1 Ka sa qai yaco ni sa taura ko Moronai e dua na ivola i Ilamani ena ikarua ni siga ena imatai ni vula ena itekivu ni ka tolusagavulu ni yabaki ni nodra veiliutaki na turaganilewa, ka tukuni mai kina na kedra itukutuku mai na iwase ni vanua ko ya.

2 Ia sa vakaoqo na vosa ka vola mai, ka kaya mai kina: I Moronai, na tuakaqu lomani, ena vuku ni Turaga, kei na veivakararawataki daru sa sotava; raica, i tuakaqu lomani, au via tukuna mada yani na itukutuku ni neimami veivaluvaluti ena yasayasa oqo.

3 Raica, era lewe rua na udolu na luvedra na wekada, a kauti ira sobu mai ko Amoni mai na vanua ko Nifai—oqo ko sa kila vinaka ni ra kawa ga i Leimani, na ulumatua tagane i Liai na tamada;

4 Oqo sa sega ni yaga me’u vakamacalataka tale vei iko me baleta na nodra ivakarau ni bula se na nodra tawavakabauta, ni ko sa kila tu na veika kece oqo—

5 Ia sa kilikili ga me’u tukuna vei iko ni ra sa tauri iyaragi ni valu tu ko ira na rua na udolu na cauravou oqo, ka ra sa vakaliuci au me’u nodra iliuliu; ka keimami sa lako mai me taqomaka na neimami vanua.

6 Ia oqo ko sa kila tale ga me baleta na veiyalayalati era a cakava na tamadra, ni ra na sega tale ni taura na nodra iyaragi ni valu, me ra valuti ira na wekadra ka vakadave dra.

7 Ia ena ikaruasagavulu kaono ni yabaki, ni ra sa raica na veika rarawa keimami sa sota kaya kei na neimami leqataki ira tiko, era sa voleka kina ni voroka na nodra veiyalayalati ka ra sa vakayacora oti, ka me ra taura cake na nodra iyaragi ni ivalu me ra taqomaki keimami.

8 Ia au a sega ni vakadonuya me ra voroka na veiyalayalati oqo, ni’u nanuma ni na vakaukauwataki keimami na Kalou, ka sega soti ni keimami na kune rarawa sara baleta ni sa vakayacori taucoko na vosa bubului era sa cakava oti.

9 Ia raica, oqo e dua na ka e dodonu sara me da rekitaka vakalevu. Ia raica, ena ikaruasagavulu kaono ni yabaki, koi au, ko Ilamani, au sa liutaki ira yani e lewe rua na udolu na cauravou oqo, ka lako ki na koro ko Jutia me vukei Anitipasi, o koya ko a lesia me nodra iliuliu na tamata mai na yasayasa ko ya.

10 Ia sa mai cokotavata na rua na udolu na luvequ cauravou oqo, (ni sa kilikili me ra vakatokai me ra luvequ) ki na mataivalu i Anitipasi, na veivakaukauwataki oqo e sa marau kina vakalevu ko Anitipasi; ia raica, era sa vakalewelailaitaki na nona mataivalu mai vei ira na Leimanaiti baleta ni ra sa vakamatea e dua na iwiliwili vakaitamera vei ira na noda tagane ena vuku ni nodra kaukauwa, o koya e sa vakavuna kina meda rarawa.

11 Ia oqo meda yalo vakacegu ga ena tikina oqo ni ra sa mate me baleta na nodra vanua kei na nodra Kalou, io, era sa marau kina ko ira.

12 Era sa maroroya tale ga na Leimanaiti e vuqa na kaivesu, ko ira kece oqori era turaganivalu liu ka ni ra sa vakamatei kece na kena vo. Ia keimami nanuma ni kevaka era se bula tiko, era sa tiko sara ga oqo mai na vanua ko Nifai.

13 Ia sa i ira oqo na koro lelevu ka ra sa taura na Leimanaiti ni sa dave kina vakalevu na nodra dra na noda tagane qaqa:

14 Na vanua ko Manitai se na koro levu ko Manitai, na koro levu ko Sisoromi, na koro levu ko Kumeni kei na koro levu ko Anitipara.

15 Ia oqori na veikoro lelevu era sa taura tu ena gauna au yaco kina ki na koro levu ko Jutia; ia ka raica ni sa cakacaka vagumatua sara tiko ko Anitipasi kei ira na nona tamata, me ra viria vakaukauwa na bai ni koro ko ya.

