1 Ug karon dihay misugod nga dakong tunglo sa tibuok yuta tungod sa pagkadaotan sa katawhan, diin, kon ang usa ka tawo mopahimutang sa iyang himan o sa iyang espada sa sakuban niini, o sa dapit nga tagoan niya niini, tan-awa, inigka ugma, dili na kini niya makita, kay hilabihan ka dako ang tunglo dinhi sa yuta.

2 Mao nga hugot nga gikuptan sa matag tawo ang unsay anaa kaniya, gamit ang iyang mga kamot, ug dili mohulam ni mopahulam; ug ang matag tawo mogunit sa puloan sa iyang espada diha sa iyang tuo nga kamot, sa pagpanalipod sa iyang kabtangan ug sa iyang kaugalingong kinabuhi ug sa iyang mga asawa ug mga anak.

3 Ug karon, human milabay ang duha ka tuig, ug human sa kamatayon ni Shared, tan-awa, dihay mitunga nga igsoong lalaki ni Shared ug nakig-away siya kang Coriantumr, diin si Coriantumr mibuntog kaniya ug migukod kaniya ngadto sa kamingawan sa Akish.

4 Ug nahitabo nga ang igsoong lalaki ni Shared nakig-away kaniya didto sa kamingawan sa Akish; ug ang panag-away nahimong hilabihan ka pintas, ug daghang liboan ang namatay pinaagi sa espada.

5 Ug nahitabo nga giliyokan ni Coriantumr ang kamingawan; ug ang igsoong lalaki ni Shared mimartsa ngadto sa gawas sa kamingawan sa kagabhion, ug mipatay og usa ka bahin sa kasundalohan ni Coriantumr samtang mga hubog sila.

6 Ug mipadayon siya ngadto sa yuta sa Moron, ug mipahimutang sa iyang kaugalingon sa trono ni Coriantumr.

7 Ug nahitabo nga si Coriantumr mipuyo uban sa iyang mga kasundalohan didto sa kamingawan sulod sa duha ka tuig, diin nakadawat siya og dugang nga kalig-on sa iyang kasundalohan.

8 Karon ang igsoong lalaki ni Shared, kansang ngalan mao si Gilead nakadawat usab og dugang kalig-on sa iyang kasundalohan, tungod sa tinago nga mga kalihokan.

9 Ug nahitabo nga ang iyang halangdon nga pari mibuno kaniya samtang naglingkod siya sa iyang trono.

10 Ug nahitabo nga usa sa tinago nga mga kalihokan mibuno kaniya sa tinago nga agianan, ug naangkon niya ang gingharian; ug ang iyang ngalan mao si Lib; ug si Lib usa ka tawo nga dako ang pamayhon, labaw pa kay ni bisan kinsa nga tawo taliwala sa tanang katawhan.

11 Ug nahitabo nga sa unang tuig ni Lib, si Coriantumr miabot sa yuta sa Moron, ug nakig-away kang Lib.

12 Ug nahitabo nga nakig-away siya kang Lib, diin si Lib mitigbas sa iyang bukton ug nasamdan siya; bisan pa niana, ang kasundalohan ni Coriantumr midasdas ngadto kang Lib, nga siya milayas ngadto sa mga utlanan sa baybayon.

13 Ug nahitabo nga si Coriantumr migukod kaniya; ug si Lib nakig-away kaniya dapit sa baybayon.

14 Ug nahitabo nga si Lib mitigbas sa kasundalohan ni Coriantumr, hinungdan nga nanglayas sila pag-usab ngadto sa kamingawan sa Akish.

15 Ug nahitabo nga si Lib migukod kaniya hangtod nga miabot siya sa kapatagan sa Agosh. Ug si Coriantumr midala sa tanan niyang katawhan uban kaniya samtang milayas siya sa atubangan ni Lib niana nga suok sa yuta diin siya milayas.

16 Ug sa iyang pag-abot sa kapatagan sa Agosh nakig-away siya kang Lib, ug siya mitigbas kaniya hangtod nga siya namatay; bisan pa niana, ang igsuong lalaki ni Lib misulong kang Coriantumr puli kaniya, ug ang panag-away nahimong hilabihan ka pintas, diin si Coriantumr milayas pag-usab gikan sa atubangan sa kasundalohan sa igsuong lalaki ni Lib.

17 Karon ang ngalan sa igsuong lalaki ni Lib gitawag og Shiz. Ug nahitabo nga si Shiz migukod kang Coriantumr, ug gibuntog niya ang daghang siyudad, ug gipatay niya ang mga babaye ug ang mga bata, ug gipangsunog niya ang mga siyudad.

