1 Karon nahitabo nga sa pagkadawat ni Moroni niini nga sulat misamot ang iyang kasuko, tungod kay nasayod siya nga si Ammoron adunay hingpit nga kahibalo sa iyang pagpanglimbong; oo, nasayod siya nga si Ammoron nakahibalo nga dili usa ka makiangayong hinungdan ang miagni kaniya nga ipadayon ang pagpakiggubat batok sa katawhan ni Nephi.

2 Ug miingon siya: Tan-awa, dili ako makigbinayloay og mga binilanggo kang Ammoron gawas kon bawion niya ang iyang katuyoan, sumala sa akong gisulti sa akong sulat; kay dili ako motugot kaniya nga siya makaangkon og dugang pa nga gahom kay sa unsay iya nang naangkon.

3 Tan-awa, nakatultol ako sa dapit diin gibantayan sa mga Lamanita ang akong katawhan nga ilang gidala nga mga binilanggo; ug tungod kay si Ammoron dili motuman sa akong sulat, tan-awa, ihatag ko kaniya sumala sa akong mga pulong; oo, akong tinguhaon ang ilang kamatayon hangtod nga mohangyo sila og kalinaw.

4 Ug karon nahitabo nga sa dihang nakasulti si Moroni niini nga mga pulong, mimando siya nga himoon ang pagpangita taliwala sa iyang mga tawo, basin makakita siya og tawo nga kaliwat ni Laman taliwala kanila.

5 Ug nahitabo nga nakakita sila og usa, kansang ngalan mao si Laman; ug siya usa sa mga sulugoon sa hari nga gipatay ni Amalickiah.

6 Karon gimandoan ni Moroni si Laman ug ang pipila sa iyang mga tawo nga adtoon ang mga magbalantay nga nagbantay sa mga Nephita.

7 Karon ang mga Nephita gipabantayan diha sa siyudad sa Gid; busa si Moroni mitudlo kang Laman ug mimando sa pipila ka tawo nga mouban kaniya.

8 Ug sa pagkagabii si Laman miduol sa mga magbalantay nga nagbantay sa mga Nephita, ug tan-awa, nakakita sila kaniya nga nagsingabot ug mitawag sila kaniya; apan miingon siya ngadto kanila: Ayaw og kahadlok; tan-awa, ako usa ka Lamanita. Tan-awa, nakaeskapo kami gikan sa mga Nephita, samtang nangatulog sila; ug tan-awa gikuha namo ang ilang bino ug among gidala.

9 Karon sa dihang ang mga Lamanita nakadungog niini nga mga pulong malipayon sila nga midawat kaniya; ug miingon sila kaniya: Hatagi kami sa imong bino, aron kami makainom; nalipay kami nga imong gidala ang bino kay kami gipangkapoy.

10 Apan si Laman miingon kanila: Tipigan nato ang atong bino hangtod nga mosulong kita batok sa mga Nephita sa pagpakiggubat. Apan kini nga mga pulong nakadugang sa ilang tinguha nga moinom sa bino;

11 Kay, miingon sila: Kami gipangkapoy, busa moinom kami sa bino, ug unya makadawat kita og bino alang sa atong rasyon, nga makapalig-on nato sa pagsulong batok sa mga Nephita.

12 Ug si Laman miingon kanila: Buhata ninyo sumala sa inyong mga tinguha.

13 Ug nahitabo nga giinom nila ang bino sa kabuhong; ug kini lamian sa ilang pagtilaw, busa giinom nila kini sa dugang nga kabuhong; ug kini isog, ingon nga giandam ang iyang kaisog.

14 Ug nahitabo nga miinom sila ug nagsadya, ug sa wala madugay silang tanan nangahubog.

15 Ug karon sa dihang nakita ni Laman ug sa iyang mga tawo nga silang tanan nangahubog, ug anaa sa lawom nga pagkatulog, mibalik sila ngadto ni Moroni ug misulti kaniya sa tanang butang nga nahitabo.

16 Ug karon mao gayod kini ang plano ni Moroni. Ug giandam ni Moroni ang iyang mga tawo nga gisangkapan niya og mga hinagiban sa gubat; ug miadto siya sa siyudad sa Gid, samtang ang mga Lamanita anaa sa lawom nga pagkatulog ug nangahubog, ug mihatag og mga hinagiban sa gubat ngadto sa mga binilanggo, hangtod nga silang tanan nasangkapan og hinagiban;

17 Oo, bisan ang ilang mga babaye, ug ang ilang tanang anak, kutob sa makamao nga mogamit og hinagiban sa gubat, sa dihang nasangkapan na ni Moroni og hinagiban ang tanang binilanggo; ug kadtong tanan nga mga butang gihimo pinaagi sa hingpit nga kahilom.