16 Io, sa oca sara vakalevu na yagodra ka sa malumalumu tale ga vakakina na yalodra, ni ra dauvala vakaukauwa ena siga ka ra qai mai cakacaka vakaukauwa tale ena bogi ena qaravi ni nodra koro levu; ia era sa sota kaya kina na veika rarawa kecega.

17 Ia oqo era sa nakita me ra veivakavuai toka ga ena vanua oqo se ra mate; o koya ko nanuma donu kina ni iwiliwili lailai oqo kau a kauta vata mai kei au, io, ko ira na luvequ cauravou ko ya, a solia vei ira na inuinui levu sara kei na marau.

18 Ka sa qai yaco ni ra sa raica na Leimanaiti ni sa levu cake tale na kedra iwiliwili na mataivalu i Anitipasi, sa lewa sara ko Amoroni me ra kakua mada ni kabai keimami mai se via kaba na koro levu ko Jutia me ia na vala.

19 Ia oqo sa lomani keimami sara na Turaga; ni kevaka me ra sa kabai keimami mai ena gauna keimami a malumalumu tu kina, ke sa rusa kina na neimami mataivalu lailai; ia oqo keimami sa maroroi.

20 E sa vakaroti ira sara tiko ga ko Amoroni me ra qarava tiko na veikoro lelevu era sa taura tu oqo. Ia sa mai cava kina na ikaruasagavulu kaono ni yabaki. Ia ena itekivu ni ikaruasagavulu kavitu ni yabaki, keimami sa vakarautaki keimami tu kina ka vakakina na neimami koro levu ki na tataqomaki.

21 Oqo keimami sa gadreva sara me ra mai kabai keimami na Leimanaiti; ia keimami sega ga ni gadreva me keimami laki kabai ira ena nodra itikotiko ni ivalu kaukauwa.

22 Ka sa yaco me ra sa veibiuyaki wavoki tu na neimami yamata me ra vakaraica na nodra veitosoyaki tiko na Leimanaiti, me ra kakua ni lako siviti keimami ena siga se ena bogi ka laki kaba na neimami veikoro lelevu ena vualiku.

23 Ni keimami sa kila tu ni ra sa koro malumalumu ka sega ni kaukauwa me ra sota kei ira; o koya gona keimami sa gadreva, me ra lako siviti keimami me rawa ni keimami kabai ira kina mai muri, ka cemuri ira yani e dakudra, ena gauna vata talega o ya, era na sotavi kina mai liu. Keimami sa vakanuinui ni keimami na rawai ira; ia raica keimami sa rarawa ni sega ni yaco na neimami gagadre.

24 Ia era sa sega sara ni doudou me lako siviti keimami ena nodra mataivalu levu, se dua ga na kena iwase, de ra na malumalumu ka vakadrukai kina.

25 Era sa sega tale ga ni doudou me ra valuta na koro ko Saraemala; ka sega ni doudou me ra kosova na ulu ni uciwai ko Saitoni, me ra lako ki na koro levu ko Nifaia.

26 Ia oqo, sa lomadra sara me ra sa tiko ga e kea na nodra mataivalu, ka me ra qarava tiko na veikoro lelevu era sa taura oti.

27 Ka sa qai yaco ni ena ikarua ni vula ni yabaki oqo, sa yaco mai kina na keimami kakana era vakauta mai na tamadra na noqu lewe rua na udolu na cauravou.

28 Ia era sa lako tale ga mai na vanua ko Saraemala e rua na udolu na tagane me ra mai keimami ikuri. Ia sa vakaoqo na nodra sa vakarau tu e lewe tini na udolu na tagane, ka vakakina na kedra kakana, ka vakakina na kedra na watidra kei na luvedra.

29 Ia ko ira na Leimanaiti, ni ra sa raica ni sa tubu cake tiko ga e veisiga na iwiliwili ni neimami mataivalu, ka sa kau tale tiko ga mai na keimami kakana, era sa rere kina ka lako kusarawa me ra segata me ra sogota na sala me kakua ni vakau tiko mai kina na keimami kakana kei na keimami ikuri.

30 Ni keimami sa kila na nodra nuiqawaqawa na Leimanaiti ena vuku ni ka oqo, keimami sa nakita kina me keimami bukiveretaki ira; o koya sa vakaroti au kina ko Anitipasi me’u kauti ira sobu na luvequ cauravou oqo ki na dua na koro levu voleka ga e kea, me vaka ni keimami kau kedra kakana tiko yani.

