1 Ug tan-awa, karon nahitabo nga ang sunod namong tumong mao ang pagpanag-iya sa siyudad sa Manti; apan tan-awa, walay paagi nga madala namo sila palayo gikan sa siyudad pinaagi sa among gagmay nga pundok. Kay tan-awa, nahinumdom sila sa among gibuhat kaniadto; busa dili na namo sila malingla sa pagdala kanila palayo gikan sa ilang mga kuta.

2 Ug mas daghan kaayo sila kay sa among kasundalohan nga wala kami mangahas nga moadto ug moatake kanila sa ilang mga kuta.

3 Oo, ug gikinahanglan nga among gamiton ang among mga tawo sa pagpanalipod niadtong mga bahin sa yuta nga among napanag-iya pag-usab; busa gikinahanglan nga maghulat kami, aron makadawat kami og dugang nga kasundalohan gikan sa yuta sa Zarahemla ug usab usa ka bag-o nga sangkap sa mga pagkaon ug ubang panginahanglanon.

4 Ug nahitabo nga ako sa ingon niana mipadala og mensahe ngadto sa gobernador sa among yuta, sa pagpahibalo kaniya mahitungod sa mga kalihokan sa among katawhan. Ug nahitabo nga naghulat kami nga makadawat sa mga pagkaon ug ubang panginahanglanon ug kasundalohan gikan sa yuta sa Zarahemla.

5 Apan tan-awa, gamay ra kini og nahatag nga kaayohan kanamo; kay ang mga Lamanita nakadawat usab og daghan nga kasundalohan adlaw-adlaw, ug daghan usab nga pagkaon ug ubang panginahanglanon; ug ingon niana ang among kahimtang niini nga panahon.

6 Ug ang mga Lamanita kalit nga moatake kanamo matag karon ug unya, naghunahuna og taktika sa pagpatay kanamo; bisan pa niana dili kami makahimo sa pagpakig-away kanila, tungod sa ilang mga dangpanan ug sa ilang mga kuta.

7 Ug nahitabo nga naghulat kami sa ingon niining malisod nga kahimtang sulod sa daghang bulan, gani hangtod nga hapit na kami mangamatay tungod sa panginahanglan og pagkaon.

8 Apan nahitabo nga nakadawat kami og pagkaon, nga gibantayan sa duha ka libo nga kasundalohan ngari kanamo alang sa among hinabang; ug mao ra kini ang tanan nga hinabang nga among nadawat, sa pagpanalipod sa among kaugalingon ug sa among nasod nga dili mahulog ngadto sa mga kamot sa among mga kaaway, oo, aron sa pagpakig-away sa usa ka kaaway nga hilabihan ka daghan.

9 Ug karon ang hinungdan niining among mga kalisdanan, o ang hinungdan nganong wala sila mopadala og dugang nga kasundalohan ngari kanamo, wala kami masayod; busa naguol kami ug usab napuno sa kahadlok, basin pa unya sa bisan unsa nga paagi ang mga paghukom sa Dios modangat sa among yuta, ngadto sa among pagkapukan ug hingpit nga kalaglagan.

10 Busa gibu-bo namo ang among mga kalag pinaagi sa pag-ampo ngadto sa Dios, nga lig-onon niya kami ug luwason kami gikan sa mga kamot sa among mga kaaway, oo, ug mohatag usab kanamo ug kusog aron among mabatonan ang among mga siyudad, ug ang among mga yuta, ug ang among mga kabtangan, alang sa pagsuporta sa among katawhan.

11 Oo, ug nahitabo nga ang Ginoo nga among Dios mihatag kanamo og kasegurohan nga siya moluwas kanamo; oo, hangtod nga siya misulti og kalinaw sa among mga kalag, ug mihatag ngari kanamo og hugot kaayong pagtuo, ug mihimo kanamo nga kami molaom sa among kaluwasan diha kaniya.

12 Ug nakabaton kami og kaisog uban sa among gamay nga kasundalohan nga among nadawat, ug hugot ang among tinguha sa pagbuntog sa among mga kaaway, ug sa pagpanalipod sa among mga yuta, ug sa among mga kabtangan, ug sa among mga asawa, ug sa among mga anak, ug sa kawsa sa among kalingkawasan.

13 Ug sa ingon niana misulong kami uban sa tanan namong kusog batok sa mga Lamanita, nga didto sa siyudad sa Manti; ug mitukod kami sa among mga tolda sa may daplin sa kamingawan, nga duol sa siyudad.

