1 Ug nahitabo nga si Shez, kinsa usa ka kaliwat ni Heth—kay si Heth namatay sa kagutom, ug ang tanan niyang mga sakop sa panimalay gawas ni Shez—mao nga, si Shez misugod sa pagpalig-on og usab sa usa ka nagkatibulaag nga katawhan.

2 Ug nahitabo nga si Shez nahinumdom sa kalaglagan sa iyang mga amahan, ug nagtukod siya og matarong nga gingharian; kay nahinumdom siya unsa ang gihimo sa Ginoo sa pagdala ni Jared ug sa iyang igsoong lalaki tabok sa lawod; ug nagsubay siya sa mga pamaagi sa Ginoo; ug nakaanak siya og mga lalaki ug mga babaye.

3 Ug ang iyang kamagulangan nga anak nga lalaki, kansang ngalan mao si Shez, mibatok kaniya; apan, si Shez gipasipad-an sa usa ka tulisan, tungod sa iyang hilabihan nga katigayonan, nga nagdala og kalinaw pag-usab sa iyang amahan.

4 Ug nahitabo nga ang iyang amahan nagtukod og daghang siyudad sa ibabaw sa yuta, ug ang katawhan nagsugod na usab sa pagkatap sa ibabaw sa tibuok yuta. Ug si Shez nagpuyo sa hilabihan ka tigulang nga panuigon; ug nakaanak siya ni Riplakish. Ug namatay siya, ug si Riplakish nagmando puli kaniya.

5 Ug nahitabo nga si Riplakish wala mobuhat nianang matarong sa panan-aw sa Ginoo, kay siya adunay daghang asawa ug mga puyo-puyo, ug misangon ngadto sa mga abaga sa mga tawo nianang hilabihan ka bug-at nga palas-anon; oo, mipabuhis siya kanila og dagko nga mga buhis; ug gamit ang mga buhis nagtukod siya og daghang dagko nga mga gambalay.

6 Ug nagpabarog siya alang kaniya og usa ka hilabihan ka maanindot nga trono; ug nagtukod siya og daghang bilanggoan, ug si kinsa nga magdumili sa pagbayad og mga buhis iyang ibalhog sa bilanggoan; ug siya kinsa dili makabayad og mga buhis iyang ibalhog sa bilanggoan; ug siya mimando nga kinahanglan silang mopadayon sa pagtrabaho alang sa ilang panginabuhi; ug si kinsa ang magdumili sa pagtrabaho pahamtangan niya og kamatayon.

7 Mao nga naangkon niya ang iyang tanang hilabihan ka maayong pagkabuhat nga mga butang, oo, gani ang iyang lunsay nga bulawan iyang gipahashasan sa mga bilanggo; ug ang tanang matang sa hilabihan ka maayong pagkabuhat nga mga butang iyang gipahimo sa mga bilanggo. Ug nahitabo nga iyang gisakit ang katawhan pinaagi sa iyang binayrang pakighilawas ug mga pagkasalawayon.

8 Ug sa dihang nagmando siya sulod sa kap-atan ug duha ka tuig ang katawhan mialsa batok kaniya; ug didto nagsugod na usab ang gubat sa yuta, hangtod nga si Riplakish napatay, ug ang iyang kaliwatan gipapahawa sa yuta.

9 Ug nahitabo nga human milabay ang daghang katuigan, si Morianton, (siya nga usa ka kaliwat ni Riplakish) mipundok og usa ka kasundalohan sa mga sinalikway, ug miadto ug nakig-away sa katawhan; ug nakaangkon siya og gahom sa daghang siyudad; ug ang gubat nahimong hilabihan ka makalilisang, ug milungtad sulod sa daghang katuigan; ug nakaangkon siya og gahom sa tibuok yuta, ug mihimo sa iyang kaugalingon nga hari sa tibuok yuta.

10 Ug human siya mihimo sa iyang kaugalingon nga hari iyang gipagaan ang palas-anon sa katawhan, nga pinaagi niini nakaangkon siya og pagdayeg sa mga mata sa katawhan, ug sila midihog kaniya nga mahimo nga ilang hari.

11 Ug naghimo siya og kaangayan ngadto sa katawhan, apan dili sa iyang kaugalingon tungod sa iyang daghang binayrang pakighilawas; mao nga gipahimulag siya gikan sa atubangan sa Ginoo.

12 Ug nahitabo nga si Morianton nagtukod og daghang siyudad, ug ang katawhan nahimong hilabihan ka adunahan ubos sa iyang paghari, sa mga gambalay man, ug sa mga bulawan ug pilak, ug sa pagpatubo og lugas, ug sa gagmay nga kahayopan, ug dagkong kahayopan, ug niadtong mga butang nga nahibalik ngadto kanila.

13 Ug si Morianton nagpabilin nga buhi sa hilabihan ka tigulang nga pangedaron, ug unya nakaanak siya ni Kim; ug si Kim mimando puli sa iyang amahan; ug siya mimando sa walo ka tuig, ug ang iyang amahan namatay. Ug nahitabo nga si Kim wala magmando sa pagkamatarong, mao nga dili siya pinalabi sa Ginoo.

14 Ug ang iyang igsoong lalaki mirebelde batok kaniya, nga pinaagi niini siya mibihag kaniya; ug nagpabilin siya sa pagkabihag sa tanan niyang mga adlaw; ug nakaanak siya og mga lalaki ug mga babaye panahon sa iyang pagkabihag; ug panahon sa iyang katigulangon nakaanak siya ni Levi; ug siya namatay.

15 Ug nahitabo nga si Levi miserbisyo panahon sa pagkabihag human mamatay ang iyang amahan, sulod sa kap-atan ug duha ka tuig. Ug nakiggubat siya batok sa hari sa yuta, nga pinaagi niini iyang naangkon ang gingharian.

