1 Faauta, o lenei sa oo ina ua uma ona faamautu le nuu o Amona i le laueleele o Seasona, ioe, ma ina ua uma foi ona tutuli ese o sa Lamanā mai le laueleele, ma sa tanumia o latou tagata oti e tagata o le laueleele—

2 O lenei sa le faitauina o latou tagata oti ona o le toatele naua o lo latou aofai; sa le faitauina foi tagata oti o sa Nifaē—ae sa oo ina ua uma ona latou tatanu o o latou tagata oti, ma ina ua mavae atu foi aso o le anapogi, ma le faanoanoa, ma le tatalo, (ma sa tupu lenei mea i le lona sefuluono o tausaga o le nofoaiga a faamasino i le nuu o Nifae) sa amata ona aveavea’i ai pea le filemu i le laueleele uma.

3 Ioe, ma sa vaai tagata ia tausi i poloaiga a le Alii; ma sa latou anaana i le tausiga o sauniga a le Atua, e tusa ma le tulafono a Mose; ona sa a’oa’oina i latou e tausi i le tulafono a Mose seia oo ina faataunuuina.

4 Ma sa faapea ona leai o se faalavelave i le nuu i le tausaga atoa lona sefuluono o le nofoaiga a faamasino i le nuu o Nifae.

5 Ma sa oo i le amataga o le lona sefulufitu o tausaga o le nofoaiga a faamasino, sa aveavea’i ai pea le filemu.

6 Peitai sa oo i le taufaaiuiuga o le lona sefulufitu o tausaga, sa sau ai se tagata i le laueleele o Sara’emila, ma o ia o se Anetī-Keriso, ona sa amata ona ia tala’i atu i tagata e faasaga i valoaga ia na fetalaia e perofeta, e uiga i le afio mai o Keriso.

7 O lenei sa leai se tulafono e faasaga i talitonuga o se tagata; ona sa matuā le tusa ai ma poloaiga a le Atua le i ai o se tulafono o le a aumai ai tagata i ni tulaga le tutusa.

8 Ona ua faapea ona fai mai o tusitusiga paia: Inā filifili ia outou i le aso nei, po o ai tou te auauna i ai.

9 O lenei afai ua manao se tagata e auauna i le Atua, o lana aia lea; pe, afai ua talitonu o ia i le Atua o lana lava aia lea e auauna atu ai ia te ia; ae afai e le talitonu o ia ia te ia sa leai se tulafono e faasala ai o ia.

10 Peitai afai sa ia fasioti tagata sa faasalaina o ia i le oti; ma afai sa ia faomea sa faasalaina foi o ia; ma afai sa gaoi o ia sa faasalaina foi o ia; ma afai sa mulilua o ia sa faasalaina foi o ia; ioe, sa faasalaina i latou mo nei amioleaga uma.

11 Ona sa i ai se tulafono e faamasinoina ai tagata e tusa ma a latou solitulafono. Ae ui i lea, sa leai se tulafono e faasaga i talitonuga o se tagata; o lea, sa faasalaina ai le tagata mo nao solitulafono sa ia faia; o lea sa tulaga tutusa ai tagata uma.

12 Ma o lenei Aneti-Keriso, o lona igoa o Kori’oa, (ma sa le mafai e le tulafono ona taofi o ia) sa amata ona ia tala’i atu i le nuu o le a lē i ai se Keriso. Ma sa faapenei ona tala’i atu o ia, e faapea:

13 E, o outou e ua noanoatia i lalo i se faamoemoe valea ma lē aoga, aisea ea ua outou faapologa ai outou lava i mea valea faapena? Aisea ua outou tulimatai atu ai mo se Keriso? Ona e leai se tagata e mafai ona ia iloa se mea o le a oo mai.

14 Faauta, o nei mea ua outou ta’ua o valoaga, ia ua outou fai mai na tuulima faasolo mai i lalo e perofeta paia, faauta, o ni uputuu valea i latou a o outou tamā.