14 Ug nahitabo nga sa pagkaugma, sa dihang nakita sa mga Lamanita nga kami anaa na sa mga utlanan sa kamingawan nga duol sa siyudad, nga sila mipadala sa ilang mga espiya libot kanamo aron makita nila ang gidaghanon ug ang kalig-on sa among kasundalohan.

15 Ug nahitabo nga sa dihang nakita nila nga dili kami lig-on, sumala sa among gidaghanon, ug nahadlok nga putlon namo ang ilang hinabang gawas kon mogawas gayod sila aron sa pagpakiggubat batok kanamo ug mopatay kanamo, ug nagtuo usab nga sayon ra nila ang pagpatay kanamo tungod sa ilang hilabihan nga gidaghanon, busa nagsugod sila sa paghimo og mga pagpangandam aron sa pagpakig-away batok kanamo.

16 Ug sa dihang nakita namo nga nangandam na sila sa pagpakig-away batok kanamo, tan-awa, mimando ako nga si Gid, uban sa gamay nga pundok sa mga tawo, motago sa iyang kaugalingon didto sa kamingawan, ug usab nga si Teomner ug usa ka gamay nga pundok sa mga tawo motago usab sa ilang kaugalingon didto sa kamingawan.

17 Karon si Gid ug ang iyang mga tawo diha sa tuo ug ang uban diha sa wala; ug sa dihang nakatago na sila, tan-awa, ako nagpabilin, kauban sa nahabilin nakong kasundalohan, sa sama nga dapit diin kami unang mitukod sa among mga tolda batok sa panahon nga ang mga Lamanita mosulong kanamo aron sa pagpakiggubat.

18 Ug nahitabo nga ang mga Lamanita migawas uban sa ilang daghan kaayo nga kasundalohan batok kanamo. Ug sa dihang nangabot sila ug sa hapit na mosulong kanamo gamit ang espada, mimando ko nga ang akong mga tawo, kadtong mga miuban kanako, mosibog ngadto sa kamingawan.

19 Ug nahitabo nga ang mga Lamanita misunod kanamo sa hilabihang kakusog, kay tinguha gayod nila nga maapsan kami aron mapatay nila kami; busa misunod sila kanamo ngadto sa kamingawan; ug milabay kami sa taliwala ni Gid ug ni Teomner, nga niana wala sila makita sa mga Lamanita.

20 Ug nahitabo nga sa dihang ang mga Lamanita nakalabay na, o ang kasundalohan nakalabay na, si Gid ug si Teomner migawas gikan sa ilang gitagoang mga dapit, ug mipugong sa mga espiya sa mga Lamanita nga dili na sila makabalik sa siyudad.

21 Ug nahitabo nga sa dihang napugngan nila sila, nanagan sila paingon sa siyudad ug misulong sa mga tigbantay nga gibilin sa pagbantay sa siyudad, nga niana gipamatay nila sila ug gipanag-iya ang siyudad.

22 Karon nahitabo kini tungod kay ang mga Lamanita mitugot sa ilang tibuok nga kasundalohan, gawas sa pipila lamang ka tigbantay, nga madala ngadto sa kamingawan.

23 Ug nahitabo nga si Gid ug si Teomner sa ingon niini nga pamaagi nakapanag-iya sa ilang mga kuta. Ug nahitabo nga mibiyahe kami, human makahimo og taas nga panaw sa kamingawan padulong sa yuta sa Zarahemla.

24 Ug sa dihang nakita sa mga Lamanita nga nagmartsa sila paingon sa yuta sa Zarahemla, nangahadlok sila sa hilabihan, basin pa unya og adunay planong giandam nga maghatod kanila sa kalaglagan; busa nagsugod na usab sila sa pagsibog ngadto sa kamingawan, oo, gani balik sa mao gihapong agianan nga ilang gigikanan.

25 Ug tan-awa, gabii na ug gipabarog nila ang ilang mga tolda, kay ang labaw nga mga kapitan sa mga Lamanita nagtuo nga gipangkapoy ang mga Nephita tungod sa ilang pagmartsa; ug nagtuo nga naabog nila ang tibuok nilang kasundalohan busa wala na sila maghunahuna mahitungod sa siyudad sa Manti.

26 Karon nahitabo nga sa dihang gabii na, mimando ako nga ang akong mga tawo dili mangatulog, apan momartsa sila sa unahan sa laing agianan paingon sa yuta sa Manti.

