1 Ug nahitabo nga kadtong tanan nga nagdumili sa pagpatalinghog sa mga pulong ni Helaman ug sa iyang kaigsuonan gipundok batok sa ilang kaigsuonan.

2 Ug karon tan-awa, nasuko sila pag-ayo, hangtod nga nakahukom sila sa pagpatay kanila.

3 Karon ang pangulo niadtong kinsa nasuko batok sa ilang kaigsuonan usa ka dako ug kusgan nga tawo; ug ang iyang ngalan mao si Amalickiah.

4 Ug si Amalickiah matinguhaon nga mahimong hari; ug kadtong katawhan kinsa nasuko matinguhaon usab nga siya mahimo nilang hari; ug ang daghan nga bahin kanila mao ang ubos nga mga maghuhukom sa yuta, ug nagtinguha sila og gahom.

5 Ug nalingla sila sa mga ulog-ulog ni Amalickiah, nga kon mosuporta sila kaniya ug mopalingkod kaniya nga ilang hari siya mohimo kanila nga mga pangulo sa katawhan.

6 Sa ingon niana nailad sila ni Amalickiah nga mobiya, bisan pa sa pagsangyaw ni Helaman ug sa iyang kaigsuonan, oo, bisan pa sa ilang tumang pag-amuma sa simbahan, kay sila halangdong mga pari sa simbahan.

7 Ug dihay daghan sa simbahan kinsa mituo sa mga ulog-ulog nga pulong ni Amalickiah, busa mibiya sila gani sa simbahan; ug sa ingon niana ang mga kalihokan sa katawhan ni Nephi hilabihan ka walay kaseguroan ug kakuyaw, bisan pa sa ilang dako nga kadaogan nga naangkon nila batok sa mga Lamanita, ug sa ilang dako nga pagmaya nga naangkon nila tungod sa ilang kaluwasan pinaagi sa kamot sa Ginoo.

8 Sa ingon niana makita nato unsa ka dali ang anak sa mga tawo nga makalimot sa Ginoo nga ilang Dios, oo, unsa ka dali nga makabuhat og daotan, ug malingla pinaagi sa usa nga daotan.

9 Oo, ug makita usab nato ang hilabihan nga pagkadaotan nga mahimo sa usa ka grabe nga daotang tawo diha sa mga anak sa mga tawo.

10 Oo, makita nato nga si Amalickiah, tungod kay tawo siya nga malipoton og pamaagi ug tawo nga daghan og mga pulong sa pang-ulog-ulog, nga nalingla niya ang mga kasingkasing sa daghang katawhan sa pagbuhat og daotan; oo, ug nagtinguha sa paglaglag sa simbahan sa Dios, ug sa paglaglag sa katukoran sa kalingkawasan nga gihatag sa Dios kanila, o diin nga panalangin gipadala sa Dios sa yuta alang sa`mga matarong.

11 Ug karon nahitabo nga sa dihang si Moroni, kinsa mao ang labaw nga komandante sa kasundalohan sa mga Nephita, nakadungog niini nga mga pagbiya, nasuko siya ni Amalickiah.

12 Ug nahitabo nga gigisi niya ang iyang kupo; ug mikuha siya og usa ka piraso niini, ug misulat diha niini—Agi og paghinumdom sa atong Dios, sa atong relihiyon, ug kagawasan, ug sa atong kalinaw, sa atong mga asawa, ug sa atong mga anak—ug gihigot niya kini sa tumoy sa usa ka tukon.

13 Ug gitaod niya ang panagang sa iyang ulo, ug ang taming sa iyang dughan, ug ang iyang mga panagang; ug gibakos ang iyang taming sa iyang bat-ang; ug mikuha siya sa tukon, diin anaa sa tumoy niini ang iyang gisi nga kupo, (ug gitawag niya kini og ang bandila sa kalingkawasan) ug miyukbo siya sa iyang kaugalingon sa yuta, ug nag-ampo siya nga mainiton sa iyang Dios alang sa mga panalangin sa kalingkawasan nga moabot sa iyang kaigsuonan, kutob nga adunay pundok sa mga Kristiyano nga magpabilin nga manag-iya sa yuta—

14 Kay mao kana ang gingalan sa tanang tinuod nga mga tumutuo ni Kristo nga mga sakop sa simbahan sa Dios niadtong mga dili sakop sa simbahan.

15 Ug kadtong kinsa nasakop sa simbahan mga matinud-anon; oo, kadtong tanan kinsa tinuod nga mga tumutuo ni Kristo malipayong midala, sa ngalan ni Kristo, o mga Kristiyano nga maoy tawag kanila, tungod sa ilang pagtuo ni Kristo kinsa moanhi.

16 Ug busa, niining higayona, si Moroni nag-ampo nga ang kawsa sa mga Kristiyano, ug ang kagawasan sa yuta kahatagan og suporta.

