1 Ao ngkai, Ngai, ae Moronaai, I a waaki ni kabanea au reekoti ni kaineti ma kamaunakia te botanaomata ake I koroi taekaia.

2 Bwa nooria, a bon totokoa ana taeka Ita ni kabane; bwa e bon tuangiia bwaai ni kabane, ma ni moan rikin te aomata; ao i mwin are e a tia ni kerikaaki te ran mai iaon te aba aio e a riki bwa te aba ae rine i aoia aaba nako, te aba ae rineaki iroun te Uea; ngaia are te Uea e tangiria bwa a na bane aomata ake a mena iaona n toro irouna.

3 Ao boni nnen Ierutarem ae boou, are e na ruo rikaaki mai karawa, ao ana tabo ae tabu te Uea.

4 Nooria, Ita e bon noora ana bong Kristo, ao e taetae ni kaineti ma Ierutarem are e boou iaon te aba aio.

5 Ao e taetae naba ni kaineti ma te bata are Iteraera, ao Ierutarem are e na roko mai iai Riaai—ao mwiin are e na kamaunaki ao e na manga kateaki riki, bwa te kaawa ae tabu nakon te Uea; ngaia are e aki kona n riki bwa Ierutarem are e boou bwa bon iai ngkoa n taai ni kawai; ma e na manga kateaki riki, ma n riki bwa te kaawa ae tabu ibukin te Uea; ao e na kateaki nakoia kaain te bata are Iteraera—

6 Ao e na kateaki Ierutarem ae boou iaon te aba aio, nakoia nikiraia kanoan Iotebwa, are iai katotongan bwaai nako ibukiia.

7 Bwa ngke Iotebwa e kaira tamana nakon te aba are Aikubita, ao e bon mate ikekei; ngaia are, te Uea e kariia nikiraia kanoan Iotebwa man te aba are Ierutarem, bwa e aonga n nanoangaia kanoan Iotebwa bwa a na aki bua, n aron are e nanoanga nakon taman Iotebwa bwa e na aki mate.

8 Ngaia are, nikiraia kaain te bata are Iotebwa a na kateaki iaon te aba aio; ao e na riki bwa abaia ni bwaibwai; ao a na katea te kaawa ae tabu ibukin te Uea, ae aekan Ierutarem ni kawai; ao a na aki manga oki ni kamangaoaki, ni karokoa e roko te toki are e na bua te aonaba.

9 Ao e na iai karawa ae boou ao te aonaba ae boou; ao ana riki n aekan are ngkoa ma are ngkoa e na tia ni bua, ao a na bane ni boou bwaai.

10 Ao ngkanne e na roko Ierutarem ae boou; ao a na kakabwaiaki ake a maeka iai, bwa bon ngaia are a mainaina kunnikaia n raraan te Tiibu te Teei; ao bon ngaia ake a warekaki i buakoia kanoan Iotebwa ake kaain te bata are Iteraera.

11 Ao ngkanne e na roko Ierutarem ngkoa; ao kaaina, a na kakabwaiaki, bwa a tia n tebokaki n raraan te Tiibu te Teei; bwa bon ngaiia ake a kamaenakoaki ma n ikotaki mani maninginingin te aonaba ake aua, ao man aaba ake i meang, ao taan katoonga kakoroan bukin te berita are e tabu are e karaoia te Atua ma tamaia, Aberaam.

12 Ao ngkana a roko bwaai aikai, a na kakoroi bukin te koroboki ae tabu are e kangai, iai ake a rimoa, ake a na manga kabane; ao iai ake a kabane, ake a na manga rimoa.

13 Ao N na bon koroi riki ae bati, ma I tabuaki; ma a korakora ao ma ni moan te kamimi a na taeka ni burabeti Ita; ma a bon kaakea, ma n teweia nako; ao e karaba ni bwangabwangan te bwa n te ngaina, ao n te bong e nako n noori bwaai ake a na roko nakoia aomata.

14 Ao ngke e mena ni bwangabwangan te bwa e karaoi nikiran te reekoti aio, man rinanon urubwai ake a na roko nakoia aomata n te bong.

