1 Nao boe blong mi, hem ia i samting moa we bae mi talem long yu; from mi luksave we tingting blong yu i wari long saed blong fasin blong laef bakegen long ded blong ol dedman.

2 Luk, mi talem long yu, se i no gat laef bakegen long ded—o, bae mi talem long ol narafala toktok, se bodi ia i no save kam bodi we i nomo save ded, samting ia we i blong roten i no save kam we bae i nomo roten blong oltaem—kasem nomo afta long taem we Kraes i kam.

3 Luk, hem i mekem ol dedman oli kasem laef bakegen long ded. Be luk boe blong mi, laef bakegen long ded i no save hapen yet. Nao, mi soemaot wan sikret long yu, be, i gat plante sikret we oli kipim i stap, mekem se i no gat wan man i save ol samting ia, be God nomo. Be mi soem long yu wan samting we mi askem wetem gud tingting long God blong mekem se bae mi save gat save—hemia long saed blong laef bakegen long ded.

4 Luk, i gat wan taem we God i jusum, we evri man bae i girap long ded. Mo wetaem bae taem ia i kam, i no gat man we i save; be God i save taem we hem i bin jusum.

5 Nao, sapos bae i gat wan taem, o wan nambatu taem, o wan nambatri taem, we ol man bae oli girap long ded, i nomata; from God i save evri samting ia; mo i inaf long mi, blong save we hem i olsem—se i gat wan taem we God i bin jusum we evriwan bae i girap long ded.

6 Nao, i nid blong mas gat wan taem we i stap bitwin taem blong ded mo taem blong laef bakegen long ded.

7 Mo nao bae mi askem se ?wanem nao i hapen long sol blong evri man long taem we oli ded go kasem taem we God i jusum blong oli laef bakegen long ded?

8 Nao sapos i gat moa bitim wan taem we God i jusum blong ol man oli girap, hemia i nomata; from evri man i no ded long semtaem, mo hemia i nomata; evri samting i olsem wan dei nomo long God, mo man nomo i kaontem taem.

9 From hemia, i gat wan taem we God i bin jusum blong ol man oli girap long ded; mo i gat wan taem bitwin taem blong ded mo laef bakegen long ded. Mo nao, long saed blong spes blong taem ia, wanem nao we i hapen long sol blong evri man, i samting ia nao we mi bin askem long Lod, wetem gud tingting, blong save; mo hemia nao samting we mi save.

10 Mo taem we bae taem ia i kam we evri man bae i girap, afta bae oli save se God i save evriwan long ol taem we hem i bin putum long man.

11 Nao, long saed blong situesen blong sol bitwin ded mo laef bakegen long ded—Luk, wan enjel i talem long mi, se spirit blong evri man, taem we i aot long bodi ia blong wol, yes, spirit blong evri man, sapos oli gud o nogud, bae oli gobak long hom, long God ia we i bin givim laef long olgeta.

12 Mo afta, bae i kam blong hapen se, spirit blong olgeta we oli stret mo gud bae oli kasem wan ples blong hapines, we oli singaotem paradaes, wan ples blong spel, wan ples blong pis, long ples ia bae oli spel long evri trabol mo evri wari, mo evri harem nogud blong olgeta.

13 Mo afta, bae i kam blong hapen se, ol spirit blong ol rabis man, yes, olgeta we oli nogud—from luk, olgeta i no gat wan pis o pat blong Spirit blong Lod; from luk, oli jusum ol nogud wok, be i no gudfala wok; from hemia, spirit blong devel i go insaed long olgeta, mo i kontrolem haos blong olgeta—mo bae olgeta ia bae oli sakemaot olgeta i go long bigfala tudak; bae oli krae, mo bae oli krae sore mo bae oli kakae tut blong olgeta, mo samting ia, from ol rabis samting we oli bin mekem, from oli go prisena folem tingting blong devel.

