1 Ket ita napasamak a kalpasan ti panangigibus ni Alma iti panagsaona kadagiti tattao ti simbaan, a nabangon iti siudad ti Zarahemla, inordenanna dagiti saserdote ken dagiti elder, babaen ti panangipatayna kadagiti imana a mayannurot iti orden ti Dios, a mangidaulo ken mangbantay iti simbaan.

2 Ket napasamak nga asino man a saan a kameng ti simbaan a nagbabawi kadagiti basolda nabuniaganda iti panagbabawi, ken naawatda iti simbaan.

3 Ket napasamak met nga asino man a kameng ti simbaan a saan a nagbabawi iti kinadakesda ken saan a nangipakumbaba iti bagbagida iti Dios—kayatko a sawen dagiti natangid iti kinapalangguad iti puspusoda—kasta met a nailaksidda, ken ti naganda ket napunas, tapno saan a naibilang ti naganda kadagiti nalinteg.

4 Ket kasta ti panangirugida a mangbangon iti urnos ti simbaan iti siudad ti Zarahemla.

5 Ita kayatko a nasken a maawatanyo a nawaya ti balikas ti Apo iti amin, nga awan ti mapaidaman iti gundaway a mangummong iti bagbagida a dumngeg iti balikas ti Dios.

6 Nupay kasta naibilin kadagiti annak ti Dios a nasken a masansan nga ummongenda ti bagbagida, ket makidanggayda iti panagayuno ken napinget a panagkararag nga agpaay iti pagimbagan dagiti kararua dagiti saan makaammo iti Dios.

7 Ket ita napasamak a pinanawan ida ni Alma kalpasan ti panangaramidna kadagitoy nga annuroten, wen, manipud iti simbaan nga adda iti siudad ti Zarahemla, ket binallasiwda iti daya ti karayan Sidon, nagturongda iti tanap ti Gideon, ta sadiay nabangon ti siudad, a naawagan iti siudad ti Gideon, nga adda iti tanap a naawagan iti Gideon, a naipanagan iti tao a napapatay iti ima ni Nehor babaen ti espada.

8 Ket napan ni Alma ket rinugianna nga impakdaar ti balikas ti Dios iti simbaan a nabangon iti tanap ti Gideon, a mayannurot iti paltiing iti kinapudno ti balikas a naisaon dagiti ammada, ken mayannurot iti espiritu ti pammadto nga adda kenkuana, a mayannurot iti pammaneknek ni Jesucristo, ti Anak ti Dios, a nasken nga umay mangsubbot kadagiti taona manipud iti basbasolda, ken iti nasantuan nga orden a nakaawaganna. Ket kasta ti pannakaisuratna. Amen.