1 Ka sa qai yaco ni sa vakayaloqaqataki Moronai sara na nona wilika na ivola oqo, ka sa vuabale na nona marau ena kena dei tu ga na vakabauta nei Paorani, io sa rekitaki koya ni sega ni dau veretaka na bula galala kei na veika ni nona vanua.

2 Ia sa rarawataka tale ga vakalevu na nodra caka ca o ira era a vakasavi Paorani tani mai na itikotiko ni veilewai, io, sa rarawataki ira vakaidina sara era sa saqata na nodra vanua kei na nodra Kalou.

3 Ka sa yaco ni sa kauta ko Moronai e dua na iwiliwili lailai ni nona tamata, me vaka na gagadre i Paorani ki na vanua ko Kitioni, a sa lesi rau ko Liai kei Tenikamu me rau liutaka tiko na vo kece ni nona mataivalu.

4 A sa vakarewataka na drotini ni bula galala ena vanua cava ga sa curuma yani, ia sa levu cake tiko ga na iwiliwili ni nona mataivalu ena nona ilakolako ki na vanua ko Kitioni.

5 Ka sa yaco ni ra sa soqoni vata ki na nona mataivalu e udolu na tamata, era sa taura cake na nodra iseleiwau me ra valataka na nodra galala, me ra kakua kina ni vakabobulataki.

6 O koya gona, a sa vakasoqona kina ko Moronai na levu ga ni tamata e rawata, ena nona ilakolako sa qai tadu yani ki Kitioni; ia ni ra sa qai cokovata kei na mataivalu i Paorani, era sa lewelevu cake ka lailai na mataivalu i Pakusi, na nodra tui na dauvakacaca ka ra a vakasavi ira tani na tamata galala ka taura na vanua ko Saraemala.

7 Ka sa yaco ni rau sa kauta yani na nodrau mataivalu ko Moronai kei Paorani ki na vanua ko Saraemala, a ra sa kaba yani na koro, ka vala kei na mataivalu i Pakusi.

8 Ka raica, a sa vakamatei ko Pakusi ka ra tauri vakavesu na nona tamata, a sa vakalesui tale ko Paorani ki na nona itikotiko ni veilewai.

9 A ra sa lewai na tamata i Pakusi me vaka na lawa, kei ira talega era via vakatui tiko era sa biu ki na vale ni veivesu; era sa vakamatei me vaka na lawa; io, o ira na tamata i Pakusi, kei ira era via vakatui tiko kei ira ga era sega ni via cola iyaragi me taqomaka na vanua, ka ra gadreva ga me ra valuta, era sa vakamatei.

10 O koya gona sa kilikili kina me muri tiko na lawa oqo me taqomaki kina na nodra vanua; ia era sa vakamatei sara vakatotolo me vaka na lawa ko ira kecega sa kunei ni ra vakacacana tiko na nodra bula galala.

11 Sa mai cava kina na ikatolusagavulu ni yabaki ni nodra veiliutaki na turaganilewa vei ira na Nifai; Erau sa vakadeitaka tale na tiko sautu mai Saraemala ko Moronai kei Paorani ena kedra maliwa na nodrau tamata, ia era sa vakamatei kecega ko ira sa sega ni dina ki na yavu ni bula galala.

12 Ka sa yaco ena itekivu ni ikatolusagavulu ka dua ni yabaki ni nodra veiliutaki na turaganilewa vei ira na Nifai, sa vakarota ko Moronai me vakau na kedra kakana na tamata i Ilamani, me vakau tale ga e ono na udolu na tamata ivalu, me ra laki vukei koya ena kena maroroi na yasa ni vanua ko ya.

13 Ka sa lewa ko koya me vakau tale ga e ono na udolu na tamata ivalu kei na ivakarau kakana e rauti ira kivei rau ko Liai kei Tenikamu. A sa yaco ni sa vakayacori na ka oqo me taqomaki vinaka kina na nodra vanua mai vei ira na Leimanaiti.

14 Ka sa yaco ni rau sa biuta toka mai ko Moronai kei Paorani e dua na iwase levu ni tamata ena vanua ko Saraemala ka rau kauta yani e dua na iwase levu ni tamata ki na vanua ko Nifaia ena nodrau sa vakadeitaka me rau laki vakavuai ira na Leimanaiti era tiko kina.