15 E faapefea ona outou iloa lo latou moni? Faauta, e le mafai ona outou iloa e uiga i ni mea tou te le vaai atu i ai; o lea e le mafai ona outou iloa o le a i ai se Keriso.

16 Ua outou tulimatai i luma ma fai mai ua outou vaai i se faamagaloga o a outou agasala. Ae faauta o se fua lea o se mafaufau valea; ma o lenei faavaleaina o o outou mafaufau ua oo mai ona o uputuu a o outou tamā, ia ua ta’ita’i ese atu ai outou i se talitonuga i mea ua le moni.

17 Ma e tele ni isi mea faapena na ia fai atu ai ia te i latou, na ta’u atu ai ia te i latou e le mafai ona faia o se togiola mo agasala a tagata, ae e faatino e tagata taitoatasi i lenei olaga e tusa ma le puleaina o le tagata lava ia; o lea e faamanuiaina tagata taitoatasi e tusa ma lona lava atamai, ma e manumalo tagata taitoatasi e tusa ma lona lava malosi; ma o soo se mea sa fai e le tagata e le o se solitulafono.

18 Ma sa faapea ona ia tala’i atu ia te i latou, ma taitai ese atu ai loto o le toatele, ma faaoso ai i latou ia faamaualuluga i lo latou amioleaga, ioe, ma taitai ese atu ai fafine e toatele, ma tane foi, e fai le faitaaga—ua fai atu ia te i latou a oti le tagata, o lona iuga lena.

19 O lenei sa alu atu foi lenei tagata i le laueleele o Seasona, e tala’i atu nei mea i le nuu o Amona, o e na avea muamua ma tagata o sa Lamanā.

20 Ae faauta sa sili atu lo latou popoto nai lo le toatele o sa Nifaē; ona sa latou ave o ia, ma saisai o ia, ma avatu o ia i luma o Amona, o le sa avea o se faitaulaga sili i luga o lena nuu.

21 Ma sa oo ina faatonu e ia ia ave ese atu o ia o le laueleele. Ma sa sau o ia i le laueleele o Kitiona, ma amata ona talai atu foi ia te i latou; ma sa ia le maua se manuia tele iinei, ona sa ave o ia ma saisai ma avatu i luma o le faitaulaga sili, ma o le faamasino sili foi i luga o le laueleele.

22 Ma sa oo ina fai atu le faitaulaga sili ia te ia: Aisea ua e fealuai ai e faapi’opi’o ala o le Alii? Aisea ua e a’oa’o atu ai i lenei nuu o le a leai se Keriso, e taofia ai lo latou olioli? Aisea ua e tautala faatautee ai i valoaga uma a perofeta paia?

23 O lenei o le igoa o le faitaulaga sili o Kitona. Ma sa fai mai Kori’oa ia te ia: Ona ou te le a’oa’o atu uputuu faavalea a o outou tamā, ma ona ou te le a’oa’o atu i lenei nuu ia latou noanoatia i latou lava i lalo o sauniga ma tu faavalea ia na faataatitia e faitaulaga anamua, latou te ave faamalosi ai le malosi ma le pule i o latou luga, e taofi ai i latou i le valea, ina ia le mafai ona latou faaēa i luga o latou ulu, ae faamaulaloina e tusa ai ma au upu.

24 Ua e fai mai o lenei nuu o se nuu saoloto. Faauta, ou te fai atu ua pologa i latou. Ua e fai mai ua moni ia valoaga mai anamua. Faauta, ou te fai atu e te le iloa pe ua moni na mea.

25 Ua e fai mai o lenei nuu o se nuu agasala ma se nuu ua pa’u’ū, ona o le solitulafono a se matua. Faauta, ou te fai atu ua le ta’usalaina se tamaitiiti ona o ona matua.

