1 Oqo na luvequ; au na tukuna tale vei iko e vica na ka; ni’u kila ni ko nuiqawaqawataka tiko na veika me baleta na nodra tucake tale na mate.

2 Raica, au sa kaya vei iko, ena sega ni dua na tucake tale—se, me’u kaya, ena dua tale na kena vosa, ena sega ni tokara na yago mate oqo na yago e tawa mate rawa, se me tokara na yago vuca oqo na yago e sega tale ni vuca rawa—me yacova ni sa lako oti mai na Karisito.

3 Raica, sai koya ga sa yaco rawa kina na nodra tucake tale na mate. Ia raica, na luvequ, e sa bera tiko ni yaco na tucake tale. Au na tukuna vei iko e dua na ka vuni; ia, e vuqa tale na veika vuni era se maroroi tu, ka sa kila duadua ga na Kalou. Ia au na vakaraitaka vei iko e dua na ka au a vakataroga matua sara vua na Kalou me’u kila rawa—sai koya na ka e baleta na tucake tale.

4 Raica, sa lokuci tu e dua na gauna me ra na lako kece mai kina na mate. Ia sa sega ni dua e kila na kena gauna; sa kila duadua ga na Kalou na gauna sa lokuci tu.

5 Oqo, kevaka me vakadua ga, se vakarua, se vakatolu na gauna, me na lako mai kina mai na mate na tamata ena sega ni dua na ka oqori; ni sa kila tu na Kalou na veika kece oqo; ia sa rauti au ga me’u kila ni na vaka dina kina—ni sa lokuci tu e dua na gauna me ra na tucake tale kina mai na mate na tamata kecega.

6 Oqo e sa dodonu me dua tiko na gauna ena kedrau maliwa na gauna ni mate kei na gauna ni tucake tale.

7 Ia oqo me’u taroga mada, a cava ena yaco ki na yalo ni tamata mai na gauna ni mate ki na gauna sa lokuci tu me yaco kina na tucake tale?

8 Oqo kevaka sa levu na gauna e lokuci tu me na tucake kina na tamata, e sega ni dua na ka oqori; ni ra na sega ni mate vata ga ena dua na gauna, ena sega ni dua na ka oqo; sa vaka me dua kecega na siga vua na Kalou na ka kece oqo, ni sa vakarautaki ga na gauna vei ira na tamata.

9 O koya, sa tu kina na gauna e lokuci me tucake mai kina mai na mate na tamata; ia sa tiko na gauna ena kedrau maliwa na gauna ni mate kei na gauna ni tucake tale. Ia oqo, au a cikeva matua vua na Turaga me’u kila na ka ena yaco vei ira na yalo ni tamata ena maliwa ni gauna oqo; ia sa vakaoqo na ka au sa kila.

10 Ia ni sa yaco mai na gauna me ra na tucake kina na tamata kecega, era na qai kila ni sa kila tu na Kalou na gauna sa lokuci tu vua na tamata.

11 Oqo, me baleta na ituvaki ni yalo ena maliwa ni mate kei na tucake tale—Raica, sa vakaraitaka oti vei au e dua na agilosi, ni yalo ni tamata kecega, ena gauna ga era biuta kina na yago mate oqo, io, na yalo ni tamata kecega, se era vinaka se ca, era na kau lesu ki na nodra itikotiko vua na Kalou o koya ka a solia vei ira na bula.

12 Ia ena qai yaco ni yalodra ko ira era sa ivalavala dodonu, era na ciqomi ena dua na itutu ni marau, ka vakatokai ko parataisi, e dua na itutu ni vakacegu kei na veisaututaki, na vanua era na vakacegu kina mai na nodra leqa kecega, kei na ka kece era dau kauwaitaka, kei na nodra rarawa;

13 Ia ena qai yaco ni yalodra ko ira era dau caka ca, io, ko ira sa ca—ia raica, sa sega ni dua na nodra vanua se tikina ena Yalo ni Turaga; ia raica, era a digitaka na caka ca mai na vinaka; o koya a curumi ira kina na yalo ni tevoro, ka na taukena na nodra vale—ia sai ira oqo era na kau tani yani ki na butobuto e tautuba me ra na tagi, ka tagiyaso, ka vakasequruqurubati, io oqo sa baleta na nodra caka ca, ka vakavuna me kauti ira vakavesu yani na tevoro.