15 Ka sa yaco ni ra sa lako tiko yani, era sa sota kei na vuqa sara na Leimanaiti, era sa vakamatea e vuqa vei ira, a ra sa taura na nodra iyaragi ni valu kei na kedra kakana.

16 Ka sa yaco ni oti na nodra tauri ira, era sa vakavuna me ra vauci ki na dua na veiyalayalati me ra kakua tale ni taura na nodra iyaragi ka mai valuti ira na Nifaiti.

17 Ia ni ra sa cakava oti na veiyalayalati oqo era sa vakauti sara me ra laki tiko vata kei ira na tamata i Amoni, ia na kedra levu e rauta e va na udolu ka ra a sega ni vakamatei.

18 Ka sa yaco ni ra sa vakauti ira oti yani era sa qai tomana tale na nodra ilakolako ki na vanua ko Nifaia. A sa yaco ni ena gauna era sa yaco kina ki na korolevu ko Nifaia a ra sa birika na nodra vale laca ena buca ko Nifaia, volekata ga na korolevu ko Nifaia.

19 Raica sa gadreva tiko ko Moronai me ra lako mai na Leimanaiti me ra mai vala kei ira ena vanua bucabuca; ia era sa sega ni doudou na Leimanaiti me ra mai valuti ira, ni ra sa kila tu na nodra yaloqaqa ka raica tale ga na kedra lewelevu; a ra sa sega ni mai valuti ira ena siga ko ya.

20 Ia ni sa bogi na vanua, sa lako lo yani ko Moronai ka kabata cake na bai ni koro, me raica se yasa ni koro cava era tiko kina na mataivalu ni Leimanaiti.

21 Ka sa yaco ni ra sa tiko ena yasana ki na tokalau, e yasa ga ni matamata ni koro; ka ra sa moce tu. Ia oqo sa lesu tale ko Moronai ka vakaroti ira na nona mataivalu, me vakarautaki vakatotolo na dali kaukauwa kei na ikabakaba, me ra tukuci sobu kina ki lomanikoro.

22 Ka sa yaco ni sa vakarota ko Moronai me ra lako yani na nona tamata ka kaba ki na dela ni bai ka tukuca sobu yani ki na yasa ni koro ko ya, io, ena yasana ki na ra, na vanua era sega ni tiko kina na mataivalu ni Leimanaiti.

23 Ka sa yaco ni ra sa tukuci sobu kece ki lomanikoro ena bogi, ena nodra dali kaukauwa kei na ikabakaba; ia ni qai kida na mataka, era sa tu kece e lomanikoro.

24 Ia oqo, ena nodra qai yadra na Leimanaiti era sa raica ni ra sa tu e loma ni koro na mataivalu i Moronai, a ra sa rere vakalevu sara, era sa dro ka ra curu yani e matamata.

25 Ia oqo ni sa raica ko Moronai ni ra sa dro e matana, sa vakaroti ira na nona tamata me ra muri ira, ka ra vakamatea e vuqa, ka wavokita e vuqa vei ira ka kauti ira vakavesu; ia era sa dro na kena vo ki na vanua ko Moronai, ka tiko ena iyalayala ni vanua mai matasawa.

26 E rau sa rawa vakaoqo ko Moronai kei Paorani na koro ko Nifaia, ka sega ni duabulu na tamata e mate kina; era sa bale mate ga kina e lewevuqa na Leimanaiti.

27 Ka sa qai yaco ni sa vuqa vei ira na Leimanaiti ka ra a kaivesu era sa gadreva me ra toki vei ira na tamata i Amoni, me ra yaco me ra tamata galala.

28 Ka sa yaco ni ko ira kecega era gadreva, sa soli vei ira me vaka na nodra gagadre.

29 O koya, e ra sa toki kecega kina na Leimanaiti kaivesu ka laki okati me tamata i Amoni, a ra sa gumatua ena teitei, io era sa tea na veimataqali kakana, ka susuga tale ga na veimataqali qele ni manumanu lelevu kei na kena lalai; ka ra sa mani galala kina na Nifaiti mai na dua na icolacola levu, io, era sa vagalalataki mai vei ira kece na Leimanaiti kaivesu.