26 Ma ua e fai mai foi o le a afio mai Keriso. Ae faauta, ou te fai atu e te le iloaina pe o le a i ai se Keriso. Ma ua e fai mai foi o le a fasia o ia mo agasala a le lalolagi—

27 Ma ua faapea ona e ta’ita’i ese lenei nuu ia mulimuli i uputuu valea a o outou tamā, ma e tusa ai ma ou lava manao; ma ua e saisaitia i latou, e faapei o ni pologa, ina ia outou faaloloto outou lava i galuega a o latou lima, ua latou fefefe ai e vaai ae i luga ma le lotoa, ma ua latou fefefe ai e faaaoga fiafia a latou aia ma avanoa tatau.

28 Ioe, ua latou fefefe e faaaoga mea e a latou lava, ne’i o latou faatausuai i o latou faitaulaga, o e ua latou faapologa i latou e tusa ma o latou manao, ma aumai i latou ia talitonu, e ala ia latou uputuu ma a latou miti ma o latou manatu valevale ma a latou faaaliga ma a latou mealilo faatagāfai, ina ia latou, pe afai latou te le faia e tusa ma a latou upu, faatausuai i se tagata ua le mailoa, o le ua latou fai mai o le Atua—o se tagata e lei vaaia lava pe ua iloaina e se tasi, o sē sa le’i i ai pe o le a i ai lava.

29 O lenei ina ua vaai atu le faitaulaga sili ma le faamasino sili i le maaa o lona loto, ioe, ina ua la vaai atu e oo lava i le Atua ua upuleaga faasaga i ai o ia, sa la le fai atu se tali i ana upu; ae sa la faatonu ia saisai o ia; ma sa la tuuina atu o ia i lima o e mautofi, ma auina atu o ia i le laueleele o Sara’emila, ina ia mafai ona aumai o ia i luma o Alema, ma le faamasino sili o le sa kovana i luga o le laueleele uma.

30 Ma sa oo ina ua aumai o ia i luma o Alema ma le faamasino sili, sa faaauau pea lava o ia i le ala e tasi e pei ona ia faia i le laueleele o Kitiona; ioe, na iu ai lava ina upuvale o ia.

31 Ma sa tulai atu o ia ma upu leoleoa tele i luma o Alema, ma faifai faasaga i faitaulaga ma a’oa’o, ma ta’uleaga i latou i lo latou ta’ita’i ese o tagata ia mulimuli i uputuu faavalea a o latou tamā, ina ia latou ola faaloloto ai i luga o galuega a tagata.

32 O lenei sa fai atu Alema ia te ia: Ua e iloa matou te le o ola faaloloto i luga o galuega a lenei nuu; ona faauta sa ou galue mai lava i le amataga o le nofoaiga a faamasino e oo mai i le taimi nei, i o’u lava lima mo lo’u lava tausiga, e ui i a’u malaga e tele faataamilo i le laueleele e ta’u atu le afioga a le Atua i o’u tagata.

33 Ma e ui i le tele o galuega na ou faia i le ekalesia, ou te le’i maua lava se mea e oo i sina senine e tasi mo la’u galuega; pe sa maua foi e soo se tasi o o’u uso, vagana ai i le nofoa-faamasino; ma i le tulaga lena na matou maua ai se totogi mo na’o lo matou taimi e tusa ai ma le tulafono.

34 Ma o lenei, afai matou te le maua se mea mo a matou galuega i le ekalesia, o le a se aoga matou te galulue ai i le ekalesia se’i vagana ai lo matou ta’u atu o le upumoni, ina ia mafai ona matou maua ai fiafiaga i le olioli o o matou uso?

35 Aisea ea la ua e fai mai ai ua matou tala’i atu i lenei nuu ina ia matou maua ai oa, ae ua e iloa, e oe lava ia, matou te le o mauaina ni oa? Ma o lenei, ua e talitonu ea o lo matou faaseseina o lenei nuu, ua tupu mai ai se olioli tele faapea i o latou loto?

36 Ma sa tali mai Kori’oa ia te ia, Ioe.

37 Ma ona fai atu lea o Alema ia te ia: E te talitonu o loo i ai se Atua?

38 Ma sa tali mai o ia, E leai.

39 O lenei sa fai atu Alema ia te ia: E te toe faafitia ea o loo i ai se Atua, ma faafitia foi le Keriso? Aua faauta, ou te fai atu ia te oe, ua ou mautinoa o loo i ai se Atua, ma o le a afio mai foi Keriso.

