1 Ut anajwan kik’ulman naq chirix naq laj Alma kixye li aatin a’in reheb’, kichunla chi ch’och’, ut kiwakli laj Amulek ut ki’ok chixtzolb’aleb’, ut kixye:

2 Ex was wiitz’in, nink’oxla naq moko naru ta naq maak’a’ xenaw chirix li k’a’aq re ru ak yeeb’il chirix lix k’ulunik li Kristo, li k’utb’il qab’aan naq Ralal li Dios; relik chi yaal, ninnaw naq kik’ute’ cheru li na’leb’ a’in chi naab’al naq maji’ nekejach chaq eerib’ sa’ qayanq.

3 Ut jo’ xepatz’ re li was wiitz’in raaro inb’aan naq tixk’e chenaw k’a’ru tento teeb’aanu, xb’aan lee ch’a’ajkilal; ut a’an ki’aatinak b’ayaq re xkawresinkil lee k’a’uxl; relik chi yaal, ut kirelaji cheru naq wanq eepaab’aal ut eekuyum—

4 Relik chi yaal, naq tz’aqalaq eepaab’aal re rawb’al li aatin sa’ lee ch’ool, re naq teeyal xtz’ilb’al rix lix chaab’ilal.

5 Ut laa’o xqak’e reetal naq li nimla patz’om li wan sa’ eek’a’uxl a’an ma wan li aatin rik’in li Ralal li Dios, malaj ut ma maajun Kristo taawanq.

6 Ut laa’ex xek’e ajwi’ reetal naq lin komon xk’ut xyaalal cheru, sa’ k’iila na’leb’, naq li aatin wan rik’in li Kristo choq’ re li kolb’a-ib’.

7 Lin komon xye resil li raatin laj Tzenos, naq li tojb’al-ix nachal xb’aan li Ralal li Dios, ut resil ajwi’ li raatin laj Tzenok; ut jo’kan ajwi’ xye resil laj Moises, re xk’utb’al xyaalal naq yaal li k’a’aq re ru a’in.

8 Ut anajwan, k’ehomaq reetal, laa’in tinch’olob’ cheru injunes naq yaal li k’a’aq re ru a’in. K’ehomaq reetal, ninye eere, naq ninnaw naq taachalq li Kristo sa’ xyanqeb’ li ralal xk’ajoleb’ li winq, re xk’ulb’al sa’ xb’een a’an li q’etok aatin re lix tenamit, ut naq a’an tixtoj rix lix maak li ruchich’och’, xb’aan naq li Qaawa’ Dios kiyehok re.

9 Xb’aan naq aajel ru naq taa’uxmanq jun xtojb’al rix li maak; xb’aan naq jo’ chanru xnimal ru li na’leb’ k’uub’anb’il xb’aan li Junelik Dios, tento taa’uxmanq jun xtojb’al rix li maak, malaj ut chixjunileb’ li winq tento te’oso’q chi maak’a’ xjalb’al; relik chi yaal, chixjunileb’ kawujenaqeb’; relik chi yaal, chixjunileb’ t’anenaqeb’ ut sachenaqeb’, ut tento te’oso’q wi ink’a’ taa’uxmanq xtojb’al rix li maak li aajel ru naq taa’uxmanq.

10 Xb’aan naq aajel ru naq taawanq jun li xnimal ru ut roso’jikil mayej; relik chi yaal, moko mayej ta re winq, chi moko re xul, chi moko k’a’ruhaq paay chi xik’anel xul; xb’aan naq maawa’aq winqil mayej; tento b’an naq taawanq li mayej chi maak’a’ roso’jik, ut chi junelik.

11 Anajwan maajun winq wan li naru chixmayejankil xkik’el li taatoje’q wi’ rix xmaak jalan chik. Anajwan wi junaq winq nakamsin, k’ehomaq reetal, li qachaq’rab’, li tiik ru, ma taarisi tab’i’ xyu’am li riitz’in? Ninye eere, Ink’a’.

12 Li chaq’rab’ naxpatz’ b’an xyu’am li ani xkamsin; jo’kan naq maak’a’ chik wan, ka’ajwi’ jun xtojb’al rix li maak li maak’a’ roso’jik, li tz’aqalaq choq’ re lix maak li ruchich’och’.

13 Jo’kan naq aajel ru naq taawanq jun xnimal ru ut roso’jikil mayej, ut chirix a’an taawanq, malaj aajel ru naq taawanq roso’jik li hoyok kik’; toja’ naq tz’aqlojenaqaq ru lix chaq’rab’ laj Moises, relik chi yaal, taatz’aqloq ru chixjunil, li junjunq xtz’iib’ul ut xtz’uqil, ut maajun raqal sachb’ilaq.

14 Ut k’ehomaq reetal, a’in tz’aqal xyaalalil li chaq’rab’, li junjunq raqal naxk’ut xyaalal li xnimal ru ut roso’jikil mayej a’an; ut li xnimal ru ut roso’jikil mayej, a’anaq li Ralal li Dios, relik chi yaal, maak’a’ roso’jik ut wan chi junelik.

