1 Na afei ɔbaa dɛ aber a Alma kyerɛkyerɛɛ nkorɔfo a wɔwɔ Gideon ndzɛmba pii a worunntum nnkyerɛw no, na ɔhyehyɛɛ asɔr no mu dwumadzi dɛ mbrɛ ɔyɛɛ no ahyɛse no wɔ Zarahemla asaase do wiei no, ɔsaan n’ekyir fii Gideon asaase do bae, nyew, ɔsanee baa nankasa ne fie wɔ Zarahemla dɛ ɔrebɛgye n’ahom wɔ dwuma a okedzii no ho.

2 Na dɛm na atsɛmbuafo no hɔn afe a otsĩa akron a wodzi adze wɔ Nephi no nkorɔfo do no dze baa ewiei.

3 Na ɔbaa dɛ atsɛmbuafo no hɔn afe a otsĩa du a wodzi adze wɔ Nephi no nkorɔfo do n’ahyɛse no, Alma fii hɔ tuu no kwan kɔr Melek asaase do, wɔ esutsen Sidon n’ahe do anee afamu, wɔ sar no n’anee afamu.

4 Na ɔhyɛɛ ase dɛ ɔrekyerɛkyerɛ nkorɔfo a wɔwɔ Melek asaase no do dɛ mbrɛ Nyankopɔn ne nhyehyɛɛ krɔnkrɔn no a wɔafrɛ no wɔ ho no tse; na ɔhyɛɛ ase dɛ ɔrekyerɛkyerɛ dɔm no wɔ Melek asaase nyina do.

5 Na ɔbaa dɛ dɔm no fii sar n’ahe do afã nyinara baa hɔn nkyɛn. Na onumaa hɔn wɔ asaase nyina do.

6 Dɛm ntsi aber a owiee n’edwuma yɛ wɔ Melek no, ofii hɔ na otuu kwan ndaansa dze faa Melek asaase n’etsifi afamu; na ɔbaa kurow bi a wɔfrɛ no Ammonihah mu.

7 Afei ɔyɛ Nephi no nkorɔfo hɔn amambra dɛ hɔn nsaase, nye hɔn nkuropɔn, na hɔn nkuraase, nyew, hɔn nkuraase nketsenketse mpo nyina dɛ wɔdze nyia odzii kan kɛdaa hɔ no ne dzin to do; na dɛm na Ammonihah asaase no so tse.

8 Na ɔbaa dɛ aber a Alma baa Ammonihah kurow mu no, ɔhyɛɛ ase dɛ ɔrekã Nyame n’asɛm kyerɛ hɔn.

9 Afei Satan esuo nkorɔfo a wɔwɔ Ammonihah kurow mu no akoma mu dzendzenndzen; dɛm ntsi wɔammpɛ dɛ wobetsie Alma n’asɛm no.

10 Naaso Alma dzii dwuma ara yie wɔ sunsum mu, ɔnye Nyame dzii aper wɔ mpaabɔ dzendzenndzen mu, dɛ onhue no Sunsum ngu dɔm a wɔwɔ kurow no mu no do; na dɛ ɔmma no tum so mma onuma hɔn nkɔ nnuho mu.

11 Naaso, wopiriim hɔn akoma, na wɔsee no dɛ: Hwɛ, yenyim dɛ ɔwo nye Alma; na yenyim dɛ ɔwo nye sɔfopanyin a ehwɛ asɔr a akyekyer wɔ mbeambea pii no do dɛ mbrɛ ɔwoara w’amambra tse; na yennyi w’asɔr mu, na yɛnngye dɛm amambra nkwaseasɛm yi so nndzi.

12 Na afei yenyim dɛ innyi tum wɔ hɛn do osiandɛ yenyim dɛ yennyi w’asɔr no mu; na ɔwo egyaa atsɛmbu egua no mu ama Nephihah; dɛm ntsi nnyɛ ɔwo nye hɛn atsɛmbuafo panyin.

13 Afei aber a nkorɔfo no kãa dɛm no, wɔsoɛree tsiaa ne nsɛm no, na wɔkasaa tsiaa no na wohimaa no ntafi, na wɔyɛɛ dɛ wɔbepam no efi hɔn kurow no mu, ntsi ofii hɔ na ɔtoaa n’akwantu no do dze faa kurow a wɔfrɛ hɔ Aaron no mu.

14 Na ɔbaa dɛ aber a ɔrokɔ no, nna awerɛhow ahyɛ no do, nna orudua abɛbrɛsɛ mu nna ne kra resi nkrum na oridzi yaw, osian dɔm a wɔwɔ Ammonihah kurow mu hɔn emumuyɛdze ntsi, na ɔbaa dɛ aber a awerɛhow hyɛɛ Alma no do no, hwɛ Ewuradze no bɔfoe puee ne nkyɛn bɛsee no dɛ:

15 Nhyira akã wo, Alma; dɛm ntsi, ma wo tsir do wɔ sor na dzi dɛw; osiandɛ ɔwɔ dɛ idzi dɛw wɔ siantsir bi ntsi; osiandɛ ayɛ nokwafo na edzi Nyankopɔn ne mbrasɛm do fitsi aber a wo nsa kãa asɛm no fii no hɔ no. Hwɛ, emi nye nyia ɔdze maa wo no.

