1 Kitaen ay-ayatek a kakabsatko, gapu ta makitak a napalubosanakon nga umay kadakayo, ngarud padasek a kasaritakayo iti pagsasaok; wen, iti mismo a ngiwatko, gapu ta makitak a daytoy ti umuna a gundaway a pannakisaok kadakayo babaen dagiti balikas nga agtaud iti ngiwatko, siak a naan-anay a naitaeng iti pangukoman, saanak a nakaumay kadakayo gapu iti adu nga aramidko.

2 Ken saanak pay koma a nakaumay ita kadakayo no saan a naited iti sabali ti pangukoman, a mangisaup iti panagturayko; ket manangngaasi unay ti Apo ta pinalubosannak nga umay kadakayo.

3 Ket kitaen, immayak a napnuan iti namnama ken tarigagay a makitak ti panangipakumbabayo iti bagbagiyo iti Dios, ken intuloyyo ti umararaw iti paraburna, a makitak nga awan ti pakababalawanyo kenkuana, a makitak nga awankayo iti nakaam-amak ti rikutna a kasasaad nga ayan dagiti kabsattayo iti Zarahemla.

4 Ngem madaydayaw koma ti nagan ti Dios, ta impalubosna a maammuak, wen, inikkannak iti aglaplapusanan a rag-o a mangammo a nabangonda manen iti wagas ti kinalintegna.

5 Ket agtalekak, a mayannurot iti Espiritu ti Dios nga adda kaniak, a maaddaanak koma met iti rag-o kadakayo; nupay kasta saanko a tarigagayan a ti rag-ok kadakayo makaigapu iti adu a rigrigatko ken leddaang a nasagrapko kadagiti kabsat iti Zarahemla, ta kitaen, mapadasanda ti rag-ok kalpasan ti pannakayanudko iti adu a rigat ken leddaang.

6 Ngem kitaen, agtalekak nga awankayo iti kasasaad a nalabes a kaawan ti pammati a kas kadagiti kabsatyo; agtalekak a saankayo a natangig iti kinapangguad ti puspusoyo; wen, agtalekak a saanyo unay a tinarigagayan iti puspusoyo dagiti kinabaknang ken dagiti awan serbina a bambanag iti lubong; wen, agtalekak a saankayo agdaydayaw kadagiti didiosen, ngem agdaydayawkayo ketdi iti pudno ken sibibiag a Dios, ken namnamaenyo ketdi ti pannakaugas dagiti basolyo, nga addaan iti pammati nga agnanayon, a dumtengto.

7 Ta kitaen, kunak kadakayo nga adunto ti banag a dumteng; ken kitaen, adda maysa a banag a kapatgan iti amin—ta kitaen, saanen nga adayo ti panawen ti yaay ken pannakipagindeg ti Mannubbot kadagiti taona.

8 Kitaen, diak ibaga nga umayto kadatayo iti panawen a panagindegna iti matay a tabernakulona; ta kitaen, saan nga imbaga kaniak ti Espiritu a kastoyto ti mapasamak. Ita saanko ammo ti maipanggep iti daytoy a banag; ngem daytoy laeng ti ammok, nga adda bileg ti Apo a Dios a mangaramid iti amin a banag a mayannurot iti balikasna.

9 Ngem kitaen, namin-adun nga imbaga ti Espiritu kaniak daytoy, a kunkunana: Iwaragawagmo kadagitoy a tao, a kunaem—Agbabawikayo, ket isaganayo ti dalan ti Apo, ket magnakayo kadagiti danana, a nalilinteg; agsipud ta kitaen, asidegen ti pagarian ti langit, ket umayen ti Anak ti Dios iti rabaw ti daga.

10 Ket kitaen, maipasngayto ken ni Maria, iti Jerusalem a daga dagiti puontayo, isu a birhen, a napateg ken napili a basiha, a marimbawanto ken mainaw babaen ti bileg ti Espiritu Santo, ket mangtedto iti lalaki nga anak, wen, uray ti Anak ti Dios.

11 Ket mapanto, nga agsagaba kadagiti saem ken rigat ken amin a kita ti sulisog; ket daytoy tapno matungpal ti balikas a nagkuna a sagabaennanto ti saem ken saksakit dagiti taona.

12 Ket awatennanto ni patay, tapno mawarwarna ti bedbed ni patay a nangpungo kadagiti taona; ken awatenna dagiti sagubanitda, tapno mapno ti lalaemna iti kaasi, a mayannurot iti lasag, tapno maammuanna a mayannurot iti lasag no kasano a tulonganna dagiti taona a mayannurot kadagiti sagubanitda.

13 Ita ammo ti Espiritu ti amin a banag; nupay kasta agsagaba ti Anak ti Dios maibatay iti lasag tapno awatenna ti basbasol dagiti taona, tapno mapunasna dagiti panaglabsingda a mayannurot iti bileg ti pannakaisalakanna; ket ita kitaen, daytoy ti pammaneknek nga adda kaniak.