14 Ena vakaoqo na itutu ni yalodra na tamata caka ca, io, ena butobuto, kei na itutu e rui vakaloloma, kei na rere levu, ni ra sa waraka na cudru waqawaqa rerevaki ni Kalou me tau vei ira; raica era na tu ena itutu oqo, ia era na tiko mai parataisi ko ira na ivalavala dodonu, me yacova na gauna ni nodra tucake tale.

15 Ia, era kila tu e so ni itutu ni marau kei na itutu ni rarawa ni yalo, ni bera na tucake tale, e a dua na imatai ni tucake tale. Io, au vakadinata ni rawa ni vakatokai me dua na tucake tale, na vakaturicake ni yalo se na yago vakayalo kei na nodrau sa lesi ki na marau se rarawa, me vaka na vosa sa cavuti oti.

16 Ka raica, ni sa tukuni tale, ni na dua na imatai ni tucake tale, ia era na tucake tale kina ko ira era a bula e liu, ko ira era sa bula tiko, kei ira era na qai muri mai, me yacova na gauna sa tucake tale kina mai na mate na Karisito.

17 Ia, eda na sega ni rawa ni kaya me sa imatai ni tucake, na ka sa tukuni tiko ena kena ivakarau oqo, ni sa rawa me nodra tucake tale na yalo kei na nodra lesi ki na marau se rarawa. Mo kakua ni nanuma ni sa kena ibalebale dina oqori.

18 Raica, au sa kaya vei iko, E segai sara; ia sa ibalebale dina ni tucake tale, na cokoti vata tale ni yalo kei na yago me tekivu mai vei ira na tamata ena gauna i Atama ka yacova mai na nona tucake tale na Karisito.

19 Ia, kevaka ena cokotivata tale na yalodra kei na yagodra ko ira sa, i valavala dodonu kei ira na dau caka ca, au sega ni kaya rawa; sa rauta ga, ni’u sa kaya era na lako kece mai; se ena dua tale na vosa, ena yaco na nodra tucake tale ni se bera na nodra tucake tale ko ira era na qai mate ni sa oti na nona tucake tale na Karisito.

20 Oqo, na luvequ, au sega ni kaya ni nodra tucake tale ena yaco ena tucake tale i Karisito; ia raica, au tukuna ga me vaka na noqu nanuma, ni yalo kei na yago era na cokoti vata, ko ira na yalododonu, ena tucake tale i Karisito, kei na nona lako cake ki lomalagi.

21 Ia au sega ni kaya, se era na tucake vata kei Koya se era na qai muri; ia au sa rawa ga ni kaya ni tiko e dua na gauna, mai na maliwa ni mate kei na tucake tale ni yago, oqo na gauna ena tiko vakawawa kina na yaloda ena marau se rarawa me yacova na gauna sa lokuca na Kalou me ra lako mai kina na mate, ka me rau cokoti vata tale kina, na yalo kei na yago, me ra na tu ena mata ni Kalou, ka lewai me vaka na nodra ivalavala.

22 Io, ena yaco kina na kedra vakalesui tale na veika kece ki na kedra itutu e liu, me vaka na nodra vosa na parofita.

23 Ena qai vakalesui tale na yalo ki na yago, kei na yago ki na yalo; io, ena semati vata na liga kei na yava kei na veisema ni yago kecega; io, ena sega ni yali kina e dua mada ga na drauniulu; ia ena vakalesui tale na veika kece ki na kedra itutu dina.

24 Ia oqo na luvequ, na vakalesui era a sa tukuna oti tu na parofita—

25 Ia era na qai serau yani na ivalavala dodonu ena matanitu ni Kalou.

26 Ia raica, ena dua na mate rerevaki ena yaco vei ira na tamata ca; ni ra na mate me vaka na veika ni ivalavala dodonu; ni ra sa dukadukali, ia ena sega ni dua na ka dukadukali me na taukena na matanitu ni Kalou; io era sa biu laivi yani, ka lesi me ra vakaivotavota ena vua ni nodra cakacaka se na nodra buno, o koya e sa ca; ia era sa gunuva na sosoko ni bilo wiwi.