16 Ug human nga iyang naangkon ang gingharian siya mihimo niana nga matarong sa panan-aw sa Ginoo; ug ang katawhan miuswag sa yuta; ug nagpuyo siya sa usa ka maanindot nga katigulangon, ug nakaanak siya og mga lalaki ug mga babaye; ug usab nakaanak siya ni Corom, kinsa iyang gidihogan nga hari puli kaniya.

17 Ug nahitabo nga si Corom mihimo niana nga maayo sa panan-aw sa Ginoo sa tanan niyang mga adlaw; ug nakaanak siya og daghang lalaki ug mga babaye; ug human siya makasinati og daghang adlaw siya namatay, gani sama sa tanan dinhi sa yuta; ug si Kish mimando puli kaniya.

18 Ug nahitabo nga si Kish namatay usab, ug si Lib mimando puli kaniya.

19 Ug nahitabo nga si Lib mihimo usab niana nga maayo sa panan-aw sa Ginoo. Ug sa mga adlaw ni Lib ang malala nga mga bitin gipamatay. Mao nga nangadto sila sa yuta sa habagatan nga bahin, aron sa pagpangayam og pagkaon alang sa katawhan sa yuta, kay ang yuta napuno sa mga hayop sa kalasangan. Ug si Lib usab mismo nahimong usa ka bantogan nga mangangayam.

20 Ug nagtukod sila og usa ka bantogan nga siyudad dapit sa may taas ug pig-ot nga bahin sa yuta, sa lugar diin ang dagat mibahin sa yuta.

21 Ug mipanalipod sila sa yuta sa habagatan nga bahin nga mahimong usa ka kamingawan, aron makakuha og mga ihalas nga mga hayop. Ug ang tibuok yuta sa amihanan nga bahin napuno sa mga lumulupyo.

22 Ug hilabihan sila ka kugihan, ug namalit sila ug namaligya ug nagpatigayon sa usag usa, aron makasapi sila.

23 Ug nagtrabaho sila sa tanang matang sa oro, ug naghimo sila og bulawan, ug pilak, ug puthaw, ug tumbaga, ug tanang matang sa mga metal; ug gikalot nila kini gikan sa yuta; mao nga, naghabwa sila og dagkong mga pundok sa yuta, aron makakuha og oro, ug bulawan, ug pilak, ug puthaw, ug kobre. Ug nagbuhat sila sa tanang matang sa hilabihan ka maayong pagkabuhat nga mga butang.

24 Ug sila adunay mga sida, ug maayong pagkalubid nga panapton; ug nagbuhat sila sa tanang matang sa panapton, nga ilang masininaan ang ilang kaugalingon gikan sa ilang pagkahubo.

25 Ug mihimo sila sa tanang matang sa mga himan sa pagbugwal sa yuta, sa pagdaro, sa pagtanom, sa pag-ani ug sa pagguna, ug usab sa paggiok.

26 Ug naghimo sila sa tanang matang sa mga himan nga ilang gigamit sa pagpatrabaho sa ilang mga hayop.

27 Ug naghimo sila sa tanang matang sa mga hinagiban sa gubat. Ug nagtrabaho sila sa tanang matang sa buhat sa hilabihan ka talagsaon nga pagkahimo.

28 Ug wala pay katawhan sukad nga mas napanalanginan kaysa kanila, ug mas gipauswag pinaagi sa kamot sa Ginoo. Ug anaa sila sa yuta nga pinili labaw sa tanang mga yuta, kay ang Ginoo namulong niini.

29 Ug nahitabo nga si Lib nagpuyo sa daghang katuigan, ug nakaanak og mga lalaki ug mga babaye; ug siya usab nakaanak ni Hearthom.

30 Ug nahitabo nga si Hearthom mimando puli sa iyang amahan. Ug sa diha nga si Hearthom nagmando sulod sa kawhaan ug upat ka tuig, tan-awa, ang gingharian giilog gikan kaniya. Ug nag-alagad siya sa daghang katuigan panahon sa pagkabihag, oo, gani bisan sa tanang nahibilin sa iyang mga adlaw.

31 Ug nakaanak siya ni Heth, ug si Heth nagpuyo panahon sa pagkabihag sa tanan niyang mga adlaw. Ug si Heth nakaanak ni Aaron, ug si Aaron nagpuyo sa pagkabihag sa tanan niyang mga adlaw; ug nakaanak siya ni Amnigaddah, ug si Amnigaddah usab nagpuyo panahon sa pagkabihag sa tanan niyang mga adlaw; ug nakaanak siya ni Coriantum, ug si Coriantum nagpuyo panahon sa pagkabihag sa tanan niyang mga adlaw; ug nakaanak siya ni Com.

32 Ug nahitabo nga nakombinser ni Com nga mokuyog kaniya ang katunga sa gingharian. Ug nagmando siya sa katunga sa gingharian sa kap-atan ug duha ka tuig; ug miadto siya aron makig-away batok sa hari, nga si Amgid, ug nag-away sila sulod sa daghang katuigan, diin atol niini nga panahon si Com nakaangkon og gahom kang Amgid, ug nakabaton og gahom sa nahibilin sa gingharian.

33 Ug sa mga adlaw ni Com dihay nagsugod nga mga tulisan sa yuta; ug migamit sila sa karaang mga plano, ug mipangalagad sa mga panumpa subay sa paagi sa mga karaan, ug nagtinguha na usab sa paglaglag sa gingharian.

34 Karon si Com nakig-away og maayo batok kanila; bisan pa niana, wala siya makabuntog batok kanila.