18 Ug mikuyanap ang kahadlok bahin ni Shiz sa tibuok nga yuta; oo, usa ka pagtuaw ang mikuyanap sa tibuok yuta—Kinsa ang makabarog sa atubangan sa kasundalohan ni Shiz? Tan-awa, gihawanan niya ang yuta sa iyang atubangan!

19 Ug nahitabo nga ang katawhan misugod sa pagpundok isip kasundalohan sa ibabaw sa tibuok yuta.

20 Ug nabahin sila; ug ang usa ka bahin kanila milayas ngadto sa kasundalohan ni Shiz, ug ang usa ka bahin kanila milayas ngadto sa kasundalohan ni Coriantumr.

21 Ug hilabihan ka dako ug kadugay sa maong gubat, ug hilabihan ka taas nga talan-awon sa pagpaagas sa dugo ug kamatay, nga ang ibabaw sa tibuok yuta natabonan sa mga lawas sa mga patay.

22 Ug hilabihan ka tulin ug ka paspas sa maong gubat nga walay bisan usa nga nahibilin aron sa paglubong sa mga patay, apan mimartsa sila gikan sa pagpaagas sa dugo ngadto sa pagpaagas og dugo, gibiyaan ang mga lawas sa mga lalaki, mga babaye, ug mga bata nga nagkatag sa ibabaw sa yuta, aron mahimo nga kan-onon sa mga ulod nga mokaon sa unod.

23 Ug ang kabaho niini mialisngaw sa ibabaw sa yuta gani sa ibabaw sa tibuok yuta; mao nga ang katawhan nahasol maadlaw ug magabii, tungod sa kabaho niini.

24 Bisan pa niana, si Shiz wala mohunong sa paggukod ni Coriantumr; kay gipanumpa niya ang pagpanimalos kang Coriantumr sa dugo sa iyang igsuong lalaki, kinsa gipatay, ug sa pulong sa Ginoo nga miabot ngadto ni Ether nga si Coriantumr dili mapatay pinaagi sa espada.

25 Ug sa ingon niana atong makita nga ang Ginoo miduaw gayod kanila uban sa kahingpitan sa iyang kasuko, ug ang ilang pagkadaotan ug pagkasalawayon nag-andam og agianan alang sa ilang walay kataposang kalaglagan.

26 Ug nahitabo nga si Shiz migukod ni Coriantumr paingon sa silangan nga bahin, gani ngadto sa mga utlanan sa baybayon, ug didto nakig-away siya kang Shiz sulod sa tulo ka adlaw.

27 Ug hilabihan ka makalilisang ang pagkalaglag sa kasundalohan ni Shiz nga ang katawhan misugod sa pagkahadlok ug misugod sa paglayas gikan sa atubangan sa kasundalohan ni Coriantumr; ug milayas sila ngadto sa yuta ni Corihor, ug mipatay sa mga lumulupyo gikan sa ilang atubangan, tanan sila nga dili moipon kanila.

28 Ug gipabarog nila ang ilang mga tolda didto sa walog sa Corihor; ug gipabarog ni Coriantumr ang iyang mga tolda sa walog sa Shurr. Karon ang walog sa Shurr duol sa bungtod sa Comnor; mao nga, gipundok ni Coriantumr ang iyang mga kasundalohan didto sa bungtod sa Comnor, ug mipatingog sa usa ka trumpeta ngadto sa kasundalohan ni Shiz sa paghagit kanila aron makig-away.

29 Ug nahitabo nga misulong sila, apan giabog pag-usab; ug miabot sila sa ikaduha nga higayon, ug giabog sila pag-usab sa ikaduha nga higayon. Ug nahitabo nga misulong na usab sila sa ikatulong higayon, ug ang panag-away nahimong hilabihan ka pintas.

30 Ug nahitabo nga si Shiz mitigbas ni Coriantumr ug siya nakahatag kaniya og daghang lawom nga samad; ug si Coriantumr, kay nawad-an sa iyang dugo, nakuyapan, ug gidala sa layo sama nga siya patay.

31 Karon ang pagkamatay sa mga lalaki, ug sa mga babaye ug sa mga bata sa duha ka pundok hilabihan ka daghan nga si Shiz misugo sa iyang mga katawhan nga sila dili na mogukod sa kasundalohan ni Coriantumr; mao nga, namalik sila sa ilang kampo.