1 Ka sa yaco ena itekivu ni ikatolusagavulu kaono ni yabaki ni nodra veiliutaki na turaganilewa vei ira na tamata i Nifai, sa taura kina ko Sipiloni na veika tabu ko ya ka a solia tu ko Alama vei Ilamani.

2 Ka sa tamata dodonu ko koya, ka sa lako vakadodonu ena mata ni Kalou; sa dau segata sara me caka vinaka tiko ga, me muria na ivunau ni Turaga na nona Kalou; me vaka e a vakayacora ko tuakana.

3 Ka sa yaco ni sa mate talega ko Moronai. Sa mai cava kina na ikatolusagavulu kaono ni yabaki ni nodra veiliutaki na turaganilewa.

4 A sa yaco ena ikatolusagavulu kavitu ni yabaki ni nodra veiliutaki na turaganilewa, era sa biuta kina na vanua ko Saraemala e dua na iwase levu ni tamata, io e lima na udolu va na drau na tagane kei ira na watidra kei na luvedra, era sa biuta na vanua ko Saraemala ka ra toki yani ki na vanua ena vualiku.

5 Ka sa yaco ni ko Akoca, ko koya ka sa dau vakatovolea me kila na ka kecega, o koya sa lako yani kina ka taya e dua na waqa levu, ena iyalayala ni vanua ko Vanuasautu ena yasa ni vanua ko Vanualala, a sa tavoca ki wai ena yasana ki na ra, ena yasa ni vanua qiqo ka icurucuru ki na vanua ena vualiku.

6 Ka raica, e ra sa vodo kina e vuqa na Nifaiti, ka ra sa soko yani kei na vuqa na kakana, ka lewevuqa tale ga kina na yalewa kei na gone; a ra sa soko cake vaka ki na vualiku. Sa mai cava kina na ikatolusagavulu kavitu ni yabaki.

7 Ia ena ikatolusagavulu kawalu ni yabaki, sa taya tale kina e vica na waqa na tamata oqo. A sa lesu tale ga mai kina na imatai ni waqa, ka ra vodo tale kina e vuqa na tamata; era sa kauta tale ga vakalevu na kedra kakana ka soko cake tale ki na vualiku.

8 A sa yaco ni sa sega tale ni kilai e dua na ka me baleti ira. Ka keimami nanuma ni ra sa luvu ena wasaliwa titobu. A sa soko tale e dua na waqa; ia keimami sa sega ni kila na vanua e lako kina.

9 A sa yaco ni ra sa lewevuqa sara na tamata era sa lako yani ki na vanua ena vualiku ena yabaki oqo. Ka sa mai cava kina na ikatolusagavulu kawalu ni yabaki.

10 Ka sa yaco ena ikatolusagavulu kaciwa ni yabaki ni nodra veiliutaki na turaganilewa, sa mate talega kina ko Sipiloni. A sa vodoka e dua na waqa ko Korianitoni, me kauta na kedra kakana na sa tiko mai na vualiku.

11 O koya gona sa dodonu kina me solia ko Sipiloni, na veika tabu ko ya ki vua na luvei Ilamani ka yacana ko Ilamani, ni a vakayacani ga vei tamana.

12 Ia raica oqo, sa lavetaki na iceuceu kece ka tu vei Ilamani, ka vakauti yani na kena ilavelave ena kedra maliwa na luve ni tamata ena vanua taucoko, ia sa sega ga ni lavetaki na veika sa vakarota tu ko Alama me kakua ni vakau yani.

13 Ia, sa kilikili ga me ra maroroya tu na veika tabu oqo, ka vakadewai sobu tiko mai na dua na itabatamata ki na dua tale; ia ena yabaki oqo, era sa soli rawa vei Ilamani, ni bera ni mate ko Sipiloni.

14 Ka sa yaco ena yabaki tale ga oqo, ni so vei ira era sa vakaduiduile ka ra toki vei ira na Leimanaiti; ka ra sa vakayavalati me ra cudruvi ira na Nifaiti.

15 Ena yabaki tale ga oqo, sa lako mai kina e dua na mataivalu levu me valuti ira na tamata i Moronaia, se na mataivalu i Moronaia, ia era sa vakadrukai ka vakasavi lesu ki na nodra vanua, ka ra bale mate kina e vuqa vei ira.

16 Ka sa mai cava kina na ikatolusagavulu kaciwa ni yabaki ni nodra veiliutaki na turaganilewa vei ira na tamata i Nifai.

17 Sa yala eke na nodratou itukutuku ko Alama kei na luvena ko Ilamani kei Sipiloni, o koya talega e luvena.