1 Ket ita napasamak iti panangrugi ti maikaduapulo ket siam a tawen dagiti ukom, nga impakaammo ni Ammoron ken ni Moroni a tarigagayanna a makisinnukat kadagiti balud.

2 Ket napasamak a narikna ni Moroni nga agragsak a kasta unay iti daytoy a kiddaw, agsipud ta tinarigagayanna dagiti abasto a naibinglay para iti pangsuporta kadagiti balud a Lamanita para iti pangsuporta kadagiti bukodna a tattao; ken tinarigagayanna pay dagiti bukod a taona para iti panangpapigsa iti soldadona.

3 Ita nangala dagiti Lamanita iti adu a babbai ken ubbing, ket awan ti babai wenno ubing kadagiti balud ni Moroni, wenno kadagiti balud nga innala ni Moroni; ngarud rinisut ni Moroni babaen ti estratehia tapno magun-od iti adu a nabalud a Nephita manipud kadagiti Lamanita no la ket mabalin.

4 Ngarud nangikur-it iti surat, ket impatulodna babaen iti katulongan ni Ammoron, nga isu met laeng ti nangyeg iti surat ken ni Moroni. Ita dagitoy dagiti balikas nga inkur-itna nga agpaay ken ni Ammoron, a kinunana:

5 Kitaen, Ammoron, naisuratko kenka ti maysa a banag maipanggep daytoy a gubat nga impakatmo a maibusor kadagiti tattaok, wenno impakat ti lalaki a kabsatmo a maibusor kadakuada, ken deteminadonka pay laeng nga ituloy kalpasan ti ipapatayna.

6 Kitaem, ibagak kenka ti maysa a banag maipanggep iti kinalinteg ti Dios, ken ti espada ti mannakabalin a pungtotna, a nakalayat kenka malaksid no agbabawika ket pagsanudem dagiti buyotmo kadagiti bukodyo a daga, wenno ti daga a sanikuayo, nga isu ti daga ti Nephi.

7 Wen, ibagak kenka dagitoy a banag no kabaelam ida a denggen; wen, ibagak kenka ti maipanggep iti dayta nakaal-alingget nga impierno nga agur-uray nga umawat kadagiti kasta a mammapatay a kas kenka ken ti lalaki a kabsatmo, malaksid no agbabawika ket isanudmo ti panggepmo a panagpapatay, ket agsublika a kadua dagiti buyotmo iti dagdagayo.

8 Ngem kas iti naminsan nga inlaksidmo dagitoy a bambanag, ket nakilabanka kadagitoy tattao ti Apo, kasta met a mabalinko a namnamaen nga aramidemto manen.

9 Ket ita kitaen, sisasaganakami nga umawat kenka; wen, ket malaksid no isanudmo dagiti panggepmo, kitaen, yetnagmo kenka ti pungtot dayta a Dios a inlaksidmo, uray pay nga agturong iti naan-anay a pannakadadaelmo.

10 Ngem, bayat a sibibiag ti Apo, umay kenka dagiti buyotmi malaksid no agsanudka, ket sarunkarannaka iti ipapatay iti mabiit, ta pagtalinaedenmi dagiti siudadmi ken dagiti dagami; wen, ket taginayonenmi ti relihionmi ken ti panggep ti Diosmi.

11 Ngem kitaen, pagarupek nga awan ti mamaay ti pannakisaritak kenka maipanggep kadagitoy a bambanag; wenno pagarupek nga maysa ka nga anak ti impierno; ngarud igibuskon ti suratko babaen ti panangibagak kenka a diak makisinnukat iti balud, malaksid iti saritaan a mangtedka iti maysa a lalaki ken ti asawana ken dagiti annakna, para iti maysa a balud; no umannugotka iti daytoy, makisinnukatak.

12 Ket kitaen, no saanmo aramiden daytoy, umayak kenka a kaduak dagiti buyotko; wen, uray pay nga armasak dagiti babbaik ken ubbingko, ket umayakto maibusor kenka, ket surotenka uray pay iti bukodmo a daga, a daga a kukuami nga immuna a tinawidmi; wen, ket agbalinto a dara para iti dara, wen, biag para iti biag; ket kadangadangkanto uray no agingga a madadaelka manipud iti rabaw ti daga.

13 Kitaen, makapungtotakon, ken kasta met dagiti tattaok; inkagumaam ti mangpapatay kadakami, ket inkagumaanmi laeng a salakniban ti bagbagimi. Ngem kitaen, no ikagumaanyo nga ad-adda a dadaelennakami ikagumaanminto a dadaelenkayo; wen, ket ikagumaanminto ti dagami, ti daga nga immuna a tawidmi.

14 Ita irikepkon ti suratko. Siak ni Moroni; siak ti dadaulo dagiti tattao a Nephita.

15 Ita napasamak a ni Ammoron, idi naawatna daytoy a surat, nagpungtot; ket nangikur-it iti sabali a surat a para ken ni Moroni, ket kastoy dagiti balikas nga inkur-itna, a kinunana:

16 Siak ni Ammoron, ti ari dagiti Lamanita; siak ti kabsat ni Amalickiah a pinapataymo. Kitaen, ibalesko kenka ti darana, wen, ket umayak kenka a kaduak dagiti buyotko ta saanak a mabuteng iti pammutbutengmo.

17 Ta kitaen, nagaramid iti saan a nainkalintegan dagiti ammam kadagiti kakabsatda, uray la a tinakawda kadakuada ti kalinteganda iti gobierno idinto a nainkalintegan a kukuada.

18 Ket ita kitaen, no idissoyo dagiti armasyo, ket itedyo ti bagbagiyo nga iturayan dagidiay nainkalintegan nga agtagikua iti gobierno, isunto nga ibilinko kadagiti tattaok nga idissoda dagiti armasda ket saanton a makigubat.

19 Kitaen, adun ti insawsawangmo a pammutbuteng maibusor kaniak ken kadagiti tattao; ngem kitaen, saankami a mabuteng kadagiti pammutbutengmo.

20 Nupay kasta, ipalubosko a makisinnukat iti balud a mayannurot iti dawatmo, a siraragsak, tapno mataginayonko ti taraonko para kadagiti tattaok a pakigubat; ket iwayangmi ti gubat nga awan patinggana, iti panangituraymi kadagiti Nephita wenno iti awan patinggana a pannakaungawda.

21 Ket no maipanggep iti dayta Dios a kinunam a linaksidmi, kitaen, awan ti ammomi a kasta a naparsua; uray dakayo; ngem no agpayso nga adda kasta a naparsua, saanmi ammo ngem inaramidnakami kasta met kadakayo.

22 Ket no agpayso nga adda sairo ken impierno, kitaen saan kadi nga ibaonnaka idiay a makipagtaeng iti kabsatko a pinapataymo, nga imparipiripmo nga addan iti daydiay a lugar? Ngem kitaen awan aniamanna dagitoy a bambanag.

23 Siak ni Ammoron, ken kaputotan ni Zoram, a pinarigat ken pinapanaw dagiti ammam iti Jerusalem.

24 Ket kitaen ita, naturedak a Lamanita; kitaen, naisayangkat daytoy a gubat tapno agibales kadagiti saan a nainkalintegan a naaramid kadakuada, ken tapno mataginayon ken magun-od dagiti kalinteganda iti gobierno; ket rikpak ti suratko ken ni Moroni.