Enos Nwoma No

1 Hwɛ, ɔbaa dɛ emi, Enos, minyim dɛ m’egya yɛ nyimpa a odzi pɛrpɛr—na ɔkyerɛkyerɛɛ me wɔ ne kasaa mu, na hwɛ, ɔyɛn me wɔ Ewuradze so ho setsie nye kasa kyerɛ mu—na nhyira nkã me Nyame ne dzin wɔ ho—

2 Na mebɛkã hom aper a medzi wɔ Nyame enyim, ansaana me nsa rekã me bɔnfakyɛ.

3 Hwɛ, mokɔr dɛ merekɛyɛ ha eku mbowa wɔ haban mu; nna nsɛm a daa metse dɛ m’egya rekã a ɔfa onnyiewiei nkwa ho, na ahotseweefo hɔn ndaamba dɛw a wobedzi ho adwen hyɛɛ m’akoma mã.

4 Na ɔkɔm dzee me kra; na mubuu ntwɛr wɔ me Yɛfo enyim, na medze mpaabɔ a ɔyɛ dzen totɔe serɛɛ no wɔ mara me kra ntsi; na musũi frɛɛ no da no nyina; nyew, na adzesaa no so memaa me ndze do dzendzenndzen ma odur sor.

5 Na ndze bi baa mo hɔ see dɛ: Enos wɔdze wo bɔn akyɛ wo, na wobehyira wo.

6 Na emi, Enos, minyim dɛ Nyankopɔn nndzi ator; dɛm ntsi, wɔpepaa m’afɔdzi.

7 Na mesee dɛ: Ewuradze, ɔyɛ dɛn yɛ?

8 Na ɔsee me dɛ: Osian wo gyedzi a ɔwɔ Christ a enntsee ne nkã da na innhun no da no mu ntsi. Na mfe pii botwa mu akɔ ansaana ɔada no ho edzi wɔ honam mu; dɛm ntsi kɔ, wo gyedzi agye wo.

9 Na afei, ɔbaa dɛ metsee dɛm nsɛm yi no minyaa pɛ bi dɛ mobɔhwehwɛ mo nuanom a wɔyɛ Nephifo no hɔn yieyɛ; dɛm ntsi, muhue me kra nyina bɔɔ mpaa maa Nyankopɔn wɔ hɔn ntsi.

10 Na aber a miridzi aper wɔ sunsum mu no, hwɛ, Ewuradze ne ndze baa m’adwen mu bio dɛ: Mobɔkɔ akɛsera wo nuanom no ber a wobedzi me mbrasɛm do enyiberdo no. Medze asaase yi ama hɔn, na ɔyɛ asaase krɔnkrɔn; na moronndom no, gyedɛ ɔnam hɔn emumuyɛ do; dɛm ntsi, mobɔkɔ akɛsera wo nuanom no dɛ mbrɛ makã no; na awerɛhow mu na medze hɔn mbrato bogu hɔnankasa hɔn etsifi.

11 Na emi, Enos, metsee dɛm nsɛm yi ekyir no, me gyedzi hyɛɛ ase dɛ oritsim wɔ Ewuradze mu; na mber tsentsen nyina midzii aper dze bɔɔ mpaa maa no dze maa mo nuanom Lamanfo no.

12 Na ɔbaa dɛ aber a mobɔɔ mpaa na meyɛɛ ndwumadzen ekyir no, Ewuradze see me dɛ: Osian wo gyedzi ntsi, mebɛyɛ w’apɛdze ama wo.

13 Na afei hwɛ, iyi nye adze a nna morohwehwɛ wɔ no hɔ—dɛ sɛ ɔbɛyɛ a, nkyɛ sɛ mo nkorɔfo Nephifo hwe ase wɔ mbrato mu, na ɔnam kwan bi do wɔsɛɛ hɔn na wɔrennsɛɛ Lamanfo no a, Ewuradze Nyankopɔn nkora mo nkorɔfo Nephifo hɔn kyerɛwsɛm do yie; sɛ ɔbɛyɛ mpo a, ɔmfa n’abaw krɔnkrɔn no tum no, ama woeyi epue ndaamba ama Lamanfo no, ama sɛ ɔbɛyɛ a, ɔdze hɔn aaba nkwagye mu—

14 Na seseiara dze, hɛn aperdzi a yedzii dɛ yɛdze hɔn bɛba gyedzi a osi pi no mu no ayɛ kwa. Na wɔkã ntam wɔ hɔn ebufuhyew mu dɛ sɛ ɔbɛyɛ a, wɔbɛsɛɛ hɛn kyerɛwsɛm na hɛnankasa, na hɛn egyanom amambra nyina so.

15 Dɛm ntsi, emi minyim dɛ Ewuradze Nyankopɔn botum akora hɛn kyerɛwsɛm no do yie ama hɛn ntsi, musũi frɛɛ no aber nyina osiandɛ wɔakã akyerɛ me dɛ: Biribiara a hom bebisa wɔ gyedzi mu no, a hom gyedzi dɛ hom nsa bɛkã wɔ Christ ne dzin mu no, hom nsa bɛkã.