15 Ao e a koro bukina bwa n te ririki naba arei are e teweaki nako iai mai buakoia aomata e a waaki te buaka ae korakora i buakoia aomata, bwa a bon mwaiti ake a teirake, aika aomata aika a korakora, ao a ukoukora tiringakin Koriantamwa man aia babaire ni karaba aika a bubuaka, ake a kaman tia n taekinaki.

16 Ao ngkai Koriantamwa, e bon tia ngaia ni kamatenanoa aron te bubuaka ma te anga ni kamwane n te aonaba, ngaia are e a buaka ma ake a ukoukora kan tiringakina.

17 Ma e aki rairananona, ao aki naba natina mwaane ma aine aika a tamaroa; ao aki naba natin Kooa mwaane ma aine aika a tamaroa; ao aki naba natin Korioa mwaane ao aine aika a tamaroa; ao ni kakimototoa, bon akea naati mwaane ao aine aika a tamaroa n te aonaba ni kabuta aika a rairinanoia man aia bure.

18 Ngaia are, e a koro bukina bwa n te moan ririki are e mena iai Ita ni bwangabwangan te bwa, a bon mwaiti aomata aika a tiringaki n te kabaang irouia kaain taian botaki ni karaba aika buakaka, bwa a buaka ni kaitara Koriantamwa bwa e aonga n reke te abanuea irouia.

19 Ao e a koro bukina bwa natin Koriantamwa aika mwaane a bon kakorakoraia ni buaka ao e korakora waanakon raraaia.

20 Ao n te kauoua n ririki e roko ana taeka te Uea nakon Ita, bwa e na riai nakona nakon Koriantamwa n taetae ni burabeti bwa, ngkana e rairananona ma kaain batana ni kabane ao te Uea e na bon anganna ueana ma ni kamaiuia aomata.

21 Bwa mwiina a na bane n tiringaki, ni kabane kaain batana ao ti ngaia n tiku. Ao e na ti maiu bwa e na noori koron bukin taeka ni burabeti ake a tia n taekinaki ni kaineti ma te botanaomata riki teuana ake a na karekea te aba bwa aia bwai; ao e na taunaki Koriantamwa irouia; ao a na bane aomata n tiringaki ma ti Koriantamwa n tiku.

22 Ao e a koro bukina bwa e aki rairananona Koriantamwa, ao aki naba kaain batana, ao aki naba aomata; ao e aki toki te buaka; ao a ukoukora tiringakin Ita, ma e birinako mai imataia ma ni karaba riki ni bwangabwangan te bwa.

23 Ao e a koro bukina bwa e teirake Tiareta, ao e buakana naba Koriantamwa; ao e kona, n te aro are e a kairia nakon te tautoronaki.

24 Ao natin Koriantamwa mwaane, a kona Tiareta n te kaaua n ririki, ma ni karekea te abanuea riki ibukin tamaia.

25 Ao ngkai e a waaki te buaka iaon te aba, a buaka ni kabane aomata ma raoia ibukin te bwai are a tangiria.

26 Ao bon iai taan iraa, ao ni kakimototoa, iai aekan nako te buakaka iaon te aba.

27 Ao e a koro bukina bwa Koriantamwa e bon mwaiti korakoran unna iroun Tiareta, ao e mwananga ni buaka ni kaitara ma ana taanga ni buaka; ao a bon kaitibo i nanon te un ae korakora, ao a bon kaitibo n te mwarua are Kirekara; ao e kaakaiaki korakoran aron te buaka.

28 Ao e a koro bukina bwa e buaka Tiareta ni kaitara i nanon te maan ae teniua te bong. Ao e a koro bukina bwa e konaaki iroun Koriantamwa, ao e bon kakioa ni karokoa e a roko n te tabo ae aoraoi are Etiron.

29 Ao e a koro bukina bwa Tiareta e a manga buaka ma ngaia riki n taabo ake aoraoi; ao nooria, e bon konaki Koriantamwa, ao e kakioaki rikaaki nakon te mwarua are Kirekara.

30 Ao Koriantamwa e a manga buaka ma Tiareta riki n te mwarua are Kirekara, ao e a konaaki Tiareta ao e a tiringaki.

31 Ao e bon ikoaki boton rangan Koriantamwa iroun Tiareta, ngaia are e a aki manga buaka riki i nanon te maan ae uoua te ririki, ao n te tai anne ni kabane aomata iaon te aba a bon kawawaea te raraa, ao bon akea ae kona n tukia.