15 Ut chi jo’kan a’an tixk’am chaq li kolb’a-ib’ reheb’ chixjunil li te’paab’anq re lix k’ab’a’; a’in ut rajb’al li roso’jikil mayej a’in, re xk’amb’al chaq lix sa’ ch’oolej aj uxtaan, li nanumta sa’ xb’een lix patz’om li tiik ruhil na’leb’, ut naxk’e jun b’e reheb’ li winq re taaruuq te’wanq xpaab’aal choq’ re li jalb’a-k’a’uxlej.

16 Ut chi jo’kan li uxtaan naru chixk’eeb’al li k’a’ru elajinb’il xb’aan li tiik ruhil na’leb’, ut naxsutiheb’ rix rik’in ruq’ li kole’k, a’ut li ani maajun paab’aal naxk’anjela re xjalb’al xk’a’uxl, k’eeb’il sa’ xb’een chixjunil li chaq’rab’ chirix li k’a’ru elajinb’il xb’aan li tiik ruhil na’leb’; jo’kan naq ka’ajwi’ re li ani wan xpaab’aal choq’ re li jalb’a-k’a’uxlej na’uxman li xnimal ru ut junelikil k’uubanb’il na’leb’ re li tojb’al-ix.

17 Jo’kan ut, li Dios chixk’ehaq taxaq eere laa’ex, ex was wiitz’in, naq chex’ok chixk’anjelankil lee paab’aal choq’ re li jalb’a-k’a’uxlej, re tex’ok chixpatz’b’al lix santil k’ab’a’, re naq a’an taaruxtaana eeru;

18 Relik chi yaal, cherelaji ruxtaanankil eeru chiru, xb’aan naq a’an kaw xmetz’ew chi kolok.

19 Relik chi yaal, tuulanob’resihomaq eerib’, ut chexkanaaq sa’ li tijok chiru a’an.

20 Elajinqex chiru naq wankex sa’ lee ch’och’, relik chi yaal, sa’ xb’een chixjunil lee ketomq.

21 Elajinqex chiru sa’eb’ lee rochoch, relik chi yaal, sa’ xb’een chixjunil lee junkab’al, eq’la, wa’leb’, ut ewu.

22 Relik chi yaal, elajinqex chiru chirix lix wankilaleb’ li xik’ neke’ilok eere.

23 Relik chi yaal, elajinqex chiru chirix laj tza, a’an aj xik’ ilonel re chixjunil li tiikilal.

24 Elajinqex chiru sa’ xb’een li awb’il sa’ lee ch’och’, re tex’usaaq rik’in.

25 Elajinqex chirix lix ketomq lee ch’och’, re taaruuq te’tamq.

26 A’b’anan moko ka’aj ta wi’ a’in; tento teehoy lee raam sa’ lee tz’aptz’ookil na’aj, ut sa’ lee muqmuukil na’aj, ut sa’ lee yamyookil ch’och’.

27 Relik chi yaal, ut naq ink’a’ nekex’elajin chiru li Qaawa’, chiwanq eech’ool chi nujenaq, ut k’eeb’ilaq junelik chi tijok chiru a’an choq’ re lee chaab’ilal, ut re ajwi’ xchaab’ilaleb’ li ani wankeb’ chesutam.

28 Ut anajwan k’ehomaq reetal, ex was wiitz’in raarookex inb’aan, ninye eere, meek’oxla naq a’in tz’aqal; xb’aan naq chirix naq xeb’aanu chixjunil li k’a’aq re ru a’in, wi neketz’eqtaana li maak’a’ k’a’ru re, ut li t’ust’u, ut ink’a’ nekerula’ani li yaj ut li ch’a’ajkilanb’il, ut ink’a’ nekek’e xkomon li k’a’ru eere wi wan, reheb’ li ani te’ajoq ru—Ninye eere, wi maajun reheb’ a’ k’a’aq re ru a’in nekeb’aanu, k’ehomaq reetal, maak’a’ xyaalal lee tij, ut maak’a’ na’ok wi’ eere, ut chanchanex eb’ laj ka’pak’al-u, li neke’tz’eqtaanank re li paab’aal.

29 Jo’kan ut, wi ink’a’ najultiko’ eere wank jo’ aj rahonel, chanchanex li tz’aj, li natz’eqe’ xb’aaneb’ laj k’uub’anel ch’iich’ (xb’aan naq maak’a’ na’ok wi’) ut nayeq’e’ rub’el roqeb’ li winq.

30 Ut anajwan, ex was wiitz’in, nawaj raj naq chirix xk’ulb’al xk’ihal li k’utuk xyaalal, rik’in naq eb’ li loq’laj tz’iib’anb’il hu neke’xch’olob’ xyaalal li k’a’aq re ru a’in, chexchalq ut chex’uuchinq choq’ re li jalb’a-k’a’uxlej.

31 Relik chi yaal, nawaj raj naq chexchalq ut naq ink’a’ chik teekawob’resi eeraam; xb’aan naq k’ehomaq reetal, anajwan xq’ehil ut xkutankil lee kolb’al; ut chi jo’kan, wi teejal eek’a’uxl ut ink’a’ teekawob’resi lee raam, sa’ junpaat taa’uxmanq choq’ eere li nimla k’uub’anb’il na’leb’ re li tojb’al-ix.

