1 Ka sa yaco ni ra sa lako yani, ka tekivu me vunautaka na vosa ni Kalou vei ira na tamata, curuma yani na nodra veivalenilotu, kei na nodra veivale; io, era sa vunautaka tale ga na vosa ena nodra gaunisala.

2 Ka sa yaco ni sa oti na cakacaka vagumatua ena kedra maliwa, eratou sa tekivu rawata na qaqa ena kedra maliwa na tamata ena ivakatagedegede dravudravua; ia raica, era sa vakasavi tani mai na nodra veivalenilotu me baleta na beci ni nodra isulu—

3 O koya sa sega kina ni vakatarai me ra curu ki na nodra valenilotu me qarava na Kalou, ni ra nanumi ni ra sa dukadukali; ia era sa dravudravua; io, era nanuma na wekadra ni sega na kedra yaga; o koya era sa dravudravua ena iyau vakavuravura; ka ra sa yalomalumalumu tale ga.

4 Oqo, ni sa veivakavulici ka vosa tiko ko Alama mai na delana ko Onita, era sa lako vakalewelevu mai vua na tamata, ko ira ka keimami dauvosa vei ira, ka ra yalomalumalumu ni ra dravudravua ena iyau vakavuravura.

5 Ia era sa lako sara mai vei Alama; sa kaya ko koya ka liutaki ira: Raica, a cava me ra kitaka na wekaqu oqo, ni ra sa beci mai vei ira na tamata kecega me baleta na nodra dravudravua, io, sa vakauasivi cake ko ira na neimami bete; ni ra dau vakasavi keimami tani mai na neimami valenilotu na valenilotu keimami a oga kina vakalevu ena kena tara; ia era sa vakasavi keimami tani mai kina ni keimami sa rui dravudravua; sa sega na vanua me keimami qarava kina na neimami Kalou; ia raica, a cava me keimami kitaka?

6 Ia ni sa rogoca oqo ko Alama, sa vuki yani ka rau veirai mata, a sa marau vakalevu sara; ni sa raica ni ra sa vakayalomalumalumutaki ena vuku ni veika rarawa sa yaco vei ira, ia era sa vakavakarau tu me ra rogoca na vosa.

7 O koya sa sega kina ni kitaka e dua na ka vei ira na lewevuqa; ia sa dodoka yani na ligana, ka tagi yani vei ira sa raica, ko ira era sa veivutuni dina sara, ka kaya vei ira:

8 Au raica ni ko ni sa yalomalumalumu; ia ko ni sa kalougata, kevaka sa vakakina.

9 Raica sa kaya na nomuni iliuliu, A cava me keimami kitaka?—ni keimami sa vakasavi tani mai na neimami valenilotu, ka sa sega ni rawa me keimami qarava na neimami Kalou.

10 Raica au sa kaya vei kemuni, Ko ni sa nanuma li ni sa sega ni rawa mo ni qarava na nomuni Kalou ka vakavo ga ena nomuni valenilotu?

11 Ia me kena ikuri, me’u taroga mada, ko ni sa nanuma li mo ni qarava wale ga na Kalou vakayadua ena veimacawa?

12 Au sa kaya vei kemuni, sa yaga sara na nomuni vakasavi tani mai na nomuni valenilotu, me yaco kina mo ni yalomalumalumu, ka vulica na yalomatua; ni sa kilikili mo ni vulica na yalomatua; ia me baleta na nomuni a vakasavi tani, era sa beci kemuni kina na wekamuni ena nomuni dravudravua, sa vakavuna kina mo ni yalo lokumi; ni sa gadrevi mo ni yalomalumalumu kina.

13 Ia oqo, baleta ni sa vakasaurarataki mo ni yalomalumalumu ko ni sa kalougata kina; ni tamata ena so na gauna, kevaka sa vakasaurarataki me yalomalumalumu, ena vakasaqara na veivutuni; ia oqo sa dina sara, ko koya yadua sa veivutuni ena raica na loloma cecere; ia ko koya sa raica na loloma cecere ka vosota me yacova na ivakataotioti ko koya oqo ena vakabulai.

14 Ia oqo, me vaka au sa kaya vei kemuni, me baleta ni ko ni sa vakasaurarataki mo ni vakayalomalumalumutaki kemuni ko ni na kalougata kina, ko ni sa sega li ni nanuma ni ra na kalougata vakalevu cake ko ira era sa vakayalomalumalumutaki ira vakataki ira ena vuku ni vosa?

15 Io, ko koya sa yalomalumalumu vakaidina, ka veivutunitaka na nona ivalavala ca, ka vosota me yacova na ivakataotioti, ko koya ga oqo ena vakalougatataki—io, sa na kalougata vakalevu cake mai vei ira era a vakasaurarataki me ra vakayalomalumalumutaki ira ena vuku ni levu ni nodra dravudravua.

