1 Ug dihay miabot usab sa mga adlaw ni Com nga daghang propeta, ug nanagna sa kalaglagan niana nga gamhanan nga katawhan gawas kon maghinulsol sila, ug mobalik sa Ginoo, ug talikdan ang ilang mga pagbuno ug mga pagkadaotan.

2 Ug nahitabo nga ang mga propeta gisalikway sa katawhan, ug nanglayas sila ngadto ni Com aron panalipdan, kay ang katawhan nagtinguha sa paglaglag kanila.

3 Ug nanagna sila ngadto kang Com og daghang butang; ug napanalanginan siya sa tanang nahibilin sa iyang mga adlaw.

4 Ug nagpuyo siya sa usa ka maanindot nga katigulangon ug nanganak ni Shiblom; ug si Shiblom nagmando puli kaniya. Ug ang igsoong lalaki ni Shiblom nakigbatok kaniya, ug diha nagsugod ang hilabihan ka dako nga gubat sa tibuok yuta.

5 Ug nahitabo nga ang igsoong lalaki ni Shiblom misugo nga ang tanang propeta nga nanagna sa kalaglagan sa katawhan kinahanglang pahamtangan sa kamatayon;

6 Ug dihay dako nga katalagman sa tibuok yuta, kay nagpamatuod sila nga ang dakong tunglo modangat sa yuta, ug usab sa katawhan, ug nga adunay dakong kalaglagan taliwala kanila, nga sukad wala pa mahitabo sa ibabaw sa yuta, ug ang ilang mga bukog mahimong sama sa mga bundo sa yuta ibabaw sa kayutaan gawas kon sila maghinulsol sa ilang pagkadaotan.

7 Ug wala sila mopatalinghog sa tingog sa Ginoo, tungod sa daotan nilang mga kalihokan; mao nga, didto nagsugod ang mga gubat ug mga panagbingkil sa tibuok yuta, ug usab daghang kagutom ug mga kamatay, nga niana adunay dakong kalaglagan, nga sukad wala pa masinati sa ibabaw sa yuta; ug kining tanan nahitabo sa mga adlaw ni Shiblom.

8 Ug ang katawhan nagsugod sa paghinulsol sa ilang kadaotan; ug sa ilang pagbuhat sa ingon ang Ginoo naluoy kanila.

9 Ug nahitabo nga si Shiblom gipatay, ug si Seth gibihag, ug nagpuyo nga bihag sa tanan niyang mga adlaw.

10 Ug nahitabo nga si Ahah, iyang anak nga lalaki, nakaangkon sa gingharian; ug siya ang nagmando sa katawhan sa tanan niyang mga adlaw. Ug mibuhat siya sa tanang matang sa pagkadaotan sa iyang mga adlaw, nga gibuhat niya ang pagpaagas sa daghang dugo; ug diyotay ra ang iyang mga adlaw.

11 Ug si Ethem, kay siya kaliwat ni Ahah, miangkon sa gingharian; ug siya usab mibuhat nianang unsay daotan sa iyang mga adlaw.

12 Ug nahitabo nga sa mga adlaw ni Ethem dihay miabot nga daghang propeta, ug nanagna pag-usab sa katawhan; oo, nanagna sila nga ang Ginoo sa hingpit molaglag kanila gikan sa ibabaw sa yuta gawas kon gihinulsolan nila ang ilang mga kadaotan.

13 Ug nahitabo nga ang katawhan nagpatig-a sa ilang mga kasingkasing, ug wala mopatalinghog sa ilang mga pulong; ug ang mga propeta nagbangotan ug mipalayo gikan sa katawhan.

14 Ug nahitabo nga si Ethem mihimo og daotang paghukom sa tanan niyang mga adlaw; ug nakaanak siya ni Moron. Ug nahitabo nga si Moron nagmando puli kaniya; ug si Moron mihimo niana nga daotan sa atubangan sa Ginoo.

15 Ug nahitabo nga dihay mitungha nga pag-alsa taliwala sa katawhan, tungod nianang tinago nga kalihokan nga gitukod aron makaangkon og gahom ug bahandi; ug dihay mitungha nga gamhanan nga tawong daotan taliwala kanila, ug nakiggubat ni Moron, diin iyang nabuntog ang katunga sa gingharian; ug nagpabilin kaniya ang katunga sa gingharian sa daghang katuigan.

16 Ug nahitabo nga si Moron mibuntog kaniya, ug nakaangkon og balik sa gingharian.

17 Ug nahitabo nga dihay mitungha nga laing gamhanan nga tawo; ug kaliwat siya sa igsoong lalaki ni Jared.

18 Ug nahitabo nga gibuntog niya si Moron ug naangkon ang gingharian; mao nga, si Moron nagpuyo nga bihag sa tanang nahibilin sa iyang mga adlaw; ug nakaanak siya ni Coriantor.

19 Ug nahitabo nga si Coriantor nagpuyo nga bihag sa tanan niyang mga adlaw.

20 Ug sa mga adlaw ni Coriantor usab dihay miabot nga daghang propeta, ug nanagna bahin sa mahinungdanon ug kahibulongan nga mga butang, ug nagsangyaw og paghinulsol ngadto sa katawhan, ug gawas kon sila maghinulsol ang Ginoong Dios mopahamtang og paghukom batok kanila ngadto sa ilang hingpit nga kalaglagan;

21 Ug nga ang Ginoong Dios mopadala o mopasanay og laing katawhan nga manag-iya sa yuta, pinaagi sa iyang gahom, subay sa paagi kon giunsa niya sa pagdala ang ilang mga amahan.

22 Ug gisalikway nila ang tanang pulong sa mga propeta, tungod sa ilang tinago nga kapunongan ug sa daotan nga salawayong mga binuhatan.

23 Ug nahitabo nga si Coriantor nakaanak ni Ether, ug namatay siya, human magpuyo nga bihag sa tanan niyang mga adlaw.