1 Kitaen, ita napasamak a saan a nagbayag kalpasan ti panangipatulod ni Moroni iti suratna iti hepe a gobernador, nakaawat iti surat manipud ken ni Pahoran, ti hepe a gobernador. Ket dagitoy ti naawatna a balikas:

2 Siak, ni Pahoran, ti hepe a gobernador iti daytoy a daga, ipatulodko dagitoy a balikas ken ni Moroni, ti hepe a kapitan iti soldado. Kitaen, kunak kenka, Moroni, a saanko a pagragsakan dagiti nakaro a rigrigatyo, wen, agladingit ti kararuak iti daytoy.

3 Ngem kitaen, adda dagidiay agragsak kadagiti rigrigatyo, wen, isu nga uray la a nagrebeldeda kontra kaniak, ken kasta met dagidiay tatttaok nga isuda dagiti tattao a para iti wayawaya, wen, ken nakaad-adu unay dagidiay immalsa.

4 Ket isuda dagidiay nangikagumaan a mangikkat kaniak iti tugaw ti panangukom ti nakaigapuan iti daytoy nakaro a kinadangkes; ta inusarda ti kasta unay a panangpasablog, ken inalillawda ti puspuso ti adu a tattao, nga isunto ti pakaigapuan ti nakaro a rigat kadatayo; impaidamda dagiti probisionmi, ken binutbutengda dagiti tattaomi a para iti wayawaya isu a saanda nga immay kadakayo.

5 Ket kitaen, pinatalawdak iti sanguananda, ket nakalibasak iti daga ti Gideon, a kaduak ti adu kadagiti soldado a kabaelak nga itugot.

6 Ket kitaen, nangipatulodak iti maysa a proklamasion iti intero a paset iti daytoy a daga; ket kitaen, inaldaw nga immayda kadakami, tapno agarmasda, para iti panangdepensa iti pagilianda ken iti wayawayada, ken tapno agibales kadagiti kinaawan hustisia a naaramid kadakami.

7 Ket immayda kadakami, isu nga uray la a dagidiay nagrebelde kontra kadakami ket nakaritda, wen, isu nga uray la nga agbutengda kadakami ken saanda maitured a makigubat kadakami.

8 Nagun-odda a matagikua ti daga, wenno ti siudad, ti Zarahemla; nangitudingda iti maysa nga ari a mangidaulo kadakuada, ket nagsurat iti ari dagiti Lamanita, nga iti daytoy nakikadua kenkuana iti maysa nga aliansa; nga iti dayta nga aliansa immanamonganna a mangmantener iti siudad ti Zarahemla, nga impagarupna nga iti daytoy panangmantener kabaelanto a sakupen dagiti Lamanita ti nabati a daga, ket maikabil isuna nga ari kadagitoy a tattao inton maparmekda babaen dagiti Lamanita.

9 Ket ita, binalawnak iti suratmo, ngem saan a pakaseknan; Saanak a makapungtot, ngem agragsakak iti kinatan-ok ti pusom. Siak, ni Pahoran, saanko ikagumaan ti bileg, malaksid laeng a pagtalinaedek ti tugaw ti panangukomko tapno mataginayonko dagiti kalintegan ken libertad dagiti tattaok. Sititibker ti kararuak iti dayta a libertad nga inaramid ti Dios nga agbalintayo a nawaya.

10 Ket ita, kitaen, labananmi ti kinadangkes uray agingga iti panangpapatay. Saanmi koma papatayen dagiti Lamanita no agtalinaedda koma iti bukodda a daga.

11 Saanmi koma a papatayen dagiti kakabsatmi no saanda koma nga agrebelde ken agarmasda iti espada kontra kadakami.

12 Ipasakupmi koma ti bagbagimi iti sangol ti pannakaadipen no kasapulan daytoy iti hustisia ti Dios, wenno no ibilinna kadakami nga aramidentayo daytoy.

13 Ngem kitaen saannakami nga ibilin nga ipasakupmi ti bagbagimi kadagiti kabusormi, no di ket masapul nga agtalekkami kenkuana, ket isalakannakami.

14 Ngarud, ay-ayatek a kabsatko, a Moroni, labanantayo ti dakes, ken aniaman a dakes a saantayo a malabanan babaen kadagiti balikastayo, wen, kas kadagiti panagrebelde ken saan a pagkikinnaawatan, labanantayo ida babaen kadagiti espadatayo, tapno mabalin a mataginayon ti wayawayatayo, tapno mabalin nga agragsaktayo iti naindaklan a pribilehio ti simbaantayo, ken iti panggep ti Mannubbottayo ken ti Diostayo.

15 Ngarud, umaykayo a dagus kaniak a kadua ti sumagmamano kadagiti soldadoyo, ket bay-am ti nabati iti panangidaulo da Lehi ken Teancum; ikkam ida iti bileg a mangidaulo iti gubat iti dayta a paset ti daga, sigun iti Espiritu ti Dios, nga isu met la ti espiritu ti wayawaya nga adda kadakuada.

16 Kitaen nangipatulodak iti sumagmamano a probision kadakuada, tapno saanda a matay agingga a makaumayka kaniak.

17 Ummongem ti aniaman a puersa a kabaelanyo iti panagmartsayo nga umay ditoy, ket sipapardas a mapantayonto a makilaban kadagidiay simmiasi, iti pigsa ti Diostayo sigun iti pammati nga adda kadatayo.

18 Ket tagikuaentayo ti siudad ti Zarahemla, tapno makagun-odkami iti ad-adu pay a taraon nga ipatulod kada Lehi ken Teancum; wen, mapantayo makilaban kadakuada iti pigsa ti Apo, ket pagpatinggaentayo daytoy nakaro a kinadangkes.

19 Ket ita, Moroni, talaga a nagragsakak iti panangawatko iti suratmo, gapu ta medio nagdanagak maipapan iti no ania ti masapul nga aramidentayo, no nalinteg koma kadatayo ti mapan makilaban kadagiti kakabsattayo.

20 Ngem kinunam a, malaksid no agbabawida imbilin kenka ti Apo a masapul a mapanka ​​makilaban kadakuada.

21 Siguraduem a papigsaem da Lehi ken Teancum iti Apo; ibagam kadakuada a saanda agbuteng, agsipud ta isalakandanto ida ti Dios, wen, ken kasta met amin dagidiay sititibker iti dayta a libertad a nangwayawayaan kadakuada ti Dios. Ket ita irikepkon ti suratko iti ay-ayatek a kabsatko, ni Moroni.