32 Xb’aan naq k’ehomaq reetal, li yu’am a’in a’an xq’ehil re naq te’xkawresi rib’ li winq chixk’ulb’al li Dios; relik chi yaal, k’ehomaq reetal, lix kutankil li yu’am a’in a’an li kutan tento te’xb’aanu wi’ li winq xk’anjeleb’.

33 Anajwan ut, jo’ xinye eere junxil, rik’in naq xek’ul k’iila k’utuk xyaalal, chi jo’kan, nintz’aama cheru naq meeb’ay xkutankil lix jalb’al eek’a’uxl toj sa’ roso’jik; xb’aan naq chirix xkutankil li yu’am a’in, li k’eeb’il qe re xkawresinkil qib’ choq’ re li junelik q’e kutan, k’ehomaq reetal, wi ink’a’ naqachaab’ilob’resi li qakutan naq wanko sa’ li yu’am a’in, chirix a’an nachal li q’ojyin re aak’ab’, li maajun k’anjel naru taab’aanumanq wi’.

34 Moko taaruuq ta teeye, naq k’amb’ilex sa’ li xuwajel ch’a’ajkilal a’an, naq tinjal ink’a’uxl, naq tinsutq’iiq rik’in inDios. Ink’a’, moko taaruuq ta teeye a’in; xb’aan naq li musiq’ej ajwi’ a’an li na’eechanink re lee tib’el sa’ li hoonal naq nekex’el chaq sa’ li yu’am a’in, li musiq’ej ajwi’ a’an taawanq xwankil chireechaninkil lee tib’el sa’ li junelikil ruchich’och’ a’an.

35 Xb’aan naq k’ehomaq reetal, wi xeb’ay xkutankil lix jalb’al eek’a’uxl toj sa’ li kamk, k’ehomaq reetal, okenaqex rub’el xwankil lix musiq’ laj tza, ut a’an nekexxtz’ap choq’ reechanihom; jo’kan naq lix Musiq’ li Qaawa’ risihom rib’ eerik’in, ut maak’a’ xna’aj eerik’in, ut laj tza wan anchal xwankil sa’ eeb’een; ut a’in xwanjikeb’ laj maak sa’ roso’jik.

36 Ut a’in ninnaw, xb’aan naq li Qaawa’ kixye naq a’an moko nawan ta sa’eb’ li ochoch moko sant ta, sa’ xch’ooleb’ b’an li tiikeb’ xch’ool nawan; relik chi yaal, ut kixye ajwi’ naq eb’ li tiikeb’ xch’ool te’k’ojlaaq sa’ li rawa’b’ejihom, re ink’a’ chik te’elq chaq; te’saqob’resiiq b’an li raq’eb’ rik’in xkik’el li Karneer.

37 Ut anajwan, ex was wiitz’in raarookex inb’aan, nawaj naq taajultiko’q eere li k’a’aq re ru a’in, ut naq teesik’ xk’anjelankil eekolb’al rik’in eexiw chiru li Dios, ut naq ink’a’ chik teeye naq maak’a’aq xk’ulunik li Kristo;

38 Naq ink’a’ chik teewech’ rix li Santil Musiq’ej, naq teek’ul b’an, ut teek’ul sa’ eeb’een lix k’ab’a’ li Kristo; naq teetuulanob’resi eerib’ toj sa’ li poqs, ut teeloq’oni li Dios, sa’ b’araq chi na’ajej wankex wi’, sa’ musiq’ej ut rik’in yaal; ut naq texwanq chi b’antioxink wulaj wulaj, xb’aan xk’ihal li uxtaan ut li osob’tesink li naxk’e sa’ eeb’een.

39 Relik chi yaal, ut nintz’aama cheru, ex was wiitz’in, naq chexyo’leq rik’in tijok junelik, re naq ink’a’ texjalb’ehiiq xb’aan li aaleek xb’aan laj tza, re naq a’an ink’a’ taanumtaaq sa’ eeb’een, re naq moko texwanq ta chi taqlanb’il xb’aan a’an sa’ roso’jik li kutan, xb’aan naq k’ehomaq reetal, a’an maajun chaab’ilal naxk’e choq’ eeq’ajkamunkil.

40 Ut anajwan ex was wiitz’in raarookex inb’aan, nawaj xtz’aamankil cheru naq chiwanq eekuyum, ut naq chekuy rik’in chaab’ilal li k’iila paay chi ch’a’ajkilal; naq meehob’eb’ li neke’isink chaq eere xb’aan xnumtajenaqil eeneb’a’il, maare anchal tex’ok choq’ aj maak chanchaneb’ a’an;

41 Naq chiwanq b’an eekuyum, ut chenumsi rik’in chaab’ilal li ch’a’ajkilal a’an, rik’in jun eekawil yo’onihom naq sa’ junaq kutan texhilanq chiru chixjunil lee ch’a’ajkilal.