1 Ug karon nahitabo nga nakadawat ako og sulat gikan ni Ammoron, ang hari, nagpahayag nga kon akong ihatag kadtong mga binilanggo sa gubat nga among nabihag ihatag niya ang siyudad sa Antiparah ngari kanamo.

2 Apan mipadala ako og sulat ngadto sa hari, nga segurado kami nga paigo ra ang among kasundalohan nga moilog sa siyudad sa Antiparah pinaagi sa among kusog; ug ang paghatag sa mga binilanggo ngadto niana nga siyudad naghunahuna kami morag dili kini maalamon, ug nga niana ihatag lamang namo ang among mga binilanggo pinaagi sa pagbinayloay.

3 Ug gibalibaran ni Ammoron ang akong sulat, kay dili siya makigbinayloay og mga binilanggo; busa gisugdan namo ang paghimo og mga pagpangandam sa pagsulong sa siyudad sa Antiparah.

4 Apan ang katawhan sa Antiparah mibiya sa siyudad, ug nanglayas ngadto sa ilang ubang siyudad, nga ilang gipanag-iya, aron sa paglig-on niini; ug sa ingon niana ang siyudad sa Antiparah nahulog sa among mga kamot.

5 Ug sa ingon niana natapos ang ikakawhaan ug walo nga tuig sa paghari sa mga maghuhukom.

6 Ug nahitabo nga sa pagsugod sa ikakawhaan ug siyam nga tuig, nakadawat kami og mga sangkap nga pagkaon ug ubang panginahanglanon, ug usab dugang nga kasundalohan, gikan sa yuta sa Zarahemla, ug gikan sa mga yuta nga naglibot, sa gidaghanon nga unom ka libo ka tawo, gawas sa kan-uman ka anak nga lalaki sa mga Ammonita nga miabot aron moipon sa ilang kaigsuonan, nga akong gamayng duha ka libo nga pundok. Ug karon tan-awa, lig-on kaayo kami, oo, ug usab gidad-an kami og daghang pagkaon ug ubang panginahanglanon.

7 Ug nahitabo nga mao kadto ang among tinguha nga makiggubat sa kasundalohan nga gibutang sa pagpanalipod sa siyudad sa Cumeni.

8 Ug karon tan-awa, ipakita ko kanimo nga sa wala madugay natuman namo ang among tinguha; oo, pinaagi sa among lig-on nga kasundalohan, o sa usa ka bahin sa among lig-on nga kasundalohan, giliyokan namo, pagkagabii, ang siyudad sa Cumeni, sa dihang hapit na nila madawat ang mga sangkap nga pagkaon ug ubang panginahanglanon.

9 Ug nahitabo nga nagkampo kami libot sa siyudad sulod sa daghang gabii; apan natulog kami tupad sa among mga espada, ug nagbutang og mga tigbantay, aron ang mga Lamanita dili makasulong kanamo sa gabii ug mopatay kanamo, diin gisulayan nila sa daghang higayon; apan sa daghang higayon nga sila misulay niini miagas ang ilang dugo.

10 Ug sa kadugayan miabot ang ilang mga pagkaon ug ubang panginahanglanon, ug mosulod na unta sila sa siyudad sa pagkagabii. Ug, imbes mga Lamanita, kaming mga Nephita ang nangabot; busa, kami midakop kanila ug sa ilang mga pagkaon ug ubang panginahanglanon.

11 Ug bisan og ang mga Lamanita naputlan sa ilang mga hinabang niining paagiha, hugot gihapon ang ilang tinguha nga panalipdan ang siyudad; busa kinahanglan nga kuhaon namo kadtong mga pagkaon ug panginahanglanon ug ipadala kini ngadto sa Judea, ug ang among mga binilanggo ngadto sa yuta sa Zarahemla.

