1 Karon nahitabo sa ikakatloan nga tuig sa paghari sa mga maghuhukom sa katawhan ni Nephi, human si Moroni makadawat ug makabasa sa sulat ni Helaman, nagmaya siya sa hilabihan tungod sa kaayohan, oo, sa dakong kalamposan nga naangkon ni Helaman, sa pagpanag-iya niadtong mga yuta nga nawala kanila.

2 Oo, ug gipahibalo niya kini ngadto sa iyang tanan nga katawhan, sa tibuok yuta nga naglibot sa dapit diin siya didto, aron sila usab magmaya.

3 Ug nahitabo nga dihadiha mipadala siya og usa ka sulat kang Pahoran, nagtinguha kaniya nga padalhan siya og mga tawo aron sa paglig-on ni Helaman, o sa kasundalohan ni Helaman, nga sa niana sayon niyang maatiman ang bahin sa yuta nga iyang nabawi pinaagi sa labihan ka milagrosong kalamposan.

4 Ug nahitabo nga sa dihang si Moroni mipadala niini nga sulat ngadto sa yuta sa Zarahemla, misugod na usab siya sa paghan-ay og plano aron maangkon niya ang nahibilin nga mga teritoryo ug mga siyudad nga giilog sa mga Lamanita gikan kanila.

5 Ug nahitabo nga samtang si Moroni sa ingon niana nangandam sa pagsulong batok sa mga Lamanita aron makiggubat, tan-awa, ang katawhan ni Nephihah, nga nagpundok gikan sa siyudad sa Moroni ug sa siyudad sa Lehi ug sa siyudad sa Morianton, gisulong sa mga Lamanita.

6 Oo, gani kadtong napugos sa paglayas gikan sa yuta sa Manti, ug gikan sa palibot nga yuta, miabot ug nakig-uban sa mga Lamanita niini nga bahin sa yuta.

7 Ug sa ingon sa ka hilabihan sa gidaghanon, oo, ug nakadawat og dugang nga kasundalohan adlaw-adlaw, pinaagi sa kamandoan ni Ammoron misulong sila batok sa katawhan ni Nephihah, ug misugod sila sa pagpatay kanila sa hilabihan ka grabe nga pagpamatay.

8 Ug ang ilang kasundalohan hilabihan ka daghan nga ang nahibilin nga katawhan ni Nephihah napugos sa paglayas gikan kanila; ug nangabot sila ug miipon sa kasundalohan ni Moroni.

9 Ug karon kay nagtuo si Moroni nga kinahanglan adunay mga tawo nga ipadala ngadto sa siyudad sa Nephihah, aron sa pagtabang sa katawhan sa pagpanalipod niana nga siyudad, ug nasayod nga mas sayon ang pagpanalipod sa siyudad gikan sa pagkahulog ngadto sa mga kamot sa mga Lamanita kay sa pagbawi niini gikan kanila, nagtuo siya nga sayon ra nilang mapanalipdan kana nga siyudad.

10 Busa gipabilin niya ang iyang tanan nga kasundalohan aron manalipod niadtong mga dapit nga iya nang nabawi.

11 Ug karon, sa dihang si Moroni nakakita nga napildi ang siyudad sa Nephihah nagmasulub-on siya sa hilabihan, ug misugod sa pagduhaduha, tungod sa pagkadaotan sa katawhan, kon duna pa ba kaha silay katakos aron dili sila mahulog sa mga kamot sa ilang kaigsuonan.

12 Karon mao kini ang nahitabo sa iyang tanan nga labaw nga kapitan. Nagduhaduha sila ug nahibulong usab tungod sa pagkadaotan sa katawhan, ug kini tungod sa kalamposan sa mga Lamanita batok kanila.

13 Ug nahitabo nga nasuko si Moroni sa gobyerno, tungod sa ilang kawalay pagtagad kabahin sa kagawasan sa ilang nasod.