16 Na menyaa gyedzi, na musũi frɛɛ Nyankopɔn ama ɔaakora kyerɛwsɛm no do yie; na ɔnye me dzii ahyɛmu dɛ ɔdze bopue ama Lamanfo no wɔ noara ne ber mu.

17 Na emi, Enos, minyim dɛ ɔbɛyɛ dɛ mbrɛ n’ahyɛmudzi no tse; dɛm ntsi me kra homee.

18 Na Ewuradze see me dɛ: W’egyanom so ebisa me dɛm adze yi; na ɔbɛyɛ hɔ ama hɔn dɛ mbrɛ hɔn gyedzi tse; osiandɛ hɔn gyedzi tse dɛ wo dze no.

19 Na afei ɔbaa dɛ emi, Enos, mikyimaa Nephi no nkorɔfo no mu na mehyɛɛ nkɔm wɔ ndzɛmba a ɔbɛba ho, na megyee dase wɔ ndzɛmba a matse na mehu ho.

20 Na megye dase dɛ Nephi no nkorɔfo no per dɛ wɔdze nkenyan bɛma Lamanfo no ma woehu gyedzi a osi pi no a ɔwɔ Nyame mu no. Mbom hɛn dwumadzi yɛɛ kwa; hɔn enyitan dɔɔ sõ, na hɔn su bɔn no maa wɔbɛyɛɛ yerɛyerɛw, abɔyafo, na nkorɔfo a wɔpɛ bɔgya, abosonsom na efĩfĩdze pii ne yɛ; nkorɔfo a wodzi mbowa hɔn mbowa biara a wɔbɔtɔ hɔn boa mu, wɔtsetse ntamadan mu, na wokyinkyin sar do a wɔdze nwoma nketsenketse esisi hɔn asen na wɔapra hɔn tsir; na hɔn nyimdzee wɔ egyen na ekuma ne yɛ ho dɔɔ sõ. Na hɔn mu dodowara nndzi hwee kã nammon ho; na mber nyinara wɔper dɛ wɔbɛsɛɛ hɛn.

21 Na ɔbaa dɛ Nephi no nkorɔfo no yɛɛ ekuafo, na woduaduaa eburow na nduadzewa ahorow pii na wɔnyɛɛn mbowa ahorow so, nguankuw, anantwikuw, na mpɔnkye nye hɔn ahorow, na mpɔnkɔ so pii.

22 Na nkɔnhyɛfo pii soɛree wɔ hɛn mu. Na nkorɔfo no yɛ akɔnkyefo, nkorɔfo a hɔn ntseasee yɛ dzen.

23 Na biribiara nnyi hɔ kã dza ɔyɛ dzen ho, nsɛmpakã na nkɔnhyɛ a ɔfa akõkoekõ, na wentwiwentwi, nye ɔsɛɛ ho, na aber nyina wɔkaakaa hɔn wɔ owu na mbersantsen ne mber tsentsen ho na atsɛmbu nye Nyankopɔn no tum ho, na dɛm ndzɛmba yi nyina—wɔdze kenyan hɔn aber nyina ama wɔaatsena wɔ Ewuradze ho suro mu. Mekã dɛ biribiara nnyi hɔ a ɔtɔ sin wɔ dɛm ndzɛmba yi ho kã, kasa pefee a nkyɛ ɔbɔtwe hɔn ekyir efi ɔsɛɛ ntsɛntsɛm mu. Na dɛm kwan yi do na mefa kyerɛw dza ɔfa hɔnho.

24 Na muhun akõkoekõ pii a osii Nephifo na Lamanfo mu wɔ mo nkwa nda mu.

25 Na ɔbaa dɛ mehyɛɛ ase dɛ mereyɛ akɔdaa, nna mfe ɔha eduosuon akron na ebotwa mu kɔ fitsi ber a hɛn egya Lehi fii Jerusalem.

26 Na muhun dɛ ɔnnkɛkyɛr na makɔ me ndamu, na Nyame no tum baa mo do dɛ menkyerɛkyerɛ na menhyɛ nkɔm na menda nsɛm no a ɔyɛ nokwar wɔ Christ mu no edzi nkyerɛ nkorɔfo no, na mada no edzi wɔ mo nkwa nda nyina mu, na medzi dɛw wɔ mu kyɛn dza ɔyɛ wiadze dze.

27 Na ɔnnkɛkyɛr na makɔ m’ahomgye bea do wɔ mo Pomfo nkyɛn; na minyim dɛ no mu na mobɔhom. Na midzi dɛw wɔ dɛm aber no a me dza ɔnnkyebo yi a ɔnnkye bo yi bɛfa bɛkyebo ahyɛ, na mibegyina n’enyim; nna medze enyigye bɔhwɛ n’enyim, na ɔbɛse me dɛ: Bra me nkyɛn, ɔwo a woehyira wo, woesiesie bea ama wo wɔ m’Egya fie. Amen.