12 Ug nahitabo nga wala maabti og daghang adlaw sa wala pa ang mga Lamanita mawad-i sa tanang paglaom sa tabang; busa gitugyan nila ang siyudad ngari sa among mga kamot; ug sa ingon niana natuman namo ang among mga plano nga mapanag-iya ang siyudad sa Cumeni.

13 Apan nahitabo nga ang among mga binilanggo hilabihan ka daghan nga, bisan pa sa among hilabihan ka daghan, napugos kami sa paggamit sa tanan namong kasundalohan sa pagbantay kanila, o sa pagpatay kanila.

14 Kay tan-awa, mangikyas sila sa dinaghan, ug makig-away gamit ang mga bato, ug mga bunal, o bisan unsa nga butang nga makuptan sa ilang mga kamot, hangtod nga nakapatay kami og sobra sa duha ka libo kanila human sila mitahan sa ilang mga kaugalingon nga mga binilanggo sa gubat.

15 Busa nahimong importante alang namo, nga kami motapos sa ilang kinabuhi, o mobantay kanila, dala ang espada, molugsong sa yuta sa Zarahemla; ug usab ang among mga pagkaon ug ubang panginahanglanon dili na igo alang sa among kaugalingong katawhan, bisan pa niadtong among mga nakuha gikan sa mga Lamanita.

16 Ug karon, niadtong lisod nga mga kahimtang, nahimong usa ka seryoso kaayo nga butang ang paghukom unsay buhaton niining mga binilanggo sa gubat; bisan pa, nakahukom kami sa pagpadala kanila ngadto sa yuta sa Zarahemla; busa mipili kami og usa ka bahin sa among mga tawo, ug among gitugyan kanila ang mga binilanggo sa paglugsong ngadto sa yuta sa Zarahemla.

17 Apan nahitabo nga sa pagkaugma namalik sila. Ug karon tan-awa, wala kami mangutana kanila mahitungod sa mga binilanggo; kay tan-awa, ang mga Lamanita misulong na kanamo, ug namalik sila sa tukma nga panahon sa pagluwas aron kami dili mahulog sa ilang mga kamot. Kay tan-awa, si Ammoron mipadala sa ilang suporta nga bag-ong sangkap sa mga pagkaon ug ubang panginahanglanon ug usab daghang kasundalohan nga kalalakin-an.

18 Ug nahitabo nga kadtong mga tawo nga among gipadala kauban sa mga binilanggo miabot sa tukma nga panahon aron pagpugong kanila, kay kami hapit na nila mabuntog.

19 Apan tan-awa, ang gamay nakong pundok nga duha ka libo ug kan-uman nakig-away sa hilabihan nga panglimbasog; oo, lig-on sila sa atubangan sa mga Lamanita, ug mipahamtang og kamatayon ngadto sa tanan nga misukol kanila.

20 Ug samtang ang nahibilin sa among kasundalohan mosibog na unta gikan sa mga Lamanita, tan-awa, kadtong duha ka libo ug kan-uman, mga lig-on ug walay kahadlok.

21 Oo, ug mituman ug naninguha sila sa pagbuhat sa ensakto gayod sa matag pulong sa sugo; oo, ug gani sumala sa ilang pagtuo kini nahimo ngadto kanila; ug nahinumdom ako sa mga pulong nga ilang gisulti kanako nga ang ilang mga inahan mitudlo kanila.

22 Ug karon tan-awa, kining akong mga anak, ug kadtong mga lalaki nga gipili sa paghatod sa mga binilanggo, maoy among nautangan niining dako nga kadaogan; kay sila ang mibuntog sa mga Lamanita; busa giabog sila og balik ngadto sa siyudad sa Manti.

23 Ug nagpabilin kanamo ang among siyudad sa Cumeni, ug tanan wala mamatay pinaagi sa espada; bisan pa niana, daghan ang nawala kanamo.

24 Ug nahitabo, human nga nanglayas ang mga Lamanita, mihatag dayon ako og mando nga ang akong mga tawo nga nasamdan kinahanglan kuhaon gikan sa mga patay, ug mimando nga tambalan ang ilang mga samad.