18 Apan kon ilang napamata ang mga Lamanita, tan-awa sila mga hubog ug ang mga Nephita unta makapatay kanila.

19 Apan tan-awa, dili kini mao ang tinguha ni Moroni; dili niya ikahimuot ang pagpatay o pagpaagas sa dugo, apan ikahimuot niya ang pagluwas sa iyang katawhan gikan sa kalaglagan; ug tungod niini nga hinungdan dili siya makahimo og walay kaangayan, dili moatake sa mga Lamanita ug molaglag kanila diha sa ilang pagkahubog.

20 Apan nakuha niya ang iyang mga tinguha; kay nasangkapan niya og hinagiban kadtong mga binilanggo nga mga Nephita nga didto sa sulod sa paril sa siyudad, ug mihatag kanila og gahom nga makapanag-iya niadtong mga bahin nga anaa sa sulod sa mga paril.

21 Ug dayon gimandoan niya ang mga tawo nga iyang kauban sa pagsibog og pipila ka lakang gikan kanila, ug palibotan ang kasundalohan sa mga Lamanita.

22 Karon tan-awa gibuhat kini panahon sa kagabhion, mao nga sa dihang nahigmata ang mga Lamanita pagkabuntag nakita nila nga giliyokan na sila sa mga Nephita sa gawas, ug nga ang ilang mga binilanggo sa sulod gisangkapan na og hinagiban.

23 Ug sa ingon niana nakita nila nga ang mga Nephita adunay gahom batok kanila; ug niini nga mga sitwasyon nakita nila nga dili angay nga makig-away sila sa mga Nephita; busa ang ilang labaw nga mga kapitan mikuha sa ilang mga hinagiban sa gubat, ug gidala nila ug gibutang sa tiilan sa mga Nephita, naghangyo og kaluoy.

24 Karon tan-awa, mao kini ang tinguha ni Moroni. Iyang gidakop sila isip mga binilanggo sa gubat, ug mipanag-iya sa siyudad, ug mimando nga ang tanang binilanggo nga mga Nephita buhian; ug miipon sila sa kasundalohan ni Moroni, ug nahimo nga dakong kusog sa iyang kasundalohan.

25 Ug nahitabo nga gimandoan niya ang mga Lamanita, nga nahimo niyang mga binilanggo, nga mosugod sila sa pagtrabaho sa pagpalig-on sa mga kuta libot sa siyudad sa Gid.

26 Ug nahitabo nga sa dihang napalig-on na niya ang siyudad sa Gid, sumala sa iyang mga tinguha, mimando siya nga ang iyang mga binilanggo dad-on ngadto sa siyudad sa Bountiful; ug gipabantayan niya kana nga siyudad og daghang lig-on nga mga sundalo.

27 Ug nahitabo nga gibuhat nila, bisan pa sa tanang pagpanglipot sa mga Lamanita, ang pagbantay ug pagpanalipod sa tanang binilanggo nga ilang gidala, ug usab mipanalipod sa tanang luna ug sa bintaha nga ilang nabawi.

28 Ug nahitabo nga ang mga Nephita misugod na usab sa pagkamadaogon, ug sa pagbawi sa ilang mga katungod ug sa ilang mga kahigayonan.

29 Daghan nga mga higayon nga ang mga Lamanita misulay sa pagliyok kanila sa gabii, apan niini nga mga pagsulay nawad-an sila og daghan nga binilanggo.

30 Ug sa daghan nga higayon misulay sila sa paghatag sa ilang bino ngadto sa mga Nephita, nga sila unta makalaglag kanila pinaagi sa hilo o sa pagkahubog.

31 Apan tan-awa, ang mga Nephita dali nga mahinumdom sa Ginoo nga ilang Dios sa ilang panahon sa kasakit. Dili sila mabitik sa ilang mga laang; oo, dili sila moinom sa ilang bino, gawas kon hatagan nila pag-una ang pipila ka Lamanita nga mga binilanggo.

32 Ug sila sa ingon niana nagmabinantayon nga walay hilo nga ihatag kanila; kay kon ang ilang bino makahilo sa usa ka Lamanita kini usab makahilo sa usa ka Nephita; ug sa ingon niana sila misulay sa tanan nila nga bino.

33 Ug karon nahitabo nga angay alang kang Moroni ang paghimo og mga pagpangandam sa pag-atake sa siyudad sa Morianton; kay tan-awa, ang mga Lamanita nakahimo, pinaagi sa ilang pagtrabaho, sa pagpalig-on sa siyudad sa Morianton hangtod nga kini nahimong lig-on kaayo nga kuta.

34 Ug nagpadayon sila sa pagdala og bag-ong kasundalohan ngadto niana nga siyudad, ug usab bag-ong mga sangkap sa mga pagkaon ug panginahanglanon.

35 Ug sa ingon niana natapos ang ikakawhaan ug siyam nga tuig sa pagmando sa mga maghuhukom sa katawhan ni Nephi.