16 O koya, era sa kalougata kina ko ira era vakayalomalumalumutaki ira ga ka sega ni ra vakasaurarataki me ra yalomalumalumu; se, ena dua tale na kena vosa, sa kalougata ko koya sa vakabauta na vosa ni Kalou, ka sa papitaiso ka sega vua na yalokaukauwa, io, ka a sega ni kau mai me kila na vosa, se me vakasaurarataki me kila, ni se bera ni vakabauta.

17 Io, era sa lewevuqa era sa kaya: Kevaka ko sa vakaraitaka vei keimami e dua na ivakatakilakila mai lomalagi, ia keimami na qai kila vakaidina; ka keimami na qai vakabauta.

18 Me’u taroga mada, oqo li na vakabauta? Raica, au sa kaya vei kemuni, E segai; ia kevaka e dua na tamata sa kila e dua na ka sa sega ni dua na vuna me vakabauta kina, ni sa kila ga ko koya.

19 Ia oqo, ena levu cake na kena ca vei koya sa kila na inaki ni Kalou ka sega ni cakava, mai vei koya sa vakabauta ga, se sa tu e dua na vuna me vakabauta kina, ka qai lutu ki na talaidredre?

20 Oqo na ka mo ni vakatulewa kina. Raica, au sa kaya vei kemuni, e sa vaka e dua na liga ki na dua tale; ka ena vakakina na tamata yadua me vaka na nona ivalavala.

21 Ia oqo me vaka au sa tukuna me baleta na vakabauta—na vakabauta e sega ni noda kila taucoko vakavinaka na ka; o koya kevaka sa tu vei kemuni na vakabauta ko ni na vakanuinuitaka na veika e sega ni laurai, ia era ka dina.

22 Ia oqo, raica, au sa kaya vei kemuni, ni’u gadreva mo ni nanuma, ni sa yalololoma na Kalou vei ira kecega sa vakabauta na yacana; o koya sa gadreva sara ko koya, ena imatai ni gauna, mo ni vakabauta, io, na nona vosa.

23 Ia oqo, sa solia na nona vosa mai vua na agilosi ki vei ira na tamata, io, e sega walega vei ira na tagane ia vei ira talega na yalewa. Ia e sega ni ko koya kece oqo; ko ira na gone lalai e tu talega vei ira na vosa e soli vei ira ena vuqa na gauna, me vakataqayataki ira na yalomatua kei na vuku.

24 Ia oqo, oi kemuni na wekaqu lomani, ni ko ni sa gadreva mo ni kila mai vei au, a cava ko ni na cakava me baleta ni ko ni sa vakararawataki ka vakasavi tani—oqo au sega ni gadreva mo ni nanuma ni’u nakita me’u vakalewai kemuni ga me vaka na veika dina—

25 Ni’u sa sega ni kila ni koi kemuni kece ko ni sa vakasaurarataki mo ni vakayalomalumalumutaki kemuni; ni’u sa vakabauta vakaidina ni tiko e so vei kemuni era rawa ni vakayalomalumalumutaki ira, veitalia ga se ituvaki ni bula cava era tu kina.

26 Oqo, me vaka au sa tukuna me baleta na vakabauta—ni sega ni noda kila taucoko vakavinaka na ka—e dina ni sa vakakina na noqu vosa. Ko ni na sega ni kila taumada na kena dina, me taucoko sara kina, me vaka ga ni vakabauta ko ya na noda kila vakavinaka.

27 Ia raica, kevaka mo ni yadra mada ka vakayadrata na yagomuni, mo ni vakatovotovotaka kina na noqu vosa, ka vakatovolea vakalailai na vakabauta, io, kevaka mada ga ko ni gadreva mo ni vakabauta, mo ni laiva na gagadre oqo me kadre e lomamuni, me yacova ni ko ni sa vakabauta ena kena ivakarau ka rawa mo ni vakabauta kina e dua na tiki lailai ni noqu vosa.

28 Oqo, me da vakatautauvatataka mada na vosa kei na dua na sorenikau. Ia, kevaka ko ni sa vakatara me tei e lomamuni e dua na sorenikau, raica, kevaka sa sorenikau dina, se sorenikau vinaka, sa na tubu, ke ko ni na sega ni biuta laivi ena nomuni tawa vakabauta, ka vorata na Yalo ni Turaga, raica, ena tekivu me tubu cake mai e lomaseremuni; ia ni ko ni sa vakila na tubu cake oqo, ko ni na kaya e lomamuni—Sa dodonu me sorenikau vinaka dina oqo, se sa vosa vinaka, raica sa vakalevutaka na yaloqu kei na yagoqu, io, sa vakararamataka na noqu kila ka, io, sa vakatekivu me kana vinaka vei au.

