1 Ug nahitabo sa diha nga si Coriantumr naayo sa iyang mga samad, misugod siya sa paghinumdom sa mga pulong nga gipamulong ni Ether kaniya.

2 Iyang nakita nga dihay gipamatay pinaagi sa espada nga hapit na moabot og duha ka milyon sa iyang katawhan, ug nagsugod siya sa pagkasubo sa iyang kasingkasing; oo, dihay napatay nga duha ka milyon sa lig-on nga mga tawo, ug usab ang ilang mga asawa ug ang ilang mga anak.

3 Nagsugod siya sa paghinulsol sa daotan nga iyang nabuhat; nagsugod siya sa paghinumdom sa mga pulong nga gipamulong pinaagi sa ba-ba sa tanang propeta, ug iyang nakita nga natuman kini hangtod niining higayona, matag tipik; ug ang iyang kalag nagbangotan ug nagdumili nga mahupay.

4 Ug nahitabo nga misulat siya og usa ka epistola ngadto kang Shiz, nagtinguha kaniya nga siya moluwas sa katawhan, ug siya motugyan sa gingharian alang sa kaayohan sa mga kinabuhi sa katawhan.

5 Ug nahitabo nga sa pagkadawat ni Shiz sa iyang epistola misulat siya og epistola ngadto kang Coriantumr, nga kon itugyan niya ang iyang kaugalingon, aron siya mopatay kaniya gamit ang iyang kaugalingon nga espada, niana siya dili na mohunos sa kinabuhi sa katawhan.

6 Ug nahitabo nga ang katawhan wala maghinulsol sa ilang pagkadaotan; ug ang katawhan ni Coriantumr nahulhogan aron masuko batok sa katawhan ni Shiz; ug ang katawhan ni Shiz gihulhogan aron masuko batok sa katawhan ni Coriantumr; mao nga, ang katawhan ni Shiz nakig-away sa katawhan ni Coriantumr.

7 Ug sa diha nga si Coriantumr nakakita nga hapit na siya mapukan milayas siya pag-usab sa atubangan sa katawhan ni Shiz.

8 Ug nahitabo nga miabot siya ngadto sa katubigan sa Ripliancum, nga, kon hubaron, dako, o molabaw sa tanan; mao nga, sa ilang pag-abot niini nga katubigan gipabarog nila ang ilang mga tolda; ug si Shiz mipabarog usab sa iyang mga tolda sa ilang duol; ug busa sa pagkaugma nagsugod sila sa pagpakig-away.

9 Ug nahitabo nga nag-away sila sa hilabihan ka pintas nga pakig-away, diin si Coriantumr nasamdan na usab ug nakuyapan siya tungod sa pag-agas sa daghang dugo.

10 Ug nahitabo nga ang kasundalohan ni Coriantumr midasdas ngadto sa kasundalohan ni Shiz nga sila mibuntog kanila, nga nahimo nila ang pagpalayas kanila gikan sa ilang atubangan; ug nanglayas sila sa habagatan nga bahin, ug mipabarog sa ilang mga tolda sa usa ka dapit nga gitawag og Ogath.

11 Ug nahitabo nga ang kasundalohan ni Coriantumr mipabarog sa ilang mga tolda dapit sa bungtod sa Ramah; ug mao gihapon kadto nga bungtod diin didto gitago sa akong amahan nga si Mormon ang mga talaan ngadto sa Ginoo, nga mga sagrado.

12 Ug nahitabo nga gipundok nila ang tanang katawhan sa ibabaw sa tibuok yuta, kinsa wala mapatay, gawas kang Ether.

13 Ug nahitabo nga nakita ni Ether ang tanang binuhatan sa katawhan; ug nakita niya nga ang katawhan kinsa midapig ni Coriantumr gipundok ngadto sa kasundalohan ni Coriantumr; ug ang katawhan kinsa midapig ni Shiz gipundok ngadto sa kasundalohan ni Shiz.

14 Mao nga, sulod sa upat ka tuig ilang gipundok ang katawhan, aron ilang makuha ang tanan nga anaa sa ibabaw sa yuta, ug nga aron ilang madawat ang tanang kusog nga mahimo nila nga madawat.

15 Ug nahitabo nga sa diha nga silang tanan nagkapundok na, matag usa ngadto sa kasundalohan nga iyang gipili, uban sa ilang mga asawa ug sa ilang mga anak—mga lalaki, mga babaye ug mga bata nga gisangkapan sa mga hinagiban sa gubat, adunay mga taming ug mga panagang sa dughan, ug mga panagang sa ulo, ug gisul-oban subay sa matang sa gubat—mimartsa sila sugat sa usag usa aron makig-away; ug nag-away sila sa tibuok niana nga adlaw, ug wala makabuntog.

16 Ug nahitabo nga sa pag-abot sa kagabhion nangaluya sila, ug namahulay sa ilang mga kampo; ug human sila makapahulay sa ilang mga kampo nagminatay sila ug nagdanguyngoy tungod sa pagkamatay sa ilang katawhan; ug hilabihan ang ilang mga paghilak, nga napuno nila ang kahanginan sa ilang mga pagminatay ug pagdanguyngoy.