14 Nao hemia i situesen blong sol blong ol nogud man, yes, long tudak, mo bae oli stap wet mo fraet tumas gogo oli kasem bigfala faea blong kros blong God long olgeta; olsem ia nao oli stap long ples ia, semmak long olgeta we oli stret mo gud, oli faenem spel long paradaes, go kasem taem we oli laef bakegen long ded.

15 Nao, i gat samfala pipol we oli bin andastanem se ples ia we sol i harem gud tumas mo ples we sol i stap harem nogud tumas, bifo long laef bakegen long ded, i wan fasfala laef bakegen long ded. Yes, mi save talem se oli save singaotem hemia wan laef bakegen long ded, girap blong spirit, o sol, blong go long ples blong harem gud o long ples blong harem nogud, folem ol toktok we oli bin talem finis.

16 Mo luk, bakegen oli bin talem se i gat wan fasfala laef bakegen long ded, wan laef bakegen long ded blong evriwan we i bin laef bifo, o i stap naoia, o bae i kam, i go kasem taem blong laef bakegen long ded blong Kraes long ded.

17 Nao, yumi no mas ting se fasfala laef bakegen long ded ia, we oli bin tokbaot long fasin ia, hem i laef bakegen long ded blong ol sol blong oli save stap long glad o harem nogud. Yu no mas ting se hemia i mining blong hem.

18 Luk, mi talem long yu, No; be hem i minim se sol wetem bodi i joen bakegen, blong olgeta we oli bin laef long ol dei blong Adam go kasem taem blong laef bakegen long ded blong Kraes.

19 Nao, sapos sol mo bodi blong olgeta we Alma i bin tokbaot bae oli joen tugeta long wan taem, ol nogud man semmak long ol stret mo gud man, mi no talem; hem i inaf, blong mi talem se olgeta evriwan oli girap; o long ol narafala toktok, laef bakegen long ded blong olgeta ia, bae i kam blong hapen bifo long laef bakegen long ded blong olgeta we oli ded afta long laef bakegen long ded blong Kraes.

20 Nao, boe blong mi, mi no talem se laef bakegen long ded blong olgeta bae i kam long stret taem blong laef bakegen blong Kraes; be luk, mi givim olsem tingting blong mi nomo, se sol mo bodi oli joen tugeta, hemia blong ol stret mo gud man, long taem we bae Kraes i laef bakegen long ded, mo i gobak antap long heven.

21 Be sapos samting ia, i kam long taem blong laef bakegen long ded blong hem o afta, mi no talem; be mi talem hemia nomo, se i gat wan taem bitwin ded mo laef bakegen long ded blong bodi, mo wan ples blong sol i stap hapi o harem nogud, i go kasem taem we God i bin jusum blong ol dedman bae oli girap, mo joen tugeta bakegen, sol tugeta wetem bodi, blong kam stanap long fored blong God, mo kasem jajem folem ol wok blong olgeta.

22 Yes, hemia i mekem fasin blong putumbak ol samting i hapen, we ol profet oli bin talem long maot blong olgeta.

23 Sol bae i kambak bakegen long bodi, mo bodi i gobak wetem sol; yes, mo evri leg mo evri han mo joen bae oli kambak long bodi blong hem; yes, bae i no gat wan pis hea blong hed we bae i lus; be evri samting bae oli kambak bakegen long stret fasin mo wei blong olgeta we i stret evriwan.

24 Mo nao, boe blong mi, hemia fasin blong putumbak ol samting we ol profet oli bin talem long maot blong olgeta—

25 Mo afta, bae olgeta we oli stret mo gud oli saen long kingdom blong God.

26 Be luk, wan ded we i nogud bae i kam long ol nogud man; from we oli ded long saed blong ol samting we oli stret mo gud; from we oli no klin, mo i no gat wan samting we i no klin we i save kasem kingdom blong God; be bae God i sakemaot olgeta, mo God i tekem olgeta blong oli mas tekem mo kakae ol frut blong wanem oli mekem, o blong ol wok blong olgeta, we oli bin nogud; mo oli dring ol makas blong wan konkon kap.