17 Ug nahitabo nga sa dihang gibu-bo niya ang iyang kalag ngadto sa Dios, ginganlan niya ang tanang yuta nga anaa sa habagatang dapit sa yuta og Kamingawan, oo, ug sa kataposan, ang tanang yuta, lakip sa amihanan ug sa habagatan—Usa ka pinili nga yuta, ug ang yuta sa kalingkawasan.

18 Ug miingon siya: Sa pagkatinuod ang Dios dili motugot nga kita, kinsa gitamay tungod kay gidala nato sa atong mga kaugalingon ang ngalan ni Kristo, pagatunob-tunoban ug pagalaglagon, hangtod nga mapahamtang nato kini sa atong kaugalingon pinaagi sa kaugalingon natong mga kalapasan.

19 Ug sa dihang nasulti ni Moroni kini nga mga pulong, miadto siya taliwala sa katawhan, mipakayab sa gisi nga bahin sa iyang sapot sa kahanginan, aron ang tanan makakita sa sinulat nga iyang gisulat sa gisi nga bahin, ug misinggit sa makusog nga tingog, nga nag-ingon:

20 Tan-awa, si bisan kinsa nga gustong manalipod niini nga panultihon sa yuta, paduola sila pinaagi sa gahom sa Ginoo, ug mosulod sa usa ka pakigsaad nga manalipod sa ilang mga katungod, ug ang ilang relihiyon, aron ang Ginoong Dios mopanalangin kanila.

21 Ug nahitabo nga sa dihang gipahayag ni Moroni kining mga pulonga, tan-awa, ang katawhan dungan nga nangadto nga nanagdagan dala ang ilang panagang nga gibakos sa ilang mga bat-ang, migisi sa ilang mga sapot agi og timaan, o isip pakigsaad, nga dili sila mobiya sa Ginoo nga ilang Dios; o, sa lain nga pagkasulti, kon sila molapas sa mga sugo sa Dios, o mohimo og kalapasan, ug maulaw sa pagdala nganha kanila sa ngalan ni Kristo, ang Ginoo mogisi kanila sama sa ilang paggisi sa ilang mga sapot.

22 Karon mao kini ang pakigsaad nga ilang gihimo, ug gipanglabay nila ang ilang mga sapot sa tiilan ni Moroni, nga nag-ingon: Kami mopakigsaad sa among Dios, nga kami pagalaglagon, gani sama sa among kaigsuonan sa yuta sa amihanan nga bahin, kon makahimo kami og kalapasan; oo, mahimo niya kaming ilabay ngadto sa tiilan sa among mga kaaway, gani sama sa among paglabay sa among mga sapot sa imong tiilan aron tunob-tunoban sa tiil, kon kami mohimo og kalapasan.

23 Si Moroni miingon kanila: Tan-awa, mga salin kita sa binhi ni Jacob; oo, mga salin kita sa binhi ni Jose, kansang kupo gigisi sa iyang mga igsuong lalaki ngadto sa daghang mga piraso; oo, ug karon tan-awa, hinumdoman nato ang pagtuman sa mga sugo sa Dios, o ang atong mga sapot pagagision sa atong kaigsuonan, ug ibalhog kita sa bilanggoan, o ibaligya, o patyon.

24 Oo, panalipdan nato ang atong kalingkawasan isip salin ni Jose; oo, hinumdoman nato ang mga pulong ni Jacob, sa wala pa siya mamatay, kay tan-awa, nakakita siya nga ang usa ka bahin sa salin sa kupo ni Jose gitipigan ug wala madunot. Ug miingon siya—Sama niining salin sa sapot sa akong anak nga lalaki nga natipigan, mao usab ang salin sa binhi sa akong anak nga lalaki panalipdan sa kamot sa Dios, ug pagadad-on ngadto kaniya, samtang ang nahibilin sa binhi ni Jose mamatay, sama sa salin sa iyang sapot.

25 Karon tan-awa, nakahatag kini og kasubo sa akong kalag; bisan pa niana, ang akong kalag nagmaya sa akong anak nga lalaki, tungod niana nga bahin sa iyang binhi nga pagadad-on ngadto sa Dios.

26 Karon tan-awa, mao kini ang pinulongan ni Jacob.

27 Ug karon kinsa ang nasayod apan ang salin sa binhi ni Jose, nga mamatay sama sa iyang sapot, mao kadtong kinsa mibiya gikan kanato? Oo, ug gani mao usab kita kon kita dili mobarog nga makanunayon diha sa pagtuo kang Kristo.

