Ang Basahon ni Ether
Ang talaan sa mga Jaredita, gikuha gikan sa kawhaan ug upat ka palid nga nakaplagan sa katawhan ni Limhi sa mga adlaw ni Hari Mosiah.
Kapitulo 1
Si Moroni mipamubo sa mga sinulat ni Ether—Ang kasaysayan sa kagikanan ni Ether gihimo—Ang pinulongan sa mga Jaredita wala iapil sa paglibog didto sa Tore sa Babel—Ang Ginoo misaad nga mogiya kanila ngadto sa usa ka pinili nga yuta ug mohimo kanila nga usa ka bantogan nga nasod.
1 Ug karon ako, si Moroni, mopadayon sa paghatag og asoy bahin niadtong karaang mga lumulupyo nga gilaglag pinaagi sa kamot sa Ginoo sa ibabaw niining amihanan nga nasod.
2 Ug akong kuhaon ang akong asoy gikan sa kawhaan ug upat ka palid nga nakaplagan sa katawhan ni Limhi, nga gitawag og Basahon ni Ether.
3 Ug kay ako nagtuo nga ang unang bahin niini nga talaan, nga naghisgot mahitungod sa paglalang sa kalibotan, ug usab ni Adan, ug usa ka asoy gikan niana nga panahon gani ngadto sa dako nga tore, ug bisan unsa nga butang nga nahitabo taliwala sa katawhan hangtod niana nga panahon, anaa na sa mga Judeo—
4 Busa dili ako mosulat niadtong mga butang nga nahitabo gikan sa mga adlaw ni Adan hangtod niana nga panahon; kay kini anaa na sa mga palid; ug si kinsa ang makakaplag niini, siya mao gihapon ang makaangkon og gahom nga iyang makuha ang kinatibuk-an nga asoy.
5 Apan tan-awa, dili ako mohatag sa kinatibuk-an nga asoy, apan ang usa ka bahin lamang sa asoy ang akong ihatag, gikan sa tore hangtod nga sila nalaglag.
6 Ug sa ingon niini nga paagi ako mohatag sa asoy. Siya nga misulat niini nga talaan mao si Ether, ug kaliwat siya ni Coriantor.
7 Si Coriantor ang anak nga lalaki ni Moron.
8 Ug si Moron ang anak nga lalaki ni Ethem.
9 Ug si Ethem ang anak nga lalaki ni Ahah.
10 Ug si Ahah ang anak nga lalaki ni Seth.
11 Ug si Seth ang anak nga lalaki ni Shiblon.
12 Ug si Shiblon ang anak nga lalaki ni Com.
13 Ug si Com ang anak nga lalaki ni Coriantum.
14 Ug si Coriantum ang anak nga lalaki ni Amnigaddah.
15 Ug si Amnigaddah ang anak nga lalaki ni Aaron.
16 Ug si Aaron ang usa ka kaliwat ni Heth, kinsa mao ang anak nga lalaki ni Hearthom.
17 Ug si Hearthom ang anak nga lalaki ni Lib.
18 Ug si Lib ang anak nga lalaki ni Kish.
19 Ug si Kish ang anak nga lalaki ni Corom.
20 Ug si Corom ang anak nga lalaki ni Levi.
21 Ug si Levi ang anak nga lalaki ni Kim.
22 Ug si Kim ang anak nga lalaki ni Morianton.
23 Ug si Morianton ang usa ka kaliwat ni Riplakish.
24 Ug si Riplakish ang anak nga lalaki ni Shez.
25 Ug si Shez ang anak nga lalaki ni Heth.
26 Ug si Heth ang anak nga lalaki ni Com.
27 Ug si Com ang anak nga lalaki ni Coriantum.
28 Ug si Coriantum ang anak nga lalaki ni Emer.
29 Ug si Emer ang anak nga lalaki ni Omer.
30 Ug si Omer ang anak nga lalaki ni Shule.
31 Ug si Shule ang anak nga lalaki ni Kib.
32 Ug si Kib ang anak nga lalaki ni Orihah, kinsa anak nga lalaki ni Jared;
33 Ang mao nga Jared mitungha uban sa iyang igsoong lalaki ug sa ilang mga pamilya, uban sa pipila ka kauban ug sa ilang mga pamilya, gikan sa dako nga tore, sa panahon nga gilibog sa Ginoo ang pinulongan sa katawhan, ug nanumpa sa iyang kasuko nga sila pagatibulaagon sa ibabaw sa tibuok yuta; ug sumala sa pulong sa Ginoo ang katawhan nagkatibulaag.