31 Ia me keimami lako ravita ga na koro levu ko Anitipara, me vaka ni keimami lako sara tiko yani ki na koro levu ena iyalayala ni vanua mai matasawa.

32 Ka sa yaco ni keimami sa cavutu ka lako yani, me vaka ga ni keimami kauta tiko na kedra kakana ki na koro levu koya.

33 Ka sa yaco ni sa kauta tale ga yani ko Anitipasi e dua na iwase ni nona mataivalu, ka biuti ira na kena vo me ra vakatawana tiko mai na nodra koro. Ia era sa sega ni cavutu mai me yacova ni’u sa volekata yani na koro ko Anitipara, kei na noqu mataivalu lailai.

34 Ia oqo, sa tiko ena koro levu ko Anitipara na nodra mataivalu kaukauwa duadua na Leimanaiti; io, na mataivalu levu duadua.

35 Ka sa yaco ni sa laki tukuni keimami vei ira ko ira na nodra yamata; era sa lako mai kei na nodra mataivalu me valuti keimami.

36 Ka sa yaco ni keimami qai drotaki ira yani ka keimami gole cake tiko, ki na vualiku. Ia keimami sa vakayarayarataki ira tani yani na nodra mataivalu kaukauwa duadua na Leimanaiti;

37 Io, keimami sa vakaliuliu tiko yani ka kauti ira sara vakayawa, me yacova na gauna era sa raici ira kina na mataivalu qaqa nei Anitipasi ni sa muri ira vakaukauwa tiko mai, era sa sega ni gole ki na imatau se ki na imawi, era sa cici muri keimami vakadodonu tiko ga mai; ia, keimami nanuma ni ra sa nakita me ra vakarusai keimami taumada ni bera ni toboki ira mai na mataivalu i Anitipasi de keimami na virikovuti ira.

38 Ia oqo ko Anitipasi sa raica ka kila rawa mai na leqa e rawa ni yaco vei keimami, ka vakusakusataki ira sara yani na nona mataivalu. Ia raica sa bogi mai na vanua; o koya era sa sega kina ni toboki keimami, ka sega tale ga ni toboki ira mai ko Anitipasi; o koya keimami sa keba kina ena bogi ko ya.

39 Ka sa yaco ni sa bera ni kida na mataka, raica, era sa vakasavi keimami tale ko ira na Leimanaiti. Oqo keimami sa sega soti ni kaukauwa sara ka sega ni rawa ni vorati ira yani; io, au sega tale ga ni via soli ira na luvequ cauravou kivei ira; o koya keimami sa dro tiko ga yani kina ki na lekutu.

40 Era sa sega ni via gole ki na imatau se ki na imawi, de keimami na virikovuti ira; ia koi au tale ga au sa sega ni vinakata me keimami gole ki na imatau se ki na imawi, de ra na toboki keimami, ka keimami na sega ni saqati ira rawa, keimami na vakarusai ga, ia era na rawa ni dro sara; ia keimami sa dro tiko ga kina ena lekutu ena siga taucoko, me yacova sara na bogi.

41 Ka sa yaco ni sa bera ni kida na mataka ka tarava, keimami sa raici ira na Leimanaiti ni ra sa kabai keimami mai, ka keimami sa dro sara yani.

42 Ia a sa yaco ni sa sega soti ni yawa sara na vanua era vakasavi keimami mai kina, era sa tu vakadua; ia e sa mataka ni ikatolu ni siga ena ikavitu ni vula.

43 Ia oqo keimami sega ni kila, de ra sa toboki ira mai ko ira na mataivalu i Anitipasi se segai, ia au sa kaya ga vakaoqo vei ira na noqu cauravou: Raica, era sa mai cegu koso na meca ka da sega ni kila na ka era nakita, era vinakata beka me da kabai ira yani me rawa ni ra lawakitaki keda ena dua na vere;

44 O koya gona na cava ko ni sa vinakata, koi kemuni na luvequ, ko ni na vorati ira yani ka vala?

45 Ia oqo i tuakaqu lomani, Moronai, me’u tukuna sara vei iko, ni’u sa sega mada ni bau raica e liu e dua na yaloqaqa, e segai, vei keda kece sara na Nifaiti.

