1 Ug karon nahitabo sa pagsugod sa ikakawhaan ug lima nga tuig sa pagmando sa mga maghuhukom ibabaw sa katawhan ni Nephi, sila nga nakapatunhay og kalinaw tali sa katawhan sa Lehi ug sa katawhan sa Morianton kabahin sa ilang mga yuta, ug ingon nga nagsugod ang ikakawhaan ug lima nga tuig sa kalinaw;

2 Bisan pa niana, wala nila mapatunhay og dugay ang hingpit nga kalinaw sa yuta, kay dihay nagsugod nga panagbingkil taliwala sa katawhan kabahin sa labaw nga maghuhukom nga si Pahoran; kay tan-awa, dihay usa ka bahin sa katawhan nga nagtinguha nga usbon ang pipila ka piho nga punto sa balaod.

3 Apan tan-awa, si Pahoran dili mousab ni motugot nga ang balaod usbon; busa, wala siya mopatalinghog niadtong kinsa nagpadala sa ilang mga tingog uban ang ilang mga hangyo kabahin sa pag-usab sa balaod.

4 Busa, kadtong kinsa nagtinguha nga usbon ang balaod nasuko kaniya, ug nagtinguha nga dili na siya mahimong labaw nga maghuhukom sa yuta; busa dihay miabot nga usa ka mainiton nga panaglalis kabahin sa hitabo, apan dili ngadto sa pagpaagas sa dugo.

5 Ug nahitabo nga kadtong kinsa nagtinguha nga si Pahoran papahawaon gikan sa hukmanan gitawag og mga tawong makihari, kay nagtinguha sila nga usbon ang balaod sa paagi nga mapukan ang gobyerno ug sa pagtuboy og usa ka hari dinhi sa yuta.

6 Ug kadtong kinsa nagtinguha nga si Pahoran magpabilin nga labaw nga maghuhukom sa yuta midala sa ngalan nga mga tawong gawasnon; ug ingon niana ang pagkabahin taliwala kanila, kay ang mga tawong gawasnon nanumpa o mipakigsaad sa pagpatunhay sa ilang mga katungod ug sa mga kahigayonan sa ilang relihiyon pinaagi sa usa ka gawasnon nga panggobyerno.

7 Ug nahitabo nga kining hitaboa sa ilang mga panagbingkil gihusay pinaagi sa tingog sa katawhan. Ug nahitabo nga ang tingog sa katawhan midapig sa mga tawong gawasnon, ug si Pahoran nagpabilin sa hukmanan, nga nakapahimo og dakong kamaya sa kaigsuonan ni Pahoran ug usab sa daghan nga katawhan sa kalingkawasan, kinsa usab mipahilom sa mga tawong makihari, nga wala sila mangahas sa pagsupak apan napugos sa pagpatunhay sa kawsa sa kagawasan.

8 Karon kadtong kinsa pabor sa mga hari mao kadtong mga halangdon, ug nagtinguha sila nga mahimong hari; ug gibuligan sila niadtong kinsa nagtinguha og gahom ug awtoridad ibabaw sa katawhan.

9 Apan tan-awa, usa kini ka makuyaw nga panahon sa maong mga panagbingkil sa katawhan ni Nephi; kay tan-awa, si Amalickiah mihulhog pag-usab sa mga kasingkasing sa katawhan sa mga Lamanita batok sa katawhan sa mga Nephita, ug siya mipundok sa mga sundalo gikan sa tanang bahin sa iyang yuta, ug gisangkapan sila, ug nangandam alang sa gubat uban ang tumang kakugi; kay siya nanumpa sa pag-inom sa dugo ni Moroni.

10 Apan tan-awa, atong makita nga ang iyang saad nga iyang gihimo dinalidali; bisan pa niana, giandam niya ang iyang kaugalingon ug ang iyang kasundalohan sa pagsulong aron sa pagpakiggubat sa mga Nephita.

11 Karon ang iyang kasundalohan dili na kaayo daghan sama kaniadto, tungod sa daghang kaliboan nga namatay pinaagi sa kamot sa mga Nephita; apan bisan pa sa ilang dakong kapildihan, si Amalickiah nakapundok og daghan kaayong kasundalohan, hangtod nga siya wala mahadlok nga mosulong sa yuta sa Zarahemla.

