wenno maisuppiat ken ni Amlici, iti nasinasina a bunggoy, addaan ti napalalo a panagririri ken nakaskasdaaw a panagsususik ti tunggal maysa.

6 Ket ngarud inummongda a sangsangkamaysa ti bagbagida tapno agbotosda babaen ti timekda maipanggep iti dayta a banag; ket naidatagda dagitoy iti imatang dagiti ukom.

7 Ket napasamak a maisuppiat ti timek dagiti tattao ken ni Amlici, isu a saan a napili nga agbalin nga arida.

8 Ita nangipaay daytoy iti nalaus a rag-o iti puspuso dagiti sumuppiat kenkuana; ngem sinugsugan ni Amlici dagiti umanamong kenkuana nga agpungtot kadagiti saan nga umanamong kenkuana.

9 Ket napasamak nga inummongda ti bagbagida, ket kinonsagrarda ni Amlici nga agbalin nga arida.

10 Ita idi nagbalin ni Amlici nga arida binilinna ida a sumaranget kadagiti kabsatda; ket inaramidna daytoy tapno masakupanna ida.

11 Ita mailasin dagiti tattao ni Amlici babaen ti naganna nga Amlici, ket naawaganda iti Amlicita; ket naawagan dagiti nabati iti Nephita, wenno tattao ti Dios.

12 Ngarud ammo dagiti tattao dagiti Nephita ti panggep dagiti Amlicita, ket ngarud nagsaganada a sumabat kadakuada; wen, inarmasanda ti bagbagida iti espada, ken iti kampilan, ken iti bai, ken iti pana, ken iti batbato, ken palsiit, ken amin a langa ti armas iti gubat, ken tunggal kita.

13 Ket kasta ti panagsaganada a sumabat kadagiti Amlicita iti oras ti yaayda. Ket adda dagiti natudingan a kapitan, ken dagiti nangatngato a kapitan, ken pangulo dagiti kapitan, a maibatay iti bilangda.

14 Ket napasamak nga inarmasan ni Amlici dagiti taona iti amin a langa ti armas ti gubat iti tunggal kita; ken nangtuding met iti agturay ken dadaulo dagiti taona, a mangidaulo kadakuada a makiranget kadagiti kabsatda.

15 Ket napasamak nga immay dagiti Amlicita iti turod nga Amnihu, iti daya ti karayan Sidon, nga agayus iti daga a Zarahemla, ket sadiay rinugianda a makigubat kadagiti Nephita.

16 Ita ni Alma, a pangulo nga ukom ken gobernador dagiti tattao ni Nephi, ngarud simmang-atda kadagiti taona, wen, kaduana dagiti kapitanna, ken dagiti pangulo a kapitan, wen, iti ulo ti buyotna, a makiranget kadagiti Amlicita.

17 Ket rinugianda a papatayen dagiti Amlicita iti turod a daya ti Sidon. Ket sipipinget a nakiranget dagiti Amlicita kadagiti Nephita, isu nga adu kadagiti Nephita ti napasag iti sango dagiti Amlicita.

18 Nupay kasta pinapigsa ti Apo ti ima dagiti Nephita, ket pinapatayda dagiti Amlicita a rinangrangkay, ket rinugianda ti nanglibas kadakuada.

19 Ket napasamak a nagmalem a kinamat dagiti Nephita dagiti Amlicita, ket pinapatayda ida a rinangrangkay, isu nga adda sangapulo ket dua a ribu lima gasut tallopulo ket dua a kararua a napapatay kadagiti Amlicita; ken adda innem a ribu lima gasut innem a pulo ket dua a kararua a napapatay a Nephita.

20 Ket napasamak nga idi saanen a makamatan ni Alma dagiti Amlicita binilinna dagiti taona nga ipatakderda dagiti toldada iti tanap ti Gideon, ti tanap a naipanagan ken ni Gideon a napapatay iti ima ni Nehor babaen ti espada; ket pinatakder dagiti Nephita dagiti toldada iti daytoy a tanap para iti rabii.

21 Ket nangibaon ni Alma dagiti agsisiim a mangsurot iti nabati kadagiti Amlicita, tapno maammuanna dagiti planoda ken balabalada, tapno masalaknibanna ti bagina kadakuada, tapno mailiklikna dagiti taona manipud iti pannakadadael.

22 Ita naawagan iti Zeram, ken Amnor, ken Manti, ken Limher dagidiay imbaonna a mangwanawan iti kampo dagiti Amlicita; dagitoy dagiti rimmuar a kadua dagiti tattaoda a mangwanawan iti kampo dagiti Amlicita.

