1 Nao i bin hapen se, long nambasikis yia blong rul blong ol jaj long ol pipol blong Nifae, i no gat ol rao o ol wo long graon blong Sarahemla.

2 Be tingting blong ol pipol i bin trabol tumas, yes, oli trabol plante from oli lusum ol brata blong olgeta, mo from oli lusum ol grup blong animol blong olgeta mo ol buluk tu, mo tu, from oli lusum ol garen blong olgeta we oli planem ol sid long hem, we Ol Man blong Leman oli bin purumbut antap long olgeta mo prapa spolem gud olgeta.

3 Mo ol hadtaem blong olgeta oli bigwan tumas, mekem se evri sol i gat wan samting we i save krae sore from; mo oli biliv se oli ol jajmen blong God we hem i sendem i kam long olgeta from ol fasin nogud blong olgeta mo ol rabis sin blong olgeta; from hemia, ol jajmen ia oli wekemap olgeta blong tingbaot ol wok blong olgeta.

4 Mo oli stat blong stanemap jos i kam moa fulwan; yes, mo plante oli baptaes long ol wota blong Saedon mo oli joenem jos ia blong God; yes, Alma i baptaesem olgeta wetem han blong hem, Alma, sem man ia we papa blong hem, Alma, i konsekretem hem i kam hae pris blong ol man blong jos, wetem han blong hem.

5 Mo i bin hapen se long nambaseven yia blong rul blong ol jaj, i gat raonabaot tri taosen faef handred sol we oli kam joen tugeta long jos ia blong God mo oli baptaes. Mo olsem ia nao nambaseven yia we ol jaj oli stap rul ova long ol pipol blong Nifae i bin en; mo pis i gogohed blong stap long ol taem ia.

6 Mo i bin hapen se long namba-eit yia blong rul blong ol jaj, ol pipol blong jos oli stat blong gat hae tingting, from oli gat plante rij samting, mo plante flas silik, mo ol gudfala kaliko we i tintin mo naes, mo from plante grup blong ol animol blong olgeta mo ol buluk, mo gol blong olgeta mo silva blong olgeta, mo evri kaen gudgudfala samting, we oli bin kasem tru long hadwok blong olgeta; mo tingting blong ae blong olgeta i kam antap long evri samting ia, from oli stat blong werem ol klos we oli sas tumas.

7 Nao samting ia i samting we i givim hadtaem long Alma, yes, mo long plante pipol we Alma i bin konsekretem olgeta blong kam ol tija, mo ol pris, mo ol elda ova long jos; yes, plante long olgeta oli harem nogud tumas long ol fasin nogud we oli luk i stat blong kam antap long medel blong ol pipol blong olgeta.

8 From oli bin luk mo oli lukgud wetem wan bigfala harem nogud we ol man blong jos oli stat blong kam antap long hae tingting blong ae blong olgeta, mo blong putum hat blong olgeta long ol rij samting mo long ol samting blong wol we i blong nating, mo oli stat blong gat tingting ia se ol man oli no hae long olgeta, oli stap mekem olsem long wanwan long olgeta, mo oli stat blong givim hadtaem, olsem we oli wantem mo glad blong mekem, long olgeta we oli no biliv.

9 Mo olsem ia nao, long namba-eit yia blong rul blong ol jaj, i stat blong gat ol bigfala rao long medel blong ol pipol blong jos; yes, i gat tingting ia blong wantem ol samting blong narafala man, mo rao, mo tingting ia blong mekem nogud long man, mo fasin ia blong givim hadtaem, mo hae tingting, i go bitim hae tingting blong olgeta ia we oli no blong jos ia blong God.

10 Mo olsem ia nao namba-eit yia blong rul blong ol jaj i bin en; mo ol fasin nogud blong jos i olsem wan bigfala ston we i blokem rod blong olgeta we oli no blong jos; mo olsem ia nao jos i stat blong stop blong muv i go fored.

11 Mo i bin hapen se long stat blong nambanaen yia, Alma i luk fasin nogud blong jos, mo hem i luk tu we eksampol blong jos i stat blong lidim olgeta ia we oli no bin biliv i go long wan pis blong rabis fasin i go long narawan, mo long wei ia, i mekem ol pipol oli go lus evriwan.

12 Yes, hem i luk se fasin ia blong no stap semmak i bigwan tumas long medel blong ol pipol, sam oli leftemap olgeta i go antap wetem hae tingting blong olgeta, oli luklukdaon long ol narafalawan, oli tanem baksaed blong olgeta long olgeta we oli stap long nid, mo olgeta we oli neked, mo olgeta we oli hanggri, mo olgeta we oli tosta, mo olgeta we oli sik mo olgeta we oli gat hadtaem.

13 Nao bigfala samting ia nao i mekem se i gat kraekrae long medel blong ol pipol, taem we ol narafalawan oli putum olgeta oli stap daon, oli helpem olgeta we oli nidim help blong olgeta, olsem serem samting blong olgeta long ol man we oli pua mo olgeta we oli gat nid, mo fidim olgeta we oli hanggri, mo olgeta we oli harem nogud long evri kaen hadtaem, from nem blong Kraes, we bae i kam folem spirit blong profesi.

14 Oli lukluk i go fored long dei ia, olsem ia nao oli holemtaet fasin blong kam klin aot long ol sin blong olgeta; oli fulap wetem bigfala glad from laef bakegen blong ol dedman, folem wanem Jisas Kraes i wantem mo paoa blong hem blong mekem ol man oli fri long ol rop blong ded.

15 Mo nao i bin hapen se Alma, from hem i luk ol hadtaem blong olgeta we tingting blong olgeta i stap daon we oli stap folem God, mo ol hadtaem we oli kavremap ol smol haf blong ol pipol blong hem, mo taem hem i luk se oli no stap semmak, hem i stat blong harem bigfala harem nogud; be, Spirit blong Lod i no livim hem.

16 Mo hem i jusum wan waes man long medel blong olgeta elda blong jos, mo i givim paoa long hem folem voes blong ol pipol, blong hem i save gat paoa blong pasem ol loa, folem ol loa we oli bin givimaot finis, mo blong yusum olgeta folem fasin nogud mo ol loa we ol pipol oli brekem.

17 Nao nem blong man ia hem i Nifaeha, mo oli bin jusum hem blong kam jif jaj; mo hem i sidaon long jea blong jajmen blong jajem mo lidim ol pipol.

18 Nao Alma i no givim long hem wok blong hae pris blong jos, be hem i holemtaet wok blong hae pris long hemwan; be hem i givim jea blong jajmen long Nifaeha.

19 Mo hem i mekem samting ia blong mekem se hemwan i save go aot long ol pipol blong hem, o long medel blong ol pipol blong Nifae, blong mekem se hem i save prijim toktok blong God long olgeta, blong stretem olgeta blong oli tingbaot wok blong olgeta, mo blong hem i save pulum daon, wetem toktok blong God, evri hae tingting mo fasin blong giaman mo evri rao we i bin stap long medel blong ol pipol blong hem, from hem i luk se i no gat wei we hem i save tekembak olgeta sapos hem i no talemaot strong wan klin testemoni agensem olgeta.

20 Mo olsem ia nao long stat blong nambanaen yia blong rul blong ol jaj ova long ol pipol blong Nifae, Alma i givim jea blong jajmen long Nifaeha, mo hem i givim evri taem blong hem long hae prishud blong tabu oda blong God, long testemoni blong trutok, folem spirit blong revelesen mo profesi.