14 Ita kunak kadakayo a nasken nga agbabawikayo, ket maipasngaykayo manen; agsipud ta kinuna ti Espiritu a no saankayo a maipasngay manen saanyo matawid ti pagarian ti langit; ngarud umaykayo agpabuniagkayo gapu iti panagbabawi, tapno maugasan dagiti basolyo, tapno maaddaankayo iti pammati iti Kordero ti Dios, a nangikkat kadagiti basol ti lubong, a maingel a mangisalakan ken mangdalus iti amin a kinikillo nga aramid.

15 Wen, kunak kadakayo nga umaykayo ket saankayo nga agbuteng, ket iwagsakyo amin a basol, a nalaka a mangisarsarak kadakayo, a nangpungo kadakayo iti pannakadadael, wen, umay ken mapankayo, ket ipakitayo iti Diosyo a sitatallugodkayo a mangibabawi kadagiti basolyo ket mangaramidkayo kenkuana iti maysa a katulagan a tungpalenyo dagiti bilinna ket paneknekanyo kenkuana iti daytoy nga aldaw babaen ti itatapugyo iti danum ti pabuniag.

16 Ket asino man a mangaramid daytoy, ken mangtungpal kadagiti bilin ti Dios manipud ita, kasta met a malagipnanto a kinunak kenkuana, wen, malagipnanto a nasaok kenkuana, a maaddaanto iti agnanayon a biag, a mayannurot iti pammaneknek ti Nasantuan nga Espiritu, a namaneknek kaniak.

17 Ket ita ay-ayatek a kakabsatko, mamatikayo kadi kadagitoy a banag? Kitaen, kunak kadakayo, wen, ammok a patienyo ida; ket babaen iti pannakaiparangarang ti Espiritu nga adda kaniak ti pamay-an nga ammok a patienyo dagidiay. Ket ita gapu ta napigsa ti pammatiyo maipanggep iti dayta, wen, maipanggep kadagiti banag a nasaokon, nagpaiduma ti rag-ok.

18 Agsipud ta kas nasaok kadakayon idi punganay, a tinartarigagayak unay a saankayo a maipada kadagiti kabsatyo a nagsagaba iti narikut a kasasaad, kasta met a naduktalak a napennek dagiti tarigagayko.

19 Agsipud ta maawatak nga addakayo iti dana ti kinalinteg; matarusak nga addakayo iti dana nga agturong iti pagarian ti Dios; wen, matarusak nga ar-aramidenyo dagiti danana a nalinteg.

20 Matarusak a naipakaammon kadakayo, babaen ti pammaneknek ti balikasna, a saan a makapagna kadagiti killo a dana; wenno sumiasi iti imbagana; wenno addaan iti kababassitan a panaglikko manipud iti kanawan ken iti kanigid, wenno manipud iti umno a mapan iti saan nga umno; ngarud, awan inggana ti maymaysa a turongna.

21 Ken saan nga agindeg kadagiti saan a nasantuan a templo; wenno kasta met a saan a maawat iti pagarian ti Dios ti rinurugit man wenno ania man a narugit; ngarud kunak kadakayo a dumtengto ti panawen, wen, ket itinto maudi nga aldaw, nga asino man a narugit agtalinaedto iti kinarugitna.

22 Ket ita ay-ayatek a kakabsatko, imbagak dagitoy a banag kadakayo ta bareng no mariingko, ti riknayo iti pagrebbenganyo iti Dios, tapno magnakayo nga awan ti pakababalawanna iti sangona, tapno magnakayo a maikanatad iti nasantuan nga orden ti Dios, a naawatyon.

23 Ket ita kayatko nga agpakumbabakayo, ken managpabus-oy ken nalanay; nalaka a kasarsarita; napno iti panaganus ken panagitured; naalumamay iti amin a banag; naregta a mangtungpal kadagiti bilin ti Dios iti amin a kanito; agdawat iti ania man a banag a kasapulanyo, iti agpada a naespirituan ken naindagaan; kanayon nga agyaman iti Dios iti ania man a banag a maawatyo.

24 Ken kitaenyo nga adda pammatiyo, namnama, ken panangngaasi, ket kalpasanna kanayon nga agaramidkayo iti adu a nasayaat.

25 Ket bendisionannakayo koma ti Apo, ken kanayon koma a nadalus dagiti pagan-anayyo, tapno uray la no makatugawkayonto iti abay da Abraham, Isaac, ken Jacob, ken kadagiti nasantuan a propeta manipud pay idi punganay ti lubong, taginayonenyo nga awan mulitna dagiti pagan-anayyo nga uray a kas kadagiti pagan-anayda nga awan mulitna, iti pagarian ti langit a saanen pulos a rummuar.

26 Ket ita ay-ayatek a kakabsatko, naisaokon dagitoy a balikas kadakayo a mayannurot iti Espiritu a namaneknek kaniak; ket aglaplapusanan ti rag-o ti kararuak, gapu iti aglaplapusanan a kinaregta ken panangipangag iti balikasko.

27 Ket ita, agtalinaed koma kadakayo ti kappia ti Dios, ken kadagiti balay ken dagdagayo, ken kadagiti arban ken pangenyo, ken amin a kukuayo, dagiti babbai ken annakyo, a mayannurot iti pammati ken nasayaat nga ar-aramidyo, manipud ita ken iti agnanayon. Ket kasta ti nasaokon. Amen.