30 Ka sa yaco ni sa rawa ko Moronai na koro ko Nifaia, ka taura vakavesu e vuqa na tamata, ka sa vakalailaitaka sara na nodra mataivalu na Leimanaiti, ka sa taura tale mai e vuqa na Nifaiti era sa kaivesu tu, ka sa mai vakaukauwataka sara vakalevu na mataivalu i Moronai; A sa cavutu kina ko Moronai mai Nifaia ka lako ki na vanua ko Liai.

31 Ka sa yaco ni ra sa raica na Leimanaiti ni sa laki valuti ira yani ko Moronai, era sa rere sara ka drovaka na mataivalu i Moronai.

32 Ka sa yaco ni sa vakasavi ira ko Moronai kei na nona mataivalu, mai na dua na koro ki na dua na koro, me yacova ni ra sa laki sota kei rau ko Liai kei Tenikamu, a ra sa drotaki Liai kei Tenikamu tale ko ira na Leimanaiti, ka gole ki na iyalayala ni vanua mai matasawa me yacova ni ra sa tadu ki na vanua ko Moronai.

33 A ra sa soqoni vata kece na mataivalu ni Leimanaiti ki na vanua ko Moronai, me sa dua ga na nodra mataivalu levu. Sa tiko tale ga mai kea ko Amoroni, na nodra tui na Leimanaiti.

34 A sa yaco ni ratou sa tuva ko Moronai, Liai kei Tenikamu, na nodratou mataivalu me viribaiti ira na Leimanaiti ena iyalayala ni vanua ko Moronai, a ra sa tuva me yacova na lekutu ka iyalayala ena yasana ki na ceva kei na lekutu ka iyalayala ena yasana ki na tokalau.

35 Ka ra sa keba vakaoqo ena bogi ko ya. Ia raica era sa oca kece sara na Nifaiti kei ira tale ga na Leimanaiti ena vuku ni ilakolako balavu era sa cakava mai; o koya era sa sega tale ni nakita kina e dua na ivadi ena bogi ko ya, vakavo duadua ga ko Tenikamu; ni sa cudruvi Amoroni vakalevu tiko ko koya, ni nanuma ni koi rau ko Amoroni kei na tuakana ko Amalikaia, sai rau na vakavuna na ivalu balavu oqo vei ira vata kei ira na Leimanaiti, io na ivalu ka sa vakavuna me dave vakalevu kina na dra, io, kei na dausiga levu.

36 A sa yaco ni sa lako yani ko Tenikamu ena nona cudru ki na nodra keba na Leimanaiti, ka tukuci koya sobu ki loma ni koro. A sa lako yani ka kauta kina na wa dali mai na dua na vanua ki na dua tale me yacova ni sa kunea na tui; ka sa cokai koya ena dua na moto ka laubasikata na lomaserena, voleka ki utona. Ia raica sa vakayadrati ira rawa na nona tamata na tui ni bera ni qai mate; a ra sa cici muri Tenikamu ka vakamatei koya.

37 Ia oqo, sa yaco ni rau sa rarawa vakalevu sara ko Moronai kei Liai ena nodrau rogoca ni sa mate ko Tenikamu; raica sa tamata qaqa sara ko koya, ka sa gumatua ni valataka na nona vanua, io sa dua ko koya na itokani dina ni bula galala; ka sa sota kaya oti e vuqa sara na ka rarawa lelevu. Ia raica, sa mate ko koya, a sa lako ena nodra sala na kai vuravura kecega.

38 Ia oqo, sa yaco ni sa cavutu ko Moronai ena siga ka tarava ka valuti ira na Leimanaiti, ka vakamatei ira kina ena dua na veivakamatei levu sara; ka ra vakasavi ira tani kina mai na vanua ko ya; a ra sa dro sara ka sega ni lesu tale mai me valuti ira na Nifaiti.