27 Ug tungod niini nga among pagmartsa sa panahon sa gabii, tan-awa, sa pagkaugma naunhan na namo ang mga Lamanita, nga niana kami nag-una sa pag-abot kay kanila sa siyudad sa Manti.

28 Ug sa ingon niana nahitabo, nga pinaagi niini nga taktika napanag-iya namo ang siyudad sa Manti nga walay dugo nga miagas.

29 Ug nahitabo nga sa dihang ang kasundalohan sa mga Lamanita miabot duol sa siyudad, ug nakakita nga andam na kami sa pagpakig-away kanila, nahibulong sila sa hilabihan ug giabot og dakong kahadlok, nga niana nanglayas sila ngadto sa kamingawan.

30 Oo, ug nahitabo nga ang kasundalohan sa mga Lamanita nanglayas gikan niining tanan nga dapit sa yuta. Apan tan-awa, gidala nila ang daghang mga babaye ug mga bata gikan sa yuta.

31 Ug kadtong mga siyudad nga nakuha sa mga Lamanita, kining tanan, niini nga panahon ania ubos sa among kamandoan; ug ang among mga amahan ug ang among mga babaye ug ang among mga anak namauli sa ilang mga panimalay, gawas sa tanan nga nakuha nga mga binilanggo ug gidala sa mga Lamanita.

32 Apan tan-awa, gamay ra ang among kasundalohan nga makapanalipod sa daghan kaayong siyudad ug sa dagko kaayong mga teritoryo nga yuta.

33 Apan tan-awa, misalig kami sa among Dios nga mihatag kanamo og kadaogan niadtong mga yuta, nga niana napanag-iya namo kadtong mga siyudad ug kadtong mga yuta, nga among kaugalingon.

34 Karon wala kami masayod sa hinungdan nganong ang gobyerno wala mohatag kanamo og dugang nga kasundalohan; ni kadtong mga tawo nga nangabot ngari kanamo nasayod nganong wala kami makadawat og dugang nga kasundalohan.

35 Tan-awa, wala kami masayod apan nagtuo kami nga kamo wala molampos, ug nadani ninyo ang kasundalohan niana nga dapit sa yuta; kon mao, kami walay tinguha nga magbagulbol.

36 Ug kon dili man kini mao, tan-awa, nahadlok kami nga adunay pipila ka panagbangi sa gobyerno, mao nga wala na sila magpadala og dugang nga mga tawo aron motabang kanamo; kay nasayod kami nga mas daghan sila kaysa ilang gipadala.

37 Apan, tan-awa, kini dili maoy mahinungdanon—misalig kami nga ang Dios moluwas kanamo, bisan pa sa kahuyang sa among kasundalohan, oo, ug moluwas kanamo gikan sa mga kamot sa among mga kaaway.

38 Tan-awa, kini ang ikakawhaan ug siyam nga tuig, sa kaulahian nga bahin, ug nanag-iya kami sa among mga yuta; ug ang mga Lamanita nanglayas na ngadto sa yuta sa Nephi.

39 Ug kadtong mga anak nga lalaki sa katawhan ni Ammon, nga akong gidayeg pag-ayo, ania uban kanako sa siyudad sa Manti; ug ang Ginoo misuporta kanila, oo, ug mipanalipod kanila gikan sa pagkapukan pinaagi sa espada, nga gani walay bisan usa ka kalag ang napatay.

40 Apan tan-awa, nakadawat sila og daghan nga samad; bisan pa niana nagmakanunayon sila sa kalingkawasan diin ang Dios mihimo kanila nga gawasnon; ug higpit ang ilang paghinumdom sa Ginoo nga ilang Dios adlaw-adlaw; oo, naninguha sila sa pagtuman sa iyang mga balaod, ug sa iyang mga paghukom, ug sa iyang mga sugo sa kanunay; ug lig-on ang ilang pagtuo sa mga panagna mahitungod niana nga moabot.

41 Ug karon, hinigugma ko nga igsoong Moroni, hinaot nga ang Ginoo nga atong Dios, kinsa mitubos kanato ug mihimo kanato nga gawasnon, kanunay nga mobantay kanimo sa iyang atubangan; oo, ug hinaot nga siya motabang niini nga katawhan, gani aron molampos ka sa pagpanag-iya sa tanan niadtong gipangkuha sa mga Lamanita gikan kanato, nga alang sa atong kabuhian. Ug karon, tan-awa, ako motapos sa akong sulat. Ako si Helaman, ang anak nga lalaki ni Alma.