23 Ket napasamak a nakadardaras a nagsublida iti kabigatanna iti kampo dagiti Nephita, gapu iti nalabes a siddaawda, ken nakariknada iti nalaus a buteng, a kinunada:

24 Kitaen, sinurotmi ti kampo dagiti Amlicita, ket iti nalabes a siddaawmi, iti daga a Minon, iti ngatuen ti daga a Zarahemla, iti labes ti daga a Nephi, nakitami ti adu a pangen dagiti Lamanita; ket kitaen, kimmappon dagiti Amlicita kadakuada;

25 Ket mapanda kadagiti kabsattayo iti dayta a daga; ket liblibasanda ida nga intugotda dagiti arbanda, ken dagiti assawada, ken dagiti annakda, nga agturong iti siudadtayo; ket malaksid no agtignaytayo a dagus sakupenda ti siudadtayo, ket papatayenda dagiti ammatayo, ken dagiti assawatayo, ken dagiti annaktayo.

26 Ket napasamak nga innala dagiti tattao ni Nephi dagiti toldada, ket pimmanawda iti tanap ti Gideon iti panagturongda iti siudadda, a siudad ti Zarahemla.

27 Ket kitaen, bayat ti ibaballasiwda iti karayan Sidon, dagiti Lamanita ken Amlicita, gapu iti kaaduda dandani, arigna, a kas iti anay ti baybay, dimtengda a mangdadael kadakuada.

28 Nupay kasta, gapu ta pinapigsa babaen iti ima ti Apo dagiti Nephita, gapu iti sipapasnek a panagkararagda kenkuana nga isalakanna ida kadagiti ima dagiti kabusorda, ngarud dinengngeg ti Apo ti ararawda, ket pinapigsana ida, ket napasag iti sangoda dagiti Lamanita ken Amlicita.

29 Ket napasamak a nakirupak ni Alma ni Amlici babaen ti espada, iti sangunsango; ket sipipigsa a nagrangetda, iti tunggal maysa.

30 Ket napasamak a ni Alma, a tao ti Dios, gapu ta nasanay a napnuan pammati, immararaw, a kinunana: O Apo, kaasian ken isalakanmo ti biagko, tapno agbalinak a ramit dagiti imam a mangisalakan ken mangtaginayon kadagitoy a tao.

31 Ita idi naisao ni Alma dagitoy a balikas nakiranget manen ken ni Amlici; ket napapigsa, isu a napapatayna ni Amlici babaen ti espada.

32 Ket nakiranget met iti ari dagiti Lamanita; ngem linibasan ti ari dagiti Lamanita ni Alma ket impatulodna dagiti bantayna a sumaranget ken ni Alma.

33 Ngem ni Alma, kadua dagiti bantayna, nakiranget kadagiti bantay ti ari dagiti Lamanita agingga a napapatay ken napagsanudna ida.

34 Ket ngarud inikkatna dagiti manglapped ti daga, wenno ti teppang, nga adda iti lauden ti karayan Sidon, inpurwakna dagiti bagi dagiti Lamanita a napapatay iti dandanum ti Sidon, tapno maaddaan iti waya dagiti taona a bumallasiw ken makiranget kadagiti Lamanita ken kadagiti Amlicita iti akinlaud a paset ti karayan Sidon.

35 Ket napasamak nga idi nakaballasiwdan amin iti karayan Sidon rinugian dagiti Lamanita ken Amlicita ti nanglibas kadakuada, iti laksid iti saan a pannakabilang ti kaaduda.

36 Ket linibasanda dagiti Nephita iti panagturongda iti langalang iti laud ken amianan, iti adayo a laksid ti nagbedngan ti daga; ket simamaingel dagiti Nephita a nangkamat kadakuada, ket pinapatayda ida.

37 Wen, nasabatda ida iti amin a sikigan, ket napapatay ken napapanawda, agingga a nawarawarada iti laud, ken iti amianan, agingga a nakadanonda iti kabakiran, a maawagan iti Hermounts; ket dayta a paset ti kabakiran ti nakaurnongan dagiti atap ken narawetnga ayup.

38 Ket napasamak nga adu ti natay iti kabakiran gapu iti sugatda, ket linamut ida dagiti ayup kasta met dagiti buitre iti tangatang; ket nasarakan dagiti tulangda, ket nagabsuonda iti daga.