39 A sa mai cava kina na ikatolusagavulu kadua ni yabaki ni nodra veiliutaki na turaganilewa vei ira na tamata i Nifai; ia era sa sota kaya na ivalu, na vakadave dra kei na dausiga, kei na vuqa na ka rarawa ena vuqa na yabaki.

40 E dina ga sa yaco tiko na veilabalabati, na veileti, na veivala kei na veimataqali caka cala kecega ena kedra maliwa na tamata i Nifai; ia era sa vakabulai ga ena vukudra na ivalavala dodonu, io, ena vuku ni nodra masumasu na ivalavala dodonu, era sa maroroi kina.

41 Ia raica, ena vuku ni kena sa rui balavu na nodra veivaluvaluti tiko na Nifaiti kei ira na Leimanaiti e ra sa yalokaukauwa kina e vuqa vei ira, ena vuku ni kena sa rui balavu na ivalu; ia e vuqa tale era sa yalomalumalumu ena vuku ni veika rarawa era a sota kaya, ka ra sa vakayalomalumalumutaki ira vua na Kalou, io ena yalomalumalumu sa titobu sara.

42 A sa yaco ni sa viribaita oti vakaukauwa ko Moronai na veivanua kecega sa voleka yani vei ira na Leimanaiti, ia ni ra sa kaukauwa vinaka kece tu, sa lesu tale ko koya ki na koro ko Saraemala; ka sa lesu tale ga ko Ilamani ki na vanua ka nona ivotavota vakawa; a sa vakadeitaki tale na tiko sautu ena kedra maliwa na tamata i Nifai.

43 A sa solia ko Moronai na lewa kece ni nona mataivalu vua na luvena, na yacana ko Moronaia; a sa lesu ko koya ki na nona vale me laki tiko vakacegu kina ena vo ni nona veisiga.

44 A sa lesu tale ko Paorani ki na nona itikotiko ni veilewai; ia ko Ilamani sa taura tale na nona ilesilesi, me vunautaka na vosa ni Kalou vei ira na tamata; raica me vaka ni a yaco tiko e vuqa na ivalu kei na veileti ena dua na gauna balavu, sa kilikili kina me vaqaqacotaki ka buli tale e so na lawa ena lotu.

45 O koya gona eratou sa lako yani kina ko Ilamani kei iratou na nona itokani, ka vunautaka na vosa ni Kalou ena kaukauwa levu ka ra sa kila kina e vuqa na tamata na nodra caka ca, ka vakavuna me ra veivutunitaka na nodra ivalavala ca ka papitaisotaki vua na Turaga na nodra Kalou.

46 Ka sa yaco ni ra sa tauyavutaka tale na lotu ni Kalou, ena vanua taucoko.

47 Io, a sa buli na veitikina eso me baleta na lawa. Ka ra sa digitaki na turaganilewa kei na turaganilewa lelevu.

48 Ka sa tekivu me ra bula sautu tale ena vanua na tamata i Nifai, a ra sa tubu me lewevuqa ka kaukauwa vakalevu sara ena vanua taucoko. Ka sa tekivu me ra vutuniyau sara mai vakalevu.

49 Ia e dina ga ni ra sa vutuniyau, ka kaukauwa, ka sautu tale ga, era sa sega ni dokadokai ira kina; era sa sega tale ga ni berabera me ra daunanuma na Turaga na nodra Kalou; ia era sa vakayalomalumalumutaki ira sara vakalevu e matana.

50 Io, era sa nanuma na veika lelevu sa vakayacora vei ira na Turaga, ni a sereki ira mai na mate, mai na veivakabobulataki, kei na vale ni veivesu, kei na veimataqali veika rarawa kecega, ka sa vakabulai ira mai na ligadra na nodra meca.

51 Ia era sa daumasu tiko ga vua na Turaga na nodra Kalou, ka sa vakalougatataki ira sara na Turaga, me vaka na nona vosa, a ra sa kaukauwa vakalevu sara ka tiko sautu ena vanua ko ya.

52 A sa yaco ni ra sa vakayacora na veika kece oqo. Ka sa mate ko Ilamani ena ikatolusagavulu kalima ni yabaki ni nodra veiliutaki na turaganilewa vei ira na tamata i Nifai.