29 Oqo raica, ena sega li ni vakalevutaka na nomuni vakabauta? Au sa kaya vei kemudou, Io; sa sega ni tubu mo dou kila vakavinaka sara.

30 Ia raica me vaka ga na sorenikau ni sa buroro, ka kadre, ka tekivu me tubu, ka qai rawa ni ko ni kaya ni sa sorenikau vinaka; ia raica sa buroro, ka kadre, ka tekivu me tubu. Ia oqo, raica, ena sega li ni vakaukauwataka na nomuni vakabauta? Io, ena vakaukauwataka na nomuni vakabauta: ni ko ni na kaya, au kila ni sa dua na sorenikau vinaka oqo; ia raica sa buroro ka vakatekivu me tubu.

31 Ia oqo, raica, dou sa kila vakaidina ni sa sorenikau vinaka? Au sa kaya vei kemuni: Io; ni veisorenikau kecega ena vuataka ga na vua e tautauvata kaya.

32 O koya, kevaka sa tubu na sorenikau, sa vinaka, ia kevaka sa sega ni tubu, raica, sa sega ni vinaka, e sa na biu laivi.

33 Ia oqo, raica, ni ko ni sa vakatovolea na vakatovotovo, ka tea na sorenikau, ena buroro ka kadre, ka na vakatekivu me tubu, e dodonu mo ni kila ni sa sorenikau vinaka.

34 Ia oqo, raica, sa taucoko li na nomunikila? Io, sa taucoko na nomuni kila ena ka oqo, ka sa ka walega na nomuni vakabauta; ia sa baleta oqo ni ko ni sa kila, sa buroro e yalomuni na vosa, ka ko ni sa kila talega ni sa tubu cake mai, ka sa vakararamataka na nomuni kila, ka sa vakarabailevutaki na nomuni vakasama.

35 Ia e dina li na ka oqo? Au sa kaya vei kemuni, Io, baleta ni sa rarama; a ka kecega sa rarama sa ka vinaka, baleta ni rawa me kilai, o koya mo ni kila ni sa ka vinaka oqo; ia raica, ni sa oti na nomuni tovolea na rarama oqo, ena qai ka taucoko li na nomuni kila?

36 Raica au sa kaya vei kemuni, E segai; ia me tudei na nomuni vakabauta, raica, o ni sa qai vakatovolea wale ga oqo na nomuni vakabauta me vaka na sorenikau ena kena vakatovotovotaki mo ni kila se sa sorenikau vinaka.

37 Ia raica ni sa tubu mai na vunikau, ni na qai kaya: Me da qarava vinaka mada, me ti na wakana ka tubu cake ka vua. Raica oqo kevaka ko ni sa qarava vinaka, sa na ti na wakana ka tubu cake ka vua sara.

38 Ia kevaka ko ni sa vakaweleweletaka na vunikau ka sega ni qarava, raica ena sega ni dua na wakana; ni sa katakata na siga sa malai, ni sa sega na wakana, sa raqosa sara, ni na qai cavuta ka biuta laivi.

39 Oqo, e sega ni kena ibalebale ni sega ni sorenikau vinaka, se na vuana me na vuataka me na sega ni gadrevi vakalevu; baleta ga ni sa matemate na nomuni qele ka ko ni sega ni vakabulabulataka na vunikau, o koya ena sega na vuanikau ena laukana mai kina.

40 Sa vakakina, kevaka dou sa sega ni vakabulabulataka na vosa, ka rai ki liu ena mata ni vakabauta ki na vuanikau ko ya, ko ni na sega sara ni betia na vua ni vunikau ni bula.

41 Ia kevaka mo ni vakabulabulataka na vosa, io, ka vakabulabulataka na vunikau ni sa tekivu me tubu, ena nomuni vakabauta kei na cakacaka vakaukauwa, ka rai ki liu ena yalo vosota ki na vua ni vunikau ko ya, ena qai ti na wakana; raica ena qai vunikau me tubu cake ki na bula tawavakaiyalayala.

42 Ia ena vuku ni nomuni gugumatua kei na vakabauta kei na vosota na vosa ka vakabulabulataka, me na qai ti na wakana e lomamuni, raica, qai yaco na gauna mo ni na betia na vuana ko ya, na ka sa taleitaki duadua, ka sa kamica duadua vei ira na ka kamikamica taucoko, ka sa vulavula sara vei ira na ka vulavula kecega, io, ka sa savasava sara mai vei ira na ka savasava kecega; ka ko ni na kania na vuanikau oqo me yacova sara ni ko ni sa mamau, ia ko ni na sega ni viakana tale, se viagunu.

43 Ia oi kemuni na wekaqu, mo ni na tauca vakaidina na vua ni nomuni vakabauta, na nomuni gugumatua kei na nomuni vosota, kei na vosota vakadede, ena nomuni waraka tiko na vunikau me vuataka na vuana vei kemuni.