40 Ma o lenei o le a se faamaoniga ua ia te oe ua leai se Atua, pe o le a le afio mai foi Keriso? Ou te fai atu ia te oe ua leai se faamaoniga o ia te oe, vagana ai lau lava upu.

41 Ae faauta, ua ia te au mea uma o se molimau ua moni nei mea; ma ua ia te oe foi mea uma o se molimau ia te oe ua moni i latou; ma e te faafitia ea i latou? E te talitonu ea ua moni nei mea?

42 Faauta, ua ou iloa ua e talitonu, ae ua ulu ia te oe se agaga pepelo, ma ua e tuu ese le Agaga o le Atua ina ia le maua e ia se nofoaga i totonu ia te oe; ae ua i ai i le tiapolo le mana i ou luga, ma ua ia feavea’i solo oe, e fai auala e mafai ona ia faaumatia ai fanau a le Atua.

43 Ma o lenei sa fai mai Kori’oa ia Alema: Afai e te faaali mai ia te a’u se faailoga, e mafai ona ou talitonu ai o loo i ai se Atua, ioe, faaali mai ia te a’u ua ia te ia le mana, ona ou talitonu ai lea i le moni o a’u upu.

44 Peitai sa fai atu Alema ia te ia: Ua lava faailoga ua ia te oe; e te faaosooso ea i lou Atua? E te fai mai ea, Faaali mai ia te a’u se faailoga, ae ua ia te oe le molimau a o’u uso uma nei, ma perofeta paia uma foi? Ua folasia i ou luma tusitusiga paia, ioe, ma ua faailoa mai i mea uma o loo i ai se Atua; ioe, e oo i le lalolagi, ma mea uma ua i ona luga, ioe, ma lona faataamilosaga, ioe, ma paneta uma foi o loo i o latou ala masani ai ua molimau mai o loo i ai se Foafoa Silisiliese.

45 Ma e ui i lea e te fealuai solo ea, ma ta’ita’i ese loto o lenei nuu, ma molimau atu ia te i latou ua leai se Atua? Ma e ui i lea e te faafiti ea e faasaga i nei molimau uma? Ma sa fai mai o ia: Ioe, ou te faafitia, se’i vagana ai ua e faaali mai ia te a’u se faailoga.

46 Ma o lenei sa oo ina fai atu Alema ia te ia: Faauta, ua ou faanoanoa ona o le maaa o lou loto, ioe, i lou tetee pea o le agaga o le upumoni, o le a mafai ona faaumatia ai lou agaga.

47 Peitai faauta, e sili ona lelei le toesea o lou agaga nai lo le avea o oe ma ala e aumai ai le toatele o agaga i lalo i le faafanoga, e ala i lou pepelo ma au upu faaviivii; o lea afai e te toe faafiti, faauta o le a taia oe e le Atua, ina ia e gugū, ina ia le mafai ona e toe tatala o lou gutu, ina ia e le toe faasesēina lenei nuu.

48 O lenei sa fai mai Kori’oa ia te ia: Ou te le faafitia le i ai o se Atua, ae ou te le talitonu o loo i ai se Atua; ma ou te fai atu foi, e te le iloa o loo i ai se Atua; ma sei vagana ai ua e faaali mai ia te au se faailoga, ou te le talitonu.

49 O lenei sa fai atu Alema ia te ia: O le mea lenei o le a ou tuu atu ia te oe mo se faailoga, o le a taia oe ia e gugū, e tusa ma a’u upu; ma ou te fai atu, i le suafa o le Atua, ia taia oe ia e gugū, ina ia le toe mafai ona e tautala.

50 O lenei ina ua uma ona fai atu e Alema o nei upu, sa taia Kori’oa i le gugū, ua le mafai ona tautala o ia, e tusa ai ma upu a Alema.