12 Oo, bisan si Amalickiah mismo misulong, nga nangulo sa mga Lamanita. Ug kini sa ikakawhaan ug lima nga tuig sa pagmando sa mga maghuhukom; ug kini sa sama nga higayon nga sila misugod sa paghusay sa mga kalihokan sa ilang mga panagbingkil kabahin sa labaw nga maghuhukom nga si Pahoran.

13 Ug nahitabo nga sa dihang ang mga tawo nga gitawag og mga tawong makihari nakadungog nga ang mga Lamanita mosulong aron sa pagpakiggubat kanila, nalipay sila sa ilang mga kasingkasing; ug nagdumili sila sa paggamit sa mga hinagiban, kay nasuko sila pag-ayo sa labaw nga maghuhukom, ug usab sa mga tawong gawasnon, nga sila dili mogamit sa ilang mga hinagiban aron sa pagpanalipod sa ilang nasod.

14 Ug nahitabo nga sa dihang si Moroni nakakita niini, ug usab nakakita nga ang mga Lamanita nagsingabot sa mga utlanan sa yuta, nasuko siya pag-ayo tungod sa pagkagahi sa ulo niadtong katawhan nga iyang gihagoan nga panalipdan sa tumang kakugi; oo, nasuko siya pag-ayo; ang iyang kalag napuno sa kasuko batok kanila.

15 Ug nahitabo nga nagpadala siya og hangyo, uban ang tingog sa katawhan, ngadto sa gobernador sa yuta, nagtinguha nga basahon niya kini, ug mohatag kaniya (ni Moroni) og gahom sa pagpugos niadtong mga masupilon sa pagpanalipod sa ilang nasod o sila pahamtangan sa kamatayon.

16 Kay kini mao ang iyang unang atubangon nga sumpoon ang maong mga panagbingkil ug mga panagsumpaki sa katawhan; kay tan-awa, kay mao na kini hangtod karon ang hinungdan sa tanan nilang kalaglagan. Ug nahitabo nga kini gitugot sumala sa tingog sa katawhan.

17 Ug nahitabo nga si Moroni mimando nga ang iyang kasundalohan makig-away niadtong mga tawong makihari, sa pagpaubos sa ilang garbo ug sa ilang pagkaharianon, ug sa pagpaubos kanila, o sila mogamit sa ilang mga hinagiban ug mosuporta sa kawsa sa kalingkawasan.

18 Ug nahitabo nga ang kasundalohan mimartsa batok kanila; ug ilang gipaubos ang ilang garbo ug ang ilang pagkaharianon, hangtod nga sa ilang pag-alsa sa ilang mga hinagiban sa gubat aron sa pakig-away batok sa mga tawo ni Moroni sila gipangtigbas ug gipahisama sa yuta.

19 Ug nahitabo nga dihay upat ka libo niadtong mga masupilon kinsa gitigbas pinaagi sa espada; ug kadtong ilang mga pangulo nga wala mamatay sa gubat gidakop ug gibalhog sa bilanggoan, kay walay panahon alang sa ilang mga paghusay niini nga higayon.

20 Ug ang nahibilin niadtong mga masupilon, imbes tigbason sa espada hangtod mahagba sa yuta, miampo ngadto sa bandila sa kalingkawasan, ug napugos sa pagpataas sa bandila sa kalingkawasan diha sa ilang mga tore, ug diha sa ilang mga siyudad, ug sa paggamit sa mga hinagiban aron sa pagpanalipod sa ilang nasod.

21 Ug sa ingon niana si Moroni mitapos sa mga tawong makihari, nga wala nay gidungog pinaagi sa ngalan nga tawong makihari; ug sa ingon niana siya mitapos sa pagkagahi sa ulo ug sa garbo niadtong katawhan kinsa mipaila sa dugo nga pagkaharianon; apan gidala sila ngadto sa pagpaubos sa ilang mga kaugalingon sama sa ilang kaigsuonan, ug sa pagpakig-away nga maisogon alang sa ilang kagawasan gikan sa pagkaulipon.

22 Tan-awa, nahitabo nga samtang si Moroni anaa sa paghunong sa mga gubat ug mga panagbingkil sa iyang kaugalingong katawhan, ug sa pagpasakop kanila sa kalinaw ug sa taas nga ang-ang sa paglambo, ug paghimo og mga balaod sa pag-andam alang sa gubat batok sa mga Lamanita, tan-awa, ang mga Lamanita miabot sa yuta sa Moroni, diin nahimutang sa mga utlanan sa baybayon sa dagat.