25 Ug nahitabo nga dihay duha ka gatos, gikan sa akong duha ka libo ug kan-uman, nga nakuyapan tungod kay nawad-an og daghang dugo; bisan pa niana, sumala sa kaayo sa Dios, ug sa among dako nga kahibulong, ug usab sa kamaya sa among tibuok nga kasundalohan, walay usa ka kalag kanila ang nakalas; oo, ug ni usa ka kalag taliwala kanila nga wala makadawat og daghan nga samad.

26 Ug karon, ang ilang pagkaluwas kahibulongan sa among tibuok kasundalohan, oo, nga naluwas sila samtang dihay kaliboan sa among kaigsuonan ang napatay. Ug makiangayon kaming mohatag og pasidungog sa milagroso nga gahom sa Dios, tungod sa ilang dakong pagtuo diin niana sila gitudloan nga motuo—nga adunay makiangayon nga Dios, ug si kinsa ang dili magduhaduha, sila mapanalipdan pinaagi sa iyang kahibulongan nga gahom.

27 Karon kini mao ang pagtuo niining akong gihisgotan; mga batan-on sila, ug ang ilang mga hunahuna mga lig-on, ug mibutang kanunay sa ilang pagsalig diha sa Dios.

28 Ug karon nahitabo nga human namo maatiman ang among mga tawo nga samaran, ug malubong ang among mga patay ug usab ang mga patay nga mga Lamanita, kinsa daghan, tan-awa, nangutana kami ni Gid mahitungod sa mga binilanggo nga ilang gihatod ngadto sa yuta sa Zarahemla.

29 Karon si Gid mao ang labaw nga kapitan sa pundok nga gipili nga mobantay kanila sa paglugsong ngadto sa yuta.

30 Ug karon, mao kini ang mga pulong nga gisulti ni Gid kanako: Tan-awa, misugod kami sa paglugsong ngadto sa yuta sa Zarahemla uban sa among mga binilanggo. Ug nahitabo nga nasugatan namo ang mga espiya sa atong kasundalohan, nga gipadala aron sa pagpaniid sa kampo sa mga Lamanita.

31 Ug misinggit sila ngari kanamo nga nag-ingon—Tan-awa, ang kasundalohan sa mga Lamanita nagmartsa paingon sa siyudad sa Cumeni; ug tan-awa, sila mosulong kanila, oo, ug molaglag sa atong katawhan.

32 Ug nahitabo nga ang among mga binilanggo nakadungog sa ilang mga singgit, nga nakapadasig kanila; ug nagsugod sila sa pagsukol batok kanamo.

33 Ug nahitabo nga tungod sa ilang pagsukol gipangtigbas namo sila sa among mga espada. Ug nahitabo nga isip usa ka pundok gihasmagan nila ang among mga espada, diin, ang ubay-ubay nga gidaghanon kanila napatay; ug ang nahibilin kanila nakaikyas ug milayas gikan kanamo.

34 Ug tan-awa, sa dihang nakalayas na sila ug dili na kami makaapas kanila, mimartsa kami paingon sa siyudad sa Cumeni; ug tan-awa, miabot kami sa tukma nga panahon nga kami makatabang sa atong kaigsuonan sa pagpanalipod sa siyudad.

35 Ug tan-awa, naluwas na usab kami gikan sa mga kamot sa among mga kaaway. Ug bulahan ang ngalan sa atong Dios; kay tan-awa, siya ang nagluwas kanamo; oo, nga nakahimo niining mahinungdanon nga butang alang kanamo.

36 Karon nahitabo nga sa dihang ako, si Helaman, nakadungog niining mga pulong ni Gid, napuno ako sa tumang kamaya tungod sa pagkamaayo sa Dios sa pagpanalipod kanamo, aron dili kami mahurot og kamatay; oo, ug misalig ako nga ang mga kalag nila sa mga napatay makasulod sa kapahulayan sa ilang Dios.