51 Ma o lenei ina ua vaai atu le faamasino sili i lenei mea, sa ia tuu atu lona lima ma sa tusi atu ia Kori’oa, e faapea: Po ua e talitonu ea i le mana o le Atua? O ai na e manao ia faaali atu i ai e Alema lana faailoga? O lou manao ea ia faatiga e ia isi, e faaali atu ai ia te oe se faailoga? Faauta, ua ia faaali atu ia te oe se faailoga; ma o lenei e te toe fia finau atili ea?

52 Ma sa tuu mai e Kori’oa lona lima i luma ma ia tusi, fai mai: Ua ou iloa ua ou gugū, ona ua le mafai ona ou tautala; ma ua ou iloa e leai se mea vagana ai le mana o le Atua e mafai ona aumaia lenei mea i ou luga; ioe, ma sa ou iloa i taimi uma lava o loo i ai se Atua.

53 Ae faauta, sa faasesēina a’u e le tiapolo; ona sa sau o ia ia te a’u e foliga mai o se agelu, ma fai mai ia te a’u: Alu atu ma toe aumai lenei nuu, ona ua latou o atu sese uma e mulimuli i se Atua ua le mailoa. Ma sa fai mai o ia ia te a’u: E leai se Atua; ioe, ma sa ia a’oa’o mai ia te a’u mea e tatau ona ou fai atu ai. Ma sa ou a’oa’o atu ana upu; ma sa ou a’oa’o atu i latou ona sa logolelei i latou i le mafaufau faaletino; ma sa ou a’oa’o atu i latou, seia oo ina ou maua ai le manuia tele, sa oo ina ou talitonu moni ai lava ua moni i latou; ma o le pogai lenei sa ou teena ai le upumoni, seia oo lava ina ou aumaia lenei fetuu tele i ou luga.

54 O lenei ina ua uma ona ia fai mai o nei upu, sa ia aioi mai ia tatalo atu Alema i le Atua, ina ia mafai ona aveese o le fetuu mai ia te ia.

55 Peitai sa fai atu Alema ia te ia: Afai e aveese lenei fetuu mai ia te oe, o le a e toe ta’ita’i ese foi loto o lenei nuu; o lea, ia faia ia te oe e pei ona finagalo i ai le Alii.

56 Ma sa oo ina sa le aveeseina le fetuu mai ia Kori’oa; ae sa tuli ese o ia, ma sa alu atu mai lea fale i lea fale ma ’aisi mo ana meaai.

57 O lenei o le tala o le mea na tupu ia Kori’oa sa vave ona faasalalau atu i le laueleele atoa; ioe, sa auina atu e le faamasino sili le folafolaga i tagata uma i le laueleele, sa ta’u atu ai ia i latou o e sa talitonu i upu a Kori’oa, e ao ina latou salamo vave, ne’i oo mai ia lava faasalaga ia te i latou.

58 Ma sa oo ina latou talitonu uma i le amioleaga o Kori’oa; o lea sa latou toe liliu uma ai i le Alii; ma o lenei mea na faaiu ai le amioletonu e tusa ma le mea na faia e Kori’oa. Ma sa fealuai solo Kori’oa mai lea fale i lea fale, e aisi meaai mo lona tausiga.

59 Ma sa oo ina a’o alu atu o ia i totonu o le nuu, ioe, i totonu o se nuu o ē sa latou vavae ese i latou lava mai tagata sa Nifaē ma latou ta’ua i latou lava o sa Soramā, ona sa ta’ita’ia i latou e se tagata sa igoa ia Sorama—ma a’o alu atu o ia i totonu o i latou, faauta, sa taia o ia ma soli i lalo, seia oo ina oti o ia.

60 Ma ua faapea ona tatou vaai ai i le iuga o ia o lē na te faapi’opi’o ala o le Alii; ma ua faapea ona tatou vaai ai e le lagolagoina e le tiapolo ana fanau i le aso gataaga, ae vave ona ia toso i lalo i latou i seoli.