23 Ug nahitabo nga ang mga Nephita dili kaayo lig-on didto sa siyudad sa Moroni; busa si Amalickiah miabog kanila, nakapatay og daghan. Ug nahitabo nga si Amalickiah nakapanag-iya sa siyudad, oo, nakapanag-iya sa tanan nilang mga kuta.

24 Ug kadtong kinsa milayas gikan sa siyudad sa Moroni miadto sa siyudad sa Nephihah; ug usab ang mga katawhan sa siyudad sa Lehi mipundok sa ilang mga kaugalingon, ug mihimo og mga pagpangandam ug andam na sa pagpakiggubat sa mga Lamanita.

25 Apan nahitabo nga si Amalickiah dili motugot sa mga Lamanita nga mosulong batok sa siyudad sa Nephihah aron makiggubat, apan mipugong kanila dapit sa baybayon sa dagat, mibilin og mga tawo sa matag siyudad sa pagbantay ug pagpanalipod niini.

26 Ug sa ingon niana mipadayon siya, nanag-iya sa daghang siyudad, ang siyudad sa Nephihah, ug ang siyudad sa Lehi, ug ang siyudad sa Morianton, ug ang siyudad sa Omner, ug ang siyudad sa Gid, ug ang siyudad sa Mulek, tanan diin nahimutang sa silangan nga bahin sa mga utlanan sa baybayon.

27 Ug sa ingon niana ang mga Lamanita nakapanag-iya, pinaagi sa kamaliputon ni Amalickiah, og daghan kaayong siyudad, pinaagi sa ilang dili maihap nga mga panon, ang tanan gilig-on pag-ayo sunod sa pamaagi sa mga kuta ni Moroni; diin ang tanan nakahatag og lig-on nga panalipod sa mga Lamanita.

28 Ug nahitabo nga mimartsa sila paingon sa mga utlanan sa yuta sa Bountiful, miabog sa mga Nephita gikan sa ilang atubangan ug nakapatay og daghan.

29 Apan nahitabo nga gisugat sila ni Teancum, kinsa mipatay kang Morianton ug misanta sa iyang katawhan sa iyang paglayas.

30 Ug nahitabo nga misanta usab siya ni Amalickiah, samtang nagmartsa siya uban sa iyang dili maihap nga kasundalohan aron iyang mapanag-iya ang yuta sa Bountiful, ug usab ang yuta sa amihanan.

31 Apan tan-awa nakasugat siya og kapakyasan nga gipasibog pinaagi ni Teancum ug sa iyang mga tawo, kay sila mga batid nga manggugubat; kay ang matag tawo ni Teancum milabaw sa mga Lamanita sa kusog ug sa kahanas sa gubat, hangtod nga nakabintaha sila sa mga Lamanita.

32 Ug nahitabo nga sila miataki kanila, hangtod nga sila mipatay kanila gani hangtod sa pagkangitngit. Ug nahitabo nga si Teancum ug ang iyang mga tawo mipabarog sa ilang mga tolda sa mga utlanan sa yuta sa Mabungahon; ug si Amalickiah mipabarog sa iyang mga tolda dapit sa mga utlanan sa baybayon buyon sa dagat, ug subay niini nga pamaagi sila giabog.

33 Ug nahitabo nga sa pag-abot sa kagabhion, si Teancum ug ang iyang sulugoon migawas sa hilom ug milakaw sa gabii, ug miadto sa kampo ni Amalickiah; ug tan-awa, ang katulogon mibuntog kanila tungod sa ilang tumang kakapoy, diin ang hinungdan mao ang mga kahago ug kainit sa adlaw.

34 Ug nahitabo nga si Teancum misulod sa hilom ngadto sa tolda sa hari, ug giduslak sa mubo nga bangkaw ang iyang kasingkasing; ug mao ang hinungdan sa kamatayon sa hari dihadiha nga siya wala makapukaw sa iyang mga sulugoon.

35 Ug mipauli siya sa hilom balik sa iyang kaugalingon nga kampo, ug tan-awa, ang iyang mga tawo nangatulog, ug siya mipukaw kanila ug misulti kanila sa tanang butang nga iyang gibuhat.

36 Ug mimando siya nga ang iyang mga kasundalohan kinahanglan mangandam, basin og ang mga Lamanita makamata ug mosulong kanila.

37 Ug sa ingon niana natapos ang ikakawhaan ug lima nga tuig sa pagmando sa mga maghuhukom sa katawhan ni Nephi; ug sa ingon niana natapos ang mga adlaw ni Amalickiah.