16 Na hwɛ, ɔasoma me dɛ me mebɛse wo dɛ san w’ekyir kɔ Ammonihah kurow mu, na kɛkã nsɛmpa no bio kyerɛ dɔm a wɔwɔ kurow no mu no; nyew, kã asɛmpa no kyerɛ hɔn. Nyew, se hɔn dɛ, gyedɛ wonu hɔnho annyɛ dɛm a Ewuradze Nyankopɔn bɛsɛɛ hɔn.

17 Na hwɛ, woesua wɔ aber yi mu dɛ wɔbɛsɛɛ wo nkorɔfo hɔn ahotɔ, (na dɛm na Ewuradze se) na iyi nye ahyɛdze na atsɛmbu, nye mbrasɛm a ɔdze ama no nkorɔfo no bɔ ebira.

18 Afei ɔbaa dɛ Alma ne nsa kãa asɛm no fii Ewuradze no bɔfoe hɔ wiei no, ɔsaan n’ekyir ntsɛmara dɛ ɔrokɔ Ammonihah asaase do. Na ɔfaa kwan fofor do kɔr kurow no mu, nyew, ɔfaa kwan a ɔda Ammonihah kurow no anaafo afamu no do.

19 Na aber a ɔhɛɛn kurow no mu no nna ɔkɔm dze no, na ɔsee ɔbarimba bi dɛ: Ana ebɛma Nyankopɔn n’akowaa ahobrɛadzenyi biribi ma oedzi?

20 Na ɔbarimba no see no dɛ: Meyɛ Nephinyi, na minyim dɛ eyɛ Nyankopɔn no nkɔnhyɛnyi krɔnkrɔn, na ɔwo nye ɔbarimba no a ɔbɔfo kãa noho asɛm wɔ enyido-adzehu mu no: Wo nsa bɛkã. Dɛm ntsi, enye me nkɔ me fie na medze m’edziban bɛma wo; na minyim dɛ ɔbɛyɛ nhyira dze ama emi nye me fifo.

21 Na ɔbaa dɛ ɔbarimba no gyee no wɔ ne fie; na wɔfrɛɛ ɔbarimba no Amulek; na ɔdze paanoo na nam besii Alma n’enyim.

22 Na ɔbaa dɛ Alma dzii paanoo no na ɔmee; na ohyiraa Amulek nye ne fifo, na ɔdze ndaase maa Nyankopɔn.

23 Na aber a odzidzii na ɔmee wiei no, ɔsee Amulek dɛ: Emi nye Alma, na meyɛ ɔsɔfopanyin a mohwɛ Nyankopɔn n’asɔr a ɔwɔ asaase nyina do.

24 Na hwɛ, ɔafrɛ me dɛ membɛkã Nyame n’asɛm wɔ dɔm yi nyinara mu, dɛ mbrɛ nyikyerɛ nye nkɔnhyɛ sunsum no kyerɛ; na mebaa asaase yi do na wɔammpɛ dɛ wɔgye me, mbom wɔpaam me, na meyɛɛ dɛ nkyɛ meredan m’ekyir dze ama asaase yi afebɔɔ.

25 Mbom hwɛ, ɔahyɛ me dɛ mensan bio na membɛhyɛ nkɔm nkyerɛ dɔm yi, nyew, na mengye dase ntsia hɔn wɔ hɔn emumuyɛ ho.

26 Na afei, Amulek, osiandɛ ama me biribi ma medzi na agye me ato mu ntsi, oehyira wo; nna ɔkɔm dze me, osiandɛ nna makye ɔkɔm nda pii.

27 Na Alma dzii nda pii wɔ Amulek nkyɛn ansaana ɔrehyɛ ase akã asɛmpa no akyerɛ dɔm no.

28 Na ɔbaa dɛ dɔm no hɔn emumuyɛ yɛɛ kɛse.

29 Na asɛm no baa Alma nkyɛn dɛ: Kɔ; na kɛkã kyerɛ m’akowaa Amulek so dɛ, kɔ na kɛhyɛ nkɔm kyerɛ dɔm yi, se dɛ—Hom nnu homho, na dɛm na Ewuradze se, gyedɛ hom nu homho annyɛ dɛm a medze m’ebufuw bɛba abɛsera nkorɔfo yi; nyew, na merenndan m’ebufuhyew no mmfi hom do.

30 Na Alma nye Amulek so kɔr dɔm no hɔn mu dɛ wɔrekɛda Nyame ne nsɛm edzi akyerɛ hɔn; na Sunsum Krɔnkrɔn no hyɛɛ hɔn mã.

31 Na wɔmaa hɔn tum araa ma nna wonntum mmfa hɔn nngu efiadze, nna nyimpa so nntum nnku hɔn; naaso wɔannkyerɛ hɔn tum no kesii dɛ wɔkyekyeer hɔn na wɔdze hɔn guu efiadze. Afei, iyi sii ama Ewuradze aakyerɛ no tum wɔ hɔn mu.

32 Na ɔbaa dɛ wɔkɔree kɛhyɛɛ ase dɛ wɔrekã asɛmpa no na wɔrehyɛ nkɔm kyerɛ dɔm no, dɛ mbrɛ sunsum nye tum a Ewuradze dze ama hɔn no tse.