28 Ug karon nahitabo nga sa dihang si Moroni nakasulti niini nga mga pulong miadto siya, ug usab mipadala sa tanang dapit sa yuta nga adunay mga pag-apostasiya, ug mipundok sa tanang katawhan kinsa matinguhaon nga magpadayon ang ilang kalingkawasan, sa pagbarog batok ni Amalickiah ug niadtong kinsa miapostasiya, kinsa gitawag og mga Amalickiahanon.

29 Ug nahitabo nga sa dihang si Amalickiah nakakita nga ang katawhan ni Moroni mas daghan kay sa mga Amalickiahanon—ug usab nakita niya nga ang iyang katawhan nagmadudahon mahitungod sa kaangayan sa kawsa nga ilang gipahigayon—busa, sa kahadlok nga siya dili makakuha sa tumong, gidala niya ang iyang katawhan kinsa gustong mokuyog ug mobiya paingon sa yuta sa Nephi.

30 Karon naghunahuna si Moroni nga dili angay nga ang mga Lamanita makaangkon og dugang nga kusog; busa nakahunahuna siya sa pagpugong sa katawhan ni Amalickiah, o sa pagkuha kanila ug pagdala kanila pagbalik, ug pahamtangan sa kamatayon si Amalickiah; oo, kay nasayod siya nga iyang hulhogan ang mga Lamanita nga masuko batok kanila, ug makiggubat batok kanila; ug nasayod siya nga buhaton kini ni Amalickiah aron maangkon niya ang iyang mga katuyoan.

31 Busa naghunahuna si Moroni nga angay nga iyang dad-on ang iyang kasundalohan, kinsa nagkapundok sa ilang mga kaugalingon, ug nagsangkap sa ilang mga kaugalingon, ug misulod sa usa ka pakigsaad sa pagpatunhay sa kalinaw—ug nahitabo nga iyang gidala ang iyang kasundalohan ug mimartsa dala ang iyang mga tolda paingon sa kamingawan, aron pugngan ang pag-agi ni Amalickiah didto sa kamingawan.

32 Ug nahitabo nga iyang gibuhat sumala sa iyang mga tinguha, ug mimartsa paingon sa kamingawan, ug gisanta ang kasundalohan ni Amalickiah.

33 Ug nahitabo nga si Amalickiah miikyas kauban sa gamay nga pundok sa iyang mga tawo, ug ang nahibilin gihatod ngadto sa mga kamot ni Moroni ug gidala pagbalik ngadto sa yuta sa Zarahemla.

34 Karon, si Moroni nga mao ang tawo nga gipili sa labaw nga mga maghuhukom ug sa tingog sa katawhan, busa siya adunay gahom sumala sa iyang kabubut-on ngadto sa kasundalohan sa mga Nephita, sa pagtukod ug sa paggamit og awtoridad diha kanila.

35 Ug nahitabo nga kadtong mga Amalickiahanon nga dili mosulod sa usa ka pakigsaad sa pagsuporta sa kawsa sa kagawasan, aron mapadayon nila ang gawasnon nga pangagamhanan, iyang gipahamtangan sa kamatayon; ug dihay pipila lamang kinsa midumili sa pagpakigsaad sa kagawasan.

36 Ug nahitabo usab, nga mimando siya nga ang bandila sa kalingkawasan ipakayab sa matag tore nga anaa sa tibuok yuta, nga gipanag-iya sa mga Nephita; ug sa ingon niana si Moroni mitukod sa sumbanan sa kalingkawasan taliwala sa mga Nephita.

37 Ug nagsugod na usab sila sa pag-angkon og kalinaw diha sa yuta; ug sa ingon niana gipadayon nila ang kalinaw diha sa yuta hangtod dapit sa kataposan sa ikanapulo ug siyam nga tuig sa paghari sa mga maghuhukom.

38 Ug si Helaman ug ang labaw nga mga pari mipadayon usab sa kahusay sa simbahan; oo, bisan sulod sa upat ka tuig nga sila nakaangkon og dakong kalinaw ug pagmaya sa simbahan.

39 Ug nahitabo nga dihay daghang nangamatay, nga hugot nga nagtuo nga ang ilang mga kalag gitubos pinaagi ni Ginoong Jesukristo; sa ingon niana mibiya sila sa kalibotan nga nagmaya.

40 Ug dihay ubang nangamatay tungod sa mga hilanat, diin sa ubang mga panahon sa tuig kasagaran kaayong anaa sa yuta—apan dili kaayo daghan ang mahitungod sa hilanat, tungod sa pagkamaayo sa mga matang sa daghang tanom ug mga gamot nga giandam sa Dios aron maayo ang hinungdan sa mga sakit, diin ang tawo ulipon sa kinaiya sa klima—

41 Apan dihay daghang namatay tungod sa katigulangon; ug kadtong kinsa namatay nga adunay pagtuo ni Kristo malipayon uban kaniya, sama sa unsay angay lang nga atong tuohan.