46 Me vaka ga ni’u vakatokai ira me ra luvequ (ni ra sa gone kecega) ia era sa tukuna mai ka vaka: I Tamai keimami, raica sa tiko kei keda na noda Kalou, ka na sega ni vakalaiva me da lutu; ia me da lako mada yani; kevaka era sega ni vakasagai keda mai, me da qai kakua ni vakamatei ira; o koya me da lako ga yani de ra na qai rawa na mataivalu i Anitipasi.

47 Oqo era sa sega mada ni bau vala vakadua, ia era sa sega sara ni rerevaka na mate; raica era sa sega sara ni kauwaitaka na nodra bula vakai ira, era sa gadreva ga me ra galala na nodra qase; io, era sa vakavulici vakavinaka mai vei ira na tinadra, ni kevaka era sega ni vakatitiqa, ena vakabulai ira na Kalou.

48 Ia era sa tukuna lesu mai vei au na nodra vosa na tinadra, ka kaya: Keimami sega ni vakatitiqataka ni ra kila tu na tinai keimami.

49 Ka sa yaco ni’u sa qai kauti ira lesu mai na noqu lewe rua na udolu me keimami saqati ira na Leimanaiti ka ra a cemuri keimami tiko mai. Ia oqo raica, ena gauna oqori era sa toboki ira mai kina ko ira na mataivalu i Anitipasi, ka sa yaco kina e dua na ivalu kaukauwa sara.

50 Era sa oca dina na mataivalu i Anitipasi ena nodra lakova mai e dua na vanua balavu ena loma ni dua na gauna lekaleka ga, ka sa vo sara vakalailai me ra rawai ira ko ira na Leimanaiti; ia kevaka me keimami a sega ni totolo yani kei ira na lewe rua na udolu, ke a yaco dina me vakakina.

51 Ni sa bale mate ena ivalu ko ya ko Anitipasi kei na vuqa tale ga na nona iliuliu baleta ni ra sa oca sara ena vuku ni lako totolo era a cakava mai—o koya ni ra sa bale mate vakaoqo na nodra i liuliu, era sa malumalumu tale ga kina na tamata i Anitipasi vei ira na Leimanaiti.

52 Ka sa yaco ni ra sa yaloqaqa sara na Leimanaiti, ka ra muri ira; ena gauna era sa muri ira matua yani kina, era sa lako mai dakudra ko ira na lewe rua na udolu i Ilamani ka tekivu ravuravu vakaukauwa sara ka veivakamatei, ia sa kaukauwa sara na nodra ravuravu yani ka ra mani saumaki kina na mataivalu ni Leimanaiti ka qaravi Ilamani.

53 Oqo ni ra sa raica na tamata i Anitipasi ni ra sa saumaki na Leimanaiti, era sa kumukumuna vata na nodra mataivalu ka ravuti ira tale na Leimanaiti mai dakudra.

54 Ka sa yaco oqo me keimami qai virikovuti ira e ke na Leimanaiti koi keimami na tamata i Nifai, na tamata i Anitipasi kei ira na noqu lewe rua na udolu, io, keimami sa virikovuti ira ka vakamatea e vuqa sara vei ira; era sa mani soro na kena vo ka solia mai vei keimami na nodra iyaragi ni valu a ra sa neimami kaivesu ni valu.

55 Ia oqo ka sa yaco ni ra sa soro oti vei keimami, raica, au sa qai wiliki ira na cauravou ka keimami a vala vata tiko ni’u leqataka, de na mani levu vei ira era sa bale mate.

56 Ia raica sa vuabale dina na noqu marau ni sega sara ga ni duabulu na tamata vei ira me bale ki na qele; io, sa kilai votu ni ra sa vala tiko me vaka na kaukauwa ni Kalou; io, e sega mada ni se bau kilai me veivakurabuitaki sara vakaoqo na kaukauwa ni nodra vala na tamata; io era sa rerevaka sara tale ga na Leimanaiti na kaukauwa ni nodra ravuravu yani; ka ra sa mani soro kina ka soli ira ga me ra kaivesu ni valu.

57 Ia me vaka ni sega na vanua e ganita me ra tiko kina e ke na kaivesu ka me rawa tale ga ni ra taqomaki tiko kina mai vei ira na Leimanaiti, o koya keimami sa talai ira sara ki na vanua ko Saraemala, ka ra veikau e dua na iwase ni mataivalu i Anitipasi; ia ko ira na kena vo era sa mai cokovata kei na noqu gone tagane ni Amonaiti, ka keimami lesu tale ki na koro levu ko Jutia.