17 Ug nahitabo nga sa pagkaugma nangadto na usab sila aron makig-away, ug mahinungdanon ug makalilisang kana nga adlaw; bisan pa niana, wala sila makabuntog, ug sa pag-abot na usab sa kagabhion napuno nila ang kahanginan sa ilang mga paghilak, ug sa ilang mga pagminatay, ug sa ilang mga pagbakho, tungod sa pagkamatay sa ilang katawhan.

18 Ug nahitabo nga si Coriantumr misulat pag-usab og usa ka epistola ngadto kang Shiz, nagtinguha nga dili na siya makig-away pag-usab, kondili angkonon niya ang gingharian ug luwason ang mga kinabuhi sa katawhan.

19 Apan tan-awa, ang Espiritu sa Ginoo mihunong na sa pagpakig-uban kanila, ug gihuptan ni Satanas sa hingpit ang mga kasingkasing sa katawhan; kay nagpadaog sila sa katig-a sa ilang mga kasingkasing, ug sa pagkakulang sa ilang panabot nga sila mahimong malaglag; mao nga namalik na usab sila aron makig-away.

20 Ug nahitabo nga nag-away sila sa tibuok adlaw, ug sa pag-abot sa kagabhion, nangatulog sila tupad sa ilang mga espada.

21 Ug sa pagkaugma nag-away sila hangtod sa pag-abot sa kagabhion.

22 Ug pag-abot sa kagabhion, nangahubog sila sa kasuko, sama sa usa ka tawo nga nahubog sa bino; ug nangatulog pag-usab tupad sa ilang mga espada.

23 Ug sa pagkaugma nakig-away na usab; ug sa pag-abot sa kagabhion silang tanan nangamatay pinaagi sa espada gawas sa kalim-an ug duha sa katawhan ni Coriantumr, ug kan-uman ug siyam sa katawhan ni Shiz.

24 Ug nahitabo nga nangatulog sila tupad sa ilang mga espada nianang gabhiona, ug pagkaugma nag-away na usab sila, ug nakig-away sila gamit ang ilang mga kusog pinaagi sa ilang mga espada ug sa ilang mga taming, sa tibuok niana nga adlaw.

25 Ug sa pag-abot sa kagabhion dihay katloan ug duha sa katawhan ni Shiz, ug kawhaan ug pito sa katawhan ni Coriantumr.

26 Ug nahitabo nga nangaon sila ug nangatulog, ug nangandam alang sa kamatayon sa pagkaugma. Ug mga dagko ug lig-on sila nga mga tawo sumala sa kusog sa mga tawo.

27 Ug nahitabo nga nag-away sila sulod sa tulo ka oras, ug nangakuyapan tungod sa pag-agas sa daghang dugo.

28 Ug nahitabo nga sa diha nga ang mga tawo ni Coriantumr nakadawat og igong kusog nga sila makalakaw, padulong na unta sila nga molayas alang sa ilang kinabuhi; apan tan-awa, si Shiz mitindog, ug usab ang iyang mga tawo, ug nanumpa siya sa iyang kasuko nga iyang patyon si Coriantumr o siya mamatay pinaagi sa espada.

29 Mao nga, siya migukod kanila, ug sa pagkaugma siya nakaapas kanila; ug nag-away sila pag-usab gamit ang espada. Ug nahitabo nga sa diha nga silang tanan namatay pinaagi sa espada, gawas ni Coriantumr ug ni Shiz, tan-awa si Shiz nakuyapan tungod sa pag-agas sa daghang dugo.

30 Ug nahitabo nga sa diha nga si Coriantumr nag-akbo sa iyang espada, nga siya mipahulay og kadiyot, ug iyang gitigbas ang ulo ni Shiz.

31 Ug nahitabo nga human sa iyang pagtigbas sa ulo ni Shiz, nga si Shiz mitukod sa iyang mga kamot ug natumba; ug sa pagkahuman niana nanglimbasog siya sa pagginhawa, ug siya namatay.

32 Ug nahitabo nga si Coriantumr natumba sa yuta, ug nahimo nga ingon og siya wala nay kinabuhi.

33 Ug ang Ginoo namulong kang Ether, ug miingon kaniya: Lakaw ngadto. Ug siya milakaw ngadto, ug nakita nga ang mga pulong sa Ginoo natuman; ug gitapos niya ang iyang talaan; (ug ang gatosan nga bahin wala nako ikasulat) ug gitagoan niya kini sa paagi nga nakit-an kini sa katawhan ni Limhi.

34 Karon ang kataposan nga mga pulong nga gisulat ni Ether mao kini: Kon kabubut-on man sa Ginoo nga ako mahimaya sa panagway o nga ako mag-antos sa kabubut-on sa Ginoo diha sa unod, dili kini igsapayan, kon kini makahimo nga ako maluwas sa gingharian sa Dios. Amen.