34 Ug ang igsoong lalaki ni Jared kay dako ug kusgan nga tawo, ug usa ka tawo nga hilabihan ka pinalabi sa Ginoo, si Jared, nga iyang igsoong lalaki, miingon kaniya: Pangamuyo sa Ginoo, aron kita dili niya libogon nga dili na unya kita magkasabot sa atong mga pulong.
35 Ug nahitabo nga ang igsoong lalaki ni Jared nangamuyo sa Ginoo, ug ang Ginoo naluoy ni Jared; busa siya wala molibog sa pinulongan ni Jared; ug si Jared ug ang iyang igsoong lalaki wala iapil sa paglibog.
36 Unya si Jared miingon sa iyang igsoong lalaki: Pangamuyo pag-usab sa Ginoo, ug kon mahimo nga iyang wagtangon ang iyang kasuko gikan kanila nga atong mga higala, nga dili niya libogon ang ilang mga pinulongan.
37 Ug nahitabo nga ang igsoong lalaki ni Jared nangamuyo sa Ginoo, ug ang Ginoo naluoy sa ilang mga higala ug sa ilang mga pamilya usab, nga sila wala iapil sa paglibog.
38 Ug nahitabo nga si Jared misulti pag-usab sa iyang igsoong lalaki, nga nag-ingon: Lakaw ug pangutana sa Ginoo kon kita papahawaon ba niya gikan sa yuta, ug kon kita papahawaon niya gikan sa yuta, pangamuyo kaniya kon asa kita moadto. Ug kinsa ang nasayod kon ang Ginoo modala kanato ngadto sa usa ka yuta nga pinili labaw sa tanan nga yuta? Ug kon mahitabo kini, magmatinud-anon kita sa Ginoo, nga kita makadawat niini alang sa atong kabilin.
39 Ug nahitabo nga ang igsoong lalaki ni Jared nangamuyo sa Ginoo sumala niana nga gipamulong pinaagi sa ba-ba ni Jared.
40 Ug nahitabo nga gidungog sa Ginoo ang igsoong lalaki ni Jared, ug naluoy kaniya, ug miingon kaniya:
41 Lakaw ug pundoka ang imong gagmay nga pundok sa kahayopan, laki ug baye, sa matag matang; ug usab ang binhi sa yuta sa matag matang; ug ang imong mga pamilya; ug usab si Jared nga imong igsoon ug ang iyang pamilya; ug usab ang imong mga higala ug ang ilang mga pamilya, ug ang mga higala ni Jared ug ang ilang mga pamilya.
42 Ug kon mahimo na nimo kini molakaw ka nga mangulo kanila ngadto sa walog sa amihanan nga bahin. Ug didto makigkita ako kanimo, ug molakaw ako sa imong atubangan paingon sa usa ka yuta nga mao ang pinili nga labaw sa tanan nga yuta.
43 Ug didto mopanalangin ako kanimo ug sa imong binhi, ug mopasanay ngari kanako sa imong binhi, ug sa binhi sa imong igsoong lalaki, ug sila kinsa mouban kanimo, og usa ka bantogan nga nasod. Ug wala nay mas gamhanan pa kay sa nasod diin ako mopasanay ngari kanako sa imong binhi, ibabaw sa tibuok yuta. Ug sa ingon niana buhaton ko kini kanimo tungod kay niining taas nga panahon ikaw nangamuyo kanako.